Mat 2
2
Ghel ɛtofene ndu se chakte wán
1Ɛ́ nè bii Jesus ɛ ntɛke Betlehem ɛ ɛylak ə Judea. Nè lu əbliy fô nɛ əbfon wɛ Helod sake ɛylake ten. Ghel ɛtofene ɛlee loo jii ɛybee yɛ chuye sɛɛ tóò ɛ ten, è gwiy ɛ Jolesalem. Ghene nè gwiy dî, è se bifte ge: 2Wan wɛ ɛ́ biin wɛ əb náà yɛ lu əbfon ə ghele Juus waay? Ghɛs kè yɛn fenjes ə wen ka fe yɛnsen ɛ ɛyyio, è me lòò è se kɛŋe gwiye se kokse wen.
3Ka ghene biften dî, əbfon wɛ Helod yio kenəə ten, ke jefse ɛytof ə wen, è gese jefse ɛytof ə ghele ghɛ Jolesalem naa ɛjim. 4Əb me tooy ghele mbiye ghɛ́ ndaa-ɛykokse Feyine, gese nɛ̀ ghel ɛydinte tesake naa ɛjim. Ghene gwiy, əb bif se ghene ge, ɛ́ sɛ nè nyak ge ɛ́ náà se bii ghááy Vi wɛ Feyine nè Yiosen-a?
5Ghene fise ge: Ɛ́ nè nyak-aa ge ɛ́ náà bii wen ɛ ntɛke Betlehem ɛ Judea fɛn. Nɛ lu-a ka wele ntum nə Feyine nè nyaken ge:
6“Wɛ̀ wɛ Betlehem, ɛ ntɛke Juda,
wɛ̀ dì báà se lu kɛn fentɛktese ɛ məme ntɛke sɛ́ Juda,
bek ge əbfon wɛ əb náà yɛ sake ghel ə ghome
ghɛ Islael é nɛ̂y fəy ɛ ghɛne məm.”
7Helod yio dî, è me jaŋ ghel ɛtofene ghii ɛybám-ɛybám. Ghene gwiy, ghene ghene diom, əb loote bifte əbliy wɛ ghene nè yɛnen ka fenjes fi yɛnsen ɛ ɛyyio. 8Ghene fekte, əb me suuy se ghene ge: Ghɛn ndu ɛ Betlehem, è loote kɛŋ ghaa wan ten luun. Ghɛne kɛŋ è yɛn, ghɛn gwiy è suuy san, é mɛɛ mɛ sɛ̂y ndu, è fo ɛykokse se wen.
9-10Ghene me lòò è se nduu, è loo ndu di, è gese yɛn fenjes fɛ ghene nè kɛɛten yɛn ɛ ghene ɛylak. Ghene yɛn dî, è se saŋle naa se ŋaŋ, nɛ əbghune ghene jofe. Fe me se bane nduu ɛ ghene mbiy, dine jii se ghene, è ndu ləysen bene fɛ wan vi nè luun. 11Ghene ndu è chin bene fɛ fenjes fi nè ləysen, è me lii ɛ ndaa, è yɛn wán vi ghene no ə wene Mɛɛle. Ka ghene yɛnen wán vi ɛ leghɛ, è me təm ɛləy ɛ wen ɛyshiɛ, è fo ɛykokse se wen. Ghene fô ɛykokse dì, è me dise əbbuam ə ghen, è fəyse gwiy nɛ̀ tefo tɛ ghene nè gwiyen so se wen. Tefo tine nè lu: Ɛytian, nɛ̀ kelɛye gese nɛ̀ keyióséne.
12Ghene chii, Feyine suuy se ghene ɛ jɛm ge ghàà ghene kase ndu ghaa Helod luun. Ghene nɛ̂y loole è me liɛ jii ɛychin è kase fiile se ghene ɛylak.
Ghe Josɛf nyiŋ è ndu se Ejibt
13Nɛy se lu ka ghel ɛtofene ghii lòòn, Josɛf loo buune, nchiy-ndaa nə Báàba Feyin gwiy se wen ɛ jɛm è suuy ge: Loole, è liɛ wán ghene no ə ten è nyiŋ è ndu nɛ̀ ghene se Ejibt è yɛ lu fo se chin ɛ əbliy wɛ mɛ nɛ̂y suuy é ghɛn fiile, bek ge Helode kɛŋe wán se yuy.
14Josɛf me loole kɛn nɛ ntəke, è liɛ wán ghene no ə ten, ghene ghene lòò se ntɛk fo è ndu se Ejibt, 15è se chii fo se chin ka Helod nè kuon. Kii nɛ̂ kine nè gan se lunse kenəə kɛ Báàba Feyin nè suuyen è chia əbghun nə wele ntum nə wen ge: “Mɛ nè jaŋ wán ə wom əb fəy se Ejibt.”
Helod yuyte ghon ɛluumene ɛtɛlɛɛ ɛ Betlehem
16Helod nɛy keele ge ghel ɛtofene ghii lɛɛse yi lɛɛsen, ke yaf wen naa se ŋaŋ, əb chiase ɛysak ge ɛ́ yuyte ghon ɛluumene ɛjim ghɛ ɛ́ nè bɛɛy ghàà chin nguk sebaa ɛ Betlehem, nɛ̀ se ntɛk sɛ se nè báksen. Helod nè suuy dî bek ka ghel ɛtofene ghii nè suuyen se wen ge shi nguk sebaa se ka ghene nè kɛɛte se yɛne fenjes fi.
17Kenəə kɛ Jelemia wɛ wele ntum nə Feyine nè suuyen me kwɛn, nɛ əb nè suuy ge:
18“Ɛ́ lu nɛ ɛ́ yio ka fezəə gwiyen ɛ Lama,
nɛ wel toŋe, buke ketaan
nɛ lu Lachel ka əb diyen ghon ə wen
nɛ ɛ́ chəmsen lolo,
bek ka ghon ə wene bɛɛyen wiy.”
Ghe Josɛf loo se Ejibt
19Nɛy se lu ka Helod nè kuonmen nɛ ghe Josɛf bɛɛy ɛ Ejibt, nchiy-ndaa nə Báàba Feyin gwiy se wen ɛ jɛm è suuy se wen ge: 20Loole, è liɛ wán ghene no ə wen, è fiile se ɛylake Islael bek ge ghel ghɛ ɛ́ nè kɛŋen se yuye wán kuokemen. 21Josɛf me loole, è liɛ wán nɛ̀ no ə ten, ghene ghene fiile se ɛylake Islael.
22Əb nɛy yio ge Alchelaus yiɛmen ndaa ə ba ə wene Helod, se yɛ sake ɛylake Judea ka əbfon, è se fane se ndu fo. Nchiy-ndaa-Feyin fó ntef se wen ɛ jɛm, əb me ndu nɛ lu ɛ Galilee. 23Əb ndu dì, è se chii ɛ ntɛke Nazalet. Kii nɛ̂ kii nè gan se lunse kenəə kɛ ghele ntum nə Feyine nè suuyen ge: “Ɛ́ nɛ̂y yɛ toŋte vi wɛ Feyine nè yiosen ge wele Nazalet.”
©CABTAL, 2012