Kananet 11
11
Azan Ta̱mu̱ta̱dde̱n olli Babeli
1Imma da̱ bali reena ozoz da̱ ol cik lo̱o̱ta̱ do̱o̱k utug co̱de̱. 2Ma baling u̱lu̱ge̱t ol ki o̱to̱n ci je̱e̱ni̱, u̱mu̱dda̱ zin mu̱u̱r ci aave ngati een zara Shinar kar zin kabaito nginati.
3Anno zin nege do̱ ne, “Ki̱vi̱ta̱ kar kidimanit tu̱u̱p kar kivadit ju̱rru̱m.” I̱li̱ngli̱ngte̱ nege tu̱u̱p utungtek biyen lo̱o̱c, kar kidimtta gi̱i̱ ci o̱lle̱ amadmadi kize ci a̱di̱lne̱ nege. 4Kar nege kizeto ne, “Ki̱vi̱ta̱ kidimantek e̱le̱tti̱ orog, kanyak ce̱e̱z ci u̱u̱ni̱ okko rok ta̱mu̱-keng, kar zara cigga̱c ku̱bu̱lte̱ kar iróng kazanonik lo̱o̱c do̱o̱k.”
5I̱ki̱ya̱ zin Manyi rok lo̱o̱c ki̱ki̱ya̱ kicin orog ki ce̱e̱z ci u̱u̱ni̱ eenyet ol cik diirik ko̱. 6Kar zin Manyi kize ne, “Ming aavtte ol ne̱ko̱ kizeto ol cik ozoz utug co̱de̱ kar ku̱tu̱gu̱zzo̱ ki i̱yo̱ko̱, i̱llo̱i̱ zin atin gi̱i̱ imma ci odolta nege ci ommog nogo. 7Ki̱vi̱ta̱ koo lo̱o̱ta̱ kar kongotanit utug cinne̱ng kar iróng nege ngen azikno.”
8Azan zin Manyi nogo koot lo̱o̱co̱we̱ do̱o̱k, ibilizet zin nege teheenyinet ce̱e̱z neci. 9Zoz zin ci akannek ol orog neci kize Babel#11:9 Babel: Utuge ci I̱bu̱ru̱ azi keng cinne ne, ongotane zoz ci ollu. Kar e̱rki̱nya̱ cik meelek vu̱rrta̱ izeto zara cik Babeli, Babilon. ma̱rri̱t nginati egerzan Manyi utug ci olli lo̱o̱tu̱ do̱o̱k koto do̱ do̱. Azan zin nogo Manyi koot lo̱o̱co̱we̱ do̱o̱k.
Dooli wak a̱rri̱ta̱ Shemi kuk rok Aburam
10E̱e̱ggi̱n ne̱ko̱ dooli wak a̱rri̱ta̱ Shemi.
Ma baling edeccai e̱rki̱nya̱ cik e̱e̱ggi̱n rama ngati uuddai tawani, izeto e̱rki̱to̱wa̱ cik Shemi o̱bo̱n co̱de̱ (100), i̱ti̱rra̱ zin logozit ci een zara Arvacad. 11Imma baling ize enne be̱e̱ti̱ Arvacadi, abak zin bo̱do̱k Shemi e̱rki̱nya̱ obet tu̱r (500) kar zin bo̱do̱k ki̱ti̱rra̱ dooli u̱gge̱ cik macik ki cik nga̱a̱ye̱k.
12Baling izeto Arvacadi e̱rki̱to̱wa̱ moten i̱i̱yo̱ ki tu̱r, i̱ti̱rra̱ zin logozit ci een zara Shelah. 13Baling ize enne be̱e̱ti̱ Shelah, kar zin Arvacadi kabak e̱rki̱nya̱ obet we̱c ki i̱i̱yo̱ (403) kar bo̱do̱k ki̱ti̱rra̱ dooli u̱gge̱ cik macik ki cik nga̱a̱ye̱k.
14Baling izeto e̱rki̱nya̱ cik Shelah moten i̱i̱yo̱, i̱ti̱rra̱ zin ngerinne ci een zara Eber. 15Baling ize enne be̱e̱ti̱ Eberi abak bo̱do̱k Shelah e̱rki̱to̱k obet we̱c ki i̱i̱yo̱ kar zin ki̱ti̱rra̱ dooli u̱gge̱ cik macik ki cik nga̱a̱ye̱k.
16Baling izeto Eberi e̱rki̱nya̱ moten i̱i̱yo̱ ki we̱c, i̱ti̱rra̱ ngerinne ci een zara Peleg. 17Baling ize enne be̱e̱ti̱ Pelegi, abak zin Eberi e̱rki̱nya̱ cik een obet we̱c ki moten i̱i̱yo̱ (430), kar bo̱do̱k ki̱ti̱rra̱ dooli u̱gge̱ cik macik ki cik nga̱a̱ye̱k.
18Baling izeto e̱rki̱nya̱ cik Pelegi moten i̱i̱yo̱, i̱ti̱rra̱ ngerinne ci een Reu. 19Bali ize enne be̱e̱ti̱ Reu, abak zin Pelegi e̱rki̱nya̱ obet ram ki torkoc (209), kar bo̱do̱k ki̱ti̱rra̱ zin dooli u̱gge̱ cik macik ki cik nga̱a̱ye̱k.
20Baling izeto Reu e̱rki̱nya̱ moten i̱i̱yo̱ ki ram, i̱ti̱rra̱ ngerinne ci een zara Serug. 21Baling ize enne be̱e̱ti̱ Serugi, abak zin bo̱do̱k Reu e̱rki̱nya̱ obet ram ki turgerem (207), kar zin ki̱ti̱rra̱ dooli u̱gge̱ cik macik ki cik nga̱a̱ye̱k.
22Baling izeto e̱rki̱nya̱ cik Serugi moten i̱i̱yo̱, i̱ti̱rra̱ ngerinne ci een zara Nahor. 23Baling ize enne be̱e̱ti̱ Nahori, abak zin Serugi bo̱do̱k e̱rki̱nya̱ obet ram (200), kar zin ki̱ti̱rra̱ dooli u̱gge̱ cik macik ki cik nga̱a̱ye̱k.
24Baling izeto Nahori e̱rki̱nya̱ moten ram ki torkoc, i̱ti̱rra̱ ngerinne ci een Terah. 25Baling ize enne be̱e̱ti̱ Terah, abak zin Nahori e̱rki̱nya̱ o̱bo̱n co̱de̱ ki omoto ki torkoc (119), kar zin ki̱ti̱rra̱ dooli u̱gge̱ cik macik ki cik nga̱a̱ye̱k.
26Baling izeto e̱rki̱nya̱ cik Terah moten turgerem, i̱ti̱rra̱ zin logoz ciginnek een i̱i̱yo̱ Aburam ki Nahor ki Haran.
27E̱e̱ggi̱n ne̱ko̱ doolik Terah.
Een Terah be̱e̱ti̱ Aburam, Nahor ki Haran. Okko Harani een be̱e̱ti̱ Loti. 28Ma̱i̱je̱ baling ngen baatinne Terah aruge, a̱da̱k zin Harani o̱rge̱ ci een Ur lo̱o̱ce̱ ci ol cik e̱e̱ggi̱n Chaldea.
29Urucco zin logoz ne̱k e̱e̱ggi̱n rama ko̱, i̱ti̱k zin Aburami buuwec ci een Sarai, okko gotoniya Nahori a̱ti̱k Milcah; een enne buweenyi gotononi wa een Haran wa bali bo̱do̱k anyak buweenyinne co̱de̱ ci azi zara ne Iscah. 30Abile bali Sarai; iróng anyak do̱le̱c.
31Idima zin Terah ollinne, ngerinne Aburam ki Lot ngerrti ngerinne Haran, ki alawan cinne Sarai, ngaa ci Aburam, kar zin ku̱lu̱ge̱t koot o̱rge̱ ci een Ur, lo̱o̱ce̱ ci Chaldea#11:31 Chaldea: Azi zar u̱gge̱ bu̱k ne, lo̱o̱c ci olli Babilon. kar atin koot Kanaana. Ma̱i̱je̱ baling ovvo nege arawa Haran, abaito zin nginati.
32Abak zin Terah zee kizeto e̱rki̱to̱wa̱ obet ram ki tu̱r (205), kar zin ka̱da̱k o̱rge̱ neci.
© 2018, Wycliffe Bible Translators, Inc. All rights reserved.