Kuyamba 11
11
Dala la Bhabhiloni
1Tsapano dziko lentse lapantsi likhana nshowo ubodzi, lichilewa-lewa mafala mabodzi. 2Wanthu paadatama achichoka kumabveladzuwa, adakawona dambo mudziko la Shinari, achikhala m'mwemo. 3Iwo adapangana nkuti, “Bwelani, ngatikonze bzidhina tibzitenthe.” Bzidhinabzo ndibzo bzaadamangisa, thala ndiyo yaadachita dongo. 4Iwo adazati, “Bwelani tibzimangile guta lina dala linkafika kudzulu, kuti tidziwike, tileke kumwazikila nadziko.”
5Chawuta adabuluka kuzanyangana guta nadala bzikhadamangiwa nawana wawanthu. 6Chawuta adati, “Wonani, awa niwanthu abodzi, anilewa-lewa nshowo ubodzi. Uku ndiko kuyamba kwawo kuchita bzaanfuna, palibe chingaatazise kuchita bzaakupangana kuti achite. 7Bwelani, ngatibuluke tikaapesanise kulewa-lewa kwawo, kuti munango-namunango wawo aleke kubva nshowo wamwanzake.” 8Nakutenepo Chawuta adaamwaza kuchoka pamwepo kuyenda kudziko lentse lapantsi, iwo adaleka kumanga guta. 9Guta limwelo lidazachemelewa kuti Bhabhiloni, pakuti Chawuta adapesanisa nshowo wawanthu pamwepo. Chawuta adaamwaza kuchoka pamwepo kuyenda kudziko lentse lapantsi.
M'badwe wa Shemu
(1 Mako 1:24–27)
10Uwu ndiwo m'badwe wa Shemu. Shemu paakhana magole dzana (100), adakhala apayi wa Aripakishadhi magole mawili pambuyo pamadzi yachigumula. 11Pambuyo pakubaliwa kwa Aripakishadhi, Shemu adakhala kwamagole mazana mashanu (500), adabala pomwe anango wana wachimuna nawachitsikana.
12Aripakishadhi paakhana magole makumi matatu namashanu (35), adakhala apayi wa Shela; 13pambuyo pakubaliwa kwa Shela, Aripakishadhi adakhala kwamagole mazana manayi namatatu (403), adabala pomwe anango wana wachimuna nawachitsikana.
14Shela paakhana magole makumi matatu (30), adakhala apayi wa Ebheri. 15Pambuyo pakubaliwa kwa Ebheri, Shela adakhala kwamagole mazana manayi namatatu (403), achibala pomwe anango wana wachimuna nawachikazi.
16Ebheri paakhana magole makumi matatu namanayi adakhala apayi wa Pelegi (34). 17Pambuyo pakubaliwa kwa Pelegi, Ebheri adakhala kwamagole mazana manayi namakumi matatu (430), achibala pomwe anango wana wachimuna nawachikazi.
18Pelegi paakhana magole makumi matatu (30) adakhala apayi wa Reu. 19Pambuyo pakubaliwa kwa Reu, Pelegi adakhala kwamagole mazana mawili napfemba (209) achibala pomwe anango wana wachimuna nawachikazi.
20Reu paakhana magole makumi matatu namawili (32), adakhala apayi wa Serugu. 21Pambuyo pakubaliwa kwa Serugi, Reu adakhala kwamakhole mazana mawili nanomwe (207), achibala pomwe anango wana wachimuna nawachikazi.
22Serugu paakhana magole makumi matatu (30), adakhala apayi wa Nahori. 23Pambuyo pakubaliwa kwa Nahori, Serugu adakhala kwamagole mazana mawili (200), achibala pomwe anango wana wachimuna nawachikazi.
24Nahori paakhana magole makumi mawili napfemba (29) adakhala apayi wa Tera. 25Pambuyo pakubaliwa kwa Tera, Nahori adakhala kwamagole dzana nakhumi napfemba (119), achibala pomwe anango wana wachimuna nawachikazi.
26Tera paakhana magole makumi manomwe (70), adakhala apayi wa Abhuramu na Nahori na Harani.
M'badwe wa Tera
27Uwu ndiwo m'badwe wa Tera. Tera akhali apayi wa Abhuramu na Nahori na Harani, Harani adakhala apayi wa Loti. 28Harani adafa apayi wake achali wamoyo, adafela mudziko laadabaliwa muguta la Uri mudziko laa Khalidhiya. 29Abhuramu na Nahori adaloola. Nkazi wa Abhuramu akhachemelewa kuti Sarayi, nkazi wa Nahori akhachemelewa kuti Milika, Milika mwana wachikazi wa Harani, Harani apayi wa Milika na Isika. 30Koma Sarayi akhali ngomwa, akhalibe mwana.
31Tera adatola Abhuramu mwana wake wachimuna nan'zukulu wake Loti mwana wachimuna wa Harani, namuloola wake Sarayi, nkazi wamwana wake Abhuramu. Adachoka muguta la Uri, mudziko laa Khalidhiya nkuyenda kudziko la Kenani. Koma paadafika ku Harani adakhala kumweko. 32Tera adalalama kwamagole mazana mawili namashanu (205), adazafela mu Harani.
Bhaibheri reChikunda © Bible Society of Zimbabwe