ЛукӀа 13
13
Аллагьдин рекьиз татайтӀа…
1Гьа вахтунда са бязибур Исадин патав атана, Аллагьдин КӀвале къурбандар ийизвай чӀавуз ПилатӀан эмирдалди яна кьейи галилейвийрикай Адаз суьгьбетна. 2И кардин патахъай Исади лагьана:
– А инсанар амай галилейвийрилай гзаф гунагьар квайвиляй яна кьенва лугьуз фикирзавани куьне? 3Ваъ, лугьузва За квез; куьн Аллагьдин рекьел татайтӀа, гьабур хьиз куьнни вири пуч жеда. 4Я тахьайтӀа, куьне Шилугьамдин минарадик акатна кьейи цӀемуьжуьд касдик Ярусалимда уьмуьр тухузвай амай вирибурулайни гзаф тахсирар ква лагьана фикирзавани? 5Ваъ, лугьузва За квез; куьн Аллагьдин рекьел татайтӀа, гьабур хьиз куьнни вири пуч жеда.
6Ада и кьисани ахъайна:
– Са касдихъ вичин ципицӀбагъда инжилдин тар хьана; тарцелай майваяр кӀватӀиз атайла, адаз затӀни гьатнач. 7Ада ципицӀбандиз лагьана: «Ингье, пуд йис я заз и таралай инжилар кӀватӀиз кӀанз, амма заз адалай затӀни жагъизвач. Вуна ам атӀутӀ: гьавайда ада вучиз чил кьазвайди я?» 8Амма ципицӀбанди жаваб яз адаз лагьана: «Агъа, цӀи ам за пер яна кьук кутадалди тур. 9Ада майваяр гъидатӀа килигда чун; тагъайтӀа, чна къведай йисуз ам атӀуда».
Исади са паб сагъарун
10 Киш юкъуз са синагугда Исади чирвилер гузвай. 11Ана чӀуру жинжи цӀемуьжуьд йисан къене акӀажарнавай са паб авай, адавай дуьз акъвазиз жезвачир. 12Ам акунмазни, Исади адаз эверна:
– Вун ви начагъвиликай азад хьанва, вах.
13ГьакӀ лагьана, Исади адал гъилер эцигна; паб гьасятда къарагъна дуьз хъхьана ва Аллагьдиз шукурар ийиз хьана.
14Киш юкъуз Исади а паб сагъар хъувуна лугьуз, синагугдин кьилевайда хъел кваз халкьдиз лагьана:
– Гьафтеда кӀвалахна кӀанзавайди ругуд югъ я; тӀаларикай сагъариз Киш ваъ, маса йикъарикай са юкъуз ша.
15– Кьве чин алайбур! – жаваб яз лагьана Реббиди. – Киш юкъуз куьне гьар сада жуван яц, я лам цурай акъудна цел тухузвачни? 16ЦӀемуьжуьд йисан къене иблисди бедбахтвилик кутунвай Ибрагьиман эвлед руш Киш юкъуз вичин къазадикай хкудна кӀандачирни кьван?
17Исади и гафар лагьайла, Адаз акси тир инсанриз регъуь жезвай, амай халкьди Адан аламатдин крарал шадвилер ийизвай.
Финдин тварцикай кьиса
(МатӀай 13:31-33; Мрк. 4:30-32)
18Исади лагьана:
– Аллагьдин пачагьвал куьз ухшар я ва Ам куьв гекъигиз жеда? 19Ам инсанди вичин сала цайи финдин тварциз ухшар я: ам экъечӀна, адакай еке тар хьана, къушарини адан хилерал мукар ийиз жеда.
20Исади давамарна:
– Аллагьдин пачагьвал куьв гекъигиз жеда? 21Ам папа цӀуд киле гъуьруьк кутур гъварциз ухшар я, ам кутунмазни тини атана.
ГуьтӀуь варар
(МатӀай 7:13-14, 22-23; 8:11-12)
22Иса Ярусалимдиз фидайла, рекье гьалтзавай шегьерра ва хуьрера Ада чирвилер гуз хьана.
23Са инсанди Исадиз лагьана:
– Я Агъа! ТӀимил инсанар хилас жеда лугьудай гафар гьахъбур яни?
Адани жаваб яз лагьана:
24– Аллагьдин Пачагьлугъдиз рехъ ачухзавай гуьтӀуь варарай физ алахъ, – жаваб гана Ада. – За квез лугьузва, гзафбур а варарай физ алахъда, амма абурувай анай экъечӀиз жедач. 25КӀвалин иесиди къарагъна рак агалайла, куьн къецел амукьда. Куьне: «Я Агъа! Я Агъа! Чаз рак ахъая», – лугьуз, варар гатаз жеда. Амма Ада квез жаваб гуда: «Куьн гьинай я? Заз куьн чидач». 26Гьа вахтунда куьне лугьуда: «Чун Вахъ галаз фу-яд тӀуьрбур я, чи куьчейрани Вуна чирвилер гайиди я». 27Амма Агъади жаваб гуда: «За квез лугьузва: куьн гьинай ятӀа, Заз куьн чидач. Залай алат, адалат квачир крар ийизвайбур». 28Квез Аллагьдин Пачагьлугъда Ибрагьим, Исакь, Якьуб ва амай вири пайгъамбарар аваз акурла, аниз ахъай тавуна къецел амукьайла, куьне сасни регъведа, шел-хвални ийида. 29РагъэкъечӀдай патайни рагъакӀидай патай, кефер патайни кьибле патай атана, инсанри Аллагьдин Пачагьлугъда межлисда чпиз чкаяр кьада. 30Исятда агъада авайбурукай са бязибур вине жеда, исятда вине авайбурукай са бязибур – агъада.
Иса Ярусалимдихъ шехьун
(МатӀай 23:37-39)
31Гьа и чӀавуз са шумуд фарисей атана, абуру Исадиз лагьана:
– Ахлад, и чкадай экъечӀ: Гьирудаз Вун рекьиз кӀанзава.
32– Фена а сикӀрез лагь хьи, – лагьана Исади, – къени пака За инсанрикай жинерар хкудда ва азарри кьунвайбур сагъар хъийида, пуд лагьай юкъуз За Зи крар куьтягьда. 33Амма къени, пакани, ахпагьан юкъузни Зун Зи рекье хьун лазим я, вучиз лагьайтӀа Ярусалимдилай гъейри маса чкада пайгъамбардивай ажал кьабулиз жедач.
34Эй Ярусалим, Ярусалим! Пайгъамбарар тергдай шегьер! Аллагьди ракъурнавайбур къванцин хура твадай шегьер! Вечре вичин цицӀибар кӀватӀна лувак кутадайди хьиз, шумудра Зун ви аялар кӀватӀиз алахънай! Амма квез кӀан хьаначир! 35Килиг, куь ичӀи макан За квез тазва. Куьне: «Реббидин ТӀварцӀелай къвезвайдаз шукур хьурай!» лугьудай вахт къведалди, квез Зун ахквадач.
© Институт перевода Библии, 2010-2024