Luk 24
24
Jön de rɔt
(Math 28:1-10; Mak 16:1-8; Jɔn 20:1-10)
1Na wën, ëkööl tueŋ wën ë akööl dhorou, të cï piny ruu, ke ke bɔ̈ të nu raŋ, bïïkï wɛ̈ɛ̈l wën cïk guik wɛ̈ɛ̈l cï ŋïrëŋïr, ku cath kɔc kɔ̈k në keek. 2Gokï kuur yök aacï laar wei ë raŋ thok. 3Na wën, aa cïk lɔ thïn, gokï guöp de Bɛ̈nydït Yecu kɛ̈n yök. 4Na wën, aa ŋootkï ke ke gäi në kënë, dï, ke ke tïŋ kɔc kaarou ke ke kääc ë kelɔ̈m, aceŋkï lupɔɔ lɔ bilbil. 5Na wën, ke ke päu piɔ̈th, abïk kenyïïn guöt piny, agokï ke thiëëc an, “Eeŋö kaar wek raan pïïr tëde kɔc cï thou? 6#Math 16:21; 17:22,23; 20:18,19; Mak 8:31; 9:31; 10:33,34; Luk 9:22; 18:31-33. Aliu ee tënë, ë rɔt jɔt: takï wenïïm në wël wään cï lɛ̈k week, ɣɔn ŋoot en Galili an: 7‘Wën ë Raan abï dhil yiɛ̈n kɔc rac, ku bï piäät ë tim cï rïïu nɔm kɔ̈u, ku bï rɔt bɛ jɔt ëkööl ee kek diäk.”’
8Gokï kenïïm tak ë wëlke, 9ku dhunykï kenïïm ë raŋ nɔm, lek kakë kedhie lɛ̈k kɔc kathiëër ku tök, ayï kɔc kɔ̈k. 10Ee yï Meri Magdalene, kekë Jowana, ku Meri man Jakop, ku diëër kɔ̈k cath në keek, kek aa lëk tuuc ee kakë. 11Go wëlken ciët ɣäär yiic tëde keek, agokï ke cuö gam. 12Na wën, ke Petero jɔt rɔt, kɔt ke lɔ ë raŋ nɔm: le ku guŋ luiit raŋic, go lupɔɔ linɔn tïŋ ke ke tɔ̈u kapäc, go jäl le paanden ke gäi në kë cï tïc.
Kɔc lɔ Emauth
(Mak 16:12-13)
13Na wën, dï, ke kɔc kaarou ë keyiic aake cath ëkööl manë guöp ke ke lɔ paan cɔl Emauth, kaam de paanë ke Jeruthalem acït meel kadhorou. 14Ku jɔkï guïïr kapäc në kë cï tïcë kedhie. 15Na wën, aa jamkï kapäc, ku yek röt luɔp, ke Yecu guöp cut rɔt tëthiɔ̈k, ku le cath ke keek ëtök. 16Ku acï ke kum nyïïn, agokï cuö ŋic. 17Go ke thiëëc an, “Ee jam ŋö guiɛɛrkï wapäc, ke we cath?”
Gokï gäk ke ke kääc, ke ke gut kenyïïn piny. 18Go raan tök ë keek, cɔl Kleopath, go bɛ̈ɛ̈r an, “Yïn ye kaman rɛ̈ɛ̈r yïtök ë Jeruthalem, ku kuc kë cï tïc ëtɛ̈ɛ̈n ë aköölkë?”
19Go ke thiëëc an, “Ee käŋö?”
Gokï lueel an, “Ka ke Yecu de Nadhareth, ee tiët ril ë luɔide ku wëlke ë Nhialic nɔm ku në kɔc nïïm kedhie. 20Ku luɔi cï bänydït ke ka ke Nhialic e yiɛ̈n miric, ayï bänykuɔn ë wo cieŋ, bï löŋde teem an, näk, gokï piäät ë tim cï rïïu nɔm kɔ̈u. 21Ku wook, aa yok ŋɔ̈ɔ̈th, nɔn ee yen raan bï Yithriɛl wɛ̈ɛ̈r bei. Ku matë cöökë ë cökkë yiic ayadäŋ an, nïn acïk aa diäk ee köölë të wään tïc ee kakë. 22Ku diëër kɔ̈k në diëër ke remda acïk wo tɔ gäi ayadäŋ, diëër cï dap riɛɛl ë raŋ nɔm wënamiäk, 23na wën, akënkï guöpde yök, ke ke jɔ bɛ̈n, bïk ku luelkï an, cïk tuucnhial tïŋ ë nyuuthic, tuuc wën lueel en an, a pïïr. 24Go kɔc kɔ̈k në kɔc rɛ̈ɛ̈r në wook gokï lɔ ë raŋ nɔm, lek ku yökkï ke cït man cï diäär e lueel: ku yenguöp akënkï tïŋ.”
25Go ke yɔ̈ɔ̈k an, “Agäi kɔc dhän oou, kɔc ë käŋ rɛɛc dap gam ka cï tït lueel kedhie! 26Kën Kërtho kake dhil guum, ku jɔ lɔ tëde ë dhuëëŋ? 27Na wën, ke ke wëër jam nu ë kacïgɔ̈ɔ̈r yiic kedhie, jam de yenguöp, gɔl ë Mothe aɣɔ̈l tït kedhie.
28Na wën, aa cïk thiɔ̈k ë paan le kek thïn, go an, le tueŋ. 29Gokï pëën an, “Rɛ̈ɛ̈rë we wook, piny acï aa thëën, akɔ̈l ë thiɔ̈k ke lɔ piny.” Go lɔ ɣöt le rëër ke keek. 30Na wën, aacï nyuc ke keek tën ee cam, ke nöm kuïn cï pam, leec Nhialic, ku wɛ̈ɛ̈kic, ku gëm keek. 31Go ke liep nyïïn, ku jɔkï ŋic, go lɔ riär piny ë kenyïïn. 32Gokï röt thiëëc kapäc an, “Kënku piɔ̈ɔ̈th dëp ë woyiic thïn, wën jiɛɛm en ke wook kueer, ke wëër wo kacïgɔ̈ɔ̈r?”
33Gokï röt jɔt ë thaar manë guöp, ku bekï kenïïm dhuöny Jeruthalem, agokï kɔc kathiëër ku tök yök acïk guëër, kekë kɔc ë rëër në keek, 34ku luelkï an, “Bɛ̈nydït acï rɔt jɔt ë yic! Ku acï tuöl tëde Thimon!”
35Go kɔc wën kaarou gokï ka cï tïc kueer guiir, ku ŋïny cï kek e jɔ ŋic ë wɛ̈ɛ̈k cï en kuïn cï pam wääkic.
Yecu Anyuth Rɔt Tuucke
(Math 28:16-20; Mak 16:14-18; Jɔn 20:19-23)
36Na wën, aa ŋootkï ke ke luel kakë, ke Yecu guöp ke jɔ tuöl ë keyiic cil, yöök keek an, “Ë mät tɔ̈u ë weyiic.”
37Gokï piɔ̈ɔ̈th päu ku riɔ̈ckï arëët, luelkï an, ee jɔk en ë tïŋkï. 38Go ke thiëëc an, “Eeŋö päu wek piɔ̈ɔ̈th? Ku eeŋö luɛɛl wek kajuëc ë wepiɔ̈ɔ̈th? 39Wɔikï yacin ku yacök, nɔn ee yen yɛn guöp? Tiɛckï yɛn ku tiëŋkï, jɔk acïn rïŋ ku yom, cït man cä wek e tïŋ nɔn ciɛth kek ë yɛn.”
40Ku të cï en kënë lueel, ke jɔ ecin nyuöth keek ayï yecök. 41Na wën, aa ŋootkï ke ke kën guɔ gam në miɛt mit kek piɔ̈ɔ̈th, ke ke gäi ke ke jɔ thiëëc an, “Dɛkï këcam ee tënë?” 42Gokï miɔɔc në baŋ töŋ de rɛ̈c cï geet, ku athïn ë kiëc. 43Go nööm, ku jɔ cam ë kenïïm.
44Go keek yɔ̈ɔ̈k an, “Wëlkï kï, wël wään cä lɛ̈k week, wään ŋuɔɔt ɛn ke ya tɔ̈u wo week an, “Käŋ kedhie abïk dhil aa yith, ka cï gɔ̈ɔ̈r në këdï ë löŋ de Mothe yic, ku tït yiic, ku Diɛt yiic.”
45Go käŋ wɛ̈ɛ̈r keek apiɛth, ke ke bï kacïgɔ̈ɔ̈r aa yök yiic, 46ku yöök keek an, acï gɔ̈ɔ̈r alë an: “Kërtho abï käŋ dhil guum, ku be rɔt jɔt ë kɔc cï thou yiic ëkööl ee kek diäk, 47ku an, puŋdepiɔ̈u ku päl ë kërac abï ke ya guiëër juöör ëbɛ̈n në rinke, gɔl ë Jeruthalem. 48Ku wek ee cäätɔɔ de kakë. 49#Luɔi 1:4. Ku tiëŋkï, wek tuöc kë cïï wäär lueel an, bï gam: ku week, jakï rëër ë pänydït Jeruthalem, aɣet të bï we piɔ̈th në riɛldïït bɔ̈ nhial.”
Yecu acï lɛɛr Paannhial
(Mak 16:19-20; Luɔi 1:9-11)
50 #
Luɔi 1:9-11. Na wën, ke ke leer biic ɣeet keek Bethani: ku jɔ e cin jat nhial, thieei keek. 51Na wën, aa ŋoot ke ke thieei, ke jël ë keyiic, ku jɔ jɔt leerë paannhial.#24:51: Këcïgäär däŋ acïnic go jɔt ke leerë paannhial. 52Gokï lam ku bekï kenïïm dhuöny Jeruthalem ke ke cï piɔ̈ɔ̈th miɛt arëët: 53ku yek cool ë tɔ̈u Luaŋdïtic, ke ke ye Nhialic leec. Amiin.
The Bible in Jieeng de Padang © The Bible Society in South Sudan, 2011.