Luk 20
20
Thiëc në Biäk de Riɛl ë Yecu
(Math 21:23-27; Mak 11:27-33)
1Na ɣɔn, ëkööl tök ee nïnkë yiic, të wëët en kɔc ë Luaŋdïtic, ku guiir wëlpiɛth, ke bänydït ke ka ke Nhialic ku kɔc ee löŋ gɔ̈ɔ̈r, ke ke jɔ bɛ̈n në röördït ëtök, 2bïk ku luelkï an, “Lɛ̈kë wook, ee riɛlou ee yïn ee kakë looi? Ku eeŋa ee raan ë gëm yïn ee riɛlë?”
3Go pɔ̈k nɔm keek an, “Ku yɛn aya, we bä thiëc cöök tök, ku abäk bɛ̈ɛ̈r: 4an Baptinh ë Jɔn, ë bɔ̈ nhial, ku ë bɔ̈ tëde kɔc?”
5Gokï kenïïm cät kapäc an, “Të lueel wok en an, ‘Aa bɔ̈ nhial,’ ka bï lueel an, ‘Eeŋödäŋ kɛ̈n wek egam?’ 6Ku na luelku yen an, ‘Aa bɔ̈ tëde kɔc,’ wo bïï kɔc biɔ̈ɔ̈k ë kɔi kedhie: luɔi cï kek Jɔn gam ëgɔk an, ee tiët.” 7Gokï bɛ̈ɛ̈r an, “Akucku të ë bï en thïn.”
8Go Yecu ke yɔ̈ɔ̈k an, “Ayï yɛn aya, we cä lëk riɛl luɔɔi ɛn ee kakë.”
Kääŋ de Kɔc Tit Dom de Enap
(Math 21:33-46; Mak 12:1-12)
9 #
Yith 5:1. Na wën, ke jɔ kɔc lɛ̈k kääŋë an: “Raan anu raan cï dom com, dom de tim cɔl enap, ago kuɛ̈i kɔc bï en aa tiit, ku jɔ keny paan mec ë pɛ̈i juëc. 10Na wën, aacï pɛɛi ë luɔk ë tiim bɛ̈n, ke jɔ lïm tök tuöc kɔc ee dom tiit an, bïk miɔɔc në ka cï luɔk ë dom ë tiim yiic: go kɔc ee dom tiit gokï dui, ku jɔkï cieec, ke cïn kë muk. 11Go lïm däŋ bɛ tooc: gokï dui aya, ku lɛ̈ɛ̈tkï arëët, ku jɔkï cieec, ke cïn kë muk. 12Go däŋ bɛ tooc, gokï dui abïk yiëk tëtök, ku jɔkï cuat ë dom këc. 13Na wën, ke jɔ bɛ̈ny de dom lueel an, ‘Eeŋö bä looi? Wëndiën nhiaar abä tooc: abï dɛ të bï kek e riëëu të tïŋ kek en!’ 14Ku të cï kɔc ee dom tiit e tïŋ, ke ke jɔ kethook mat an, ‘Wën bï käŋ lɔ̈ɔ̈k lak kï. Bäk näkku, ke ke buk lɔ̈ɔ̈k lak bï aa këda!’ 15Gokï cuat biic ë dom këc, ku jɔkï nɔ̈k.
Bï bɛ̈ny de dom ke jɔ luöi ŋö?” 16“Abï bɛ̈n bïï kɔc ee dom tiitë bɛ̈n nɔ̈k, ku jɔ dom yiɛ̈n kɔc kɔ̈k.”
Na wën, aa cïk e piŋ, ke jɔkï lueel an, “Tɔ pëën Nhialic en ee kënë!”
17 #
Diɛt 118:22. Go keek woi, ku lueel an, “Kënë ee kaŋö kë cï këcïgɔ̈ɔ̈rë lueel an,
‘Kuur cïï ë yïk rɛɛc,
Yen manë guöp acï tɔ ye kuur ë aguk nɔm.’
18Raan bï kuurë lööny ë yenɔm, ka bï mot abï ciët abuui!”
Thiëc në Biäk de Kun ë Athölbö
(Math 22:15-22; Mak 12:13-17)
19Ku bänydït ke ka ke Nhialic ku kɔc ee löŋ gɔ̈ɔ̈r akɔɔrkï luɔi bï kek e dɔm ë thaar manë guöp, ee riɔ̈ɔ̈c riɔ̈ɔ̈c kek ë kɔc tei: aŋickï nɔn ë lueel en kääŋë në këden. 20Gokï tiit, ku jɔkï nëëm tooc, kɔc bï röt kɔ̈c tɔkï röt ë kɔc piɛth, bïk jamdɛn bï wööc bɛ̈n jɔt, agokï yiɛ̈n bɛ̈ny, le löŋde guiir. 21Gokï thiëëc an, “Bɛ̈ny ee wëët, yïn ŋicku nɔn ee yïn käŋ lueel apiɛth ku wɛ̈ɛ̈të kɔc apiɛth, ku cïï kɔc ee kuany yiic, ku ye kɔc wɛ̈ɛ̈t ë kueer ë Nhialic në yic. 22Cï pal wook an, buk Kaithar kuöt athölbö, ku cie ye?”
23Go ruëënyden ŋic, ku yöök keek an, “Eeŋö thɛm wek ɛn? 24Nyuöthkï yɛn rial tök. Ee raanou cï gɔ̈ɔ̈r ë yekɔ̈u, ayï rinke?”
Gokï bɛ̈ɛ̈r an, “Ee Kaithar.”
25Go keek yɔ̈ɔ̈k an, “Yak Kaithar yiɛ̈n ka ke Kaithar, ku yak Nhialic yiɛ̈n ka ke Nhialic.”
26Ku akënkï lëu në jön bï kek jamë jɔt ë kɔc nïïm: acïk gäi në bëër cï en e bɛ̈ɛ̈r, ku jɔkï mim.
Thiëc në Biäk de Jönërɔt ë Thuɔɔuwic
(Math 22:23-33; Mak 12:18-27)
27 #
Luɔi 23:8. Na wën, ke kɔc kɔ̈k ke Thadokai ke ke jɔ bɛ̈n tëde yen, kek kɔc wën ee jai an, acïn jön bï kɔc röt jɔt nu, bïk ku thiëckï an, 28#Nyöŋ 25:5. “Bɛ̈ny ee wëët, acï Mothe gäär wook an, ‘Të cï mänhë ë raan thou, ku de nɔm tik, ku thou ke cïn meth mänhë abï rëër kekë tiiŋde, dhiëëth mänhë nɔm.’ 29Ku aa de raan ë de nɔm wɛ̈ɛ̈t kadhorou: ku jɔ wëndït tik thiaak, ago thou ke cïn meth. 30Na wën, ke wën lɔ ë yecök jɔ rëër kekë tiiŋde, ku jɔ thou ke cïn meth. 31Go wën ee kek diäk jɔ rëër kekë yen, ayï wɛ̈ɛ̈t ciëën kedhie ayadäŋ: ku acïn mïth cïk nyääŋ piny, ku jɔkï thou. 32Na wën, ke tik löök thou ë ke cök ciëën aya. 33Na ënɔɔnë, ëkööl ë jönërɔt ë kɔc, ke tiiŋë bï aa tiiŋ ë ŋa ë keyiic? Acï rëër ke keek kadhorou. 34Go Yecu bɛ̈ɛ̈r, yöök keek an, “Mïth ke pinyë nɔm ayek thiëëk, ku ye ke thiaak, 35ku kɔc bï tɔ ye kɔc röŋ në ɣet bï kek ɣet pinytui, ku yökkï jönërɔt ë kɔc cï thou yiic, acïkï bï aa thiëëk, ku cïï ke bï aa thiaak, 36ku cïkï duëër bɛ thou aya: acïk thöŋ ë tuucnhial, ku ayek wɛ̈ɛ̈t ke Nhialic, wɛ̈ɛ̈t ke jönërɔt. 37#Bɛ̈n 3:6. Ku jön ee kɔc cï thou jɔt, en acï Mothe nyuöth week në gäärdɛn ɣɔn gɛ̈ɛ̈r në këde but, ɣɔn cï en Bɛ̈nydït tɔ ye ‘Nhialic de Abraɣam, ku Nhialic de Yithaak, ku Nhialic de Jakop.’ 38Acie Nhialic de kɔc cï thou, ee Nhialic de kɔc pïïr: kɔc kedhie apïïrkï në yen.”
39Go kɔc kɔ̈k ë kɔc ee löŋ gɔ̈ɔ̈r gokï bɛ̈ɛ̈r an, “Bɛ̈ny ee wëët, yïn ë löŋ tiiŋ nɔm!” 40Na wën, ke ke jɔ riɔ̈ɔ̈c në thiëc bï kek e bɛ thiëc käŋ.
Thiëc në Biäk de Kërtho
(Math 22:41-46; Mak 12:35-37)
41Go ke thiëëc an, “Eeŋö lueelë kɔc en an, Kërtho ee wën ë Debid? 42#Diɛt 110:1. Ku acï Debid guöp lueel në awerek de Diɛtic, an,
‘Bɛ̈nydït acï Bɛ̈nydiëndït yɔ̈ɔ̈k an:
Nyuc ë ciin cuënydï,
43Aɣet të bän kɔc de ater në yïn tɔ ye kën ee yïn yïcök dhɔ̈ɔ̈r.’
44Aye Debid tɔ ye ‘Bɛ̈nydït’, ku jɔ aa wënde adï?”
Yecu Ajäny Kɔcpiööcë bïk Röt Tiit në Kɔc ee Löŋ Gɔ̈ɔ̈r
(Math 23:1-36; Mak 12:38-40)
45Na wën, ke yöök kɔckɛn ë piööcë abï kɔc piŋ kedhie an, 46“Yak röt tiit ë kɔc ee löŋ gɔ̈ɔ̈r, kɔc kɔɔr cath ke ke ceŋ lupɔɔ bär, ku nhiaarkï thiëc ee kɔc röt thiëc ë thuk yiic, ku nhiaarkï ɣään piɛth ë ɣööt ke Nhialic yiic ayï ɣööt ke këcam yiic, 47ku yek ɣööt ke diëër cïn nïïm röör cam yiic, ku yek lɔ̈ŋ ë lɔ̈ŋ bäär thiɛɛn kek kërɛɛcden: këdɛn tuc bïk yök kek ee kɔckë abï dït!”
The Bible in Jieeng de Padang © The Bible Society in South Sudan, 2011.