San Lucas 11
11
Jesús tjaago kexreen tsjao ni Ndo Dio
(Mt. 6:9-15; 7:7-11)
1Naa nchaꞌon Jesús jitjao Ndo Dio ngain naa jna, ko are juexin kjuao ndo, naa thi chujni bakao ndachro ngain:
—Nchekuanna ni ra runichjaa ná Ndo Dio, jañaa inchin Juan, thi banchegithe chujni, banchekueꞌen chujnii.
2Jesús ndachro:
—Are tsjao ra Ndo Dio, ndachro ra:
Suixin Ndudana ná thjen ngajni,
Suixin jikininxin tsusayaꞌa.
Dijiꞌi diketuꞌan Suixin nthiꞌi.
Ko tsuꞌen inchin Suixin rinao nthiꞌi ngataꞌa nunthe inchin tuꞌen nthi̱ꞌa̱ ngajni.
3Chjana ni ra jai thi rugundana ná sine ná.
4Nchetjañana ni ra thi jianꞌa binthaꞌa ná, ixin jaꞌan ná kai nthatjañaa ná thi chujni ncheꞌe jianꞌa ngajin ná.
Nchegathoꞌa ni ra tangi ko tanchrjandaꞌa ni ra ngain thi jianꞌa.
5Kai ndachro Jesús ngain na̱:
—Kexeꞌe ra xro chunda ra naa xi jian dakjioꞌo ra, ko ngusine thie siji xa nchiandui ra ko rundathjo ra xa: “Nalugaa, nchekjen na nii niuthja 6ixin naa xi jian dakjiꞌan nandaa juixin xa kjín, ko biji xa nchiania ko jaꞌan xruꞌin chunda thi ruchjaꞌa xa.” 7Ko ja̱ rundachro ra ngaxiꞌon nchiandui ra: “Ncheñaoꞌa na, ukuejaa nchiania ko utatejuangi xanꞌna ngataꞌa saon; chroꞌa singathjen ruchjaꞌa thi jaꞌa rinao.” 8Aro ja̱ xi jian dakjioꞌo ra tsanchrjandaꞌa runichjaꞌa ra xa, jaꞌa ra singathjen ra ko ruchjeꞌe ra xa thi jeꞌe xa rinao xa aro ijeꞌa ixin jian dakjioꞌo ra xa, jeꞌo ixin tatsanchrjanda ra xa tasinthechrin ra. 9Mexin jaꞌan rindathjo ra: Danchia ra ko Ndo Dio ruchjaa ra, thjee ra ko sinchii ra, dinga ra ntha dijexin, ko ntha dijexin mee ruxiree ntha. 10Ixin thi danchia, dayee, ko thi thjee, dithja, ko thi dinga ntha dijexin, ntha dijexin xiree ixin jeꞌe dinga.
11’¿Kexeꞌe ra xro chunda ra xaꞌan ra, anchao ruchjeꞌe ra xan naa xro are sanchiaꞌa ra xan naa niuthja? ¿o aruchjeꞌe ra xan nthauꞌe kunchee are jeꞌe xan sanchiaꞌa ra xan nthauꞌe kuchee? 12¿o aruchjeꞌe ra xan naa kunthanchia are sanchiaꞌa ra xan naa juja? 13Mexinxin jaꞌa ra maski chujni jianꞌa ra, aro nuꞌa ra dajon ra thi jian ngain xaꞌan ra, ¡icha jian Ndudaa ná, ndo thjen ngajni ixin dajon ndo Espíritu Santo ngain chujni danchia!
Jesús ko Beelzebú thi thetuꞌen kain espíritu jianꞌa
(Mt. 12:22-30; Mr. 3:19-27)
14Naa nchaꞌon Jesús bengi naa espíritu jianꞌa dinchethapo naa thi xii, ko are espíritu jianꞌa jiꞌi ubachrjexin ngain xa, jeꞌe xa unchao nichja xa. Ko tsjé chujni beꞌe nthi̱ꞌa̱ anto kuiseꞌen na̱ ixin thi bincheꞌe Jesús. 15Aro ikanxion na̱ ndachro na̱:
—Xii jiꞌi dengi xa espíritu jianꞌa kunixin juachaxiin nchiijin thi diꞌin Satanás ko kai diꞌin Beelzebú, thi thetuꞌen kain espíritu jianꞌa.
16Ko ikanxion na̱ binao na̱ runcheyeꞌe na̱ Jesús, ko banchia na̱ ixin jeꞌe runcheꞌe naa thi jian rukixin ngajni. 17Aro jeꞌe ubenuꞌe thi texraxaon na̱, ko ndachro ngain na̱:
—Ja̱ chujni thetuꞌan ngain naa nunthe ndachjeeya na̱, chujni nunthe mee ndatsjexin na̱, ko ja̱ chujni ngain naa rajna o chujni texiꞌin ngain naa nchia theto na̱, chujni teꞌi tuin ndatsjexin na̱. 18Ko ja̱ ndachro ra ixin jaꞌan dengi espíritu jianꞌa kunixin juachaxiin Beelzebú, ¿kexreen tsunchrjeꞌen thi thetuꞌan nchiijin, ja̱ jeꞌo dengi choo?, mee ruchro ixin thetukaꞌo choo ko thi jeꞌe thetuꞌan seꞌa tsunchrjeꞌen. 19Ixin ja̱ jaꞌan dengi espíritu jianꞌa kunixin juachaxiin Beelzebú, anchee, ¿kensen chjee chujnia ra juachaxin ixin dengi na̱ espíritu jianꞌa? Ja̱ jaꞌa ra rundachro ra ixin Ndo Dio, mee ruchro ixin nduaꞌa thi texraxaon ra. 20Aro jaꞌan deꞌngi espíritu jianꞌa kunixin juachaxiin Ndo Dio, ko jiꞌi ruchro ixin thi thetuꞌan Ndo Dio ujii ngajin ra.
21’Are naa xii tsanga jinda xa nchianduꞌa xa kunixin chia taade ngaa raa xa, are mee kain thi jichunda xa jichjian jian. 22Aro ja̱ tsii inaa xii icha tsanga ngain xi jinda nchianduꞌa, ko santsjeꞌe xa chia taade jingaa raa, ko sasikao xa kain thi kuenchjiꞌan xii mee ko tsunchjeeya kain thi bantsje xa ngain nchia mee.
23’Thi chujni rinaoꞌa na jaꞌan, chujni mee ningakunna, ko thi thiaoꞌa icha chujni ixin rurueꞌna, chujni mee ncheꞌe ixin icha nchekjínxin chujni ngajin.
Thi espíritu jianꞌa kjan
(Mt. 12:43-45)
24’Are naa espíritu jianꞌa sathjixin ngain naa chujni, espíritu jiꞌi sathji thi xruꞌin chujni jii ixin dikjee thi sinchejugaꞌa. Ko are dithjaꞌa thi sinchejugaꞌa, jeꞌe xraxaon ko ndachro: “Jaꞌan sarukjan na ngain nchiania thi bachrjexin.” 25Ko are espíritu mee kjan, jeꞌe dithja chujni mee inchin naa nchia digajon na̱ ko chrjuin ditsujin ngaxiꞌin nchia. 26Kuthimejan espíritu jianꞌa mee diruee iyaato espíritu icha jianꞌa ke jeꞌe, ko kain espíritu sadixiꞌin ngain chujni mee, ko chujni mee icha tangi tuꞌen ke are saꞌo.
Thi chujni ndua chrjuin tunuꞌe ngain anseen
27Are Jesús jindachro kain jiꞌi, biji naa nchrii ngayee chujni ko suji ndachro:
—¡Anto chrjuin ixin thi nchrii binthakunkjiꞌa ko binthakai!
28Ko Jesús ndachro:
—¡Icha chrjuin thi chujni thiꞌin thi ndachro Ndo Dio ko dithikaon!
Chujni jianꞌa banchia na̱ naa thi jian runcheꞌe Jesús
(Mt. 12:38-42; Mr. 8:12)
29Chujni xrathe na̱ ko kunchieꞌen na̱ ngandajin Jesús, ko jeꞌe kuexiꞌin nichja ko ndachro:
—Kain chujni ngain nchaꞌon teꞌi, jeꞌe na̱ jianꞌa na̱ ko danchia na̱ sikon na̱ thi jian nthaꞌa, aro xruꞌin icha sikon na̱, jeꞌo thi bathuꞌe Jonás. 30Ko jañaa inchin thi kjuaago Jonás ngain chujni binthe ngain rajna Nínive, jañaa kai jaꞌan, thi Xii juixin ngajni, rukjan na naa thi naꞌa dikunxin ni ngain chujni te jai. 31Thi nchrii baketuꞌan ngain sur singathjen nchra ngain nchaꞌon are sueꞌen chujni jie̱ te jai, ko jeꞌe nchra ruchro nchra jie̱ ngain na̱, ixin jeꞌe nchra juixin nchra anto kjín ixin bikiꞌin nchra thi benuꞌe Salomón, ko nthiꞌi ngajin ra jii naa thi icha nuꞌe ke Salomón aro xruꞌin chujni thinxin. 32Ko chujni binthe ngain rajna Nínive singathjen na̱ ngain thi nchaꞌon are Ndo Dio sincheꞌe jie̱ kain chujni ixin ruchro na̱ jie̱ ixin chujni te jai, ixin kain chujni Nínive bithikaon na̱ are Jonás bindache na̱ juajnee Ndo Dio, ko nthiꞌi jii naa thi icha renthe ke Jonás aro xruꞌin chujni thinxin.
Jmakon ni, mee thi xruꞌi nchengaseꞌen anseen ni
(Mt. 5:15; 6:22-23)
33’Xruꞌin chujni sinchakaon naa xruꞌi ko tsema xrui, o sakeꞌe ngangindeꞌe naa ntha kaja, icha jian dakeꞌe xruꞌi nui ixin kain chujni sixiꞌin nchia singaseꞌen na̱. 34Jmakon ni inchin naa xruꞌi nchengaseꞌen ni. Mexinxin ja̱ jmakon jaꞌa jian, nguixin ansean dingaseꞌen kai. Aro ja̱ jmakon jianꞌa, kai nguixin ansean jii ngain thi naxin xeꞌe. 35Darinda thi dingasaan richunda jaꞌa, ko rukjanꞌa inchin thi naxin xeꞌe. 36Aro ja̱ nguixin ansean jichunda thi dingasaan ko xruꞌin thi naxin xeꞌe jichunda, mexinxin jaꞌa ra inchin xruꞌi nchengasaan nguii thi ridinthe ra, jañaa inchin naa xruꞌi chrjuin nchegasaan.
Jesús binchesatheꞌe xi fariseo ko xi tjaago ley
(Mt. 23:1-36; Mr. 12:38-40; Lc. 20:45-47)
37Are Jesús juexin ndachro kain yaa, naa xi fariseo ndache xa Jesús ixin sinekaꞌo xa ngain nchianduꞌa xa. Jesús kjui nchianduꞌa xa ko bixiꞌin ko beꞌe ngain ntha netaxin ni. 38Jeꞌe xi fariseo mee xratao tabinchexruan xa ixin bikon xa Jesús beꞌe bine ko kunthiꞌa jinda inchin kukuꞌen chujni judío. 39Aro Jesús ndachro ngain xa:
—Jaꞌa ra xro fariseo ra jeꞌo ngama ra tunthi ra jinda, jañaa inchin thjeen ra thi dixin ni ko thi nea ni, aro ngaxiꞌin ansean ra jii kain thi jianꞌa ko themeꞌe ra chujni ko ncheꞌe ra icha jianꞌa. 40¡Jaꞌa ra thinxinꞌa ra! ¿Anuaꞌa ra ixin Ndo Dio thi binchechjian ngama ra, kai binchechjian ngaxiꞌin ra? 41Dajon ra tumi ngain chujni nua, aro dajon ra kunixin ansean ra, ko jamee tsurua ra.
42’¡Anto tangi tsuꞌan ra jaꞌa ra xro fariseo ra!, ixin jaꞌa ra dajon ra ngain Ndo Dio thi thexin dacha ra ngain kaxranchuni, ko karuda, ko icha ka, aro jaꞌa ra ncheꞌa ra thi jian ko thjueꞌa ra Ndo Dio. Aro rugunda sincheꞌe ra thi jian ko xra dajon ra thi tedajon ra.
43’¡Anto tangi tsuꞌan ra, jaꞌa ra xro fariseo ra! Jaꞌa ra xro nthaxruxiꞌan ra dinthe ra ngain ntha xintaon icha chiaon jikee xi thetuꞌan ngaxiꞌin niꞌngo, ko nthaxruxiꞌan ra tsusayaꞌa ra kunixin juajna ngatja nthiꞌá.
44’¡Anto tangi tsuꞌan ra jaꞌa ra xro tjaago ra ley ko jaꞌa ra xro fariseo ra!, xro te ra inchin chinthi jima, ko chujni datho na̱ ngataꞌa chinthi aro nueꞌa na ixin nthi̱ꞌa̱ jixrabaa chujni.
45Kuthejan naa xii anto nuꞌe ley ndachro xa ngain Jesús:
—Suixin ke tjaago, are suixin dinchesatheꞌe ni fariseo, ¿a kai jaꞌan ná rindachjejin ni ra?
46Ko Jesús ndachro:
—¡Kai jaꞌa ra xro tjaago ra ley anto tangi tsuꞌan ra! Ixin jaꞌa ra ncheka ra chujni thi icha tangi, ko jaꞌa ra xruꞌin ncheꞌe ra ixin rukjengijna ra na̱.
47’¡Anto tangi tsuꞌan ra jaꞌa ra! Ixin jaꞌa ra nchechjian ra chinthi ixin xraxaunxin ra kain chujni bagayee juajnee Ndo Dio, ko ni chujnia ra xranchrjen ni kjuaaya are saꞌo. 48Kunixin jiꞌi tjaago ra, ixin nthaxruxiꞌan ra thi bincheꞌe ni chujnia ra xranchrjen, ixin jeꞌe na bintheguen na̱ ni bagayee juajnee Ndo Dio are saꞌo ko jaꞌa ra nchechjian chinthiꞌi na̱.
49’Mexinxin Ndo Dio kunixin thi jian juaxraxauen ndo ndachro ndo: “Ruruaꞌan ra tsjé ni dayee juajnee ndo Dio ko ni apóstol ngajin ra, ko jaꞌa ra nasuenxon ra thuꞌa na̱ ko ithuꞌa na̱ sinchekinga ra na̱.” 50Mexinxin chujni te jai Ndo Dio sincheꞌe jie̱ ixin jnii kain ni bagayee juajnee Ndo Dio, ni buen na̱ are nakuexinxin kunchjian nunthe jiꞌi, 51jiꞌi ruchro are beꞌen Abel ko bikjexinxin are buen na̱ Zacarías, thi buenxin na̱ ngusine altar ko niꞌngo. Yaa thi rindathjuxin ra jaꞌan ixin Ndo Dio sincheꞌe jie̱ ixin kain chujni yaa.
52’¡Anto tangi tsuꞌan ra jaꞌa ra, xro tjaago ra ley!, ixin jaꞌa ra chunda ra thi xroon jitaxin kain thi thetuꞌan Ndo Dio aro jaꞌa ra rinaoꞌa ra thinxin ra, ko tanchrjandaꞌa ra ixin icha chujni tsinxin xroon jiꞌi.
53Are Jesús ndachro kain jiꞌi, xi tjaago ley ko xi fariseo anto bintheguñao xa ngain Jesús, kuthimejan anto tsjé banchiangiꞌi xa 54ixin rugikunxin xa ja̱ jeꞌe runichja naa thi nduaꞌa, ixin jañaa nchao rukjangiꞌi xa.
© 2017, Wycliffe Bible Translators, Inc. All rights reserved.