Chivkeeb 9
9
Vajtswv Coglus Rau Nau-as
1Vajtswv foom koobhmoov rau Nau-as thiab nws cov tub hais tias, “Nej yuav muaj tub muaj ki coob, mas nej cajces yuav huamvam mus thoob ntiajteb. #Chiv 1:28 2Txhua yam tsiaj hauv ntiajteb, txhua yam nas-noog uas ya saum nruabntug, txhua yam kab uas ntaug hauv av, thiab txhua yam ntses hauv hiavtxwv, puavleej yuav ntshai rwg nej. Txhua yam ntawd yog muab tso rau nej kav. 3Nej muaj cai noj tau txhua yam ntawd ib yam li tej zaub uas Kuv twb pub rau nej noj lawm thiab. 4Tiamsis nej tsis txhob noj tej nqaij uas tseem muaj ntshav nyob rau hauv; Kuv txwv li no vim txojsia yog nyob rau hauv cov ntshav. #Levi 7:26-27; 17:10-14; 19:26; 2Kev 12:16; 15:23 5Yog leejtwg txov ib tug tibneeg twg txojsia, tus ntawd yuav raug txim tuag. Yog tej tsiaj twg tom ib tug tibneeg tuag, Kuv yuav rautxim tuag rau tej tsiaj ntawd ib yam nkaus. 6Vajtswv yog tus tsim kom tibneeg muaj tus hwvxyeej zooli Nws, yogli ntawd, yog leejtwg muab ib tug tibneeg ntawd tua povtseg, yuav muaj lwmtus muab nws tua ib yam nkaus li ntawd thiab. #Khiav 20:13; Chiv 1:26
7“Nej yuavtsum muaj tub muaj ki kom coob, kom nej tej cajces thiaj yuav huamvam mus thoob ntiajteb.” #Chiv 1:28
8Vajtswv hais rau Nau-as thiab nws cov tub tias, 9“Zaumno Kuv coglus tseg rau nej thiab nej cajces, 10thiab rau txhua yam uas muaj sia, tsis hais txhua yam noog thiab txhua yam tsiaj, uas nrog nej tawm hauv lub nkoj los. 11Kuv coglus tseg rau nej hais tias: Kuv yuav tsis rhuav txhua yam uas muaj sia los ntawm dej nyab ntxiv lawm, thiab dej yuav tsis nyab lub ntiajteb kom puastsuaj ib zaug ntxiv li lawm.
12“No yog lub cim ntawm Kuv tej lus cogtseg mus ibtxhis rau nej thiab txhua yam uas muaj sia, 13Kuv yuav muab Kuv tus duab tshavnag tso sawv rau saum nruabntug. Tus duab tshavnag ntawd yog lub cim uas Kuv coglus tseg nrog lub ntiajteb. 14Thaum twg Kuv ua kom muaj huab roos saum nruabntug, thiab muaj tus duab tshavnag ntawd tshwm nyob rau saum cov huab, 15Kuv yuav ncontsoov tej lus uas Kuv tau cogtseg rau nej thiab rau txhua yam tsiaj hais tias dej yuav tsis los nyab txhua yam uas muaj sia kom puastsuaj ib zaug ntxiv li lawm. 16Thaum tus duab tshavnag sawv tshwm rau saum cov huab, Kuv yuav pom tus duab tshavnag ntawd thiab yuav nco txog tej lus uas Kuv tau cogtseg mus ibtxhis rau nej thiab rau txhua yam uas muaj sia nyob hauv ntiajteb. 17Qhov ntawd lau, yog lub cim uas Kuv coglus tseg rau txhua yam uas muaj sia nyob hauv ntiajteb.”
Nau-as Thiab Nws Cov Tub
18Nau-as cov tub uas tawm hauv lub nkoj los yog: Sees, Has thiab Yafej. (Has yog Kana-as txiv.) 19Nau-as peb tus tub no yog txhua tsav tibneeg uas nyob hauv ntiajteb cov yawgkoob.
20Nau-as yog tibneeg ua liaj ua teb, nws yog thawjtug uas xub cog txivhmab. 21Tomqab nws haus ib co kua txivhmab, nws txawm qaug heev, nws ciali hle ristsho thiab pw liabqab ploog hauv nws lub tsevntaub. 22Thaum Has, uas yog Kana-as txiv, pom nws txiv pw liabqab li ntawd, nws txawm tawm mus hais qhia rau nws ob tus tijlaug. 23Ces Sees thiab Yafej thiaj mus muab tau ib lub tsho ntev nthuav rau saum nkawd nrobqaum thiab muab khuam rau saum nkawd xubpwg. Nkawd thiaj thaubqab mus rau hauv lub tsevntaub thiab coj mus npog nkawd txiv, thiab tig ntiag rau ibcag kom tsis txhob pom nkawd txiv liabqab. 24Thaum Nau-as zoo cawv tsim los nws paub tej uas nws tus tub ntxawg ua rau nws, 25nws thiaj hais tias,
“Kuv foom phem rau Kana-as!
Nws yuav ua nws ob tus tijlaug qhev.
26Ua tus TSWV uas yog Sees tus Vajtswv tsaug!
Kana-as yuav ua Sees qhev.
27Thov kom Vajtswv ua rau Yafej#9:27: Yafej: Lub npe no hais muaj ntsis thooj li lolus Henplais uas hais tias “huamvam.” huamvam!
Thov kom nws cajces nrog Sees tsav tibneeg nyob uake.
Kana-as yuav ua Yafej qhev.”
28Tomqab dej nyab ntiajteb tag, Nau-as ua neej nyob tau 350 xyoo ntxiv 29thiab tuag thaum nws muaj hnubnyoog 950 xyoo.
© 2022 United Bible Societies. All rights reserved.