John 6
6
Chin namanganan Hesus hachi lemay lipfu an tatakhu
1Immuy chi at hichi hi arkhaw ja pfimmad-ang cha Hesus chin baybay ad Galilee an nangadnan khu hi Tiberias. 2Cho-or chin tatakhu an nangunud ti tinnig cha hana milagro an en-enat na an nangpatikhaw ay ni apfalinana, ti nun-epatenong na hachi mumpunchokhoh. 3Nunti-id cha Hesus ja chin disipolo na han pfulludna ja inumpfun cha. 4Metongor ay chuy ja machakngan chin pfehtan chi Hudju an Pangnomnoman cha chin Nalohan chin Angher Apo Jos. 5Unagkhu nuntigkhatigkhaw hi Hesus ja tinnig na hachi cho-or an tatakhu an khun mehmehnot ay hija, ja inali na ay Philip hi, “Chaad nin chi i ta-o nguminaan hi epa-an hay hato tatakhu?” 6Inali na hitay ta toptopngana hi Philip, ti aniꞌ-ilan Hesus hini atona. 7Tempfar Philip ja inali na hi, “Anong un inginay pfinoꞌla hi gwaloy pfulan#6:7 Literal: Anong un inginay chugway khahot hi denarius. Hini oha an denarius ja hija hini pfinoꞌlan ni ohan takhu hi hen-arkhaw. ja achi omanay hi hiniꞌ-itangon cha.” 8Ja inalin Andrew an oha ay cha chuy adalan Hesus an ibpfan Simon Peter hi, 9“Tayya han ung-ungnga an lala-e an nunhohongot hi lema an tenapay#6:9 Hitay an tenapay ja na-apja hi barley, an hija hini khun anun chi napubli. ja chugwa an khachiw. Muti achi omanay ti cho-or hato tatakhu.” 10Ja inalin Hesus hi, “Ipapfun ju hachi tatakhu.” Hotti impapfun cha ay chuy agawwachaan cha an achoꞌlan chi holoꞌ. Ja umuy hi lemay lipfu hachi linala-e ay chuy an khagong. 11Enalan Hesus chin lema an tenapay ja nunyaman ay Apo Jos, ja empe-ap-apong na hachi tatakhu an numpanga-umpfun. Ja enat na khu chin khachiw. Nangan cha hotti na-apchan cha an amin. 12Unagkhu na-apchan chin tatakhu ja inalin Hesus hachi disipolo na hi, “I ju tipunon hay hachi nun-ahagwar ta ma-id metapar.” 13Hotti enat cha ja nun-apnu han himpolo ta chugwa an pfahkit chin nun-ahagwar ay chuy lema an tenapay an inan hachi tatakhu.
14Tinnig hachi tatakhu hichuy enat Hesus an nangpatikhaw ay ni apfalinana, ja inali cha hi, “Hijah tay hini nipadtu an Profetan Apo Jos an umali heto lota.” 15Aniꞌ-ilan Hesus an khun cha nomnomon an piliton cha hija an mumpfalin hi ari cha. Muti achi na podhon, hotti tenaynana chicha ja inti-id na khu ay chuy an pfulludna ta iomohha.
Chin chimmalanan Hesus hichin chanum
16Gwan nahilip ja nunchayyu hachi disipolon Hesus hichi baybay, 17ja nunlukhan cha han pfalangay ta umuy cha hichi chammangna an ad Kapernaum. Gwa an nadhom ja ma-id pay tinnig cha hi mangunud ay Hesus. 18Unagkhu himpfumagkha ja immali han mapfi-ah an ijah ja nuntipjaꞌ-ong chin chanum. 19Khun mungkhaud hachi disipolon Hesus ja unagkhu immachawwi cha hi lema wenno unum hi kilomitlu ay chin pingngit chi baybay an narpugwan cha, ja tinnig cha hi Hesus an khun chumalan ay chuy chanum, ja khun mehmehnot ay chicha. Ja nang-entata-ot cha. 20Himmapit hi Hesus ja inali na hi, “Achi aju toma-ot ti ha-in.” 21Ja nun-an-anla cha an nanglukhan ay hija. Naꞌnaꞌ-omtang ja emmatam cha chin pingngit chi baybay an negpongan ni i cha omajan.
22Chin nun-ingwiꞌgwiit ja gawwacha cha pay hachi tatakhu ay chuy pingngit chuy baybay an chammang ni immajan hachi disipolon Hesus. Tinnig cha an ma-id uchumna hi pfalangay, ja anila cha an agkhuy niꞌlukhan hi Hesus chin oh-ohha an nunlukhanan hachi disipolo na. 23Muti ay chuy an nanong ja gwacha chin uchumna an pfalangay an narpu ad Tiberias an nangtaꞌchug ay chuy negpongan chin nanganan hachi tatakhu ay chuy tenapay an nunyamanan Apo Hesus ay Apo Jos. 24Tinnig hachi tatakhu an ma-id hi Hesus, ja ma-id khu hachi disipolo na, hotti amat hichi ja niꞌlukhan cha chin pfalangay, ja neꞌpacheh cha an umuy ad Kapernaum ta i cha hingiton hi Hesus.
Hi Hesus ja mipadchung hi anun an mangchat hi piꞌtakhuwan
25Unot inah-upan hachi tatakhu hi Hesus ay chuy chammangna an ad Capernaum ja inali cha ay hija hi, “Rabbi, aꞌ-anunay immaliyam heto?” 26Ja inalin Hesus hi, “Umannung hitay alloꞌ, an hini khunaꞌ paningitan ay chaꞌju ja khapo ta inan ju chin tenapay ja na-apchan aju. Achiyaꞌ khun hingiton khapo ta na-awatan ju hana enat u an panginnilaan ju ay ni apfalinaꞌ. 27Hay maphod hi aton ju ja pfu-un hini anun heto lota chi epa-ennongan ju an itamu, ti hay hato ja mapogpog. Hay epa-ennongan ju an hingiton ja hini anun an achi mapogpog, an hijay mangchat hi piꞌtakhuwan an ma-id chi pogpogna. Hini mangchat ay tay an achi mapogpog an anun ja un angkhay ha-in an Na-ilangitan an Takhu, ti hi Ama chi nangchat hi kalintikhaꞌ.” 28Ja empfokha cha ay hija hi, “Hot ngay aton mi an mangat ay ni penhod Apo Jos?” 29Tempfar Hesus ja inali na hi, “Hay podhon Apo Jos hi aton ju ja mamati aju ay ha-in an hennag na.” 30Ja empfokha cha khu hi, “Hot gwacha mah chi ipatikhaw mu ta panginnilaan mi ay ni apfalinam ta gway aton mi an mamati ay he-a. Hotti ngay mah atom? 31Hi Moses ja penangana chin a-apo ta-o hi mana hichi let-ang. Ti allona ay ni hapit Apo Jos hi, ‘Penangana chicha ay ni anun an narpu ad langit.’ ”#6:31 Exodus 16:4-5 32Tempfar Hesus ja inali na hi, “Umannung hitay alloꞌ, an pfu-un hi Moses chi nangchat ay chuy inan cha an narpu ad langit, an hi Ama chi nangchat. Ja chin khun cha anun an narpu ad langit, ja pfu-un hijay nahamad an anun an ichat Apo Jos ay chaꞌju ad ugwani. 33Ti hinuy nahamad an anun an ichat Apo Jos ja hijah nuy hini narpu ad langit ta ichat nay piꞌtakhuwan hay hana tatakhu an mamati ay hija.” 34Ja inali cha hi, “Apo, khun mu akay mah ichat hinuy allom an anun ay chaꞌmi.” 35Ja inalin Hesus hi, “Ha-in hini mipadchung hi anun an mangchat hi piꞌtakhuwan. Ti hini mamati ay ha-in ja achi homenhenaang ja achi ma-ug-ugaw. 36Muti umannung chin inaliꞌ, an anong unaꞌ tinikhaw ay chaꞌju ja agkhujaꞌ pattiyon. 37An amin hana eneꞌchan Ama an mumpfalin hi tatakhuꞌ ja umali cha ay ha-in. Ja hini umali ay ha-in ja akhamichoꞌ an achiꞌ epakak. 38Ti immaliyaꞌ an narpu ad langit ta atoꞌ hini penhod Ama an nannag ay ha-in an pfu-un hini penenhod u. 39Hijah tay chi penhod Ama hi atoꞌ, an pummahuwoꞌ an amin hana inchat na ay ha-in ay tay umali an apogpokhan tay lota ta ma-id oh-ohha hi ma-utaw. 40Ti hitay hini penhod Ama, ta an amin hana tatakhu an nanginnila ja namati ay ha-in, ja miꞌtakhu cha hi ma-id chi pogpogna. Hotti pummahuwoꞌ chicha chin apogpokhan tay lota.”
41Unot chengngor hachi Hudju chin inali na ja ente-a cha an mungngulungur, ti achi cha penhod chin inali na an, “Ha-in hini mipadchung hi anun an narpu ad langit.” 42Ja khun cha allon hi, “Unchah pfu-un hitay hini empfalay Josep an hi Hesus? Anila ta-o cha nuy a-ammod na, ja anagkha ta allona hi un narpu hija ad langit?” 43Ja inalin Hesus ay chicha hi, “Epokhong ju an mungngulungur. 44Ma-id chi hay oha hi mamati ay ha-in an khahin un hi Ama an nannag ay ha-in chi mangehnot ay chicha. Hana ayya mamati ja pummahuwoꞌ chicha chin apogpokhan tay lota. 45Ti gwa han nitulaꞌ an hapit Apo Jos an intulaꞌ hachi profeta hi nangarjana hi, ‘An amin chi tatakhu ja tuchugwan Apo Jos.’#6:45 Isaiah 54:13 Hini munchongor ay ni ituchun Ama ja khenokhotana, ja mamati ay ha-in. 46Ma-id chamchama nannig ay Ama, ti un angkhay ha-in an narpu ay hija chi nannig. 47Umannung hitay alloꞌ, hana mamati ay ha-in ja miꞌtakhu cha hi ma-id chi pogpogna. 48Ja ha-in hini mipadchung hi anun an mangchat hi nahamad an piꞌtakhuwan. 49Chin a-apo ju an nangan chin mana hichin agawwachaan cha hichi let-ang ja nun-a-atoy cha chamchama. 50Muti hitay inaliꞌ an anun an narpu ad langit, ja hini mangan hot achi matoy. 51Ja ha-in hini mipadchung hi anun an narpu ad langit an mangchat hi piꞌtakhuwan. Hini mangan ay tay an anun ja miꞌtakhu hi ma-id chi pogpogna. Ti hitay an anun ja hija hitay achor u an ichat u ta gway aton chi tatakhu an miꞌtakhu.”
52Chengngor hachi Hudju ja ente-a cha khu an nunhohongnger ja inali cha hi, “Ngay aton tay an takhu an mangchat ay chuy achor na ta anun ta-o?” 53Ja inalin Hesus hi, “Umannung hitay alloꞌ. Nu achi aju meꞌ-an ay tay achor u an Na-ilangitan an Takhu, ja miꞌ-inum ay tay chalaꞌ, hot achi aju magwachaan hi nahamad an piꞌtakhuwan. 54Hana ayya meꞌ-an ay tay achor u ja miꞌ-inum ay tay chalaꞌ ja magwachaan cha hi piꞌtakhuwan an ma-id chi pogpogna, ja pummahuwoꞌ chicha chin apogpokhan tay lota. 55Ti hitay achor u ja nahamad an anun, ja hini chalaꞌ ja nahamad an ma-inum. 56Hana meꞌ-an ay tay achor u ja miꞌ-inum ay tay chalaꞌ ja meꞌ-oh-ohha cha ay ha-in. Ja gawwachaaꞌ khu ay chicha. 57Hi Ama an mamattakhu chi nannag ay ha-in, hijaot un gwa ay ha-in hini nahamad an piꞌtakhuwan. Amat khu hina hana mangan ay ha-in, an magwachaan cha hi nahamad an piꞌtakhuwan. 58Ti ha-in hini nahamad an anun an narpu ad langit, an achi amat chin khun anun hachi a-apo ju chin nahop. Ti hay hachi nangan ay chuy an anun, ja nun-a-atoy cha chamchama. Muti hana ayya meꞌ-an ay tay an anun, ja miꞌtakhu cha hi ma-id chi pogpogna.” 59Inalin Hesus hay hato chin nuntudtuchugwana ay ni sinagoga ad Kapernaum.
60Chengngor hachi disipolon Hesus hitay an intuchu na, ja cho-or chay nangali hi, “Mun-achamot kaykhu hay hato khuna ituchu ja ngachah chi mangngor?” 61Inannilan Hesus an khun cha mungngulungur ja inali na hi, “Un ayya angkhay hay hato inaliꞌ ja napukhit hi punnomnoman ju, 62ja ngay nomnomon ju nu tikhanaꞌ an Na-ilangitan an Takhu an mumpfangngad ad langit an narpugwaꞌ? 63Hay alloꞌ ja hini mangchat ay ni nahamad an piꞌtakhuwan ja hini Espiritun Apo Jos an pfu-un hitay lamoh. Ja hana inaliꞌ ay chaꞌju ja narpu ay ni Espiritun Apo Jos, hotti hay hato chamchama chi mangchat hi piꞌtakhuwan. 64Muti gwachay uchumna ay chaꞌju chi achi mamati ay ha-in.” Inalin Hesus hitay ti napfajag an iniꞌ-ila na hana achi mamati ay hija ja hini oha an i mangngina ay hija. 65Ja entoloy Hesus an nangali hi, “Anilaꞌ an gway achi mamati ay chaꞌju. Hijaot un u inali hi ma-id chi hay oha hi mamati ay ha-in an khahin un ekhohkhohan Ama chicha.”
66Chumalat hay hachi nun-ali na ja cho-or hachi ninitnud ay hija an nun-akak. 67Ja inalin Hesus hachi himpolo ta chugwa an adalan hi, “Chaꞌju ngay, un ju chah podhon an me-ekak?” 68Tempfar Simon Peter ja inali na hi, “Apo, ngay uchumna hi i mi unuchon? An un he-a ja angkhay chi mangtuchu ay ni aton an miꞌtakhu hi ma-id chi pogpogna. 69Ja namati ami ay he-a ti inannila mi an he-a hini pinilin Apo Jos an nasantuwan.” 70Ja inalin khu Hesus hi, “Aa, ti ha-in chi namili ay chaꞌju an himpolo ta chugwa an adalan u. Muti anong ja gwa han oha ay chaꞌju an amat ay Satanas hini nomnom na.” 71Hay pitulungan tay an inalin Hesus ja hi Judas an empfalay Simon Iskariot. Ti anong un oha hija hay hachi himpolo ta chugwa an adalan, ja hija chi i mangngina ay Hesus ta patajon cha.
© 2004, Wycliffe Bible Translators, Inc. All rights reserved.