Mateo 1
1
Is Kepuun ni Jesu Kristu
(Mateo 1:1-17; Lucas 3:23-38)
1Iyan heini kes gug̵ud te kepuun ni Jesu Kristu. Kevuwazan si Jesu Kristu ni Hadì David dengan. Ne si David, kevuwazan ni Abraham. 2Ne si Abraham, amey ni Isaak, ne si Isaak, amey sikandin ni Hakub. Ne si Hakub, anak din si Huda wey is menge suled din. 3Ne si Huda, iyan esawa zin si Tamar, ne iyan menge anak dan si Piris wey si Sara. Ne si Piris, amey ni Isrum, ne si Isrum, amey ni Aram, 4ne si Aram, amey ni Eminadab, ne si Eminadab, amey ni Nasun. Ne si Nasun, amey ni Salmun, 5ne si Salmun, iyan esawa zin si Rahab, ne iyan anak dan si Buus. Ne si Buus, ne amey ni Ubid. Ne iyan iney ni Ubid si Rut. Ne si Ubid, amey ni Isai. 6Ne si Isai, ne amey ni Hadì David.
Ne si David, amey ni Sulumun (iyan iney ni Sulumun kes esawa zengan ni Uriya). 7Ne si Sulumun, amey ni Rubuam, ne si Rubuam, amey ni Abyas. Ne si Abyas, amey ni Asa. 8Ne si Asa, amey ni Husepat. Ne si Husepat, amey ni Huram, ne si Huram, amey ni Usyas, 9ne si Usyas, amey ni Hutam. Ne si Hutam, ne amey ni Akas. Ne si Akas, amey ni Isikyas. 10Ne si Isikyas, ne amey ni Menasis. Ne si Menasis, ne amey ni Amun. Ne si Amun, iyan amey ni Husyas; 11ne si Husyas, iyan anak din si Hikunyas wey is menge suled din. Iyan haazà timpu he mid-uwit te menge tigBebilunya is menge tig-Israyil pehendiyà te Bebilunya.
12Ne hein mid-uwit en is menge tig-Israyil ziyà te Bebilunya nevuwad si Hikunyas ne iyan anak din si Selatyil. Ne amey si Selatyil ni Surubebil. 13Ne si Surubebil, amey ni Abyud, ne si Abyud, ne amey ni Iliyakim. Ne si Iliyakim, amey ni Asur. 14Ne si Asur, amey sikandin ni Saduk. Ne si Saduk, amey ni Akim. Ne si Akim, amey ni Ilyud, 15ne si Ilyud, amey ni Iliasar. Ne si Iliasar, amey ni Matan, ne si Matan, iyan amey ni Hakub. 16Ne si Hakub, iyan amey ni Jose he iyan esawa ni Maria. Ne si Maria, iyan iney ni Jesus he migeraran he Misiyas, he ke và dà egkeg̵iya, kes mibpilì te Megbevayà he ibpahadì.
17Sepulù wey heepat he lapis te kevuwazan ebpuun dà te kegkevuwad ni Abraham taman ki David. Ne ebpuun maan te kegkevuwad ni David taman te ked-uwita te menge tig-Israyil pehendiyà te Bebilunya, sepulù wey heepat daan he lapis. Ne puun dutun taman te ked-enaka ki Jesu Kristu, sepulù ded daan wey heepat he lapis.
Is Ked-enaka ki Jesus
(Mateo 1:18-25; Lucas 2:1-7)
18Iyan heini g̵ug̵ud te keag̵i te ked-enaka ki Jesu Kristu. Nekeg̵unan is iney zin si Maria te maama he egngezanan ki Jose. Iyan, te wazè dan pa meked-esawa, netuenan ni Maria he meg̵ingey sikandin pinaag̵i te g̵ehem te Wag̵as he Mulin-ulin. 19Ne si Jose, kenà sikandin edsuwey te kesug̵uan he imbilinbilin ni Moises, ne tenged kayi, kenè din edleusen te ed-esawa si Maria, iyan, kenè din daan egkesuatan he meeled-eled si Maria, umba ed-isipen din he edhusayen dà heini te meeles. 20Ne zutun te kemulu zin pa ed-isipa is iring kayi, mibpeteg̵einep kandin is belinsug̵uen te Nengazen. Ne ke sikandin te, “Sikew Jose, is kevuwazan ni Hadì David, kenè ka melenew he ebpengesawa ki Maria su meg̵ingey sikandin pinaag̵i te g̵ehem te Wag̵as he Mulin-ulin. 21Maama is id-anak din ne ngezani nu ki Jesus, he ke và dà egkeg̵iya, Menluluwas, su iyan sikandin edlibri te menge etew he edsunud kandin wey kenè en sikandan siluti tenged te menge salè dan.”
22Umba nehitavù heini is langun diyà te ki Maria wey si Jose su egketuman is migkag̵i zengan te Nengazen pinaag̵i te ebpeneuven din he migkag̵i te, 23“Ebmeg̵ingey is rag̵a ne id-anak din is maama, ne iyan ngazan te vatà si Imanwil,” he ke và dà egkeg̵iya, nekeamur is Megbevayà kenitew.
24Ne zutun nepukew si Jose. Ne midtuman din haazà is sambag kandin te velinsug̵uen te Nengazen ne mid-esawa zin si Maria. 25Iyan, wazè din si Maria uvayi taman te wazè pa mekeanak. Ne hein in-anak en haazà is batà, migngezanan ni Jose ki Jesus.
© 2001, Wycliffe Bible Translators, Inc., All rights reserved.