Matiu 1
1
Tuvuna atoa Iesu Karisto
(Luk 3:23-38)
1 #
1 Kro 17:11; Aitiutiu 22:18. Lo ateva oia vuku eaauliaa tuvuna atoa Iesu Karisto. Iesu tuvuna ia Deivit. Me Deivit tuvuna ia Abraham.
2Abraham tamane ia Aisiki,
me Aisiki tamane ia Jekop,
me Jekop tamane ia Jiuda me tuena atoa me nengane atoa,
3 #
Aitiutiu 38:29-30; Rutu 4:18-22. me Jiuda tamairarue ia Peres me Sera, kinairarua ta Tamar,
me Peres tamane ia Hesron,
me Hesron tamane ia Ram,
4me Ram tamane ia Aminadab,
me Aminadab tamane ia Nason,
me Nason tamane ia Salmon,
5 #
Rutu 4:13-17. me Salmon tamane ia Boas, kinna ta Reiab,
me Boas tamane ia Obet, kinna ta Rutu,
me Obet tamane ia Jesi,
6 #
2 Sam 12:24. me Jesi tamane ia King Deivit,
me Deivit tamane ia Solomon,
kinna Solomon manna akasina ia Uraea,
7me Solomon tamane ia Rehoboam,
me Rehoboam tamane ia Abia,
me Abia tamane ia Eisa,
8me Eisa tamane ia Jehosapat,
me Jehosapat tamane ia Jehoram,
me Jehoram tamane ia Usaea,
9me Usaea tamane ia Jotam,
me Jotam tamane ia Eihas,
me Eihas tamane ia Hesikaea,
10me Hesikaea tamane ia Manase,
me Manase tamane ia Eimon,
me Eimon tamane ia Josaea,
11 #
2 Ki 22–24; 2 Kro 36:10; Jer 27:20. me Josaea tamane ia Jehoiasin#1:11 Tale inangari nge Grik, Jekonia, mene kateae ararina Jehoiasin. me nengane atoa. Isaa o nau laghe soallotila aIsraeli etoa me laghe siola eBabilon.
12 #
Esra 3:2. Ghe mene tiuaala nau eteva laghe siola eBabilon:
Jehoiasin tamane ia Sealtiel,
me Sealtiel tamane ia Serubabel,
13me Serubabel tamane ia Abiut,
me Abiut tamane ia Eliakim,
me Eliakim tamane ia Eisor,
14me Eisor tamane ia Sadok,
me Sadok tamane ia Akim,
me Akim tamane ia Eliut,
15me Eliut tamane ia Eleasar,
me Eleasar tamane ia Matan,
me Matan tamane ia Jekop,
16me Jekop tamane ia Josep, manna ia Meri, ta ngetana Meri Iesu ghe lutula, la aseasea va Mesaea ia.
17Liuna avalua o me tuvuna atoa Abraham ghe tiuaala me ghe mae sio ta Deivit erooroo kasangaulu ghaata (14) vituu. Me ghe tiuaala ta Deivit me ghe ghaala nau eteva laghe siola eBabilon erooroo kasangaulu ghaata (14) vituu. Me ghe mene tiuaala nau laghe siola eBabilon me ghe ghaala nau ta Mesaea erooroo mene kasangaulu ghaata (14) vituu.
Lutulutuaane Iesu Karisto
(Luk 2:1-7)
18 #
Luk 1:27, 35. Kiukiuna Iesu Karisto nau eteva ghe lutula, isaa avalua toko. Kinna ta Meri, laghe uela va aue eghaa Josep me emanna ia, me karika lalu ghe aso aitauaa me laghe tarala va tale sarasarakaniaane Spirit Manga ateva me Meri ghe kkaaila aliki eteva. 19Josep ghulughuluena ia, ghe nongola va Meri ang ghe suusunuku, ghe tam annala tani ghelei epalata Meri ta mataira taumattu ngatoa, liuna avalua o me ghe nnaala va enim ruu einao inangari etingiu etairarua.
20Nau eteva Josep ghe annangaili llo, arovaeaata ta kapuna ensolo ateva Vau eteva ghe mae sio etana tale niasoasopoi eteae. Me ghe auliaala etana va, “Josep io tuvuna io Deivit, urau mene matautu tani ghaa Meri va evausenimi ia. Unongo, ia o aliki eteva ekakkaaia ta kovana, Spirit Manga ateva ghe taue lao sio etana. 21#Luk 1:31; 2:21.Aliki eteva aue elutu etana, taita ia, me ukolo ararina ateae ta Iesu, poli ia aue easaangi kapuna taumattu ngatoa#1:21 Tale inangari nge Hibru, Iesu malloeana va “Iaue easaangi”. Iaue ararina ateae God tale Pokane ateva Inangari niaippooa ngaitauaa. Utara Eksodis 3:14-22. tale kaluira ssavoto.”
22Isaa akapa llo Vau eteva ghe auliaala ta propete ateva emua arau ang ghele kaurekatila, ghe uela va, 23#Ais 7:14.“Am nongola, kateva vause karika ghe aso tee teva taita aue esunuku me emolena aliki eteva taita ia, me aue la kolo ararina ateae ta Immanuel” — malloeana va “God etokatoka teeita.”
24Nau eteva Josep ghe anguula, ghe gheleila voto kapuna ensolo ateva Vau eteva ghe auliaala etana, me ghe ghaala vause ateva. 25#Luk 2:21.Me karika ghe aso teeiela lomosina ta ghe molenaala aliki eteva, taita ia. Me ghe kolola ararina ateae ta Iesu.
Copyright © 2018, Wycliffe Bible Translators, Inc. All rights reserved.