Mixteco, Xochapa -WBT (Portions NT) Non Drama

Tá ndiꞌi ndi̱yaꞌa tiempo, saa xa̱á xíka Jesús ñuu ya ñúꞌu estado Galilea, ta xïin ka ra kaka ra estado Judea chi nda naꞌnu nuu na judío ta ndúku nda kaꞌni ñaꞌa nda. Ta xa ku̱yati ni koo viko ya ndítava na judío nuu síkuaꞌa na veꞌe vixín ndóo na uvi ndaa kivi. Saa ndi̱kaꞌan nda ñani Jesús xiꞌin ra, káchi nda saa:
―Vaꞌa kee un ñuu yóꞌó, ta kuꞌun un estado Judea ya ná kuni na ndíkun sata un yatuꞌun íkan un. Chi na kúni ya ná kundaa ini inka naꞌa tuꞌun xaꞌa na, ta íkan túvi na chiñu ya xíto naꞌa. Tá kúu yóꞌo̱ xíni un ikan un chiñu yóꞌó, ta vaꞌa kuáꞌan sinaꞌa un mií un nuu ndiꞌi ni kúu naꞌa ―káchi nda xiꞌin ra.
Káꞌan nda ñani ra saa xiꞌin ra, chi köo kándixa ñaꞌa nda. Saa ndi̱kaꞌan Jesús xiꞌin nda, káchi ra saa:
―Täꞌan vi tindaa kivi kuꞌun i, sundi ndóꞌo̱ ta ndá kivi ndikuu ta ya vaꞌa ku ndiꞌi va ya nuu ndo. Chi ndóꞌo̱ ta küvi kundasi nuu na ñuu ivi yóꞌó kuni na ndóꞌo̱, ta yeꞌe kúndasi nuu va na xíni na yeꞌe, chi káꞌan teꞌe i xiꞌin na xaꞌa ya väꞌa íkan na. Kuáꞌan mií ndo viko, küꞌun vi yeꞌe chi täꞌan tindaa kivi kuꞌun i ―káchi ra xiꞌin nda ñani ra.
Tá ndiꞌi ndi̱kaꞌan ra saa ta ndi̱ndoo ra estado Galilea.

Tá ndiꞌi kuaꞌan nda ñani ra, saa ndi̱kiꞌin tu mií va ra kuaꞌan ra viko ikán, ta küaꞌan túvi ra, kuaꞌan sěꞌe va ra. Saa xa̱á nda chiñu nuu na judío ndúku nuu nda Jesús, káchi nda saa:
―¿Mií chí ndíkaa ra ikán? ―káchi nda.
Ta káꞌan ni na xiꞌin taꞌan na xaꞌa Jesús, káchi na saa: “Ra vaꞌa va ku ra”, káchi na. Ta sava na káꞌan: “Süvi ra vaꞌa ku ra, ra síndaꞌvi na ñuu ku ra”, káchi na.
Ta nda iin na köo káꞌan túvi xaꞌa ra nuu inka naꞌa, chi íꞌvi na nuu na chiñu naꞌnu nuu na judío.
Tá xa kuaꞌan táꞌvi sava viko ikán, saa ndi̱xaa Jesús veꞌe ñuꞌu, saa xa̱á ra sínaꞌa ra. Ta iin ndi̱kanda ini nda chiñu nuu na judío xíni soꞌo nda káꞌan ra, saa xa̱á nda káꞌan nda, káchi nda saa:
―¿Ndachu vaꞌa xíni ni ra, ta süvi ra ndi̱sikuaꞌa ku ra? ―káchi nda.
Saa ndi̱kuiin Jesús káꞌan ra:
―Ya sínaꞌa i ta süvi ya xíni mií i kua, ya xíni ra ti̱ꞌvi yeꞌe vaxi i kua sínaꞌa i. Tá ndá ndo chíkaa ini xaa súvi ya kúni Ndioxi, ta vaꞌa kundaa ini ndo xaꞌa ya sínaꞌa i, án ya vaxi nuu Ndioxi kua án ya xáa xiní mií i kua káꞌan i xiꞌin ndo. Iin taa, ra káꞌan xaꞌa ichí kúu mií ra, ta íkan ra saa chinuu vaꞌa ra tuꞌun ra ya ná xaa toꞌo ñaꞌa inka naꞌa. Sundi tá íyo iin ra köo chínuu vaꞌa ra tuꞌun mií ra, ta ndíkundee ra ndúku ra ya ná chinuu vaꞌa naꞌa tuꞌun ra ti̱ꞌvi ñaꞌa, ta saa kúndaa ini yo ra ndaa ku ra, ta köo ya síki íyo ini ra.
’¿Án süvi ya ndaa kua si̱ndoo ra Moisés ley Ndioxi ndaꞌa ndo?, ta nda iin ndo köo xáa súvi ya káꞌan ya. ¿Ndachu kúni ndo kaꞌni ndo yeꞌe? ―káchi Jesús xiꞌin nda.
Saa ndi̱kuiin ndiꞌi na káꞌan na, káchi na saa:
―Tachi nduvaꞌa kúu mií un. ¿Unku na káꞌan kaꞌni yóꞌo̱ ra? ―káchi na xiꞌin ra.
Saa ndi̱kuiin Jesús káꞌan ra xiꞌin na, káchi ra saa:
―Xaꞌa ya i̱kan i iin chiñu vaꞌa ni nuu ndo yakan ndíkanda ni ini ndiꞌi ndo. Saa íkan tu mií va ndo xáa chiñu ndo kivi ndíkundee ndo, chi tá ti̱ndaa una kivi ka̱ku seꞌe taa ndo, ta kuaꞌan ndo xiꞌin ya ndíkunuu tuni Ndioxi ya. Vani kivi ndíkundee ndo kua ta xáa sávi ndo ley ikán. Ta saa ni mií ndo tá ndi̱xinu una kivi ka̱ku seꞌe taa ndo, xaꞌa ya köo kúni ndo yaꞌa ndo nuu ley Ndioxi ya ndi̱kaꞌan ra Moisés xiꞌin ndo, yakan xáa súvi ndo ya. ¿Ta ndachu sáa ni ndo xíni ndo yeꞌe xaꞌa ya si̱ndaꞌa i iin ra taa kivi ndíkundee ndo? Tá xíto ndo ya íkan naꞌa, ta käꞌan ndo xaꞌa ndisaa ya xíto ndo íkan na. Saa chi xiꞌna xíniñuꞌu ndo kundaa vaꞌa ini ndo xaꞌa ya íkan na, ta saa kuchiñu ndo kaꞌan ndo ya ndaa xaꞌa ya íkan na ―káchi Jesús xiꞌin na.

Ta sava na ñuu Jerusalén xa̱á na káꞌan na, káchi na saa:
―¿Án süvi ra yóꞌó ku ra ndúku na chiñu ya kaꞌni ñaꞌa na? Ta ndachu vaꞌa káꞌan ra nuu ndiꞌi yo, ta ni köo na káꞌan xiꞌin ra. ¿Án sana xa ku̱ndaa va ini na chiñu, ra yóꞌó ku Cristo? Ni yoo ta xíni yo míí ke̱e ra. Sundi tá ná kixi ra kúu Cristo, ta nda iin naꞌa köo xíni míí chí kixi ra ―káchi na.
Ta saa ndíkaa Jesús keꞌe veꞌe ñuꞌu sínaꞌa ra, ñaa nda̱niꞌi ra tachi ra ta ndee ni ndi̱kaꞌan ra, káchi ra saa:
―¡Ya ndaa kua xíni ndo yeꞌe ta xíni tu ndo nuu ke̱e va i! Sundi süvi xaꞌa ya kúni mií i kua vaxi i, chi íyo iin ra ti̱ꞌvi yeꞌe vaxi i, ta ra ikán ta ndaa ni ini ra, ta ndóꞌo̱ köo xíni ndo ra. Ta mií i ta xíni vaꞌa i ra, chi nuu ra ikán ke̱e i vaxi i. Mií ra ti̱ꞌvi yeꞌe vaxi i ―káchi ra xiꞌin na.
Ta saa ku̱ni na tiin na ra chikaa na veꞌe kàà, sundi nda iin na köo ndi̱tiin ñaꞌa chi täꞌan tindaa kivi ya chi̱tuni Ndioxi. Ta kuaꞌa ni na ka̱ndixa ñaꞌa, saa káꞌan na, káchi na saa:
―Ya ndixa kua kúu ra yóꞌó ra Cristo, chi kuaꞌa ni ya vaꞌa, yatuꞌun chee ni íkan ra. Tá ná kixi inka ra ta ¿án ikan ra tá kuꞌva íkan ra yóꞌó? ―káchi na xaꞌa Jesús.

Saa xi̱ni soꞌo nda fariseo ya vaꞌa ni káꞌan naꞌa xaꞌa Jesús, ta iin ndi̱kitaꞌan yuꞌu nda xiꞌin sutu nda naꞌnu nuu na veꞌe ñuꞌu, ta sutu ikán ti̱ꞌvi nda naꞌa, na ndáa veꞌe ñuꞌu ya kuaꞌan na tiin na Jesús. Saa ndi̱kaꞌan Jesús xiꞌin na, káchi ra saa:
―Siloꞌo ni va tiempo íyo i xiꞌin ndo, ta saa ndiko koo i kuꞌun i nuu ra ti̱ꞌvi yeꞌe vaxi i. Ta saa ndinduku ndo yeꞌe, ta küchiñu ndo niꞌi ndo yeꞌe, chi nuu kuꞌun i ta ndóꞌo̱ küchiñu ndo kuꞌun ndo ―káchi ra xiꞌin na.
Saa xa̱á nda judío ndákan tuꞌun taꞌan mií nda, káchi nda saa:
―¿Míí chí kuꞌun ra yakan káꞌan ra, küchiñu yo niꞌi ñaꞌa yo? ¿Án sana kuꞌun ra ñuu na griego nuu ndóo sava na taꞌan yo, ta kuꞌun ra sinaꞌa ra na griego ikán? Ta unkua kúni kaꞌan ya ndi̱kaꞌan ra: “Nduku ndo yeꞌe ta nïꞌi ndo yeꞌe, ta nuu kuꞌun i ta küchiñu ndo kuꞌun ndo”, káchi ra ―káchi nda.

Tá ti̱ndaa kivi chee ni ya ndiꞌi viko ikán, ta saa ndi̱kundichi Jesús ta nda̱niꞌi ra tachi ra ta ndee ni ndi̱kaꞌan ra, káchi ra saa:
―Tá ndá ndóꞌo̱ íchi ini, ta vaꞌa kixi ndo nuu i ta taxi i tikuii koꞌo ndo. Na kándixa yeꞌe, tá káa nuu kána tikuii xínu rá kuaꞌan rá, saa koo rá ini na, tá kuꞌva káꞌan tuꞌun Ndioxi ―káchi Jesús xiꞌin na.
Ndi̱kaꞌan Jesús saa xiꞌin na chi na kándixa ñaꞌa ta ndikiꞌin na Tachi I̱í Ndioxi koo ya xiꞌin na. Täꞌan kixi ya koo ya xiꞌin na, chi täꞌan ndiko koo ra kuꞌun ra nuu ndivi.

Saa tá xi̱ni soꞌo na tuꞌun ikán ta ndi̱kaꞌan sava na, káchi na saa:
―Ya ndaa, ndixa ra profeta ra káꞌan ndoso tuꞌun yuꞌu Ndioxi ku ra yóꞌó ―káchi na.
Ta sava na káꞌan:
―Cristo ra ti̱ꞌvi Ndioxi vaxi ku ra ―káchi na.
Ta sava tuku na káꞌan:
―Süvi Cristo ku ra, köo xíni yo kixi iin ra chee, ra kúu Cristo chí estado Galilea. Chi tuꞌun Ndioxi ya ta̱a na xinaꞌa káchi ya saa: Ra kúu Cristo ta kaku ra tixin seꞌe sikua ta rey David, ta ñuu Belén nuu ndi̱xiyo ra rey David kee ra, káchi tuꞌun Ndioxi ―káchi na.
Saa ta iin ndi̱taꞌvi taꞌan na, xaꞌa Jesús. Ku̱ni sava na tiin na ra, ta nda iin na köo ndi̱tiin ñaꞌa.

Saa ndi̱ko koo na ndáa veꞌe ñuꞌu kuaꞌan na nuu nda fariseo xiꞌin nda naꞌnu nuu sutu, saa ndi̱kaꞌan na ikán xiꞌin nda káchi na saa:
―¿Ndachu köo ndi̱tiin ndo ra kixi xiꞌin ndo? ―káchi nda.
Saa ndi̱kuiin na ikán káꞌan na, káchi na saa:
―Nda iin naꞌa köo káꞌan tá kuꞌva káꞌan ra ikán ―káchi na.
Saa ndi̱kuiin nda fariseo káꞌan nda:
―¿Án ku̱chiñu ra si̱ndaꞌvi tu ra ndóꞌo̱ va? Ta nda iin nda chiñu naꞌnu nuu yo, ni ndeꞌe fariseo ta köo kándixa nde ra. Sundi na köo xíni ley Ndioxi, ta na ndi̱tavi chiꞌña ku na ―káchi nda xiꞌin na ikán.
Saa ndi̱kaꞌan iin ra taꞌan nda, ra náni Nicodemo, ra ndi̱xaꞌan nuu Jesús iin ñǔu, káchi ra saa:
―¿Án káꞌan ley Ndioxi ya íyo ndaꞌa yo, ya taxi yo kuachi xaꞌa iin taa tá täꞌan kuni soꞌo yo ya káꞌan ra, ta ni täꞌan kaꞌan ra ndikuiin ra xaꞌa ya íkan ra? ―káchi ra xiꞌin nda.
Saa ndi̱kuiin nda káꞌan nda:
―¿Án taꞌan ra ikán ku tu yóꞌo̱ va? Xíniñuꞌu un kaꞌvi vaꞌa un tuꞌun Ndioxi saa kua kundaa ini un, chi nda iin na káꞌan ndoso tuꞌun yuꞌu Ndioxi, ta köo na kée nda iin ñuu ya ñúꞌu estado Galilea ―káchi nda xiꞌin ra.
Saa ndi̱kiꞌin iin iin nda kuanuꞌu nda veꞌe nda.

聆听 San Juan 7