Yakkha 2023 WBT/NEBS  (NT) Drama

नामलेन भेनिक कुचिक्‍कुचिक लेक्‍सानिङ् ङ्‌खा मामुचि उङ्‌चिङा त्‍यार न्‍जोगुहा खुम्‍दु नाम्‍खुबा किवा ङ्‌खेतुहोङ् सियापाङ्‌बे ङ्‌ख्‍या॥ न्‍नाबे न्‍दासुनिङ् सियापाङ्‌गा उया एप्‍ताना लुङ्‌खाक योरोक लाइयामासाना न्‍निसु॥ ङ्‌खाॽनिङ्‌गो उङ्‌चि सियापाङ्‌बे ङ्‌ङुयानिङ् हाङ्‌बा येसुगा लास न्‍नाबे न्‍दुप्‍सुनिन॥ न्‍हाङा आच्‍चाम्‍मा एसाङ् ङ्‌येबामासानिङ् थाप्‍थुम्‍बे मिक लेङ्‌चाखुबा फुहा तेक वाखुबा हिप्‍पाङ् याॽमिचि उङ्‌चि युम्‍बे येबाराचि॥
मामुचि किसिॽमाङा योङ्‌साङ् फोप म्‍फोप्‍ता, ङ्‌खा हिप्‍पाङ् याॽमिङा ङ्‌खाचि लुयाचुचि, “न्‍निङ्‌दा हिङ्‌गिलिक लेक्‍साब्‍याना इजाङ् स्‍याहाचिगा उलुम्‍बे योग्‍वाम्‍गाना? उङ् नाबे मान्‍ना! ङ्‌खाॽनिङ्‌गो उङ् स्‍यानाभाङ् हिङ्‌गिलिक लेक्‍साब्‍यामाना॥ गालिलबे वायानिङ् उङा न्‍निङ्‌दा इ लुइमिसिघा ङ्‌खा चेॽया मितानुम, ‘याॽमिगा उच्‍या पापि याॽमिचिगा मुकपे आमे, ङ्‌खाचिङा उङ् कुरुसपे न्‍छुसिॽवा न्‍हाङ् सुम्‍ना लेनबे फेरि स्‍याङ्‌नाभाङ् हिङ्‌गिलिक लेङ्‌मेॽना’ ङ्‌खा चेॽया मुन्‍दिम्‍घा?” ङ्‌खिङ्‌बेला ङ्‌खाचिङा येसुङा लुचिहा चेॽया म्‍मितु॥
मामुचि सियापाङ्‌भाङ् न्‍लासाहोङ् उङ्‌चिङा न्‍निसुहा घाक चेॽया एए चेलाचि नुङ् हेकोहा घाक याॽमिचि ङ्‌खेम्‍मेतुचि॥ ङ्‌खा मामुचि मारियाम माग्‍दालिनि, योआन्‍ना नुङ् याकुबका उमा मारियाम न्‍साया॥ उङ्‌चिनुङ् ङ्‌वायाहा हेकोहा मामुचिङा चा ङ्‌खा चेॽया सेगुम्‍पाकचि ङ्‌खेम्‍मेतुक्‍साचि॥ ङ्‌खाॽनिङ्‌गो “न्‍निङ्‌दा ओनेक काइवाघा, खा चेॽया जेप्‍पा मेन्‍हा” कासाङ् उङ्‌चिङा पात्‍ते न्‍जोगुनिन॥ ङ्‌खाॽनिङ्‌गो पात्‍तुरुस च्‍हेन मुथिङ्‌रिक पोगाहोङ् सियापाङ्‌बे लुक्‍ताख्‍या, न्‍हाङ् उकुरिक उगाहोङ् सियापाङ्‌बे सोनिङ् तेक से निसु, खा निसुहोङ् आच्‍चाम्‍मा एसाङ् पाङ्‌पोटि लासा॥


न्‍ना लेन येसुगा हिप्‍पाङ् चेलाचि यारुसालेम साहारभाङ् इम्‍माउस बाङ्‌ना तेन पोटि खेॽमास्‍याचि॥ न्‍ना यारुसालेमभाङ् एए किलोमिटारहिङ् माङ्‌दु साया॥ उङ्‌चि यारुसालेमबे इ लेक्‍साहा ङ्‌खा घाक चेॽयागा उतुम्‍बे साला लेन्‍मास्‍याचि॥ ङ्‌खाचि ङ्‌खाॽला साला लेन्‍साङ् लाम्‍मास्‍याचिनिङ् येसु तायाहोङ् ङ्‌खाचिनुङ् लाम्‍मा तारोक्‍तु॥ ङ्‌खाॽनिङ्‌गो ङ्‌खाचिङा उङ् चिनान्‍जोगान्‍चुन॥
येसुङा ङ्‌खाचि छिम्‍दुचि, “न्‍जिङ्‌दा इगा उतुम्‍बे साला लेन्‍साङ् लाम्‍मा सिम्‍मेचिघा?”
न्‍हाङ् ङ्‌खाचि न्‍नाबे येबाचि॥ उङ्‌चिगा नाचिक कुइम ङ्ओतामासा॥ ङ्‌खा हिप्‍पाङ्‌बे क्‍लेओपास बाङ्‌नाङा येसु छिम्‍दु, “यारुसालेम कोतुरागाहोङ् चा न्‍नाबे इ लेक्‍साहाभोङ् न्‍दा था मान्‍नायि?”
येसुङा ङ्‌खाचि खाॽला लुचि, “इमिन्‍हा चेॽया?”
ङ्‌खाचिङा लुयाचु, “नासारातपेॽना येसुगा उतुम्‍बे, उङ् एको निङ्‌वाफुमाभाङ् चेक्‍खुबा साया॥ उङ् निङ्‌वाफुमा नुङ् याॽमिचिगा उयुम्‍बे आच्‍चाम्‍माहा काम चोक्‍खुबा नुङ् साक्‍तिसालि चेॽया चिन्‍खुबा साया॥ ङ्‌खाॽनिङ्‌गो खाङ्‌खाङ् हाङ्‌खुबाचि नुङ् एङ्‌गा हाङ्‌गुम्‍बाचिङा उङ् दान्‍डा म्‍बिहोङ् न्‍सिसुनिभोङ् रोमि तायेन्‍राङ्‌बागा उमुकपे म्‍बिहाक्‍सु, न्‍हाङा कुरुसपे न्‍छुसि॥ कानिङ् गो उङामाङ् इजिरेलिचि मुक्‍ति पिवाचिहाभोङ् लाम्‍बु सोक्‍साम्‍ङा॥ ङ्‌खाॽनिङ्‌गो उङ् कुरुसपे न्‍छुएन्‍दुना चा हेन सुम लेन लेक्‍साब्‍या॥ फेरि आनिङ्‌गा एकोहिप्‍पाङ् नानुन्‍छाचिङा लुयाहा चेॽया खेप्‍सुम्‍ङाहोङ् आच्‍चाम्‍मा एतिमिङ्‌हा॥ ङ्‌खाचि हेन भेनिक सियापाङ्‌बे ङ्‌ख्‍या, ङ्‌खाॽनिङ्‌गो ङ्‌खाचिङा न्‍नाबे येसुगा लास न्‍दुप्‍सुनिन॥ न्‍हाङा ङ्‌खाचि न्‍दायाहोङ् लुया, ‘कानिङ् वालोक्‍दुतचि निसुम्‍चिम्‍ङाहा, उङ्‌चिङा येसु हिङ्‌गिलिक्‍नाभोङ् लुयाहा॥’ न्‍हाङा आन्‍चिङ्‌गा एकोहिप्‍पाङ् काम्‍निभाकचि चा सियापाङ्‌बे सोसे ङ्‌ख्‍या, उङ्‌चिङा चा ङ्‌खा मामुचिङा ङ्‌गायाहा लोॽवा न्‍निसु, ङ्‌खाॽनिङ्‌गो येसु च्‍हेन न्‍निसुनिन॥”
न्‍हाङा येसुङा लुचि, “न्‍निङ्‌दा गो इमिन्‍हा याॽमिसिगान॥ निङ्‌वाफुमाभाङ् चेक्‍खुबाचिङा ङ्‌गायाहा चेॽया बिस्‍वास चोक्‍मा चा खिङ् छाक्‍नुङ् आइमिघा! इना निङ्‌वाफुमाङा पाक्‍सुना खिरिस्‍टङा आदार नुङ् माहिमा तोक्‍मा हाक्‍निङ् ओन्‍दाङ् खा घाक तुखि आङ्‌मा पोर्ने न्‍सायान्‍हायि?” न्‍हाङा येसुङा ङ्‌खाचि मोसा नुङ् निङ्‌वाफुमाभाङ् चेक्‍खुबाचि घाकङा उका उतुम्‍बे धार्मासाप्‍लाबे न्‍छेप्‍तुहा चेॽयागा तुम्‍बिला योक्‍मेतुचि॥
उङ्‌चि खेॽमा मिताचिना इम्‍माउस तेनगा उयुम्‍बे न्‍दायाब्‍यानिङ् येसु च्‍हेन ङ्‌खाचि हाक्‍निङ् मियोरोक सोम्‍मा खेॽमागा चोगा॥ ङ्‌खाॽनिङ्‌गो ङ्‌खा हिप्‍पाङ् चेलाचिङा उङ् खाॽला लुयाचु, “नाम आहेक्‍सा, हेन न्‍दा कान्‍चिङ्‌नुङ् वाया॥” न्‍हाङा उङ् ङ्‌खाचिनुङ् वासे ख्‍या॥ येसु ङ्‌खाचिनुङ् चासे युङानिङ् चालेप्‍पा उमुकपे याङुहोङ् निङ्‌वाफुमा नुनिङ्‌वा पि, न्‍हाङ् चालेप्‍पा एगुहोङ् ङ्‌खाचि पिचि॥ ङ्‌खिङ्‌बेलाले ङ्‌खाचिगा मिक ङ्‌होसा, न्‍हाङ् येसु चिनाचोगाचु॥ ङ्‌खाॽनिङ्‌गो ङ्‌खिङ्‌बेलामाङ् येसु उङ्‌चिगा युम्‍भाङ् मासाब्‍या॥ ङ्‌खा हिप्‍पाङ् उङ्‌चि-उङ्‌चि खाॽला कायाचि, “उङ् कान्‍चिङ्‌नुङ् लाम्‍बुबे लाम्‍साङ् धार्मासाप्‍लागा तुम्‍बिला लुयानिङ् एन्‍चिङ् लुङ्‌मा इब्‍बे-इब्‍बे न्‍जोन्‍दास्‍यामासान्‍नायि?”
न्‍हाङा ङ्‌खाचि ङ्‌खिङ्‌बेलामाङ् पोगाचिहोङ् यारुसालेम पोटि लासाचि॥ न्‍नाबे तासाचुनिङ् ङ्‌खाचिङा एए चेलाचि नुङ् हेकोहा याॽमिचि न्‍छुप्‍साहा तुप्‍साचुचि॥ न्‍हाङ् ङ्‌खाचिङा ङ्‌खा हिप्‍पाङ् खाॽला न्‍लुचि, “जेप्‍पा हाङ्‌बा स्‍यानाभाङ् हिङ्‌गिलिक लेक्‍सामाना, सिमोन पात्‍तुरुसङा चा उका उमिकङा निसुक्‍सुना!” न्‍हाङा ङ्‌खा हिप्‍पाङ् चेलाचिङा चा लाम्‍बुबे लेक्‍साहा चेॽया नुङ् येसुङा चालेप्‍पा एगुहोङ् पिचिनिङ् इमिन चिनाचोगाचुना ङ्‌खा घाक चेॽया योक्‍मेताचुचि॥


खा चेॽया न्‍जेक्‍मास्‍यानुङ् येसु थाप्‍थुम्‍बे ङ्‌खाचिगा उलुम्‍बे येबारायाहोङ् खाॽला लुचि, “न्‍निङ्‌दा हाङ्‌हाङ् लेक्‍सिगानि॥” ङ्‌खाॽनिङ्‌गो ङ्‌खाचि इसिॽना मुइ निसुम्‍ङाना म्‍मिताहोङ् किसिॽमाङा आत्‍ते न्‍जोगा॥
येसुङा ङ्‌खाचि लुचि, “न्‍निङ्‌दा इजाङ् किसितिॽवाघा? न्‍हाङ् इजाङ् न्‍निङ्‌गा निङ्‌वाबे साङ्‌का चोङ्‌मेकाहा? आलाङ् आमुकचि सोयानुम्‍चिम, न्‍हाङ् न्‍निङ्‌दा उचुन चिनाचोङ्‌मेकाहा॥ न्‍निङ्‌मुक्‍ङा तोक्‍तिॽयास्‍या, का येसुमाङ् ओम्‍ङान इजाङ्‌बाङ्‌निङ् इसिॽना मुइगा गो सा नुङ् ओसेङ्‌ख्‍वाक म्‍मामेन, न्‍निङ्‌दा निमासिइवागा आका गो वान्‍ने॥” खाॽला लुचिहोङ् उलाङ्-उमुक सोॽमेतुचि॥
ङ्‌खाचि इब्‍बे-इब्‍बे न्‍जोन्‍दास्‍या न्‍हाङ् आच्‍चाम्‍मा ङ्‌ङेता॥ न्‍हाङामाङ् खा चेॽया जेप्‍पा ओम्‍येम मेन्‍हायेमभोङ् बिस्‍वास चोक्‍मामाङ् ङ्‌यासुनिन॥ ङ्‌खिङ्‌बेला येसुङा ङ्‌खाचि खाॽला लुचि, “न्‍निङ्‌दानुङ् चाम्‍योङ्‌बा वेॽहा?” ङ्‌खाचिङा एको नियाना नासा येसु म्‍बि॥ न्‍हाङा न्‍ना नासा ताप्‍तुहोङ् ङ्‌खाचिगा युम्‍बे चो॥ न्‍हाङ् खाॽला लुचि, “का न्‍निङ्‌दानुङ् वायाङ्‌निङ् आका उतुम्‍बे मोसाङा छेप्‍तुना ब्‍यावास्‍थागा छेप्‍ताप, निङ्‌वाफुमाभाङ् चेक्‍खुबाचिङा न्‍छेप्‍तुचिहा छेप्‍तापचि नुङ् छेमगा छेप्‍तापपे छेप्‍ताहा घाक चेॽया इमिन्‍होङ्‌चा पुरा लेङ्‌मेहाभोङ् का न्‍निङ्‌दा लुॽनेन्‍सानिन्‍हा॥”
न्‍हाङा उङा ङ्‌खाचि धार्मासाप्‍लाबे छेप्‍ताहा चेॽया ङ्‌ङासुनिभोङ् उङ्‌चिगा निङ्‌वा होसुबिचि॥ न्‍हाङ् खाॽला लुचि, “धार्मासाप्‍लाबे खाॽला छेप्‍तामा, निङ्‌वाफुमाङा पाक्‍सुना खिरिस्‍टङा तुखि आङ्‌द्‌वाहोङ् सुम्‍ना लेनबे फेरि स्‍यानाभाङ् हिङ्‌गिलिक लेङ्‌मे॥ न्‍हाङा यारुसालेमभाङ् तारोक्‍माहोङ् घाक जातिगा याॽमिचि उका उनिङ्‌बे पास्‍चाताप नुङ् पाप छेमागा पार्चार चोक्‍माहाचि॥ न्‍निङ्‌दा निसुम्‍घा खा घाक चेॽया न्‍निङ्‌दामाङ् हेकोहा घाक जातिगा याॽमिचि चा खेम्‍मेतानुम्‍चिम॥ हाकु सोयानुम, आप्‍पाङा युक्‍सुना बाचा का न्‍निङ्‌दाबे पाक्‍स्‍वाङ्, ङ्‌खाॽनिङ्‌गो न्‍निङ्‌दा निङ्‌वाफुमाभाङ् साक्‍ति मेन्‍दोक्‍ले सोम्‍मा ना साहारबेॽमाङ् वायामासानि॥”


न्‍हाङा येसुङा चेलाचि साहारभाङ् बेथानिया तेन पोटि खेतुचि, न्‍नाबे न्‍दासुहोङ् उमुक थेन्‍दुहोङ् ङ्‌खाचि आसिक पिचि॥ ङ्‌खाचि आसिक पिॽमास्‍यानिङ् उङ् ङ्‌खाचिभाङ् फोक्‍साहोङ् तो वालोकपोटि चान्‍दाख्‍या॥ न्‍हाङा ङ्‌खाचिङा उका आराधाना न्‍जोगु, न्‍हाङ् इब्‍बे-इब्‍बे चोन्‍सिसाङ् यारुसालेम साहारपोटि न्‍लासा॥ न्‍हाङा ङ्‌खाचि साधाइ निङ्‌वाफुमापाङ्‌बे निङ्‌वाफुमागा पार्साम्‍सा चोक्‍साङ् वामा न्‍दारोक्‍तु॥

聆听 लुका 24