If you would like a copy of this version please contact info@davaraudiobibles.org

Sagalla New Testament © Bible Society of Kenya. Sagalla New Testament Audio Bible ℗ 2022, Davar Partners International.

Sagalla New Testament

Kwa Theofilo:
Kwa kukala wandu wengi wawandika ighulu ya malagho ghadeike ghati yetu, selyi tighorerero ni walye ekezanye nawo kufuma kudyowa, wekemwona kwa meso na waeresi wa uvoro ugho. Kwa hung'u neonile ni kirani namose, kwa kukala namanya kirani malagho agha ghose selyi gheluo, nikuwandikile karakara uwe, mundu wa Ishima, eri umanye fulo ya malagho agha ufundiso.

Nao ngelo ilya Herode eluo Mzuri wa Judea, koluo na mkohani mumoju aitogho Zakaria, wa kigojo cha wakohani cha Abia, naye woluo na mkwake wa mbari ya Aroni, aitogho Elizabeti. Nawo wose weluo wandu wa hachi hambiri ya Mlungu, wekeghenda kuirimana na milomu na malaghizo gha Bwana sikweo na makosa. Ela siwevele mwana ungi kwa kukala Elizabeti woluo koloi, na wose weluo waghosi.
Nao ilyi Zakaria eluo kemtumikila Mlungu kwa kazi yake ya ukohani kele izughe lyake, kuirimira ada za ukohani, kura ikamugwila yengila kele Hekalu ya Mlungu kufusila ubani. Na makoghano gha wandu weluo shighati wekelomba ngelo yefusila. Nao alyenyi malaika wa Bwana kamfumila, kakala kimusi gasi ya kijo ya mazabahu yefusila. Naye Zakaria aghenda amwona kakirimua na kangilo ni wogha. Ela malaika kamuza, “Zakaria, swangilo ni wogha, kwani malombi ghako ghasikilo, na mkwako Elizabeti ukuvalilagha mwana wa kiwalume, na izina lyake ujemwita Johana. Nawe ujeboelo na ndighi, na wazima wengi wejeboelo kwa kuvalo kwake. Kwani ujekala mubwaa hambiri ya Bwana, na sejenwa divei ango kindu chingi chenarusa, naye ujejulo ni Roho wa Kuela kufuma ngelo ewo kele kifu cha mee. Naye ujewaghalula wengi wa wana wa Israeli kwa Bwana Mlungu wawe. Naye umukayailagha Bwana keghenda kwa ndighi za roho na udimo sa ghwa tondolo Elija, ughalulagha ngolo za wana aba kwa wana wawe, na visikiriwi kuuya kele ngila ya wandu wa hachi, na kuwaika kirani wandu kwa undu ghwa Bwana.”
Nao Zakaria kamuza malaika, “Nighamanyagha ije agha? Kwani imi nimi mghosi na mkwangu ni mkekulu.” Nao malaika kamtumbulila, “Imi nimi Gabrieli, nikalagha hambiri ya Mlungu, na nendetumo nikuletele na kukughorera ughu uvoro ghwaloli. Na lola ujekala bubu sodimagha kughora hata ijua lyilya agha malagho ghejekatila, kwa kukala sudumusile malagho ghangu ghekuja kukatiso kwa ngelo yake.”
Nao wandu weluo wekemdafurira Zakaria shighati wakashinika kwa kumuka luma kwake kele Hekalu. Naye aghenda afuma, seluo kedima kughoranya nawo, kwa hung'u wakamanya kamba waona iono Hekaluni, naye kawakumbila mikonu kwa kukala wakala bubu. Nao ngelo yake yetumika ighenda idua kagala kaya kwake. Nyuma ya majua agha mkwake Elizabeti kangiza kifu, naye kakuvisa kwa mezi misanu, keghamba, “Ndamu Bwana wanidea kirani andu anifunyila waya ghwangu wanduni.”

Nao mwezi ghwa katandatu, malaika Gabrieli katumo ni Mlungu kele muzi ghwa Galilaya ghuitogho Nazareti, kwa mchana mumoju eluo keuso ni Josefu, mundu wa mbari ya Daudi; na izina lyake ulya mchana woluo keito Mariamu. Nao malaika kamjila kamuroghowa, “Sere ikale kwako, Bwana uwo ngila mojori na uwe na wakubarikia na ndighi.” Naye Mariamu kakirimusho na ndighi ni ghore zilya, na karirikanya ngoloni kwake ghore zilya kutambula kwake nini? Nao malaika kamuza, “Swangilo ni wogha Mariamu, kwani Mlungu waboelo ni uwe. Lola ujengiza kifu na ujevala mwana wa kiwalume na izina lyake ujemwita Jesu. Naye ujekala mubwaa, na ujeito Mwana wa Mlungu wa Ighulu; na Bwana Mlungu ujemuhawa kifumbi cha uzuri ghwa akee Daudi, naye ujetawala nyumba ya Jakobo kwa kale na kale, na uzuri ghwake sighujedua lyingi.”
Nao Mariamu kamuza malaika, “Agha ghekalagha ije nemi siweni mlume?” Malaika kamuza, “Roho wa Kuela ukuselelagha, na ndighi za Mlungu zijekukalila kiju. Kwa hung'u mwana evalogho ujekala mwana wa kuela na Mwana wa Mlungu. Na lola mbari yako Elizabeti uwo na kifu, uhao mwana wa walume kele ngelo yake ya ukekulu, na ughu ni mwezi ghwake ghwa katandatu kwa iye eluo keito koloi. Kwani kwa Mlungu sikwesi kindu chingi sichedimikagha.” Nao Mariamu kaghora, “Imi nimi mtumishi wa Bwana; sighakale kwangu selyi waghora.” Nao aho malaika kamusigha.

Nao majua ghalye Mariamu kauka kwa shoshoa kaghenda kele isanga lya mighondi kele muzi ghwa Juda. Kaghenda kangila kele nyumba ya Zakaria, kamuroghowa Elizabeti. Naye Elizabeti aghenda asikila kuroghowa kwa Mariamu, kamwana keluo kifu kakachumba. Elizabeti kajulo ni Roho wa Kuela, kakirimuwa kaghora na lwaka lubwaa, “Wabarikio uwe kele wake, na uvalo ghwa kifu chako ghwabarikio. Na agha ghanijila ije, kamba mee Bwana wangu anijile? Kwani nighenda nisikila lwaka lwa kuroghowa kwako, kamwana keo kele kifu changu kakachumba kwa kuboelo. Naye wabarikio uyu adumuse kamba agha ghaghoriro ni Bwana ghejekatila.”

Nao Mariamu kaghora,
“Ngolo yangu yamkasa Bwana,
na roho yangu yaboelo ni Mlungu Mkizi wangu.
Kwani waghulola umbole ghwa mtumishi wake.
Kwani kufuma indakwenyi vivali vose vejeniita mubarikio.
Kwani uyu ewo na ndighi wanideila malagho mabwaa,
na izina lyake ni lya kuela.
Na mbazi yake ni kwa walye wose wamuhawagha ishima
kufuma kivali hata kivali.
Naye waghorora mkonu ghwa ndighi
na kuwasaghisa awa wakukasile ngoloni kwawe.
Wawajisa weo na ndighi kele vifumbi vawe va uzuri
na kuwajosa walye weo wa isi.
Wawaghutisa weo wanjale na vindu valoli
na wazuri wawagalisa mikonu mituu.
Wamwarura mtumishi wake Israeli
kwa kukumbuka ilagano adeile na wana ake.
Na saluwale kuonyeza mbazi kwa Abrahamu
na uvalo ghwake kwa kale na kale.”
Nao Mariamu kakalanya na Elizabeti kwa miezi mitatu, nao ima kawuya kaya kwake.

Nao ngelo ifika ya Elizabeti kukufungula, kavala mwana wa kiwalume. Nao wambawe na kichuku chake waghenda wasikila uvoro ghwa selyi Bwana amudeila mbazi wakaboelo ngila mojori naye. Nao ijua lya nane wekeja kumuchwa mwana. Nawo weshaile kumwita Zakaria izina lya tatie. Ela mee kaghora, “Hata, izina lyake ni Johana.” Nawo wakamuza “Sikwesi mundungi wa kichuku chako aitogho hung'o.” Nao wakamkotela tatie kwa kumukonyerea selyi eitogho. Naye Zakaria kalomba kibao chewandika na kawandika, “Izina lyake ni Johana.” Nao wose wakashinika. Nao iyo ngelo yenyi Zakaria katambula mlomu, lumi lwake lukafunguka, kadyowa kughora kemkasa Mlungu. Nao wose weluo avui nawo wakangilo ni wogha, na uvoro ghwa malagho agha ghukaera kele isanga lyose lya mghondi ghwa Judea. Na wose wasikile wakaghaika ngoloni kwawe, wekeghamba, “Uyu mwana ukalagha ije? Kwani mkonu ghwa Bwana ghuo ighulu yake.”

Nao Zakaria tatie mwana, kajulo ni Roho wa Kuela, katondola, keghamba,
“Akaso Bwana Mlungu wa Israeli,
kwani wawajila kuwawarura na kuwakombola wandu wake.
Naye watipatila Mkizi ewo na ndighi yetisimila,
kufuma kele kivali cha mtumishi wake Daudi.
Selyi aghorire kwa wana tondolo wake wa Kuela wa kale.
Kamba tikizogho na wamaiza wetu,
na kufuma kwa awo wose watimenyagha.
Kuwafwila waya wana ake selyi alagile
na kukumbuka ilagano lyake lya Kuela.
Ighemi aghemile na ake Abrahamu.
Kutihawa, kamba isi tikizo kele mikonu
ya wamaiza wetu, timutumikile sikowesi wogha.
Kele ueli na uhachi hambiri yake majua ghose gha
kukala moyo kwetu.
Na uwe mwanwangu, ujeito tondolo wa Mlungu wa Ighulu
kwani ujemkayayila Bwana kuboesa ngila zake.
Kuwaghorera wandu kamba wejekizo,
kwa kufwilo waya kaung'a zawe.
Kwani kwa umbole ghwa mbazi ya Mlungu wetu,
utiletelagha mlangazi ghwa ukizi kufuma mlunguni.
Kuwalangazila walye wekalagha kizeni na kele kirenderende cha kifwa,
na kulongoza maghulu ghetu kele ngila ya sere.”
Nao mwana kazegua, kapata ndighi rohoni, naye woluo kekala kireti hata ijua aonekane kwa wandu wa Israeli.

聆听 Luka 1