पेज्याइ ङोःसी
दीखो पेज्या मत्ती लाःकेन मीःइ प्रुःक्योक याःबु लेःङ्‍गो इःङे। दीखो पेज्याइ तोःङमीःजीकरा ताःम्ज्या पेःक्योक थार्च्युगेन्दी येशुरा इःङे लाःती लाःकुए। ताःङ्बुइ तीःनामला कोन्ज्योइ राःङगीइ मीःक्या यहुदीक्याला मेःन्दा चीग थार्च्युगेन्दी ताङ्तेर्के लाःती ताःम्ज्या पेःदी एःके। ओः ताःम्ज्यादी कोन्ज्योइ येशुला जाम्बुलीङला ताङ्दी पुरा पेःसी। दी याःबु लेःङ्‍गो येशु केक्योक ओःले छार्क्योक क्युःपा यहुदीक्याइ लागी चीग्रा मीःङे इःनाङ जाम्बुलीङगीइ थाम्जेर मीःक्याइ लागी इःङे।
दीखो पेज्यालादी काःल्क्योक तामक्या याःबुले टीदी ज्यादी एः। दीखो पेज्याला येशु केमीःजीक खुङ सीक्योक ओःले खुङ फीर्च्या सोम्बो लोःक्योक तामक्याइ बारेला प्रुःदी एः। दीखो पेज्याला खुङ केक्योक, बप्‍तीस्मा लेःङ्क्योक, खुङला परीक्षा लेःङ्क्योक ओःले खुङगीइ गालीलला प्रचार पेःक्योक, लोप्क्योक ओःले टाःच्युक्योक तामक्याइ बारेला प्रुःदी एः। खुङ तीङगीइ खेप यरुशलेमला काःल्क्योक, ओःला तीङगीइ हप्‍ताला काःल्क्योक तामक्या, खुङला क्रुसला प्याङ्क्योक ओःले फीर्च्या सोम्बो काःल्क्योक तामक्याइ बारेला प्रुःदी एः।
दीखो याःबु लेःङ्‍गोला येशु छ्‍येइ ठीम ओःले नाःम्खालीङगीइ क्याःल्खापकीइ बारेला लोप्चेला आङ्ज्या ज्योर्क्योक छ्‍योम्बो लोबेन इःङे लाःती प्रुःदी एः। खुङगीइ लोप्चे छोल्क्योक तामक्यादी दी वीषयक्याइ बारेला एः,
(१) काःङला तेर्क्योक लेःङ्‍गो– नाःम्खालीङगीइ क्याःल्खापकीइ मीःक्या ङीमु ओःङ्‍कोःन तामक्याइ बारेला (अध्याय ५-७)
(२) चीङङीरा योबाक्याला प्रचार पेःदो लाःती तेर्क्योक आज्ञा (अध्याय १०)
(३) नाःम्खालीङगीइ क्याःल्खापकीइ बारेला पेदामक्या (अध्याय १३)
(४) चेलापनगीइ बारेला लोप्क्योक (अध्याय १८)
(५) ताःसेइ तीःनाम सीःङेन बारेला ओःले येशु ख्रीष्ट तीङ्ला ओःङेन बारेला लोप्क्योक (अध्याय २४-२५)
थीमी सुची
येशु ख्रीष्टकीइ फाफामुक्या ओःले खुङगीइ केबु १:१–२:२३
बप्‍तीस्मा तेर्केन युहन्‍नाइ सेवाकार्य ३:१-१२
येशुइ बप्‍तीस्मा रा परीक्षा ३:१३–४:११
येशुइ गालीलला पेःक्योक सेवाकार्या ४:१२–१८:३५
गालीलमीःजीक यरुशलेमथुप १९:१–२०:३४
यरुशलेमला तीङ्‍गीइ हप्‍ता २१:१–२७:६६
येशु सीक्योकलाःम्‍ले सोम्बो काःल्क्योक ओःले योबाक्याइ कील्‍ला थोङ्क्योक २८:१-२०

聆听 मत्ती पेज्याइ ङोःसी