If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

तेसी धियाडी यीशु घरा का निखल़ी करे गलिला रै समुन्दरा रे किनारे नाहीं करे बेठअ। होर तेऊ सेटा बड़ी भीड़ कट्ठे होई कि सह किस्ती में चढू, होर सारी भीड़ कनारे में खड़ी रही। होर तेऊ तयाबे दृष्टान्ता में बहू गला खोजी एक बउणे आल़अ बेजे बउंदअ निखतअ बउदे वक्ते कुछ बेजा बाता रे कनारे पडू होर चेलू इच्छी करे चुंघु थोडा जेहा बेजा शाफडा री जमीना में पडू ज़खे खासा माटा नांई भेटा सह बेजा छेकअ लागा, किबेकी माटा खासा नांई थी होर धूपा लागी करे सह बेजा झ्लुसू, होर जड़े नांई ढाकणे री बजा का सह शूका। पर धयाडे निखल़ने में त्याह जल़ी, होर जड़ा नांई ढाकणे का त्याह शुके। कुछ बेजा झाख्ड़े पडू होर झाख्ड़े सह बढ़ी करे जिहारु। पर कुछ बेजा रांबडी जमीना में पडू, होर फल़ी करे कोई शअ गुणा, कोई शाठ गुणा, होर कोई तीह गुणा। जासके कणेट हो त्याह शुणा।


चेले सेटा इच्छी करे तेऊबै बोलू, तूह लोके संघे दृष्टान्ता में किबे गला करा? तेऊ उतर दिना, तमाबे स्वर्गा रे राज्य में भेदा री समझ दिनी दी साहा, पर तयाबे नांई। किबेकि जासू सेटा साहा, तेऊबै होर दीणा, होर जासू सेटा बहू होला: पर जासू सेटा नांई आंदा, तेतका जोह कुछ तेऊ सेटा साहा, सह भी नीणा। हाऊं त्याहबे दृष्टान्ता में शिक्षा दिंदा, कि त्याह हेरदे भी नांई हेरदे होर शुणदे भी नांई शुणदे, होर नांई समझदे। त्याहरे बारे में यशायाह री भविष्यवाणी पूरी हूँदा: तमा कणेटा का तअ शुणना, पर समझणा नांई; होर आछी का हेरना, पर तमा नांई हेरना। किबेकि याह लोका रा मन मोटा होऊदा, होर जोह कनेटा का ज़ोरे शुणा होर त्याहा आपणी आछी बन्द करी दी; कई एडा ना होहे कि त्याह आछी का हेरे, होर कनेटा का शुणे, होर मना का समझे, होर तेहुकी नाहे, होर हाऊं त्याह ठीक करू।
पर धन्य साहा थारी आछी, कि त्याह हेरा; होर थारे कणेट कि त्याह शुणा। किबेकि हाऊं तमाबे सच बोला कि बहू ज़ेहे भविष्यद्वक्ता होर धर्मी चाहू कि जोह गला तमे हेरा साहा, पर नांई हेरी; होर जोह गला तमे शुणा, पर नांई शुणी।


एबा तमे बोलण आले रे दृष्टान्ता रा अर्थ शुणा: जोह कोई राज्य रा वचन शुणी करे नांई समझे, तेऊरे मना मे जोह बउदा, तेऊ सह दुष्ट इच्छी करे छड़ीयाउंदा। यह सह साहा, जोह बाता रे कनारे बऊन्दा साहा। होर जोह शफ्ड़े वउदा साहा, या त्याह साहा, जोह बचन शुणी करे तेवरी खुशी संघे मना। पर आपु में जड़ा नांई डाहंणे री बजा का सह थोड़े धयाडे रअ ही साहा, होर जेबा वचना री बजा का क्लेश होर दुख हूँदा, तेबा तेभरी ठोकर खांदा। जोह वेज़ा कांडे में बऊ, यह सह साहा, जोह बचन शुणा, होर एउ संसारा री चिन्ता होर धना रा धोखा वचन दबाऊनदा होर किछे फल नांई इंदअ। रांबडी जमीना बे बऊ, यह सह साहा, जोह बचन शुणी करी समझा, होर फल़ आंणा; शअ गूणा, कोई साठ गुणा, होर कोई तीही गूणा।

यीशु तयाबे एक होर दृष्टान्त दिना: स्वर्गा रा राज्य तेऊ किसाना बराबर साहा जूणी आपणे खेचे शोभला बेजा बऊ। पर जेबा लोका सुतेदे थी, तेबा तेऊरे शत्रु ईछी करे गिहू मेंझे जंगली बेजा बई करे नाठअ। जेबा लागदा लागा होर लुडी लागी, तेबा जंगली दाणे रे बूटे भी हेरदे लागे। एता में घरा रे नोकरे ईच्छी करे तेऊबै बोलू, हे मालक, कैह तांई आपणे खेचे शोभला बेजा नांई बऊ? तेबा जंगली दाणे रे बूटे कंधा का आउए? तेऊ तयाबे बोलू, यह कासु शत्रु रा काम साहा। नोकरे तेऊबै बोलू, कैह तेरी इच्छा साहा, की हामे नाहीं करे त्याह बटोरू? तेऊ बोलू नांई, एडा ना हो कि जंगली दाणे रे बूटे बटोरदे वक्ते तमे त्याह संघे गिहू रे डाला भी ना पेचे। फसला काटणे तणी दुही कठे बढने देया, होर काटणे वक्ते महा काटणे आले बै बोलणा कि पहिले जंगली दाणे रे बूटे बटोरी करे ज़ाल़ने बै कठे बान्हाँ, होर गिहू मेरे भंडारा में कठे करा।


तेऊ तयाबे एक होर दृष्टान्त दिना स्वर्गा रा राज्य राई रे दाणे बराबर साहा, जोह कुंणी मणशे नी करे आपणे खेचे बऊ। सह सभी बेजे का होछअ हुँदा पर जेबा बढ़ा तेबा सह सभी शागा का बढ़अ हुँदा; होर एडअ बूटअ हुँदा कि सरगा रे चेलू भी तेऊरी डाली री छाईंटा में बसेरा करी सकता।


तेऊ तयाबे एक होर दृष्टान्त दिना: स्वर्गा रा राज्य खमीरा रे बराबर साहा जोह कुंणी बेटड़ी नी करे दस किलो पीठे में मलाऊ होर हुंदे-हुंदे सह सारा खमीर होऊ।

यीशु या गला दृष्टान्ता में लोका बै बोली, होर बिना दृष्टान्ते सह तयाबे किछे नांई बोलदअ थी, कि जोह बचन भविष्यद्वक्ता सगे बोलू, सह पूरा हो: महा दृष्टान्ता बोलणे बे आपणें मुँह खोलणअं महा त्याह गला जोह संसारा री शुरुआता का गोझी रही प्रगट करणी।

तेबा सह भीड़ा छाडी करे घरा वे आउअ, होर तेऊरे चेले तेऊ सेटा इच्छी करे बोलू, खेचे जंगली दाणे रा दृष्टान्त हामा बै समझा। तेऊ उतर दिना, शोभले बेजे बऊंण आल़अ मणशा रे शोहरू साहा। खेच संसारा रे लोका साहा, शोभला बेजा राज्य रे शोहरू, होर जंगली बेजा दुष्टा रअ शोहरू। जूणी शत्रु सह बणाऊ सह शैतान साहा, कटनी संसारा रा अन्त साहा, होर काटणे आल़अ स्वर्गदूत साहा। जुणी जंगली दाणे बटोरा होर जाल़दा तेडा ही संसारा रा अन्ता मेंजे हूँणा। हाऊ मणशा रअ शोहरू आपणे स्बर्गा दूता भेज़णे, होर तेऊरे राज्य मेजा का सभी ठोकरा री बजा होर कुकर्म कर्णआले कठे करणे, होर त्याह आगि रे कुंडे पाउंणे, ज़खे लेरना होर दांद पिशणा हूँणा। तेऊ वक्ते धर्मी आपणे बापू रै राज्य में धयाडी बराबर चमकणे। जासके कणेट हो त्याह शुणा।

स्वर्गा रा राज्य खेचे गोझीदे धना बराबर साहा, जोह कासु मणशा भेटा होर तेऊ सह गझयाऊ, होर खुशी संघे नाहीं करे आपणा सब कुछ बेचु होर सह खेच लऊ।

तेबा सरगा रा राज्य एकी व्यापारी जेड़अ साहा, जोह कासु मणशा भेटा होर गझयाऊ, होर खुशी सगे नाहीं करे आपणा सब कुछ बेचु होर सह खेच लऊ। जेबा तेऊ बहुमूल्य मोती भेटअ तेबा तेऊ आपणा सब कुछ बेचु होर सह लऊ।

तेऊकी सरगा रा राज्य तेऊ बड़े ज़ाल़ा बराबर साहा जोह समुद्रा में पाऊ, होर हर तरहा री माछी ढाकी। होर जेबा जाल़अ भरु, मछुए जाल़अ कनारे बै खींची आणु, होर वेशी करे शोभली-शोभली माछी भांडे में डाही होर माड़ी-माड़ी फैंकी दीनी। संसारा रा अन्ता में एड़ा ही हूँणा। स्वर्गदूता इच्छी करे दुष्ट धर्मी का अलग करने, होर दुष्ट लोका आगि रे कुंडे पाउंणे। ज़खे लेरना होर दांद पिशणा हूँणा।

कैह तमे या गला समझी? त्याहे बोलू, उअह। तेऊ तयाबे बोलू, एतकी तणी हर एक शास्त्री जोह स्वर्गा रे राज्य में चेलअ बणुदअ साहा, तेऊ जेह घरेलू मणश साहा जोह आपणे भण्डारा का नई होर पुराणी चीजा काढ़ा।


जेबा यीशु यह सब कुछ दृष्टान्ता में खोजी छेकू, तेबा तखा का नाठअ। होर आपणे नगरा में इच्छी करे त्याह प्रार्थना घरा में एडे उपदेशा दींदअ, लगअ कि त्याह परेशान होई करे वोलदे लागे, एउ या ज्ञान होर सामर्थ्य रे काम कंधा का भेटे? कैह यह मिस्त्री रअ शोहरू नांई? होर कैह एउरी आमा रा ना मरियम होर भाई रा ना याकूब, यूसुफ, शिमोन यहूदा नांई? होर कैह एउरी सभे बहीणा हामा मेंझे नांई रहंदी? तेहुकी एउ यह सब कंधा का भेटा एउ साबे त्याहे तेऊरी बजा का ठोकर खाई, यीशु तयाबे बोलू, भविष्यद्वक्ता रा आपणे देशे होर आपणे घरा छाडी होर कंधे निरादर नांई हुँदा। होर तेऊ तखे त्याहरे अबिश्बास री बजा का बहू सामर्थ्या रे काम नांई करी।

聆听 मत्ती 13