If you have would like a copy of this version please contact info@davarpartners.org

Text: Churahi New Testament, CC-BY-SA-4.0, The Love Fellowship. Audio: Churahi New Testament Audio Bible, CC-BY-SA-4.0, Davar Partners International, The Love Fellowship, 2022

Churahi New Testament

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

यीशु गांहथै टैंमा बत्तै मझ अक मैहणु तका जै कांणा जमोरा थ्या। यीशुरै चैलै यीशु किना पुच्छु, “हे गुरू! कुनि पाप क्यौरा थ्या, ऐनि या ऐसेरै मयि बबै पाप क्यौरा थ्या? कि ऐ जंमतै सिंउ कांणा थ्या।” यीशु उत्तर दिता, “ना ऐनि मैहणु पाप क्यौरा थ्या ना ऐसेरै मयि-बबै, पण ऐ ता ऐठणीरै तेईनी भूं कि परमेश्वरेरी सामर्थिरै कम तैस मझ प्रकट भुईया। जेनि आंउ भेईजौरा मूं तेसेरै दितोरै कम जल्दी पूरै कांने अत्तै। रात भूंती आ, जेख्णी कौ बि मैहणु कम ना करि सकता। आंउ ज्यो-तेईनी संसारा मझ आ त्यो-तेईनी संसारेरी ज्योति आंउ आ।”
ऐ बोलि करि यीशु धरती पन थुक्कु, जां थुक्कै ला लैप बंणा करि सै लैप कांणै मैहणुरै टीरा पन ला करि, तैस सिंउ बौलु, “गा, शीलोहेरै कुंडा मझ धौ लै।” शीलोहेरा मतलब आ, भेईजौरा। तेनी मैहणु गहि करि टीरै धोतै जां जेख्णी सै वापस या ता तैस लेहिंथु थियु। तां तेसेरै पड़ोसी जां जैन्हैं सै पेहिलै भिख मगता लधौरा थ्या, सै योकिया मझ बोलणा लगै, “क्या ऐ सैहै ना, जै बेशि करि भिख मगता भुईंथ्या।” कुछ मैहणुवें बौलु, “ऐ सै ना! ऐ तैस सैयि केणुक्या होरा।” तां तेनी बौलु, “आंउ सैहै कांणा।”
तां मैहणुवें तैस किना पुच्छु, “तिंडै टीरा केरी नजर किहीं खुलि।” तेनी उत्तर दिता, “जैस मैहणुनी यीशु बोलतै, तेनी मिट्टिरा लैप बंणा करि मिंडा टीरा पन ला करि बौलु, कि गहि करि शीलोहेरै कुंडा मझ टीरै धौ लै, मीं जेख्णी टीरै धोतै ता मूं लेहिंणा लगु।” तैन्हैं तैस किना पुच्छु, “सै मैहणु कोठि आ?” तेनी बौलु, “आंउ ना जांणता।”

मैहणु तैस कांणै मैहणु जै ठीक क्यौरा थ्या, फरीसिया किनि लै ग्यै। जेसै धियाड़ि यीशु मिट्टिरा लैप बंणा करि तेसैरा टीरा केरी नजर खोलथि तेधियां आरामेरी धियाड़ी थी। फिरी फरीसियै तैस किना पुच्छु; तु किहीं तकांणा लगा? तेनी तैन्हांं सिंउ बौलु, “तेनी मिंडै टीरा पन मिट्टी लयि, फिरी मीं टीरै धोतै ता मिंडै टीरै ठीक भौ ग्यै जां आंउ तकांणा लगा।”
ऐत पन किछ फरीसियै बौलु, “ऐ मैहणु परमेश्वरेरी तरफों ना केईनी कि, सै आरामेरी धियाड़िरा पालन ना काता।” होरनियें बौलु, “कौ पापी मैहणु भला ऐतियै चमत्कारेरै कम किहीं लुहाय सकता?” ऐसै गलै पन सै योकिया मझ भिड़ियूंणा लगै। तैन्हैं तैस कांणै सिंउ फिरी बौलु, “तेसेरै बारै मझ तु कितु बोलता केईनी कि तेनी तिंडा टीरा केरी नजर खोलि?” तेनी बौलु, “सै ता भविष्यवक्‍ता।”
पण जै यहूदी अगुवे थ्यै तैन्हांं विश्वास ना भुआ कि, सै कांणा थ्या, जां अबै सै तका सकींथ्या, ज्यो-तेईनी तैन्हैं तेसेरै माँ-बब शदा करि तैन्हांं किना ना पुच्छु, “क्या ऐ तुवाड़ा पुत्र आ, जैसनि तुवे बोलतै अत्तै कि ऐ कांणा जमौरा थ्या? फिरी अबै सै किहीं तका सकता?” तेसेरै मयि-बबै जुबाव दित्ता, “असु पता कि ऐ असैड़ा पुत्र आ जां ऐ कांणा जमौरा थ्या; पण असुवां ऐ पता ना कि ऐ किहीं तकांणा लगा? जां ना असु ऐ पता कि कुनि ऐसेरै टीरा केरी नजर खोलि। ऐस किना पुच्छा; ऐस अपड़ै बारै मझ ऐपुवै शुणा दींणु।” ऐ गलै तेसेरै मयि-बबै ऐठणीरै तेईनी बोलि केईनी कि जै यहूदी अगुवे थ्यै सै तैन्हांं किना डरींथ्यै। केईनी कि यहूदी अगुवे ऐ फैसला थ्या क्यौरा कि जै कौ यीशु, मसीह मनैला, सै यहूदी सभा घरा किना भेईर कढि दींणा। ऐठणीरै तेईनी तेसेरै मयि-बबै बौलु, “ऐ अपुवै समझदार आ ऐस पुछि लिया।”
फिरी यहूदी अगुवे सै मैहणु दुबारे फिरी शदा जै कांणा थ्या जां तेसनी बौलु, “परमेश्वरेरी महिमा कर। असै जांणतै अत्तै कि सै मैहणु पापी आ।” तेनी जुबाव दित्ता कि “आंउ ना जांणता कि सै मैहणु पापी आ कि ना, आंउ अक गल जांणता कि आंउ कांणा थ्या जां अबै तका सकता।” तैन्हैं तेसनी फिरी बौलु, “तेनी ताउ सेईतै कितु कियु, कि तु तकांणा लगी पिया?” तेनी तैन्हांं सिंउ बौलु, “मीं तुहां सिंउ शुणा दित्तु पण तुहैं ना शुणु, अबै दुबारे केईनी शुणना चांहथै अत्तै? क्या तुवे बि तेसेरै चैलै बंणना चांहथै अत्तै?” सै तेसनी बुरा-भला बोलणा लगै कि, “तु तेसैरा चैला भूंणा, असै मूसा भविष्यवक्तेरै चैलै अत्तै। असु पता कि परमेश्वर मूसै सिंउ गलै करींथ्या, पण ऐस मैहणुरै बारै मझ ना जांणतै कि ऐ कोठां यौउरा।”
तेनी तेन्हांनि जुबाव दित्ता, ऐहै ता हैरानी बाई गल आ कि तुहां ना पता कि सै कोठां यौउरा, तेनी मिंडै टीरा केरी नजर खोलि। असु पता कि परमेश्वर पापिया केरी ना शुणता, सै तैन्हांं केरी शुणता जै तेसेरै भक्त अत्तै जां तेसैरी मर्जी पूरी कातै। जेख्णी किना संसार बंणा ता आज तेईनी असुवें कदि कोस किना ना शुणु कि कुनिक्यै कोसक्यै कांणेरै टीरै ठीक क्यै जै पेईदा भूंणा किना कांणा थ्या। अगर ऐ मैहणु परमेश्वरेरी तरफ किना ना भूंता ता अपड़ि मर्जी सिंउ किछ बि ना करि सकींथ्या। तैन्हैं तैस सिंउ बौलु, “तु बिल्कुल पापा मझ पेईदा भौरा, जां तु असुनि शिख्रांता?” जां तैन्हैं सै यहूदी सभा घरा किना भेईर कढि ला।

यीशु शुणु कि तैन्हैं सै भेईर कढि ला; ता जेख्णी सै मैहणु यीशुनि मैआ ता यीशु तैस सिंउ बौलु, “क्या तु परमेश्वरेरै पुत्रा मतलब मूं पन विश्वास काता?” तेनी उत्तर दित्ता, “हे प्रिय! मूंनी शुणा कि परमेश्वरैरा पुत्र केणु आ ता कि आंउ तैस पन विश्वास करूं?” यीशु तैस सेईतै बौलु, “आंउ परमेश्वरैरा पुत्र आ जां तीं आंउ तका लियौरा, जां जै ताउ सेईतै गलै काता आंउ सैहै आ।” तेनी तेसनी हत्थ जोड़ी करि बौलु, “हे प्रभु! आंउ विश्वास काता।” तां यीशु बौलु, “आंउ संसारा मझ न्याय कांना यौउरा, जां जैन्हां ना लेहिंथु, सैक्यै तकाईया जां जैन्हां लेहिंथु सैक्यै कांणै भौ गहिया?” जै फरीसी तैस सेईतै थ्यै, तैन्हैं ऐकेई गलै शुणि करि तैस सिंउ बौलु, “क्या तु बोलता कि असै बि अंधै अत्तै?” यीशु तैन्हांं सेईतै बौलु, “अगर तुवे कांणै भूंतै भुईं ता तुहांनि पाप ना थ्या, पण तुवे ता बोलतै कि असु लेहिंथु आ; ऐठणीरै तेईनी तुवाड़ै पाप माफ ना भूंणै।”

聆听 यहुन्ना 9