छाप्‍लाखाओ अ़सिन्‍खा
ओ युहन्‍नाआ छाप्‍तुओ नुय़ङ्‌खान्‌आ येसु निनाम्‍हाङ्‌ओ युङ्‌युङ्‌ओ अ़चुय़ङ निकिना खाङ्‌मुसु। मो “य़ङ म़ना म़लिसाकि आन्‍रादा म़युङा”नि छाप्‍तुयुङ्‌सु १:१४ । येसु निनाम्‍हाङ्‌ओ अ़चुछा खोन्‍कि हिप्‍माय़ङ्‌ओ कालेन्‍पा म़युङ्‌याङ। ओ नुय़ङ्‌खान काखिप्‌चिआ येसु मोवात्‍निङा साकोङ्‌छ़ङ अ़मुने, खोन्‍कि मो साकोङ्‌छ़ङ्‌लाम्‍पा खोचिआ ह़ङ्‌म़ङ अ़तोक्‍नेनिओ मिन्‍माआ छाप्‍माय़ङ ओ २०:३१ ।
निनाम्‍हाङ्‌ओ अ़चुय़ङ खोन्‍कि येसु अ़क्‌तात्‌ङा ओ। ओ नुय़ङ्‌खान्‌ओ बुयाओ अ़धाङ्‍आ मो म़दोम्‍दाओ काचिचिओ अ़तुक्‌वादा खाम़एत। ओसाआ येसुङा निनाम्‍हाङ्‌ओ अ़चुछा खोन्‍कि हिप्‍माय़ङ्‌ओ कालेन्‍पा निकिना नुलोक खालुसु। खोन्‍किना हाङ्‌पाओ म़दोम्‍दाओ अ़चुकाचिचिआ दि खाङ्‌मुसुनिओ य़ङ खोक्‍कोसोओ अ़चुय़ङ्‌आ नुलोक खालुसु। बुयाओ अ़धाङ्‍आ देत्‍नि अ़क्‍चित म़नाचि येसुएदा साकोङ्‌छ़ङ म़मुवाकि खोक्‍कोसोओ अ़चुकाखेङ्‌पा म़लिसा, मेन निचिआ खोक्‍को फित्‍चि अ़मुवाकि खोक्‍कोएदा साकोङ्‌छ़ङ मान्‍मुचिनि खाम़एत। १३ दाङ्‌का १७ अ़धाङ्‌चिदा खोक्‍को अ़लाप्‌ओ अ़खाखुत अ़चुकाखेङ्‌पाचिएनान म़मुवाओ यावायोक खोन्‍कि क्रुस्‌दा स़मा बुया खोक्‍कोसोओ अ़चुकाखेङ्‌पाचि चुम्‍माय़ङ खोन्‍कि राक म़प़चिओ अ़तुक्‌वादा छाप्‍तायुङ्‌सा। देङ्‌दाओ अ़धाङ्‌चिदा येसुओ अ़चुलाप्‍खावा खोन्‍कि खोक्‍को चिन्‍माखाङ्‌माय़ङ, खोक्‍को क्रुस्‌दा म़सुवाओ, म़सुवादाओदाङ्‌का म़लासाखोन्‍तालोन्‍ताओ खोन्‍कि खोक्‍को अ़चुकाखेङ्‌पाचिएदा खाङ्‌म़मुसान्‍चिन्‌ओ अ़तुक्‌वादा खालुसायुङ्‌सा।
अ़लुक्‍निन्‌ओ ह़ङ्‌म़ङ्‌ओ आसिखा ख्रिस्‍तलाम्‍पा तोक्‍तिन। येसुङा लाम, अ़छ़ङ खोन्‍कि ह़ङ्‌म़ङ ओ निकिना लोक्‍सा खोक्‍कोएदा काताचिआ ओ आसिखा अ़तोक। ओ नुय़ङ्‌खान्‌दा अ़च़वाङ य़ङ दि याक्‌याङ्‌नालो लावा सिन्‍कामेत य़ङ्‌चि: चाक्‌वा, पेम्‍पाक, साम, भेरा काखाङ, भेरा खोन्‍कि अङ्‌गुरा ताङ खोन्‍कि मोसोओ अ़सिवाओ अ़तुक्‌वादा दोय़ङ्‌लादा म़छाप्‍तायुङ्‌सा।
थुत्‍मेत्‍लो अ़तुक्‌वा ऩङ
बुयाओ अ़खालुमा य़ङ १:१-१८
बप्‍तिस्‍मा काप़ युहन्‍ना खोन्‍कि येसुओ अ़चुकाखेङ्‌पाचि १:१९-५१
येसुओ झाराएदाओ अ़चुफामा २:१–१२:५०
यरुसलेम च़क्‌चिदात्‍नि क़प्‍माय़ङ आदेङ्‌ओ लेन्‌चि १३:१–१९:४२
येसु म़सुवादाओदाङ्‌का म़खोन्‍तालोन्‍ताओ खोन्‍कि खाङ्‌म़मुसान्‍चिन्‌ओ २०:१-३१
अ़लुक्‍माय़ङ: खोक्‍को हान्‍छाङ गालिल्‌दा म़लासान्‍खाङ्‌म़मुसान्‍चिन्‌ओ २१:१-२५

聆听 युहन्‍ना छाप्‍लाखाओ अ़सिन्‍खा