Perjanjian Baru terjemahan Bahasa Melayu Maluku Utara

Melayu Maluku Utara

Perjanjian Baru Bahasa Melayu Maluku Utara @ Lembaga Alkitab Indonesia 2020

Tinggal anam hari lagi orang agama Yahudi mo biking dorang pe hari raya Paska, kong Yesus pigi di Betania, Lazarus pe kampong. Lazarus itu yang perna mati kong Yesus kase hidup ulang. Jadi, orang-orang di kampong itu biking acara makang-makang untuk hargai pa Yesus. Waktu itu, Marta yang layani pa dorang. Kong Lazarus dudu makang sama-sama deng Yesus deng orang-orang yang datang di situ. Waktu dorang sementara makang, Maria ambe minya wangi narwastu asli stenga liter. Minya wangi itu pe harga mahal skali. Kong dia siram minya wangi itu palang-palang pa Yesus pe kaki, turus dia goso Yesus pe kaki deng dia pe rambu. Minya wangi itu pe bobou langsung dapa ciom di samua tampa di dalam ruma itu.
Di situ ada Yudas Iskariot, satu dari Yesus pe murit. Dia yang nanti mo bahianat pa Yesus. Dia bilang bagini, “Astaga! Minya wangi pe mahal itu kong, bikiapa tara jual la dia pe doi kase barbage pa orang-orang miskin? Minya wangi itu pe mahal sama deng orang pe gaji satu taong.” Sebenarnya Yudas bilang bagitu bukang karna dia peduli pa orang-orang miskin, tapi karna dia papancuri, dia jaga ambe dari dorang pe doi kas yang dia pegang.
Tapi Yesus bilang, “Kase biar suda Maria biking bagitu pa Kita, karna apa yang dia biking itu sama deng dia so kase siap Kita pe mayat waktu Kita mo dapa kubur nanti. Orang-orang miskin salalu ada, jadi tempo apa saja ngoni bole bantu pa dorang. Tapi Kita tara sama-sama deng ngoni turus-turus.”

Banya skali orang agama Yahudi dengar Yesus ada di kampong Betania, jadi dorang pigi ka sana. Dorang ka sana itu bukang cuma mo lia pa Yesus, tapi dong mo lia lagi pa Lazarus, orang yang so perna mati kong Yesus so kase hidup ulang. Pe dengar itu, imam-imam kapala baku ator la mo bunu pa Yesus, deng pa Lazarus lagi. Barang, waktu Yesus so kase hidup ulang pa Lazarus, banya orang agama Yahudi so jadi percaya pa Yesus, kong so tara mau iko pa imam-imam kapala.


Dia pe beso, orang banya yang so ada di kota Yerusalem la mo biking agama Yahudi pe hari raya, dong dengar kata, Yesus ada di tenga jalang mo pi di kota Yerusalem. Jadi dorang ambe daong-daong palem, turus pigi sambut pa Yesus kong bilang deng suara kuat,
“Hosana!
Puji pa Dia yang Tuhan Allah so utus datang kamari.
Dia itu bangsa Israel pe Raja!”
Waktu Yesus so dekat di kota Yerusalem, Dia dapa keledai muda satu ekor, kong nae di keledai itu. Apa yang Dia biking itu, itu sama deng yang Tuhan Allah so janji dulu mo jadi, kong itu ada tatulis di Kitab Suci bagini,
“Ee, orang-orang Yerusalem,
coba lia, ngoni pe Raja ada datang, jadi ngoni tara usa tako lagi.
Dia ada dudu di atas keledai muda satu.”
Waktu banya orang puji pa Yesus itu, Yesus pe murit-murit bolong mangarti bikiapa kong dorang puji pa Yesus. Tapi nanti, waktu Yesus so dapa puji deng hormat karna Dia mati kong hidup ulang, baru dong sadar, samua itu jadi, sama deng yang Tuhan Allah so bilang di Kitab Suci.
Orang banya yang ada waktu Yesus pangge pa Lazarus kaluar dari kubur la kase hidup ulang pa dia, dorang itu kase tau turus pa orang-orang. Jadi, banya orang yang pigi sambut pa Yesus, barang dorang so dengar Dia yang biking mujizat itu. Kong orang-orang Yahudi dari aliran Farisi baku bilang, “Ado, tong pe usaha untuk kase berenti pa Dia tara berhasil. Coba ngoni lia saja, banya skali orang di dunia so datang iko pa Dia.”

Dari samua orang yang datang basambayang di Yerusalem untuk iko agama Yahudi pe hari raya, ada lagi orang-orang bukang Yahudi yang datang. Dorang itu pigi pa Filipus. Filipus itu dari kampong Betsaida di daera Galilea. Kong dorang bilang pa dia, “Bapa, torang ingin mo baku dapa deng Yesus.”
Kong Filipus kase tau pa Andreas, turus dorang dua pigi kase tau lagi pa Yesus.
Kong Yesus bilang pa dorang, “So dia pe waktu Tuhan Allah mo biking Anak Manusia dapa puji deng hormat. Inga bae-bae yang Kita bilang ini. Apa yang mo jadi pa Kita nanti, Kita ambe conto bagini: kalu orang tanam gandum pe biji, biji itu tara batumbu kalu tara isi dalam tana. Itu sama deng biji itu mati dulu baru mo batumbu, abis itu baru dia mo babua banya. Bagitu lagi deng ngoni. Sapa yang hidup cuma untuk dia pe diri sandiri, dia itu akan mati tapisa deng Tuhan Allah slama-lamanya. Tapi sapa yang kase dia pe hidup yang ada di dunia ini untuk iko pa Kita, dia itu yang akan dapa hidup deng Tuhan Allah slama-lamanya. Sapa yang suka biking apa yang Kita suru, dia musti iko pa Kita, kong di mana saja Kita ada, dia lagi musti ada di situ. Kong sapa yang biking apa yang Kita suru, Kita pe Bapa akan hormati pa dia.”
Yesus bicara lagi, “Kita pe hati sedi skali. Kita so tara tau mo bilang apa. Apa Kita mo bilang Bapa kase lapas penderitaan ini dari Kita? Tantu tara bagitu! Mala, untuk dapa penderitaan ini suda sampe Kita datang di dunia ini.” Kong Yesus berdoa, “Bapa, apa yang mo jadi pa Kita, Bapa biking suda, supaya orang-orang puji deng hormat pa Bapa.”
Abis itu, dapa dengar suara dari sorga, “Kita so kase tunju Kita pe kuasa yang hebat, kong Kita akan kase tunju lagi Kita pe kuasa yang hebat.”
Orang banya yang ada di situ dengar suara itu. Ada babarapa orang dari dorang yang bilang itu babunyi guntur, kong ada lagi yang bilang, itu malaekat pe suara yang sementara bicara pa Yesus.
Kong Yesus bilang, “Suara yang ngoni dengar itu, bukang untuk Kita, tapi untuk ngoni supaya ngoni dengar. Skarang ini Tuhan Allah mo adili pa orang-orang yang ada di dunia ini, kong Iblis, setang-setang pe raja yang ada kuasa di dunia ini me Tuhan Allah mo kase kala. Kong Kita, kalu Kita dapa angka di atas bumi, Kita mo biking sampe samua orang bole percaya pa Kita.” Yesus bilang bagitu supaya samua orang bole tau, nanti Dia mo mati di kayu salib.
Kong orang banya itu bilang, “Di lima kitab Musa, Tuhan Allah janji mo utus Mesias, Raja yang mo kase slamat pa manusia. Tuhan Allah bilang Raja itu tetap mo hidup sampe slama-lamanya. Jadi, bagimana kong Bapa bilang, Bapa itu Anak Manusia yang mo dapa angka di atas bumi, abis itu mati? Sebenarnya yang Bapa maksut itu sapa?”
Kong Yesus bilang pa dorang, “So tara lama lagi, Tarang ini ada sama-sama deng ngoni. Jadi waktu Tarang ini masi ada, ngoni musti bajalang sama-sama deng Tarang ini turus, jang sampe galap tutu ngoni pe jalang. Barang, sapa yang bajalang di galap, dia tara akan tau ka mana dia mo pigi. Selama Tarang ini ada di sini, percaya suda pa Tarang ini, supaya ngoni jadi ana-ana Tarang.”
Abis Yesus bilang bagitu, Dia pigi basambunyi dari dorang.

Biar lagi Yesus so biking banya mujizat pa dorang pe muka, tapi dorang masi tara percaya pa Dia. Deng dorang tara percaya pa Yesus, itu suda yang dulu Tuhan Allah bilang mo jadi, sama deng nabi Yesaya dulu perna tulis,
“Tuhan, amper-amper tarada orang yang percaya kabar yang torang kase tau.
Biar lagi Tuhan kase tunju Tuhan pe kuasa pa dorang,
dorang tetap tara percaya.”
Dorang tara percaya bagitu, karna itu sama deng yang nabi Yesaya so perna bilang lagi,
“Tuhan so biking dorang pe mata buta,
jadi dorang tara mo lia apa yang butul.
Tuhan lagi so biking dorang pe hati karas,
jadi dorang tara mo mangarti apa yang butul.
Karna dorang memang so tara mau bertobat,
jadi Kita tara mo kase slamat pa dorang.”
Nabi Yesaya bilang bagitu, karna waktu Yesus bolong datang, Tuhan Allah so kase penglihatan pa nabi Yesaya tentang Yesus pe kuasa yang hebat, kong kase tau tentang Yesus yang mo datang itu.
Biar lagi banya orang yang tara percaya pa Yesus, banya pemimpin-pemimpin agama Yahudi yang jadi percaya pa Dia. Tapi dorang tara mau orang tau dong itu percaya pa Yesus, barang dong tako orang-orang Yahudi dari aliran Farisi user pa dorang dari ruma ibada. Barang, pemimpin-pemimpin agama Yahudi lebe suka manusia puji deng hormat pa dorang daripada Tuhan Allah yang puji deng hormat.

Kong Yesus bilang deng suara kuat, “Sapa saja yang percaya pa Kita, dia bukang cuma percaya pa Kita, tapi dia lagi percaya pa Tuhan Allah yang so utus pa Kita datang di dunia ini. Kong sapa saja yang so lia pa Kita, dia lagi so lia pa Tuhan Allah yang utus pa Kita. Kita datang di dunia ini sebagai Tarang, supaya sapa saja yang percaya pa Kita, dia itu so tara hidup lagi di dalam galap. Kong kalu orang dengar apa yang Kita ajar, tapi dia tara biking itu, bukang Kita yang mo hukum pa dia. Karna Kita datang bukang untuk hukum orang-orang yang ada di dunia, tapi mo kase slamat pa dorang dari dosa-dosa. Sapa saja yang tara tarima pa Kita, deng yang tara tarima Kita pe ajaran, dorang itu mo dapa hukum. Kong nanti di hari kiamat, Tuhan Allah yang mo hukum pa dorang pake Kita pe ajaran itu nanti. Barang, Kita pe ajaran bukang dari Kita pe diri sandiri, tapi dari Bapa yang utus pa Kita. Dia itu yang ada parenta pa Kita untuk bilang apa yang musti Kita mo bilang deng kase tau. Kong Kita tau, Tuhan Allah pe parenta itu biking ngoni bole hidup deng Dia slama-lamanya. Jadi, apa yang Kita jaga bilang pa ngoni itu, itu sama saja deng apa yang Tuhan Allah bilang pa Kita.”

聆听 Yohanes 12