<div class="version vid1142 iso6393muy" data-vid="1142" data-iso6393="muy">
    <div class="book bkMAT">
        <div class="chapter chINTRO1" data-usfm="MAT.INTRO1">
            <div class="imt"><span class="content">Ere ye ti m&#601;&#599;&#601;mki ka Ma M&#649;weni Sulumani ya Meciy&#649; &#224;b&#601;ki ni</span></div><div class="ip"><span class="content">Masla&#331;a ya &#224;b&#601;ki wakita ge Meciy&#649; ni &#224;&#599;afay slimi gaya&#331; a wakita ni bu ndo. Ku tamal nahkay n&#601;&#331;gu ni, kwa ka m&#601;nj&#601;ki gani ndam ga Yezu &#599;ek t&#601;&#768;s&#601;ra &#224;b&#601;ki ti Meciy&#649; zal asak ga Yezu ni (Meciy&#649; ti t&#601;zalay na&#331; Levi daya). Masla&#331;a ya &#224;b&#601;ki wakita ni ti zal Z&#649;de, awayay a&#599;afaki ma ga ndam mah&#601;&#331;garay pakama ge Melefit ya t&#601;&#768;&#599;&#601;mbiyu, t&#601;&#768;&#599;&#601;m amagravu ni ti &#224;grava ka sarta ga Yezu e&#599;e&#599;i&#331; a (je&#331;gey Meciy&#649; 1.22-3&#160;; 2.15&#160;; 2.17-18&#160;; 2.23&#160;; 3.3&#160;; ma ndaha&#331; t&#601;&#768;bu aka&#599;a hini daya).</span></div><div class="ip"><span class="content">Ka m&#601;nj&#601;ki ga wakita ni Meciy&#649; &#224;&#599;&#601;mki ma ke miwi ga Yezu. K&#601;l&#601;&#331; gani &#224;&#331;g&#601;ha&#599; ere ye ti Yezu &#224;gray akaba &#224;&#599;&#601;m ni &#599;ek aka&#599;a ga ata Mark nday ata L&#649;k ya t&#224;&#331;g&#601;ha&#599; ni&#160;: Yezu &#224;nj&#601;ki ke t&#649;wi gaya&#331; ka ha&#599; Gelili, &#242;ru gwar a Zer&#649;zalem. Yezu na&#331; &#224;bu agray t&#649;wi gaya&#331; ni ti g&#649;zit &#224;na g&#649;zit ndam ya ta&#599;&#601;bay na&#331; ni t&#601;&#768;s&#601;r na&#331; ti na&#331; way&#160;; k&#601;l&#601;&#331; gani Piyer &#224;&#599;&#601;m Yezu ti na&#331; Krist bay g&#601;&#599;akani ya amara ni (16.16). Piyer &#224;ra &#224;&#599;&#601;ma pakama nana ti k&#601;l&#601;&#331; gani Yezu &#242;ru gwar a Zer&#649;zalem, wu&#599;aka akoru ti &#224;hi ana ndam ma&#599;&#601;bay na&#331; ni ah&#224;r &#224;&#599;&#601;m t&#226;ka&#599; na&#331; eslini, m&#601;k ama&#331;gaba e kisim ba (16.21).</span></div><div class="ip"><span class="content">E ki&#599;i&#331; ga pakama ga Yezu ya &#224;&#599;&#601;m ni bu ni ti Meciy&#649; &#224;daba ndaha&#331; a, &#224;slamatakabu, &#224;b&#601;ki ka m&#601;la&#331; g&#601;rg&#601;ri zlam a wakita gaya&#331; ni bu&#160;: ma ga Yezu ya &#224;&#599;&#601;m ka h&#601;ma ni (5.1&#8211;7.29), ma ga Yezu ya &#224;&#599;&#601;m ka ya ti asl&#601;r ndam asak gaya&#331; ni (10.1&#8211;11.1), ma gozogul ga Yezu ya &#224;&#599;&#601;mki ka M&#601;gur ge Melefit ni (13.1-52), ah&#601;mamam ndam ga Yezu t&#226;nj&#601;ha&#599;kabu ni (18.1&#8211;19.2) akaba ma ga Yezu ya &#224;&#599;&#601;mki ka mandav ga duniya ni (24.1&#8211;25.46).</span></div><div class="ip"><span class="content">Meciy&#649; a&#599;&#601;fiki ana leli zlam ya ti t&#224;grakivu ka Yezu ni ti &#224;gravu aka&#599;a ga zlam ya ti &#224;grakivu ka ndam Izireyel a Wakita ge Melefit ya ahaslani bu ni. Yezu &#224;sl&#601;ka ka ha&#599; Ezip a aka&#599;a ga ndam Izireyel na (2.14-15)&#160;; t&#224;baray na&#331; aka&#599;a ga ndam Izireyel ya t&#224;sl&#601;kaba a d&#601;luv ba ni (3.13), &#224;caka daliya a hu&#599; gili ba (4.1) m&#601;k &#224;c&#601;liya a h&#601;ma va ga macahi Divi ge Melefit ana mis aka&#599;a ge M&#649;wiz ya &#224;gray na (5.1). Yezu ti na&#331; bay m&#601;gri t&#649;wi ana Melefit ya &#224;cakay daliya a k&#601;la geli vu ni (Izayi 53.4&#160;; Meciy&#649; 8.17)&#160;; na&#331; Wur ge Mis, ya Deniyel &#232;pi Melefit am&#601;fiyu na&#331; a bay vu ni (Deniyel 7.13-14&#160;; Meciy&#649; 9.6). Yezu &#232;ndeveri&#331;aba t&#649;wi gaya&#331; na &#599;ek&#160;: kani ti na&#331; &#171;&#160;Melefit ya anj&#601;ha&#599; akaba leli ni&#160;&#187; (Emen&#649;wel) ya Izayi &#224;&#599;&#601;mki ma ni (Izayi 7.14&#160;; Meciy&#649; 1.23&#160;; 28.20).</span></div>
        </div>
    </div>
</div>

Ere ye ti məɗəmki ka Ma Mʉweni Sulumani ya Meciyʉ àbəki ni
Maslaŋa ya àbəki wakita ge Meciyʉ ni àɗafay slimi gayaŋ a wakita ni bu ndo. Ku tamal nahkay nəŋgu ni, kwa ka mənjəki gani ndam ga Yezu ɗek tə̀səra àbəki ti Meciyʉ zal asak ga Yezu ni (Meciyʉ ti təzalay naŋ Levi daya). Maslaŋa ya àbəki wakita ni ti zal Zʉde, awayay aɗafaki ma ga ndam mahəŋgaray pakama ge Melefit ya tə̀ɗəmbiyu, tə̀ɗəm amagravu ni ti àgrava ka sarta ga Yezu eɗeɗiŋ a (jeŋgey Meciyʉ 1.22-3 ; 2.15 ; 2.17-18 ; 2.23 ; 3.3 ; ma ndahaŋ tə̀bu akaɗa hini daya).
Ka mənjəki ga wakita ni Meciyʉ àɗəmki ma ke miwi ga Yezu. Kələŋ gani àŋgəhaɗ ere ye ti Yezu àgray akaba àɗəm ni ɗek akaɗa ga ata Mark nday ata Lʉk ya tàŋgəhaɗ ni : Yezu ànjəki ke tʉwi gayaŋ ka haɗ Gelili, òru gwar a Zerʉzalem. Yezu naŋ àbu agray tʉwi gayaŋ ni ti gʉzit àna gʉzit ndam ya taɗəbay naŋ ni tə̀sər naŋ ti naŋ way ; kələŋ gani Piyer àɗəm Yezu ti naŋ Krist bay gəɗakani ya amara ni (16.16). Piyer àra àɗəma pakama nana ti kələŋ gani Yezu òru gwar a Zerʉzalem, wuɗaka akoru ti àhi ana ndam maɗəbay naŋ ni ahàr àɗəm tâkaɗ naŋ eslini, mək amaŋgaba e kisim ba (16.21).
E kiɗiŋ ga pakama ga Yezu ya àɗəm ni bu ni ti Meciyʉ àdaba ndahaŋ a, àslamatakabu, àbəki ka məlaŋ gərgəri zlam a wakita gayaŋ ni bu : ma ga Yezu ya àɗəm ka həma ni (5.1–7.29), ma ga Yezu ya àɗəm ka ya ti aslər ndam asak gayaŋ ni (10.1–11.1), ma gozogul ga Yezu ya àɗəmki ka Məgur ge Melefit ni (13.1-52), ahəmamam ndam ga Yezu tânjəhaɗkabu ni (18.1–19.2) akaba ma ga Yezu ya àɗəmki ka mandav ga duniya ni (24.1–25.46).
Meciyʉ aɗəfiki ana leli zlam ya ti tàgrakivu ka Yezu ni ti àgravu akaɗa ga zlam ya ti àgrakivu ka ndam Izireyel a Wakita ge Melefit ya ahaslani bu ni. Yezu àsləka ka haɗ Ezip a akaɗa ga ndam Izireyel na (2.14-15) ; tàbaray naŋ akaɗa ga ndam Izireyel ya tàsləkaba a dəluv ba ni (3.13), àcaka daliya a huɗ gili ba (4.1) mək àcəliya a həma va ga macahi Divi ge Melefit ana mis akaɗa ge Mʉwiz ya àgray na (5.1). Yezu ti naŋ bay məgri tʉwi ana Melefit ya àcakay daliya a kəla geli vu ni (Izayi 53.4 ; Meciyʉ 8.17) ; naŋ Wur ge Mis, ya Deniyel èpi Melefit aməfiyu naŋ a bay vu ni (Deniyel 7.13-14 ; Meciyʉ 9.6). Yezu èndeveriŋaba tʉwi gayaŋ na ɗek : kani ti naŋ « Melefit ya anjəhaɗ akaba leli ni » (Emenʉwel) ya Izayi àɗəmki ma ni (Izayi 7.14 ; Meciyʉ 1.23 ; 28.20).

聆听 Meciyʉ Ere ye ti məɗəmki ka Ma Mʉweni Sulumani ya Meciyʉ àbəki ni