KAHTAMYENGHAN 8
8
Muleampu Jüpmah
1Hüpoi Kahwange Noah hei I phei ghonu me ngohpu üyin yinmok üshei hüyange ching yinmok üshei teih-e tüo; hüyange Kahwange kahtoknyu me wangyang ja leine tam, hüyange yeng-a eamah; 2yengching yengpeiwo hüyange wangdang tawolan küp; hüyange wangmepu yeipu wai tüke lak, 3hüyange yeng-a kahtoknyu mepu yelakpe jüppe mah. Hüyange nyih gho ja phei me denga ngoi phei me yeng-a eamah, 4hüyange leat nyit, hüyange nyih pen me nyit shepupa nyih me ghonu-a Ararat kahtang me ngoi. 5Yeng-a yelakpe jüppe ta, hüyange leat pen shepupa üwangpa nyih me kahtang shedaopupa ngeye wangyangki.
6Nyih deli phei me Noah-e Iye lingpu ghonu tawo ep, 7hüyange lye khawang ja shonne tei. Tüopa leih-e üye hüyange yeng-a kahtoknyu mepu jaosheye ea manmah manmah lingleiye puwe ngoh. 8Tüophei me kahtok mepu yeng-a hüm-e lakman shi she shinglak jingne, lye awshu ja shonne tei; 9hüpoi awshuwa yoi yaloklak yetüopu jingne, I tangte ghonu te muh leih ye, hangjingne kahtok üshei me yeng ngoh. Tüokhei, üne-o Iye yoi yak ngaiye I yahyange yoi phei ghonu me in. 10lye üne-o nyih nyit tanne ngoh, hüyange nishe lye awshuwa ghonu mepu shonne tei; 11hüyange awshuwa ünpong me I tangte leih ye, hüyange leihu, I ju me olive peyak üla ja jepyange ngoh. Tüokhei yeng-a kahtok te hümme yeteki she Noah-e shing. 12Hüyange Iye üne-o nyih nyit tanyange, awshuwa shonne tei, tüo ünpa-a I tangte leih üye.
13Noah wangpeng gho wok phei me ja shepupa, üwangpa leat, hüyange üwangpa nyih me, yeng-a chahwannyu mepu eamah; tüophei me Noah-e ghonu te küppu epyange lei, hüyange leihu, kahtok-a ea-teiye ngoh. 14Leat ni shepupa, nyih da me nyit shepupa me kahtok meimei-e eamah yangki.
15Tüokhei Kahwange Noah te i, 16“Nang, hüyange nenok sheko, nahalan hei nyemnyalan ghonu mepu yutüoh. 17Mei üshei yomepu nang phei üyin ngohpu üshei, awhalan hei ching yinmoklan, shom-e kempu yinmok hangheyin kahtoknyu me pah-e tainang, nang phei ghonu mepu ngaitüoh; hüke iman chahwannyu me wangmanne puh-e hüyange jalunne chahwannyu me ngailak.” 18Tüokhei, Noah, I hayimlan, hüyange I sheko hei nyemnya nyulan ngai. 19Hüyange yinmok üshei, wang awhalan üshei, hangheyin kahtoknyu me po nang, yoi yoi ükhong ghonu mepu yu.
Noah-e Dopu Ja Pha
20Tüophei me Noah-e Youngwanpa jingne wümjong ja ling; hüyange jaoshepu yinmok mepu, hüyange jaoshepu awhalan mepu yahyange lye wümjong me jak dopu ja do. 21Hüyange dopu phawe Youngwanpa mongmei ne tam, hüyange Youngwanpawe yoi nying nyingke hüke i, “Taowe kahtanyuha jingne nishe kahtoknyu te yephoilak hangjingne kahtanyuha mongjang me teihpu naha memuh ümeng ngoh nang; yejema-a Taowe lüohe üshei nishe Taowe ja me lingpu kih-e mah ne yetamlak. 22Kahtoknyu hangshin ngohlakei ngohwante, deidei lilalak hei tah yahpu hipak, wangshüm hei wanglüm, jüo hei eanyu, nyihning yaning ngaipu yelaklak.”
Àwon tá yàn lọ́wọ́lọ́wọ́ báyìí:
KAHTAMYENGHAN 8: KONYBSI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Konyak Naga Bible - ÜJAO LAITEP
Copyright © 2011 by The Bible Society of India
Used by permission. All rights reserved worldwide.