Luk 21

Ŋaazɩkuzluŋlɔ 'la vavalʋʋ

(Mak 12.41-44)

1Na, Zozii ya 'ci 'kʋbhli 'nyɩ ɔ kopea nyɩbhɛlɩa ‑ɔ zʋa 'lɛ mala vavalɩɩa 'dlɔan nɩkplaan na 'ciin. 2Ɔ ya ŋaazɩkuzluŋlɔ bhlo ‑ma 'lɩ, ɔ zʋa 'yɛpɩ 'deencie ‑mɔsɔ 3'nyɩ ɔ ya 'cla lebhe: «N solu anyɩ ɩ ‑glɩ ‑nʋawlɛ, ŋaazɩkuzluŋlɔ ‑naa, ɔ ya 'nyɩ, ɔ ya ‑danaanʋaa 'fɩan 'kʋzi. 4Sa ma ‑naa 'fɩan mala 'bhɛlɩa 'la zuloa 'kʋ ma 'manɩ 'lɛ 'nyɩ ma ya 'lɛ 'nyɩ. ‑Ma ɔmɔ, ɔla ŋaazɩa nɩkplaan, ‑tɛtɛa 'fɩan ɔ ‑kaa 'lɛ ɩya ɔ 'kaa kʋ na, ɩmɩ ɔ 'nyɩ 'lɛ.»

Zozii nyɩtɛ Laagɔpaakadiea 'la ‑gbɔlʋwɔlɩ

(Mat 24.1-2; Mak 13.1-2)

5Sa ‑anʋa nyɩtɛa 'lɛ Laagɔpaakadiea* 'la nanɔa ɩya vavalɩɩ 'nanɩa 'fɩan ma ‑zʋʋ 'lɛ nɩkplaan 'la cɩa wɔlɩ na, Zozii ya 'cla lebhe: 6«Ɩmɩ ‑naa 'fɩan a 'lɩmʋ 'lɛ na, clɩɩ bhlo cɩ 'ka ŋeni ɩya cokwie bhlogbɩɩ 'la ka ɛ licokwie 'kʋ ‑to: Ɩmɩa ‑tɛtɛa cɩ 'ka ‑gbɔlʋɔ.»

Zozii nyɩtɛ bhɩalɩdaa 'la wɔlɩ

(Mat 24.3-8; Mak 13.3-8)

7Na, ma ya Zozii neencla lebhe: «Canyɔ, clɩɩsaa 'kʋ ɩmɩ ‑naa cɩ 'kaa 'lɛ ŋeni 'nyɩ ghledasaa ‑ɩ cɩ kaa 'lɛ palalɩ le ɩ cɩ 'ka ŋeni bha?» 8Ɔ ya maa 'cla lebhe: «A zʋlʋ pɔlɛ 'kʋ ɩya a 'la kʋa 'dɛ, ma 'la 'nyiglilia anyɩ. Sa, ncaabhutukpa cɩ 'ka 'na 'ŋlɩa 'ma ɩya ma 'ka ci. Ma cɩ 'ka 'cla lebhe ‑amʋ ma ‑glɩ 'lɛ, ‑aana clɩɩa ya ŋeni, ‑ma a 'la gɩlɩa maa. 9Daa a cɩ 'ka 'lɛ tʋ ɩya zɔgblɩ 'la wɔlɩ 'nu na, pɔlɛɛn 'la 'wlʋa anyɩ. Sa ɩ ‑fata le ɩmɩ ‑naa ŋenini ‑bɛɛ, ‑ma ‑laagɔzɔan 'la bhɩadaa cɩ 'ta ka ka pɔtɔnʋ ŋeni.»

10Na Zozii ya maa 'cla lebhe: «'Bhlɩ ɩ cɩ 'ka 'bhlɩ tʋ ŋeni ɩya nyɩbhɛlɩdu 'ka nyɩbhɛlɩdu tʋ ŋeni. 11‑Dʋdʋ cɩ 'ka ‑gbɔɔn tɩtɛlɩ. 'Bhlɩ ‑bhutukpa 'kʋ, gukadɩ cɩ 'ka ncɛlɩ 'bhla ɩya ŋɔmʋ 'ka pla. Ŋanɔkalɩwɔlɩ ɩya 'ciinzizieligbɩ 'kadɩ cɩ 'ka ‑laagɔa nɩkplaan 'wlʋlʋ.

Ɩmɩa ‑ɩ cɩ 'ka 'lɛ gɩlɩnyaa ŋeni na

(Mat 10.17-22; Mak 13.9-12)

12‑Ma 'fɩɔn ɩya ɩmɩ ‑naa ‑tɛtɛa 'ka 'lɛ ŋeni na, ma cɩ 'ka anyɩ 'kʋbhli ɩya ma 'ka anyɩ gbaylɩsa. Ma cɩ 'ka anyɩ bhibhiepalɩa* ‑zɔn famʋ ɩya ma 'ka anyɩ ‑palʋʋn 'pa. ‑Amʋ 'wluku, ma cɩ 'ka anyɩ nyɩbhɛlɩ ɩya goonvlacɩ ‑deliin fa. 13A cɩ 'ka 'dɛ 'plɩlɩ ɩya a 'ka 'na ‑danʋfʋɛ li. 14A zʋ acɩ 'wluun le ɩ 'ta ‑fata le a pʋ 'kʋklʋun ɩya a 'matɩ ɩmɩa a cɩ 'ka 'lɛ nyɩtɛ, ɩya a 'ka 'lɛ acɩ 'kʋtɩtɔlʋ na. 15Sa ‑amʋ, n cɩ 'ka anyɩ wɔlɩ neen zʋ ɩya n 'ka anyɩ dɩgalɩ 'nyɩ, ala ‑zɔbhɛlɩgbanyɔ bhlogbɩɩ cɩ 'ta 'lɛ mino ɔ 'ka 'lɛ ‑daa 'kʋ ‑sa ‑aana ɔ 'ka 'lɛ gbatlɩmʋnʋ na. 16Anyɩ 'titi ala valɩnya, a bholiecɩ, ala 'slinya ɩya a 'nagwɩɛcɩ ‑ɔ cɩ ‑ka 'lɛ anyɩ 'pɛlʋzʋ, ɩya ma 'ka anyɩ nɩkplaan, ‑bhutukpa 'kwɩ neen fa. 17‑Amʋ 'wluku, ncɛlɩa 'fɩan cɩ 'ka anyɩ zɔbhɛlɩ. 18‑Ma ala 'wlu 'la nyacie bhlogbɩɩ cɩ 'ta mlɔ. 19A kla kpaan, sa pɔɔklalɩɛa nɩkplaan ala jabhʋa cɩ 'ka 'lɛ 'wlʋlʋ.

Ɩmɩa ‑ɩ cɩ 'ka Zolizalɛmʋdua ŋeni na

(Mat 24.15-22; Mak 13.14-20)

20Daa a cɩ 'ka 'lɛ tavʋkandi 'lɩ ɩya ɩ 'ka 'lɛ Zolizalɛmʋdua 'kpamu zʋ na, a cibhlili le 'dua 'la gbɔlʋclɩɩa ya ŋeni. 21Na, 'dɛ 'la daa, maa ‑ɔ ‑cɩ ka 'lɛ Zudeebhlɩa 'kʋ kʋ na, 'naa ma 'gu ɩya ma mʋ 'kikia nɩkplaan. Maa ‑ɔ ‑cɩ ka 'lɛ Zolizalɛmʋdua nɩkplaan kʋ na, 'naa ma 'wlʋʋ nɩkplaan. Maa ‑ɔ ‑cɩ ka 'lɛ 'kwlɩɩn kʋ na, ma 'la cɔlɔa 'dua nɩkplaan. 22Sa kpasaclɩɩ ɩ cɩ 'ka 'lɛ 'plɩ, clɩɩa nɩkplaan ɩmɩa ‑tɛtɛa ‑ɩ ‑kʋ zieziewɔlɩ 'lɛ na, cɩ 'ka 'lɛ 'kʋglalɩ na. 23Na, clɩɩ ‑naa 'kʋ, 'ŋwlɛa ‑ɔ ‑ka 'lɛ nɩkpla kalɩ ɩya maa ‑ɔ cɩ ‑ka 'lɛ 'cuo nyɩa na, ɩ cɩ 'ka 'tɛbhalɩ ɩ 'ka maa ‑nyɩɔ. Sa 'kwlɩbhɩɛ 'kadie cɩ 'ka 'bhlɩa ŋeni ɩya Laagɔ 'ka ɔla dɔgbɛa ncɛlɩa 'kʋ ‑salɩ. 24Ma cɩ 'ka maa 'bhla, ma 'ka maa 'bhlɩa ‑tɛtɛa 'kʋ ‑palʋʋn 'pa ɩya ncɛlɩa ‑ɔ 'ta 'lɛ Zifʋnya* ‑glɩ na, ma 'ka Zolizalɛmʋdua 'kʋnamʋnʋ ‑aan, ɩya mala daa 'ka 'plɩ.

Nclɔɔa 'Cʋa 'la cilɩɛa 'la wɔlɩ

(Mat 24.29-31; Mak 13.24-27)

25'Ghledɩ ‑bhutukpa cɩ 'ka 'ylʋbhuoa, cabhuoa ɩya ‑zɔlʋa nɩkplaan 'plɩlɩ. Ɩya ‑dʋdʋa 'kʋ, ncɛlɩ 'ka pɔɔvʋʋn kʋ ɩya gea 'la neengbalɩa ɩya ɛla vʋlɩɛa 'ka maa pɔlɛɛn ‑sa. 26'Wugo cɩ 'ka ncɛlɩ 'wlu 'wlʋ, ŋanɔkalɩwɔlɩa ‑ɩ cɩ 'ka 'lɛ ‑laagɔzɔan ŋeni na, ɩla pɔɔvʋa 'la gbʋ, sa ‑laagɔɔn 'la 'tɛtɩa cɩ 'ka 'dɩdɔ. 27Na, ma cɩ 'ka Nclɔɔa 'Cʋa* 'lɩ, 'nyukplu 'kɔɔ ‑didio ɩya ɔ 'ka 'tɛtɩa 'fɩan ɩya 'klʋagbaa ‑tɛtɛa nɩkplaan cili. 28Daa nʋnʋgbɩ ‑naa cɩ 'ka 'lɛ 'plɩlɩɛ bhɔ na, a 'nyugo ɩya a ‑bho 'wlu 'kʋ, sa ala gbʋʋnsalɩɛ ya cɩmɛ.»

'Figisua 'la ‑nyandla

(Mat 24.32-35; Mak 13.28-31)

29'Nyɩ Zozii ya maa wɔlɩ bhlo palalɩ 'nyɩ ɔ ya 'cla lebhe: «A kope ka 'figisu ɩya ‑daa sia 'fɩan: 30Daa a lɩɩ 'lɛ 'nyɩ ɩ tlʋ 'lɛ 'taakpɩ ‑leli na, anyɩ 'titi a cibhlili sɛɛ le ‑kɔkwɛ ya cɩmɛ. 31'Sɛtɛɛ bhlogbɩɩ, anyɩ ‑ma, daa a cɩ 'ka 'lɛ ɩmɩ ‑naa 'lɩ ɩya ɩ 'ka ŋeni na, a cibhlili sɛɛ le Laagɔ 'la Nyɩbhɛlɩdua* ya cɩmɛ. 32N solu anyɩ ɩ ‑glɩ ‑nʋawlɛ le 'bhlɛsʋʋn ‑naa 'la ncɛlɩa cɩ 'ta 'plɩ 'nyɩ ɩmɩ ‑naa ‑tɛtɛa cɩ ŋeni. 33‑Laagɔɔn ɩya ‑dʋdʋa cɩ 'ka 'plɩ, ‑ma 'na wɔɔnyɩtʋa cɩ 'ta 'plɩ.

A gblɩbhalɩ

34A gblɩbhalɩ, ala pɔlɩa 'la ka sɛ 'fɛtlɩlilie, nʋmlanɩɛ, ‑laagɔzɔn 'la pɔɔplelɩɛ nɩkplaan 'kʋwɔbhalɩ ɩya clɩɩ ‑naa 'la ka anyɩ ‑zɔnvuvusa 'kʋ bhlili le 35‑dada 'bhisa. Sa ɩ cɩ 'ka ncɛlɩa 'fɩan ‑ɔ ‑kʋ 'lɛ ‑dʋdʋa 'kʋ na, 'kʋ bhlili. 36Na, a 'la ŋɔmʋa, ‑ma a bhibhie clɩɩa 'fɩan ɩya a ‑ka 'tɛtɩ 'lɩ, a 'ka nʋnɩgbɩa 'fɩan ‑ɩ ci 'lɛ 'yɛpɩ na ‑sɩa ɩya a 'ka Nclɔɔa 'Cʋa* ‑deliin 'nylugo.»

37Zezezeliin, ka Zozii kʋa 'lɛ Laagɔpaakadiea* ‑zɔn, ɔ caa 'lɛ 'nyɩ 'ylʋ ‑ka bhli na, ɔ wlʋ 'lɛ ‑zɔn 'nyɩ ɔ mʋ 'lɛ 'kikea ma la 'lɛ ‑Olivisikikea na 'wlu, 38'nyɩ ‑zʋkpasa 'pɩɩ, 'bhlɩnyaa 'fɩan cio 'lɛ 'bhlɩ Laagɔpaakadiea ‑zɔn, le ma 'kɔɔ 'nyukwliinpo.

Àwon tá yàn lọ́wọ́lọ́wọ́ báyìí:

Luk 21: NTLD13

Ìsàmì-sí

Pín

Daako