مَتَّى 10
10
الْفَصْلْ الْعَاشْرْ
يَسُوعْ كَيْصِيفْطْ تْلَامْدُه الطّْنَاشْ
1وْمْنْ بَعْدْ عَيّْطْ يَسُوعْ عْلَى تْلَامْدُه الطّْنَاشْ وْعْطَاهُمْ السُّلْطَة بَاشْ يْخَرّْجُو الجّْنُونْ وْيْشَافِيوْ النَّاسْ مْنْ كُلّْ عْلَّة وْمْنْ كُلّْ مَرْضْ. 2وْهَادُو هُمَ السّْمْيَاتْ دْيَالْ الرُّسُلْ الطّْنَاشْ: اللّْوّْلْ فِيهُمْ سِمْعَانْ الْمْكَنِّي بُطْرُسْ وْخُوهْ أَنْدْرَاوُسْ، وْيَعْقُوبْ بْنْ زَبَدِي وْيُوحَنَّا خُوهْ، 3وْفِيلُبُّسْ وْبَرْتُولَمَاوُسْ، وْتُومَا، وْمَتَّى مُولْ الضَّرِيبَة، وْيَعْقُوبْ بْنْ حَلْفَى وْتَدَّاوُسْ، 4وْسِمْعَانْ الْوَطَنِي، وْيَهُودَا الْإِسْخَرْيُوطِي اللِّي غَيْخُونْ يَسُوعْ.
5وْصِيفْطْ يَسُوعْ هَادْ الطّْنَاشْ وْوْصَّاهُمْ وْݣَالْ: «مَا تْمْشِيوْشْ لْعَنْدْ الشّْعُوبْ اللِّي مَاشِي يْهُودْ وْمَا تْدَخْلُوشْ لْمْدُونْ السَّامِرِيِّينْ، 6وَلَكِنْ سِيرُو لْعَنْدْ الْخْرْفَانْ الْمُّوضّْرِينْ اللِّي مْنْ شَعْبْ إِسْرَائِيلْ، 7وْفْطْرِيقْكُمْ خَبّْرُو النَّاسْ بْلِّي الْوَقْتْ دْيَالْ مَمْلَكَةْ السَّمَاوَاتْ رَاهْ قَرّْبْ. 8شْفِيوْ الْمَرْضَى، وْحْيِيوْ الْمُوتَى، وْرَدُّو الْمْجْدَامِينْ طَاهْرِينْ، وْخَرّْجُو الجّْنُونْ. خْدِيتُو بْلَاشْ إِيوَا عْطِيوْ بْلَاشْ. 9مَا تْدِّيوْ فْجْيُوبْكُمْ لَا دْهَبْ، لَا فْضَّة، لَا نْحَاسْ، 10لَا رَزْمَة، لَا جُوجْ لْبْسَاتْ، لَا صْبَّاطْ، لَا عْكَّازْ، عْلَاحْقَّاشْ الْخْدَّامْ كَيْسْتَاهْلْ مَاكْلْتُه.#1كورنتوس 9:14؛ 1تيموتاوس 5:18 11وْالْمْدِينَة وْلَا الدُّوَّارْ اللِّي دْخَلْتُو لِيهُمْ، سْوّْلُو عْلَى شِي حَدّْ يْسْتَاهْلْ يْضَايْفْكُمْ، وْبْقَاوْ عَنْدُه حْتَّى تْمْشِيوْ بْحَالْكُمْ. 12وْإِلَا دْخَلْتُو لْشِي دَارْ، سَلّْمُو عْلَى مَّالِيهَا. 13وْإِلَا كَانُو مَّالِينْ الدَّارْ يْسْتَاهْلُو سْلَامْكُمْ، سْلَامْكُمْ يْوْصَلْ لِيهُمْ. وْإِلَا مَا كَانُوشْ يْسْتَاهْلُوهْ، سْلَامْكُمْ يْرْجَعْ لِيكُمْ. 14وْإِلَا مَا قْبْلُوكُمْشْ مَّالِينْ شِي دَارْ وْلَا شِي مْدِينَة وْلَا مَا سْمْعُوشْ لْكْلَامْكُمْ، خَرْجُو مْنْ تْمَّ وْسُوسُو الْغَبْرَة اللِّي فْرْجْلِيكُمْ.#الاعمال 13:51 15نْݣُولْ لِيكُمْ الْحَقّْ: رَاهْ حَالْةْ أَرْضْ سَدُومْ وْعَمُورَة فْيُومْ الْحِسَابْ غَادِي تْكُونْ خَفّْ مْنْ حَالْةْ دِيكْ الْمْدِينَة».#لوقا 10:4-12
التَّعَدُّو اللِّي جَايْ
16«هَانِي كَنْصِيفْطْكُمْ بْحَالْ الْخْرْفَانْ بِينْ الدّْيَابْ، إِيوَا كُونُو عْلَى بَالْ بْحَالْ اللّْفَاعِي، وْضْرِيْفِينْ بْحَالْ الْحْمَامْ.#لوقا 10:3 17وْرَدُّو بَالْكُمْ مْنْ النَّاسْ، حِيتْ غَادِي يْدِّيوْكُمْ لْلْمَحَاكِمْ، وْفْدْيُورْ الصّْلَاة دْيَالْهُمْ غَيْضْرْبُوكُمْ،#مرقس 13:9-11؛ لوقا 12:11،12؛ 21:12-15 18وْغَيْجَرُّوكُمْ قُدَّامْ الْحُكَّامْ وْالْمُلُوكْ عْلَى قْبْلِي، بَاشْ تْشَهْدُو لِيَّ قُدَّامْهُمْ وْقُدَّامْ الشّْعُوبْ اللِّي مَاشِي يْهُودْ. 19وْمْلِّي يْدِّيوْكُمْ مَا تْرَفْدُوشْ الْهَمّْ لَا كِيفَاشْ وَلَا آشْ غَادِي تْݣُولُو، حِيتْ دِيكْ السَّاعَة غَادِي يْتّْعْطَاكُمْ آشْ غَتْݣُولُو. 20عْلَاحْقَّاشْ مَاشِي نْتُمَ اللِّي غَادِي تْهَضْرُو، وَلَكِنْ الرُّوحْ دْيَالْ بَّاكُمْ اللِّي فْالسّْمَا هُوَ اللِّي غَادِي يْعْطِيكُمْ الْكْلَامْ اللِّي تْݣُولُوهْ. 21الْخُو غَيْسَلّْمْ خُوهْ بَاشْ يْتّْقْتَلْ، وْالْبُو غَيْسَلّْمْ وَلْدُه بَاشْ يْتّْقْتَلْ، وْالْوْلَادْ غَيْنُوضُو ضْدّْ وَالِدِيهُمْ وْغَيْقْتْلُوهُمْ،#مرقس 13:12؛ لوقا 21:16 22وْغَيْكَرْهُوكُمْ ݣَاعْ النَّاسْ عْلَى وْدّْ الْإِسْمْ دْيَالِي. وَلَكِنْ اللِّي بْقَى تَابْتْ حْتَّى لْلّْخْرْ غَيْنْجَا.#متى 24:9؛ مرقس 13:13؛ لوقا 21:17؛ متى 24:13؛ مرقس 13:13 23وَلَكِنْ مْلِّي يْتّْعَدَّاوْ عْلِيكُمْ فْشِي مْدِينَة، هَرْبُو لْوَحْدَة خْرَى. رَانِي نْݣُولْ لِيكُمْ الْحَقّْ: مَا تْجِيوْ فِينْ تْضُورُو عْلَى مْدُونْ إِسْرَائِيلْ كُلّْهُمْ حْتَّى يْجِي وَلْدْ الْإِنْسَانْ».
24«رَاهْ التّْلْمِيدْ مَاشِي حْسَنْ مْنْ الْمُعَلِّمْ دْيَالُه، وَلَا الْخْدَّامْ حْسَنْ مْنْ سِيدُه.#لوقا 6:40؛ يوحنا 13:16؛ 15:20 25بَرَكَا عْلَى التّْلْمِيدْ إِلَا كَانْ بْحَالْ الْمُعَلِّمْ دْيَالُه، وْالْخْدَّامْ بْحَالْ سِيدُه. وْإِلَا سْمَّاوْ مُولْ الدَّارْ بَعْلَزَبُولْ، إِيوَا شْنُو غَيْسَمِّيوْ مَّالِينْ دَارُه؟#متى 9:34؛ 12:24؛ مرقس 3:22؛ لوقا 11:15
26مَا تْخَافُوشْ مْنّْهُمْ، عْلَاحْقَّاشْ ݣَاعْ اللِّي مْسْتُورْ غَادِي يْتّْعَرَّى، وْݣَاعْ اللِّي مْخَبِّي غَادِي يْبَانْ.#مرقس 4:22؛ لوقا 8:17 27وْعْلَى دَاكْشِّي، اللِّي ݣْلْتْ لِيكُمْ فْاللِّيلْ، ݣُولُوهْ فْالنّْهَارْ. وْݣَاعْ دَاكْشِّي اللِّي سْمَعْتُوهْ فْالسِّرْ، بْرّْحُو بِيهْ مْنْ فُوقْ السّْطُوحَ. 28مَا تْخَافُوشْ مْنْ هَادُوكْ اللِّي كَيْقْتْلُو الدَّاتْ وْمَا يْقَدْرُوشْ يْقْتْلُو الرُّوحْ، وَلَكِنْ خَافُو مْنْ هَادَاكْ اللِّي قَادْرْ يْهْلَكْ الرُّوحْ وْالدَّاتْ بْجُوجْهُمْ فْجَهْنَّمْ. 29يَاكْ جُوجْ طْيُورْ كَيْتّْبَاعُو بْدْرْهَمْ وَاحْدْ! وَلَيْنِّي مَا غَيْطِيحْ حْتَّى وَاحْدْ فِيهُمْ فْالْأَرْضْ مْنْ غِيرْ إِلَا بْغَا بَّاكُمْ اللِّي فْالسّْمَا. 30أَمَّا نْتُمَ حْتَّى شْعَرْ رَاسْكُمْ رَاهْ كُلُّه مْحْسُوبْ. 31إِيوَا بْلَا مَا تْخَافُو، رَاكُمْ حْسَنْ مْنْ بْزَّافْ دْ الطّْيُورْ. 32اللِّي غَيْعْتَرْفْ بِيَّ قُدَّامْ النَّاسْ، غَنْعْتَرْفْ بِيهْ حْتَّى أَنَا قُدَّامْ بَّا اللِّي فْالسَّمَاوَاتْ. 33وَلَكِنْ اللِّي غَيْنْكَرْنِي قُدَّامْ النَّاسْ، حْتَّى أَنَا غَنّْكْرُه قُدَّامْ بَّا اللِّي فْالسَّمَاوَاتْ».#2تيموتاوس 2:12
مَاشِي الْهْنَا وَلَكِنْ السِّيفْ
34«عَنْدَاكْ يْحْسَابْ لِيكُمْ بْلِّي جِيتْ بَاشْ نْدِيرْ الْهْنَا عْلَى الْأَرْضْ، رَاهْ مَا جْبْتْشْ الْهْنَا وَلَكِنْ جْبْتْ السِّيفْ. 35جِيتْ بَاشْ نْفَرّْقْ بِينْ الْوَلْدْ وْبَّاهْ، وْبِينْ الْبَنْتْ وْمّْهَا، وْبِينْ الْعْرُوسَة وْعْݣُوزْتْهَا. 36وْغَادِي يْوَلِّيوْ عْدْيَانْ بْنَادْمْ هُمَ مَّالِينْ دَارُه.
37اللِّي عْزِيزْ عْلِيهْ بَّاهْ وْلَا مُّه كْتَرْ مْنِّي، مَا يْسْتَاهْلْنِيشْ. وْاللِّي عْزِيزْ عْلِيهْ وَلْدُه وْلَا بَنْتُه كْتَرْ مْنِّي، مَا يْسْتَاهْلْنِيشْ. 38وْاللِّي مَا يْهَزّْشْ صْلِيبُه وْيْتْبَعْنِي، مَا يْسْتَاهْلْنِيشْ.#متى 16:24؛ مرقس 8:34؛ لوقا 9:23 39حِيتْ اللِّي بْغَا يْنَجِّي حْيَاتُه غَادِي يْخْسَرْهَا، وْاللِّي خْسَرْ حْيَاتُه عْلَى قْبْلِي غَادِي يْنَجِّيهَا».#متى 16:25؛ مرقس 8:35؛ لوقا 9:24؛ 17:33؛ يوحنا 12:25
الْأَجْرْ
40«اللِّي رَحّْبْ بِيكُمْ رَحّْبْ بِيَّ، وْاللِّي رَحّْبْ بِيَّ رَحّْبْ بْهَادَاكْ اللِّي صِيفْطْنِي.#لوقا 10:16؛ يوحنا 13:20؛ مرقس 9:37؛ لوقا 9:48 41وْاللِّي رَحّْبْ بْشِي نْبِي وْهُوَ عَارْفُه نْبِي، غَادِي يَاخُدْ أَجْرْ بْحَالْ دْيَالْ النّْبِي. وْاللِّي رَحّْبْ بْشِي وَاحْدْ مْتَّاقِي اللَّهْ وْهُوَ عَارْفُه مْتَّاقِي اللَّهْ، غَادِي يَاخُدْ أَجْرْ بْحَالْ دْيَالْ اللِّي مْتَّاقِي اللَّهْ. 42كُلّْ مْنْ كَيْعْطِي لْوَاحْدْ مْنْ هَادْ الصّْغَارْ وَاخَّا غِيرْ كَاسْ دْ الْمَا بَارْدْ عْلَاحْقَّاشْ هُوَ تْلْمِيدْ دْيَالِي، نْݣُولْ لِيكُمْ الْحَقّْ، رَاهْ مَا غَيْضِيعْشْ فْالْأَجْرْ دْيَالُه».
Àwon tá yàn lọ́wọ́lọ́wọ́ báyìí:
مَتَّى 10: MSTD
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
