San Mateo 7
7
Ásï jáma arhinhchpeni
(Lc 6.37-38,41-42)
1“Ásï jáma je arhinhchpeni ka chájtujtsï no arhinhchanhantaaka, 2jimboka ambe engajtsï cha arhinhchpeaka, májkuentsï arhinhchanhantaaka ka ambe engari útspeaka méntkuendi k'uanhaskumenhantaaka. 3¿Nénari chéti erachini tekaasïni jarhuatani enga echenharhitini jaka, ka t'úri no exekorheni kostiasïni engari jukanharhitini jaka? 4¿Nénari jimbosï tekaajki chéti erachini arhini? ‘Jurajkukini p'ínharhikuntani ambe engakini echenharhitaka’ ka jiniri t'u kostiasïni jukanharhitini jarhani. 5¡Ískuri ísï uandasïnga! Kostiasïni urheta p'ínharhikorhentsï ka jiájkaniri sési éskaaka ka úakari chéti erachini p'ikunharhikuntani ambe enga echenharhitaka.”
6“Ásï jáma je pímbinhasï ambe uíchuechani íntsaani o tsakapu mereari jukaparharini kúchichani k'uanitskakuaani, ásïksï inde t'auajchakue ka ásïksïni uíchuecha k'uanhajpatse katsarheni.”
Jurhengorhe kurhajkorheni
(Lc 11.9-13; 6.31)
7“Kurhajkorhe ka intsïnhaakari, jirinhantsï ka xéntaakari, uámuta ka mítamenhaakari, 8jimboka ne enga kurhajkorhejka intsïnhasïndi, ka ne nema enga jirinhantajka xéntasïndi ka ne nema enga uámutatspejka mítamenhasïndi.”
9“¿Jaki cha ma ísï ixu, engaksïni chári uátsïti ma kurhinda ma kurhacheaka ka t'u tsakapu ma íntskuni? 10¿O ekakini kurucha ma kurhacheaka ka t'u akuitse ma p'akarhkurhatani? 11Ekachkajtsï cha nóambakeparini, jurhenaka chári uátsïtichani ambakiti ambe íntsaani, ¡Náxanderu ambakiti ambe íntsaua chári Táte enga auandarhu jaka imechani engaksï kurhakuaka!”
12“Ísï jimbo néna engajtsï uéjka eskajtsï kánhaaka, ísï kámpe je, jimboka ísïska juramukuani kurhajchani ka Diósïri uandarichani kurhajchaani.”
No kómukurhasti
(Lc 13.24)
13“Jimesï incha enga no kómukurhaka, jimboka uanhenhaska engaksï jimesï inchajka enga kómukuarhaka, ka engaksï ima xanhari kóstini jatajka enga tsînchetpejka; 14k'óru no kómukurhasti ka no kórurhasti ima xanhari enga tsípekuarhu pérpejka ka namuntkuksïsï xéntajti.”
Jángua jimbojtsï mítpeaka
(Lc 6.43-44)
15“Jinguntku jáma je diósïri uandari eratakorherichani jinguni, engaksïni karichini járhantatini janochejka ka k'óruksï incharini jiuatsïni apejpentspitini. 16Imecheri jángua jimbojtsï míteantaauaka. ¿Andi tsïtunirhu úba p'ikunhantasïnki o tsurhumurhu jígusï p'ikunhantasïnki? 17Ísï jimbo, jarhasti ambakiti anhatapu enga ambakiti amanhejchakua jukajka, ka ístu jarhasti anhatapu enga no ambakiti amanhejchakua jukajka. 18No úati anhatapu ambakiti no ambakiti amanhejchakua jukani, ka nójtu úati no ambakiti anhatapu ambakiti amanhejchakua jukani. 19Náki uéjki anhatapu ma enga no áspiti amanhejchakua jukajka, ch'apanhasïndi ka kurhinhantani. 20Ísï jimbojtsïsï imecheri jángua jimbo míteantauaka.”
Diósïri irechekuarhu no iámendu inchanhaati
(Lc 13.25-27)
21“Nóksï iámendu ima engajtsïni ‘¡Acha, Acha arhijka!’ Inchaati auandarhu anapu irechekuarhu, imajkuksïsï inchaati engaksï ísï jámka eska jucheti Táte enga auandarhu jaka na uéjka. 22Uánekuajtsïni imani jurhiatekua arhiati: ‘Acha, Acha, ¿Andi nóchi chéti jakangurhikua jimbo arhijtsïkpeski, ka chéti jakangurhikua jimbochi nóambakitichani petarhpeantaani ka uánekua milagruechanchi úani?’ 23Ka jiájkani ji arhiauaka: ‘Nóksïni míteska ¡Kéndikuchejtsïni nósesi ambe úricha!’”
K'umanchekua sési úkata
(Mc 1.22; Lc 6.47-49)
24“Ima engarini kurhajka ka jucheti uandakuechani marhuataani, acheti míakua jukari ma jinguni terukutantasïnga enga k'umanchekua úni jámani tsakapurhu karhakua píjtsïtaka. 25Ka janispti, ka iurhentpeni ka kánekua tarhiani, ka méntku k'umanchekuani nósesi kántani, ka k'umanchekua no xerekorhentaspti jimboka tsakapu pítsetixapka. 26K'óru ima engarini íni uandakuechani kurhajchani jaka ka no marhuataani, acheti no míakua jukari ma jinguni terukutantasïnga enga k'umanchekuani kutsarindu úpka. 27Janispti ka iurhentpeni ka kánekua tarhiani, ka méntku k'umanchekuani nósesi kántani, ka kuáskuspti ka xerendurhikorhentaspti.”
28Enga Jesusi k'amarapka uandani, ísku pakareranhatixapti imeri arhijtsïkperakuani kurharini, 29jimboka jarhamekua jinguni jurhentpesïrempka ka no ísï eskaksï juramukua jurhentpiricha na jurhentpejka.
Àwon tá yàn lọ́wọ́lọ́wọ́ báyìí:
San Mateo 7: DKPJ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Biblia en P´urhépecha, Michoacán, México © Sociedad Bíblica de México, A.C.
