San Mateo 10
10
Jesusi témbeni tsimani jurhengorherichani erakuasti
(Mc 3.13-19; Lc 6.12-16)
1Jesusi témbeni tsimani jurhengorheri jémbechani erakuaspti, ka juramukua íntsaaspti nósesi jarhati espirituechani petarhpeantaani, ka mámaru jásï p'amenchakuechani ka p'ikuarherakuechani ambakerpeantaani.
2Ístiksï témbeni tsimani jurhengorhericha: Simoni uénani enga Pédru arhinhempka; ka erachi jémba Andresï; ka Juánu, Sebedeo uájpecha; 3ka Felipe ka Bartolome ka Tomasï; ka Mateo tumina tánantsti; ka Jakobu Alfeo uájpa; ka Lebeo engajtuksï Tadeo arhimpka; 4ka Simoni uarhipiti ka Júdasï Iskariote, ima enga Jesusini intsïnharhitpepka.
Jesusi jurhengorherichani jurhentpeni axaasti
(Mc 6.7-13; Lc 9.1-6)
5Íni témbeni tsimani, Jesusi axaani jámani arhistakuaspti: “No jakajkuticheri xanhari jimbo ásï ni je, ka Samaria anapu iretecharhu ásï inchaaku je, 6sánderu sáni karichi tsînchekatecha Israeli anapuecha jinguni ni je. 7Ka arhijtsïkpeakajtsï eska auandarhu anapu irechekua janoxakaia. 8P'amenchatichani ambakerantaa je, ka uarhirichani tsítantaa je, ka xúta jukarhekorherichani p'ikurheantaa je, ka nóambakitichani petarhpeantsï je. Chájtsï ísku intsïnhaska íni ambe, chájtu ásï ambe ma kurhajkorhe je.”
9“Tumina ásï p'ájtakorhe je, méntku nóma jásï; 10sutupu ka mórhekorhekuajtu ásï pájtakorhe je, o kuarhachi o tenhexkorhekua ka imani ambe engajtsï xanhari jimbo uétarhenchapaaka, jimboka ánchekorheri ma sésekua jatsisïnga eska t'ireranhaaka.
11Ka engajtsï k'éri iretarhu ma o sapichu iretarhu ma niáraaka, jirinhantsï je nemani engajtsï mintsinharhiaka, ka imecho pakara je engajtsï jamberi uéakuntaska. 12Ekari nani niáraaka, jima anapuechani sési uandajpaa. 13Ka ekaksï jima anapuecha jukanchaka eskaksï uandajpanhaaka, chéti sési jakua imani k'umanchekuarhu jauati; k'óru ekaksï jima anapuecha no jukanchaka eskaksï uandajpanhaaka, sési jakua no jima pakaraati. 14Ka engaksïni nema nósesi erokaaka, ka nóksïni kurhani, ima kumanchekuarhu o iretarhu uéakuntsï je ka t'upuri sésisesi uauanduntsï je. 15Sési jimboksïni arhixaka eska jurhiatekua enga útatsperanhaaka, ima iretarhu anapuechaksï sánderu k'amanharhiranhantaati eskaksï Sodoma ka Gomorra anapuecha.”
Atanhantsï kánhaaka
16“Jíksïni karichini axaxaka jimesï engaksï jiuatsïcha uánekua jámka, jinguntku jáma je, ísï eskaksï akuitsecha ka jipunicha na jámka.”
17“Jinguntku je, jimbokaksïni juramuticha jinguni páaka, ka k'umanchekua tángorhentskuecharhuksïni k'uikirheati, 18ka ístujtsï jíndeni jimbo k'érati juramuticha jinguni pánhaaka ka irechecha jinguni; ísïjtsï úaka jima uandantani jucheti ambe ka iámendu iretechani mítetaraani. 19Ka engajtsï juramutichani jinguni pánhaaka, ásï jáma je uandanheani ambe o nénajtsïsï uandaa, jimajtsï jánhastanhaaka ambe enga k'uanijka uandani, 20jimbokajtsï no chásï uandaaka, chári Táteri Espirituksïnisï uandaraati.”
21“Márkuechaksï uandikperaati, ka tátechaksï uájpechani uandikuauati, ka sapichaksï tátjembani ka amambani mókukuati ka uándikuauatiksï. 22Jucheti jakangurhikua jimboksïni kurhunheati; k'óru ima p'ímutantskateuati enga tekaantaaka k'amarhuni jamberi. 23Engaksïni ireta ma jimbo atakuekaaka, máteru iretarhu ni je sïpakorheni. Sési jimbochkaksïni arhixaka eska Acheti Uájpa junguaka engajtsï nótki iápuru Israeli anapu iretecharhu nirani jauaka.”
24“Jurhengorheri ma no sánderu k'éri ambesti eska jurhentpiri jémba, ka jántspiri májtu no sánderu k'éri ambesti eska imeri ánchetpiri. 25Nósesisti eska jurhengorheri jurhentpirini uanokuaka. Ka engaksï tekaajka Belsebu arhini imani enga chéni jémbo k'érika, ¡Nénaksï no tekauaia sánderu nósesi arhiani chéni jémbo anapuechani!”
Ásï chérhpe je
(Lc 12.2-7)
26“Ásï chérhpe je, jimboka mítekorheaka iámendu ambe enga no mítekorheka, ka xarhatanhantaati ambe enga jískakata jaka. 27Ambe engaksïni pájpakandu arhijka, chájtsï jurhiatekua uandantaaka, ka ambe engaksïni ji arhindikuni jaka, taiajtsïtakatecharhu uératini uinhacha je uandantani. 28Ásï chérhea je uándikpitichani, jimbokaksï no úsïnga mintsita uándikutspeni; sánderu sántsï imanisï chérheaka enga anhanhatakuani ka tsípekuani chpírirhu k'uanijpajka.
29¿Andi cha no míteski, eskaksï tsimani kuínicha ma taiakata jimbojkusï piánhajka? Ka eska nóma uekorhentasïnga eka chári Táte no uékaaka. 30Ísï jimbo, jauiri jamberijtsï sési miiumenhatixaka. 31Ásï che je: Chájtsï sánderu jukaparhaska eskaksï kuínicha.”
Jesusi jingunini
(Lc 12.8-9)
32“Eka nema uánekuechani japarini uandaska eska jíndeni jinguniska, jíjtuni ima jingunini uandaaka jucheti Táteni japarini enga auandarhu jaka. 33Ka eka nema uánekuechani japarini uandaaka eska no jíndeni jinguniska, jíjtuni no ima jingunini uandaaka jucheti Táteni japarini enga auandarhu jaka.”
Jesusini jimbo uarhiperanhaati
(Lc 12.51-53; 14.26-27)
34“Ásï ísï eratse je eskani ji parhakpeni sési pájperakuasï juka juáni, nósesi pájperakuasïni juka juáni, uarhiperata ambesïni juáka. 35Eska tataka, tátjembani mókukuaka, ka eska nanaka amambani mókukuaka, ka tarhamba tarhampirini mókukuni, indenisïni juka juáni. 36Ísï jimbo, márkuechaksï kurhunhperaati.”
37“Ne enga tátjembani ka amambani sánderu uékaaka eska jíndeni uékani, no nitatarhenchasïndi jíndeni jingunini, ka ne enga uájpechani sánderu uékaaka eska jíndeni, no nitatarhenchasïndi jíndeni jingunini. 38Ka ne enga no ichandikorheaka krúsini ka chúxapandini, no nitatarhenchasïndi jíndeni jingunini. 39Ima enga tsípekuani patsakorhekuekaaka, tsîtaati, k'óru ima enga imeri tsípekuani jíndeni jimbo tsîtaaka, p'ímutantskorheati.”
Diósï maiampentaati
(Mc 9.41)
40“Ima engaksïni sési erokaaka, jíndentsïnisï sési erokani jati, ka ne engarini sési erokani jaka, sési erokaxati imani engarini axaka. 41Ne enga Diósïri uandarini ma mítentaakaka ísï sési erokani, méntkueni andakua intsïnhaati eska Diósïri uandari ma, ka ne enga kaxumbitini ma sési erokaaka, kaxumbitiri itsïmperata intsïnhaati. 42Eka nema, jucheti sapini ma ísïni itsï ts'irapiti íntskuaka, jimbokarini jíndeni chúxapasïnga, sési jimboksïni arhisïnga eska intsïmperakua andakorhetixakaia.”
Àwon tá yàn lọ́wọ́lọ́wọ́ báyìí:
San Mateo 10: DKPJ
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Biblia en P´urhépecha, Michoacán, México © Sociedad Bíblica de México, A.C.
