KEJADIAN 1
1
Dunia Kijadi
1Ku imemula, Jenang Kicipte langit ru bumi ru ma de mong ku ikateh.
2Bumi pekseg bebentok ru lekat kusong. Teu jerek bikelimbog ya gengwer tapi Kelog Jenang Kibegerak ku kemil teu ajeh.
3Jenang Kiurok, “Hodloh mong cahaya,” lalu cahaya pen mong. 4Jenang Kirasa honj Isengik bile Kineng hal ajeh. Telas ajeh Kek Kipeaseg cahaya ju gengwer. 5Jenang Kiog muh cahaya ajeh “Yah” ru guer ajeh “Kelem.” Bile kelem ya lalu ru jadiloh pegelap, begei ajehloh genap arik petame.
6Telas arik ajeh, Jenang Kiurok, “Hodloh mong ruang kusong ku semakdek teu supaye kicerlah teu ajeh nu nar bahagian.” Lalu hal ajeh pen belaku. 7Begei ajehloh Jenang Kicerlah teu ku kerop ruang kusong ajeh ju teu de mong ku ikemil. 8Jenang Kiog muh ruang kusong ajeh “Langit.” Bile kelem ya lalu ru jadiloh pegelap, begei ajehloh genap arik kedue.
9Telas arik ajeh, Jenang Kiurok, “Hodloh teu de mong ku kerop langit kigel nu nanek tempat supaye tik de sod ajeh bibakek.” Lalu hal ajeh belaku. 10Jenang Kiog muh tik de sod ajeh “Darat” ru kumpulan teu ajeh “Laot.” Jenang Kirasa honj Isengik bile Kineng hal ajeh. 11Jenang Kiurok nij, “Hodloh tik kiperhol dikdij jenis cengwai, begei jenis de kiperhol benih ru jenis de kiperhol pelek de bermat.” Lalu hal ajeh belaku. 12Begei ajehloh tik kiperhol dikdij jenis cengwai. Jenang Kirasa honj Isengik bile Kineng hal ajeh. 13Bile kelem ya lalu ru jadiloh pegelap, begei ajehloh genap arik ketige.
14Telas arik ajeh, Jenang Kiurok, “Hodloh mong bende-bende terang ku langit kaha-peaseg yah ju kelem, ru hodloh dikdij ajeh kijadi tanda ha arik, tahut ru musem. 15Hodloh bende-bende terang ku langit ajeh kiperlau bumi.” Lalu hal ajeh belaku. 16Jenang Kicipte nar bende terang, de entoi ajeh mat arik kaha-kuasa yah ru de macot ajeh gecek kaha-kuasa kelem. Jenang juga Kicipte perloi. 17Jenang Kidek dikdij bende terang ajeh ku langit supaye kiperlau bumi, 18ru supaye kibekuasa ku yah ru kelem, ru supaye kipeaseg cahaya ru guer. Jenang Kirasa honj Isengik bile Kineng hal ajeh. 19Bile kelem ya lalu ru jadiloh pegelap, begei ajehloh genap arik keempat.
20Telas arik ajeh, Jenang Kiurok, “Hodloh laot tebeg ya bebegei jenis bende sui, ru langit tebeg ya bebegei jenis cep.” 21Begei ajehloh Jenang Kicipte binatag laot de entoi, dikdij jenis bende sui de begerak ku kateh laot, ru dikdij jenis bende sui de bekengyeg. Jenang Kirasa honj Isengik bile Kineng hal ajeh. 22Jenang Kiberkat dikdij ajeh, “Hodloh bende-bende sui ku kateh laot naibiak ru naiterbeg laot, ru juga dikdij jenis bende sui de bekengyeg betambah jeoi ku bumi.” 23Bile kelem ya lalu ru jadiloh pegelap, ajehloh genap arik kelima.
24Telas arik ajeh, Jenang Kiurok, “Hodloh bumi kiperhol dikdij jenis binatag darat joi jenis liknai memaseg: Binatag daknek, maklok de cekcip ku kemil tik, ru binatag ces.” Lalu hal ajeh belaku. 25Begei ajehloh Jenang Kicipte dikdij jenis binatag ces, binatag daknek, ru maklok de cekcip ku kemil tik. Jenang Kirasa honj Isengik bile Kineng hal ajeh.
26Telas ajeh Jenang Kiurok, “Hunen borloh Hibeh sengoi serupa begei ha Lihik supaye enai doh naibekuasa ku dikdij kak ku laot, cep ku langit, binatag daknek, binatag ces, ru maklok de cekcip ku kemil tik.” 27Begei ajehloh Jenang Kicipte sengoi serupa begei ha Ilei. Kek Kicipte keral ru kerdor. 28Telas ajeh Kek Kiberkat, “Hodloh jerkebekenon-cenok jeoi-jeoi supaye kenon-cenok jerkek naigei ru naibekuasa ku seluroh bumi. Bekuasaloh ku kak ku laot, cep ku langit, ru dikdij binatag ku darat.” 29Jenang Kiurok, “Nengloh, Eng ya Ngog dikdij jenis cengwai de kiperhol benih ru de kiperhol bebegei pelek de bermat ku bumi adeh ha caknak jerkek. 30Eng doh juga Ngog dikdij cengwai belaer sebegei caknak nu dikdij binatag de benyawe begei binatag ces ku kemil bumi, cep ku langit, ru maklok de cekcip ku kemil tik.” Lalu hal ajeh belaku. 31Jenang Kineng dikdij ma de ya Kicipte ajeh, ru Kirasa ihad honj Isengik. Bile kelem ya lalu ru jadiloh pegelap, ajehloh genap arik keenam.
Currently Selected:
KEJADIAN 1: AEH
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.