Matayo 16

Wandu kushaya mwakilimbita

(Marko 8:11-13; Luka 12:54-56)

1Nao Wafarisayo na Wasadukayo wakamghendela Jesu wekeshaya kumtegha, wakamlomba adee mwakilimbita kufuma mlunguni. 2Ela Jesu kawatumbulila, “Ngelo ya hafukeni mwanaghoragha, ‘kukalagha kuelile kwa kukala mlunguni kwakusua.’ 3Na naikesho kiro mwanaghambagha, ‘kukalagha laghelaghe lelo, kwani maengu ghadunguluwa.’ Inyo mwanaweni kutambula ghekalagha kwa kuzighana mlunguni, ela simutambulagha alama za izi ngelo. 4Kivali cha ulaghelaghe na sichedumusagha chalomba mwakilimbita, ela sichihawogho mwakilimbita ungi sala mwakilimbita wa Jona.” Nao kawasigha kaghenda ngila zake.

Chachu ya Wafarisayo na Wasadukayo

(Marko 8:14-21)

5Nao Wairimi wake wawambuka chambuko weluwale kutwala mikate. 6Jesu kawauza, “Manyeni na mukulinde na chachu ya Wafarisayo na Wasadukayo.” 7Wakadyowa kuhelea wenyi kwa wenyi wekeghamba, “Ni kwa kukala sititute mikate.” 8Ela Jesu kemanya agha; kaghora, “Inyo wandu wa idumusi ichache kudani muheleagha gha kusowa mikate? 9Ado simutambukilogho? Ado simukumbukagha gha mikate misanu kwa wandu elfu sanu? Mwanajuze vikapu vilinga va misusure? 10Ango mikate mfungate kwa wandu elfu ine, mwanajuze vikapu vilinga va misusure? 11Kudani simotambukilogho kamba seluo nikeghora ighulu ya mikate? Kulindeni na chachu ya Wafarisayo na Wasadukayo.” 12Nao wairimi wakatambukilo kamba seluo kewauza wakulinde na chachu ya mikate, ela na mafundiso gha Wafarisayo na Wasadukayo.

Petro kumghora Jesu kukala ni Masihi

(Marko 8:27-30; Luka 9:18-21)

13Nao Jesu afika isanga lya Kaisari Filipo, kawakotela wairimi wake, “Wandu wanaghoragha Mwana wa Mdamu nani?” 14Nawo wakamtumbulila, “Wamoju waghora ni Johana Mubatizi, wamoju Elija na wamoju Jeremia ango mumoju wa wana tondolo.” 15Naye kawauza, “Nenyo mwanaghoragha nimi ani?” 16Simoni Petro katumbulila, “Uwe nuwe Masihi Mwana wa Mlungu ewo moyo.” 17Nao Jesu kamtumbulila, “Baha uwe Simoni wa Johana! Kwani si mdamu ungi akumanyisa agha, sala Aba ewo mlunguni. 18Nemi nakuza, uwe Petro: nuwe iwe, na kele iwe ilyi nijewaghala ikanisa lyangu na hata ndighi za kifwa sizidimagha kulyisima. 19Nijekuhawa mifungulo ya uzuri ghwa mlunguni na icho chose ujechifungila urumenguni chijefungilo mlunguni na icho chose ujechifungula urumenguni chijefungulo mlunguni.”

20Nao Jesu kawakanyila wairimi wake, siwamghorere mundungi kamba iye ni Masihi.

Jesu kughora ighulu ya masirimi ghake na kifwa chake

(Marko 8:31—9:1; Luka 9:22-27)

21Nao kufuma ilya ngelo Jesu kadyowa kuwaghorera wairimi wake mwazi kamba ni suti aghende Jerusalemu, na asirimiso na malagho mengi ni waghosi, wakohani wabwaa na Walimu wa Sheria na aulagho na ijua lya katatu azuso. 22Nao Petro kamruta na mbali kamkemela, keghamba, “Agha ghakale kulele kwako Bwana, na lyingi sighadeike!” 23Ela Jesu kaghaluka kamuza Petro, “Ghenda noko Shetani! Nuwe kikwalo kwangu, kwani suririkanyagha gha Mlungu sala gha wadamu.”

24Nao Jesu kawauza wairimi wake, “Ngera mundungi ashaya kuniirima, ni suti akukane iye mwenyi na atuke msalaba ghwake na aniirime. 25Kwani uwo wose ashaile kukiza umana ghwake ughulaghazagha na uwo wose elaghazagha umana ghwake kwa undu ghwangu ughupatagha. 26Kwani mundu upatagha faida muni ilyi apata urumengu ghose na kuhaitisa umana ghwake? Ango mundu ufunyagha kimuni kibalo cha umana ghwake? 27Kwani Mwana wa Mdamu ukujagha na wana malaika wake kele ubwaa ghwa Tatie, naye ujemlipa kila mundu kwa madeo ghake. 28Fulo namuza, kuo wamoju weo kimusi aha siwefwighagha hata wamwone Mwana wa Mdamu keja kele Uzuri ghwake.”

Àwon tá yàn lọ́wọ́lọ́wọ́ báyìí:

Matayo 16: SAGALLANT

Ìsàmì-sí

Pín

Daako