পত্থম 4
4
কয়িন আর হেবল
1আদমে তা মোক্কো হবা ইধু গেলে হবা পিদিলী অলঅ, আর কয়িন নাঙে তার এক্কো পুয়ো অলঅ। সেক্কে হবা কলঅ, “লগেপ্রভু মরে এক্কো মরদ্ পুয়ো দিলো।” 2পরেদি তা পেদত্ কয়িন ভেই হেবলর জর্ম অলঅ। হেবলে ভেড়া পাল্ চোরেদ আর কয়িনে ভূইয়ো কাম্ গুরিদো।
3পরেদি এক সময়োত্ কয়িনে লগেপ্রভু ইধু তা ভূইয়োর্ কিজু গুলোগুলি আনিনে উৎসর্ব গুরিলো। 4হেবলেয়ো তা পালত্তুন্ পত্তমে জর্মেয়্যে কয়েক্কো ভেড়া আনিনে সিগুনোর তেলানি উৎসর্ব গুরিলো। লগেপ্রভু হেবল আর তা উৎসর্বয়ানি গুজি ললঅ, 5মাত্তর্ কয়িন আর তা উৎসর্বয়ানি গুজি ন-ললঅ। ইয়েনত্যে কয়িনোর অমকদ রাগ্ অলঅ আহ্ তে মু কালা গুরি থেলঅ। 6এবাবোত্যে দেগিনে লগেপ্রভু কয়িনোরে কলঅ, “কিত্তে তুই রাগ গোজ্যচ্ আর কিত্তেই বা সুদোমু গুরি আগজ্? 7যুদি তুই গম কাম্ গরচ্ সালে কি তঅ মুয়োন আজি-হুজি ন-অদঅ? মাত্তর্ যুদি গম্ কাম নঅ-গরচ্ সেক্কে দঅ শদানে তরে পেবাত্তে তঅ ইধু এইনে বোই থেবগি; মাত্তর্ তারে তত্তুন্ বুঝে আনা পুরিবো।” 8ইয়েন পরেদি একদিন্যে মাদত্ থেবার অক্তত্ কয়িনে তার ভেই হেবল লগে কধা কোইয়্যে, আহ্ সেক্কে তে হেবলরে আক্রমণ গুরিনে মারে ফেলেল।
9সেক্কে লগেপ্রভু কয়িনরে কলঅ, “তঅ ভেই হেবলে কুদু?”
কয়িনে কলঅ, “মুই হবর্ ন-পাং। মঅ ভেইবোর্ দেগাশুনোর ভারান্ মঅ উগুরে নাহি?”
10সেক্কে লগেপ্রভু কলঅ, “ইয়েন তুই কি গোজ্যচ্? চাহ্, ভুইয়োত্তুন্ তঅ ভেইবোর্ লোগানে মইধু এইনে কানের্। 11ভূইয়ানে যেক্কে তঅ আঢত্তুন্ তঅ ভেইবোর্ লোগান গুজি লবাত্তে মুয়োন খুল্যে সেক্কে ভূইয়োর অভিশাপ্পানই তঅ-উগুরে পড়িলো। 12তুই যেক্কে ভূইয়ো চাষ গুরিবে সেক্কে সিয়েনে আর তরে সেধোক্ক্যেন খেত-খেত্তি ন-দিবো। তুই পোল্ল্যেই পোল্ল্যেই পিত্থিমীয়ানত্ ঘুরি বেড়েবে।”
13সেক্কে কয়িনে লগেপ্রভুরে কলঅ, “এ সাজাগান মর্ সোজ্য ন-অর্। 14এচ্চ্যে তুই মরে ভূইয়োত্তুন্ ধাবেই দিলে, যিয়েনত্তে মুই তঅ চোগো আন্দলত্ ওই যেম্। পোল্ল্যেই পোল্ল্যেই মুই যেক্কে পিত্থিমীয়ানত্ ঘুরি বেড়েম্ সেক্কে যিবে মুজুঙোত্ মুই পুরিম তেয়ই মরে খুন গুরিবো।”
15সেক্কে লগেপ্রভু তারে কলঅ, “সালে যে তরে খুন গুরিবো তাহ্ উগুরে সাতগুন হেনা সুজো অবঅ।” ইয়েন কোইনে লগেপ্রভু কয়িনত্যে এন্ এক্কান চিহ্নোর সুদোম গুরিলো যেনে কনজনে তারে আঢত্ পেইনেয়ো খুন্ ন-গরন।
কয়িন বংশর কধা
16ইয়েন পরেদি কয়িনে লগেপ্রভুর্ মুজুঙোত্তুন্ যেইনে এদনর্ পূগেদি নোদ নাঙে এক্কান দেজত্ বজত্তি গরা ধুরিলো। 17পরেদি কয়িনে তা মোক্কো ইধু গেলে তে পিদিলী অলঅ আর হনোকর্ জর্ম অলঅ। সেক্কে কয়িনে এক্কান শঅর্ বানেল। তে তার্ পুয়োবো নাঙান ঢগে শঅরান নাঙান রাগেল হনোক। 18হনোক পুয়োবোর নাঙান্ ঈরদ; ঈরদ পুয়োবোর নাঙান্ মহূয়ায়েল; মহূয়ায়েল পুয়োবোর নাঙান্ মথুশায়েল; মথুশায়েল পুয়োবোর নাঙান্ লেমক।
19লেমকর দ্বিবে মোক্ এলাক্। সিগুনোর একজনর নাঙ্ আদা, আরেক জনর নাঙ্ সিল্লা। 20আদার পেদত্ যাবলর জর্ম অলঅ। যিগুনে তাম্বুলত্ থান্ আর য়েমান পালেনে জীংকানি কাদান্ এ যাবলে তারার পুরোণি মানুচ্। 21যাবল ভেইবোর্ নাঙান্ এলঅ যূবল। যিগুনে বীণা আর বাঁশী বাজান যুবল তারার বেক্কুনোর আগ মানুচ্। 22সিল্লার পেদত্ তূবল-কয়িনোর জর্ম অলঅ। পিদোল আর লোয়ার নানান্ বাবোত্যে মিশিন বানানা তার কাম। তূবল-কয়িন বোন্নোর্ নাঙান এলঅ নয়মা।
23একদিন্যে লেমকে তার দ্বিবে মোগরে কলঅ,
“ আদা আর সিল্লা, তুমি মঅ কধাগান শুনো;
লেমক মোক্কুন্, মঅ কধাগান শুনো।
যে মানুচ্চ্য মরে আঘাত্ গোজ্যে,
অত্তাৎ যে গাবুজ্যেবো মঅ কিয়্যেত্ আত্ তুল্যে,
মুই তারে মারে ফেল্যং।
24কয়িনরে মারে ফেলেবার হেনা যুদি সাতগুন অয়,
সালে লেমকরে মারে ফেলেবার হেনা অবঅ সাতাত্তুর্ গুণ।”
আদমর্ পুয়ো শেথ
25পরেদি আদমে আরঅ তা মোক্কো ইধু গেলঅ সেক্কে তা মোক্কোর্ এক্কো পুয়ো অলঅ। তা মোক্কো সিবে নাঙান্ রাগেল শেথ। হবা কলঅ, “কয়িন হেবলরে মারে ফেলেইয়্যে বিলি গোজেনে হেবল জাগানত্ মরে আরঅ এক্কো পুয়ো দিলো।”
26সে পরেদি শেথর এক্কো পুয়ো অলঅ। তে তার্ নাঙান রাগেল ইনোশ। সেক্কেত্তুন্ ধুরি মানুচ্চুনে লগেপ্রভুরে তার পেবার্ সর্মান দিয়া আরাম্ভ গুরিলাক্।
Àwon tá yàn lọ́wọ́lọ́wọ́ báyìí:
পত্থম 4: CBT
Ìsàmì-sí
Pín
Daako

Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Copyright © 2021 Bangladesh Bible Society