Matiyə̈ 5
5
Jezü mü pö sə̈ azü bhâlə̂ küma aga
1Ndə̂ Jezü wûn kpûlû azü nə̈, tche kênga atə̂lə̂ küma aga kə̈ sə̂ ëbêche. Adjisîpili ndə̂ yê pâlatə̂ andjê kə̈ sə̂ ëndrotə̂ yê. 2Tche jêtə̂ kə̂ nyisə̂ rə sə̈ andjê.
Pö pâ tchôtchô kə̂ sə
(Luk 6.20-23)
3«Nyë wä la mômô, nyënyê ndə̂ nyë wûnsə̂ nə̈ pä rə ndə̂ Yingö wâbo lə̂ su nyê-a,
bëte Gbölö gö-gbïɛ̈ ndə̂ tchêlafô#5.3 Gbölö gö-gbïɛ̈ ndə̂ tchêlafô wä ndjë tə̂ ngâ köbo ndə̂kə̂ to pö ndə̂ Gbölö gö-gbïɛ̈ ndə̂ Ndjapä. wätə̂ andə̂ nye nə̈!
4Nyë wä la mômô, nyënyê ndə̂ nyê kɨ angêta,
bëte Ndjapä âtroadje ngûla nyê!
5Nyë wä la mômô, nyënyê ndə̂ nyê mbo rə nyima-ë,
bëte nyê gboadje cho ndə̂ Ndjapä nyîkrə rə̂ bëte nyê!
6Nyë wä la mômô, nyënyê ndə̂ gʉ kə̂ mbo djîrə̂ rə nyu nyê batə̂ gʉ ngû la kɨ̈zɨ̂,
bëte Ndjapä âkʉadje rə sə̈ nyê gundə̂sə̂ rə ndə̂ su nyê nyîndə̂ nə̈!
7Nyë wä la mômô, nyënyê ndə̂ nyê wun nyonyo azü,
bëte Ndjapä âwun-adje nyonyo nyê!
8Nyë wä la mômô, nyënyê ndə̂ nyë wâ la grôgrô su,
bëte nyê wun-adje Ndjapä!
9Nyë wä la mômô, nyënyê ndə̂ nyê mbo rə̂ pä zɨtɨ su wa lə̂ gbâtə̂ azü,
bëte Ndjapä eadje nyê tə̂ abechë ndə̂ yê!
10Nyë wä la mômô, nyënyê ndə̂ azü mbo arə gbôgbô tə̂ nyê, bëte kə̂ mbo adjîrə̂ rə ndə̂ nyê,
bëte Gbölö gö-gbïɛ̈ ndə̂ tchêlafô wätə̂ andə̂ nye nə̈!
11Nyë wä la mômô, nyënyê ndə̂ azü dro nyê, kə̂ mbo ngbongbo rə tə̂ nyê, kə̂ to angbongbo pö lakə̂ mo yepa la rə̈ nyê bëte mê. 12Äwäpä tə̂ nyê kra-ê, nyê wa la mômô, bëte ngâ gbölö tchôtchô rə kä lakə̂ krʉ bëte nyê bhâ lafô! Ädə̈ käko ânyë azü mbô ngbongbo rə alême tə̂ a-earə̂ ndə̂ma Ndjapä ndə̂ andjë sə̂ dokʉ̈tchê tə̂ nyê#5.12 Nyë dɨ̈ 2 Akn 36.16; Abdj 7.52..»
Pö pâ ngbro la ngbänga
(Mar 9.50; Luk 14.34-35)
13«Nyënyê, nyë wätə̂ ngbro lə̂ gûtə̂ azü pâ cho âtə. Âdə kötchô ngbro nə̈ âyu lə̂nə̈ nə̂, a âmbo tâ atöko ânyë kötchô nə̈ ka ëlə̂nə̈ ngbânə̂? Ngâ rə ndə̂kə̂ mbo rə̂ tâ wâbo-a. Äwä kütû ndə̂kə̂ pa a yi rə̂ atə̂ sûwu ânyë azü dradra rə̂ la da andjê.
14«Nyënyê, nyë wätə̂ ngbänga lə̂ gûtə̂ azü pâ cho âtə. Gö ndə̂ a mbô rə̂ lə̂ küma aga wâbo ndə̂kə̂ zatə̂ yê wü-a. 15Akrə tôâbo wo lə̂ lâmba ndə̂kə̂ za rə̂ ëtchâtchâ lüsû-a. Tche âza rə̂ pâ ngâ rə lafô, ânyë azü tchâalê nə̈ gbɛ̂ wun tchô ndə̂ sɨ̂nyî nə̈. 16Äwäpä ngbänga nyê tcho käko-ë tchâtchu azü gbɛ̂, ânyë andjë wun tchôtchô kə̂ mbo rə ndə̂ nyê, käko ânyë andjë voga Bha nyê ndə̂ tche sə̂ bhâ lafô.»
Jezü la ndïɛ̈
17«Âwâbo pä nyë to rə̂ tə̂ su nyê pä më nə̈ ndə̂kə̂ ndɨ tchə̂lə̂ ndïɛ̈ ndə̂ Möyîze âdəndjë pö ndə̂ a-earə̂ ndə̂ma Ndjapä-a. Më nə̂âbo ndə̂kə̂ ndɨ tchə̂lə̂ nə̈ gbɛ̂-a, më nə̈ ndə̂kə̂ mbo rə̂ ânyë kə̂ dje tchə̂lə̂ nə̈ wa tâ. 18Ɛn-ɛn, tə̂ lëge nə̈ më tö rə̂ sə̈ nyê: Dokʉ̈tchê ndə̂kə̂ pa tchêlafô la tchêbêche âtə ro, ngâ kpîɛ̂kpîɛ̂ mbëtï âdəndjë ngâ kpîɛ̂kpîɛ̂ rə kʉ̂tê Mbëtï-ndïɛ̈ nə̈ balë roabô tee-a, zoo arə gbɛ̂ mbo gundə̂sə̂ nə̈. 19Bëte rə̂ kä, akrə ndə̂ tche kôsə̂ ngâ kpîɛ̂kpîɛ̂ pö lə̂ ndïɛ̈ nə̈, ânyë kə̈ nyîsə̂ köbo kə̂ kosə̂ ndïɛ̈ nə̈ sə̈ azü, tchê wadje tə̂ kpîɛ̂kpîɛ̂ akrə lə̂ Gbölö gö-gbïɛ̈ ndə̂ tchêlafô. Praâbalë akrə ndə̂ tche mbô rə gundə̂sə̂ ndïɛ̈ nə̈, ânyë kə̈ nyîsə̂ rə sə̈ azü ndə̂kə̂ pa andjë mbo ndjë rə̂ käko-ë, tchê wadje tə̂ gbölö akrə lə̂ Gbölö gö-gbïɛ̈ ndə̂ tchêlafô. 20Më tö rə̂ sə̈ nyê päkëdə̂: Âdə nyê âmboabô djîrə̂ rə mbô âro andə̂ a-earə̂ kə̂ nyisə̂ ndïɛ̈ la afarizïɛ̈n nyɛ̂-ɛn, nyê liabô atə̂lə̂ Gbölö gö-gbïɛ̈ ndə̂ tchêlafô tee-a.»
Kə̂ nyisə̂ rə pâ pö ndə̂ mêrâ
21«Nyë djê pö ndə̂ a tô rə̂ sə̈ araâta azə̈ alême nə̂ päkëdə̂: ‹Amö won-abô akrə wôn-ê#5.21 Nyë dɨ̈ Eki 20.13; Det 5.17., akrə ndə̂ tche wôn akrə, a eadje la tchë atə̂ tchâtchu earə̂ kə̂ wa ngbanga›. 22Praâbalë mëmê ndə̂ me nə̈, më tö rə̂ sə̈ nyê päkëdə̂: Akrə ndə̂ tche mbô mêrâ tə̂ ngâ yê, tche kʉ̈sə̂ nə̈ pä a e la tchë atə̂ tchâtchu gbölö kpûlû ndə̂ earə̂ kə̂ wa ngbanga. Akrə ndə̂ tche tô rə̂ sə̈ ngâ yê päkëdə̂: ‹Mo ndɨ̂ nə̂›, a â-eadje la tchë atə̂ tchâtchu a-earə̂ kə̂ wa ngbanga. Akrə ndə̂ tche tô rə̂ sə̈ ngâ yê päkëdə̂: ‹Momö ndə̂ earə̂ nyî âtə›, tche kʉ̈sə̂ nə̈ pä a yi tchë lə̂ wo ndə̂ âju pïï etə̂. 23Âdə mo âsə̈ e ndə̂kə̂ kʉ rə sə̈ Ndjapä pâ gbalâka-ngela, ânyë sə̂ ngâ pö ndə̂ âwâ lə̂ gbâtə̂ zə̈ la ngâ zə̈ tê lə̂ zə̈, 24äwäpä mo gbotə̂ rə nə̈ ndə̂ mo nyikrə rə̂ ndə̂kə̂ kʉ rə̂ sə̈ Ndjapä lâme tchâtchu gbalâka nə̈, kə̂ e, kə̂ nyikrə pö lə̂ gbâtə̂ zə̈ la ngâ zə̈ dokʉ̈tchê ânyë, la tchêngbâ nə̈ mo ka ndə̂kə̂ kʉ rə ndə̂ zə̈ nə̈ sə̈ Ndjapä.
25«Âdə mo âwa la pö la ngâ earə̂ kə̂ kosə̂ zə̈, äwäpä mo djetə̂ zə̈ la tchë gasa-ê, ndə̂ gbô nyê ndə̂po la tchë pâ köbo. Âdə mo âmboabô mbô tâ käko-ë, tche yosə̂ zə̈ sə̈ earə̂ kə̂ wa ngbanga, ânyë earə̂ kə̂ wa ngbanga nə̈ gbotə̂ zə̈ sə̈ aturûgu ndə̂kə̂ pa andjë yi mö bhâlə̂ nda kânga. 26Tə̂ lëge nə̈, më tö rə̂ sə̈ mö: Âdə mo âkʉabô makətche ndə̂ a dɨ̂ rə̂ sə̈ mö kʉ̂ gbɛ̂, mô wutuabô balë lə̂ nda kânga nə̈ tee-a.»
Pö pâ kə̂ pu ɛ̈chë âdəndjë köchë ndə̂ akrə
27«Nyë djê pö ndə̂ a tô rə̂ alême nə̂ päkëdə̂: ‹Amö puabô ɛ̈chë âdəndjë köchë ndə̂ akrə pû-î#5.27 Nyë dɨ̈ Eki 20.14; Det 5.18..› 28Mëmê ndə̂ me nə̈, më tö rə̂ sə̈ nyê päkëdə̂: Akrə ndə̂ tche wûn ɛ̈chë ndə̂ ngâ yê, ânyë kə̈ mbô gʉ yê, dëkë tche pû ɛ̈chë nə̈ bhâlə̂ su yê nə̂. 29Âdə la zə̈ də ndôkö kä âkə̂ mbo rə̂ pä mo te lə̂ ngbongbo rə, amö niɛ rə̂, kə̂ yi rə̂ tʉ̂rʉ tə̂ zə̈. Äfü pä ngâ tchâme-tə̂ zə̈ balë yu, ârô anə̈ ndə̂kə̂ pa a yi ndundu tə̂ zə̈ gbɛ̂ la rə̂ atə̂lə̂ wo ndə̂ âju pïï etə̂. 30Âdə könô zə̈ də ndôkö kä âkə̂ mbo rə̂ ndə̂kə̂ pa mo te lə̂ ngbongbo rə, amö ku rə̂ kə̂ yi rə̂ tʉ̂rʉ tə̂ zə̈. Äfü pä ngâ tchâme-tə̂ zə̈ balë yu, ârô anə̈ ndə̂kə̂ pa a yi ndundu tə̂ zə̈ gbɛ̂ la rə̂ atə̂lə̂ wo ndə̂ âju pïï etə̂.»
Kə̂ nyisə̂ rə pâ pö ndə̂kə̂ gro ɛ̈chë
(Mat 19.9; Mar 10.11-12; Luk 16.18)
31«Nyë djê pö ndə̂ a tô rə̂ alême nə̂ päkëdə̂: ‹Köchë ndə̂ tche grô ɛ̈chë ndə̂ yê, äwäpä tche za mbëtï ndə̂kə̂ kosə̂ ɛ̈chë nə̈ sə̈ tchë#5.31 Nyë dɨ̈ Det 24.1..› 32Mëmê ndə̂ me nə̈, më tö rə̂ sə̈ nyê päkëdə̂: Âdə ngâ köchë âgro ɛ̈chë ndə̂ yê, ndə̂ ɛ̈chë nə̈ pûâbô ngâ köchë ngbî pû-î, ânyë ɛ̈chë nə̈ tô ngâ täfo köchë, dëkë bəndɨ köchë nə̈ kä ndə̂ âmbô rə̂ pä ɛ̈chë nə̈ pu köchë ndə̂ ngâ akrə. Köchë ndə̂ tche tô ɛ̈chë ngbâ ngâ köchë ndə̂ tche grô tchë, dëkë tche pû ɛ̈chë ndə̂ akrə nə̂.»
Pö pâ kə̂ deba
33«Nyë djê ndjë pö ndə̂ a tô rə̂ alême sə̈ araâta azə̈ nə̂ päkëdə̂: ‹Amö deabô ba dê ämbämbänə̈-ê. Rə ndə̂ mo dêba ndə̂kə̂ mbo rə̂ sə̈ Gbölö Gbïɛ̈ ndə̂ zə̈, äwäpä mo mbo rə bä nə̈#5.33 Nyë dɨ̈ Lev 19.12; Nomb 30.3; Det 23.22-24..› 34Mëmê ndə̂ me nə̈, më tö rə̂ sə̈ nyê päkëdə̂: Âwâbo päkëdə̂ nyë deba balë-a. Nyë dëäbô ba dê la rə̈ tchêlafô-ê, bëte tchêlafô wätə̂ tchô ndə̂ Ndjapä sə tâ. 35Nyë dëäbô ndjë ba dê la rə̈ tchêbêche-ê, bëte tchêbêche wätə̂ mbätä ndə̂ Ndjapä kʉ da yê ëpânə̈. Nyë dëäbô ndjë ba dê la rə̈ Jerûzalêmo-ê, bëte Jerûzalêmo wätə̂ gö ndə̂ gbölö Gbïɛ̈. 36Amö deabô ba dê pâ küma zə̈-ê, bëte mo wâbo ndə̂kə̂ mbo rə̂ pä ngâ su küma zə̈ balë watə̂ grôgrô nə̈ âdəndjë tə̂ bübü nə̈-a. 37Âdə nyë âsə̈ to pö, äwäpä pö ma nyê wa kütû balë: ‹Ɛn-ɛn, pö nə̈ kä›, âdəndjë ‹ɛ̂n-ɛ̈n, pö nə̈ də̂âbo rə̂ lâme-a.› Pö gbɛ̂ ndə̂ nyê to rə̂ pâ anə̈ lâme, ätö dəndə̂ Ngbongbo akrə.»
Pö pâ kə̂ mbo ngbongbo rə lə̂ kpâlâ ngbongbo rə
(Luk 6.29-30)
38«Nyë djê pö ndə̂ a tô rə̂ alême nə̂ päkëdə̂: ‹Âdə akrə âtro la zə̈, mo tro ndjë la yê. Âdə tche âkoa jï zə̈, mo koa ndjë jï yê#5.38 Nyë dɨ̈ Eki 21.24..› 39Mëmê ndə̂ me nə̈, më tö rə̂ sə̈ nyê päkëdə̂: Âwâbo päkëdə̂ nyë mbo ngbongbo rə tə̂ akrə ndə̂ tche mbô ngbongbo rə tə̂ nyê-a. Âdə ngâ akrə ârʉa ngälâ zə̈ də ndôkö, amö dje ndjë balë nə̈ sə̈ tchë tralë tche rʉ̂â rə̂. 40Âdə ngâ akrə ânyində̂ kə̂ e la mö bhâ tchâtchu earə̂ kə̂ wa ngbanga ndə̂kə̂ za krʉ lə̂ba ndə̂ zə̈, amö gbo ndjë tə̂ gbölö ngrɨ̈ngrɨ̈ lə̂ba zɨ ndə̂ zə̈ sə̈ tchë. 41Âdə ngâ akrə âza mö la gbôgbô ndə̂kə̂ pa mo za kʉ̂ngbô tə̂ yê kə̂ nə la rə̂ ngbâ kïlömɛ̂tere balë, amö za rə̂ kə̂ nə la rə̂ ngbâ kïlömɛ̂tere bïchuû. 42Âdə ngâ akrə âyu mö tə̂ rə, za rə̂ sə̈ tchë. Âdə ngâ akrə âyu mö ndə̂kə̂ mbo geda tchânə̂ zə̈, koabô sə̂nə̈ kô-ê.»
Kə̂ nyində̂ azü ndə̂ andjë kosə̂ nyê
(Luk 6.26-28,32-36)
43«Nyë djê pö ndə̂ a tô rə̂ alême nə̂ päkëdə̂: ‹Äwäpä mo nyində̂ akrə ndə̂ tche nyîndə̂ zə̈, kə̂ kosə̂ akrə ndə̂ tche kôsə̂ zə̈#5.43 Nyë dɨ̈ Lev 19.18..› 44Mëmê ndə̂ me nə̈, më tö rə̂ sə̈ nyê päkëdə̂: Nyë nyïndə̂ a-earə̂ kə̂ kosə̂ nyê! Nyë tö pö sə̈ Ndjapä bëte azü ndə̂ andjë mbo gbôgbô tə̂ nyê! 45Käko-ë, nyê wadje tə̂ abechë ndə̂ Bha nyê ndə̂ tche sə̂ bhâ lafô. Bha nyê nə̈ kä ndə̂ âmbo rə̂ ânyë lo ndə̂ yê ta pâ angbongbo azü ndjë pâ atchôtchô azü. Tche wän nyïvrö pâ adjîrə̂ azü ndjë pâ a-earə̂ mbə̈lï. 46Âdə nyë ânyi kütû ndə̂ azü ndə̂ andjë nyîndə̂ nyê, tchôtchô rə giamâ kä ndə̂ nyê gbo rə̂ tchânə̂ Ndjapä? A-earə̂ kə̂ pala makətche-lapöo mbö ndjë rə batə̂ rə̂ ndə̂ nyê mbo rə̂ lâme. 47Âdə nyê âpo kütû ndə̂ angâ nyê, rə ndə̂ nyê mbo rə̂ ânyë âro andə̂ adɨ̂sɨ̂ azü də̈ giamâ? Azü ndə̂ andjë wûn-âbô sə̂ Ndjapä wûn-î, andjë mbö ndjë rə batə̂ rə̂ ndə̂ nyê mbo rə̂ lâme. 48Äwäpä nyë watə̂ azü ndə̂ andjë dâka gbɛ̂, batə̂ Bha nyê ndə̂ tche sə̂ bhâ lafô ânyë kə̈ dâka gbɛ̂ lâme.»
Àwon tá yàn lọ́wọ́lọ́wọ́ báyìí:
Matiyə̈ 5: lnl
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Wycliffe Bible Translators, Inc.
