Matiu 2
2
Ria Vana Tarove Iri Tove Jesu
1Jesu i podo e Betelema loborona pua na Judia, torana ko i vae batu lavata Erode. Taramuzina i podo go Jesu, kaki ria vano tarove iri lamae Jerusalema, iri reqeme tepa i keba me saṉa ne. 2Iri lama tana, “Adepa to ikoego sale i podo go, tina batu lavata ria vano Jiu, remu qi mia domiri ia iza keba me tepa i keba me saṉa ne, qi lama go di vabatua ia qi go.”
3Ṉalu batu lavata Erode igata seko dena, iki nanao velaka to kaega, mana gerena napu so osiqira ria iri koego Jerusalema. 4Erode i teṉo qira osiqira patere ro mana vano tarove na tamana, i tana ne qira, “Adepa tane tina podo ego Kristo?”
5Ria iri vataule, “Komala Betelema loborona pua na Judia, tanego iato dena pata i karo bana go propeta ne,
6‘Betelema kena na Judia,
aro qoki lete muzi sivala ne qira
kaega ria batu naro Judia,
tanego de qo koego aro tina reqe
me kakia batu tina kenaqa
ne qira basoero era Izirel.’ ”
7Gonae Erode i koru qira vano tarove iri reqe me tepa i keba me saṉa ne, tarina za mia vamikia tanuna. Mana i tana ne qira, ava torana tane i sadaka go domiri ne. 8Mana taramuzina nae, i turine qira za Betelema, i vane qira de, “Za mana taqi velake sale dena, ṉalu muna za soba go ia, muna lama va rove zave, go tanuqu tuna za vabatu napua ia.”
9Taramuzina iri gata lupo pataro i sine go batu lavata Erode, iri zaza napu. Mana iri mia napua so domiri iri mia bana go, i kenaqa ne qira, go iza noto eso totorana de ikoego sale ne. 10Ṉalu iri mia go domiri ne, iri lete kula sivala. 11Mana ṉalu iri keba za pade ne, iri zamia qiru tamasina Maria, iri koloku tutuṉu iri vabatua Jesu, gonae iri papaqa pata vavagado ria, iri sosovolomo ne Jesu qolu, tala i nonoli velaka mana lodu i nonoli velaka ṉalu iri subia go.
12Do loborona kukureka ria, God i sine ne qira tariniki ule za de ikoego Erode. Gonae iri lulua kaki zuka kakavata mana iri gado ule za komala ro ria.
Josepo Mana Tamasina Jesu Iri Paqa Za Izipito
13Taramuzina vano tarove iri zaza, aqelo ia Batu ne i lama sadake Josepo loborona kukureka, mana i sine ne ia, “Dogara! Pala sale nae, mana sinana paqa za Izipito go. Za koe nae go na doka so ṉalu tuna sine napu nigo era, tanego Erode i nanao tina taqia sale nae mana vae vale igo.”
14Gonae Josepo i dogara me, i lulu qiru tamasina Jesu kuse nae mana iri paqa za Izipito, 15i za koe Izipito go idoka e so ṉalu Erode i le. Go seko ia Batu ne, i va rove ze go propeta tina lama ogoto go, igo, “Qa koru vasiporo bana ze sale era Izipito.”
Erode I Vae Vale Qira Sale Valeke Ro
16Taramuzina Erode i rove vano tarove ne iri poqe go ia, i lete muma sakata, gonae i turine qira vano soldia tarina za vae vale lupo qira sale valeke ro i karua ba iara kaebo karua ave qira iri koego Betelema mana komala ro iri ko garogaro go. Iva todo ze torana ṉalu itana bana ne qira go ria vano tarove ne.
17Iago seko ia Batu ne iva rove zego propeta Jeremaia, qo i sine go, i lama voto, igo,
18“Iri gata zaqe koru,
kaki komala iri
vitoṉo ze Rama,
kaki basoe i dae korukoru
mana i lete maqata go.
Resol i dae qira salero ia,
iri le lupo,
mana ki soko kaega ka basoe
ṉara va velake go
nanao na go,
tanego salero ia
iri kaega lupo.”
Josepo Mana Tamasina Jesu Iri Ule Za Nazaret
19Taramuzina Erode i le, aqelo ia Batu ne i sadaka ze Josepo loborona kukureka tepa Izipito. 20Mana aqelo ne i sine ne Josepo, “Dogara! Lulu qiru tamasina Jesu, mana ule za pua na Izirel, tanego ria iri soko go vae na sale ne iri le bana to.” 21Gonae Josepo i dogara me, ilulu qiru tamasina Jesu mana iri ule za pua na Izirel.
22Ṉalu Josepo i gata Akelus i kavale go tamana, i batu ego Judia, i sareki na zae na de go, tanego i rove bana ze ia loborona kukureka ne, iago Josepo i zae tepa kena Qalili. 23Gonae i za koe kaki komala iri vitoṉo ze Nazaret. Izazu ne iadena go seko ro iri sine bana go propeta ro ne tina lama voto go, “Tarina vitoṉo ze ia valeke na Nazaret.”
Àwon tá yàn lọ́wọ́lọ́wọ́ báyìí:
Matiu 2: VRSNT
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The New Testament in Varisi, Solomon Islands © Bible Society of the South Pacific, 1994, 2004.
