Génesis 4
4
Caino, Abele sho cäcöbö
lä cuaano wei tä a̦
1Tä nö fa dedelönö, Adananö bei suwäbö e nija, ijilu a fa tacönö, Ewa a shibönabölayoma. A fa shibönabölönö, bei ijilubö Caino a tablalema. A fa tablalönö, a wa̦ suwä fama.
—Jeobaanö wale fa bayeliblalönö, iba ijiluyä wa̦lo ya tablalei lä cufe —a cuma.
2A shibönaböa fa co̦lunö, Caino a nodi jamö, bei fääshä Abele e tablaö nomöjölayoma. Cäcöbö fa yawälönö, Abelenö yalo oweja bei bä taboma. Caino bei a li ficalimoma.
3Tä nö fa dedelönö, Jeobaa nija, Cainonö nii bä dodobou ja, a waloquema. 4Inaja bei fääshä e ca̦i nia fa cuaanö, yalo ocalo a dodobobä a ca̦i waloa mö feduquema. Yalo oweja jaba a lä cui a fa yailönö, a fa bacäcälalönö, a ya̦jicö daböjöwä dodoboyoluma.
Inaja a cuaaö ja, Abele nija, Jeobaa a bufi doblaloma. Yalo a lä dodobono wei a ma cui ja, a bufi ca̦i doblaloma. 5Ö̦jö ma cui, Caino nija a bufi doblalou mlai ja, a wailema. Nii bä lä dodobono wei bä ma cui, ebä ca̦i wailema. Ö̦jö cudeenö, Caino a jushudou fe fa balojolonö, a wäyäcu nö quilidaliyoma.
6Jeobaa a lä cuinö, abinaja a nowa tama.
—¿Wedi wa tä tabä wa li jushuo cule? ¿Wedi wa tä tabä wa wäyäcu nö li quiliaö cule? 7Wa dodijaö ja, wa nia waimou malä mlai. Wa dodijaimi ja, wa̦lidiwä tä lä cuinö wa nofi lämaö ajedewä. Ö̦jö tänö wa nofi ma tale ma cui, a bufi yai da wasömamo —Caino a nowa tama.
8Ö̦jö däjä, abinaja Caino a cuaama. Bä fääshä Abele a fa nacaläfälönö, ulifi jamö cäcöbö alayoma. Ö̦jamö cäcöbö yami cuo däjä, bei fääshä a nabä quequema. A nabä fa queicunö, a shälema. 9Ö̦jö a lä shäleno wei ja, Jeobaa a wa̦ fama. Caino a wa̦lima.
—¿Wedi jamö fääshäfä bei a li? —a cuma.
—Cuwi. ¿Wedi jamö a cua mada culawä? ¿Camiyänö ö̦jö ya nofi tabobä ya tawä? —Caino a jushuolibö ca̦i cuobloma.
10Öjö däjä, Jeobaa a wa̦ faö co̦oma.
—¿Wedi wa tä taö dicoo cufe? Mashita jamö, fääshäfä wa i̦yäbö nofi jushua dodijimaquema. Camiyä nija i̦yäbö nö jo̦wa yuamamou bufio lä cule. 11¿Ö̦jö tawä? Mashita a ja, fääshäfä wa i̦yäbö sufamalema cudeenö, fei däjä cafä bäfä nö bleaamaö nomöjöa. Wa nia lä ficalimou wei jamö, ya tä ulifi wa̦lidiblamaö. 12Wa täbä ma döaö wei ma cui, täbä nia cauimi. Wa yai bälöo yanöcöblou mlai ja, showadi moli wa bälödou fa cuaanö, wa nia docua blajalayou —a cuma.
13Jeobaa nija, abinaja Caino a cuu nomöjöoma.
—Inaja wale taamaö ja, ya nö doblobimi waiquiwä. 14Inaja dicowä mlai. Ya ficalimobä, wale doblamabou mlai ja, wale nia jo̦wa yashuablalaö. Cafä wa ma cui nija, ya ca̦i ajedou co̦obä tä nia cuomi. Wale bälömabou yanöcöa mlai ja, moli ya bälödou fa cuaanö, ya jo̦wa nia docuu malä blajaö wei. Inaja ya cuaaö cudeenö, ya docuu lä cuaaimadi jamö wale fa dalalöjenö, wale nia shäö dicooje —a cuma.
15Ö̦jö ma cui, abinaja Jeobaa a cuma.
—Mlaicätä. Cafä wa shäa bädaleije ja, cafä wa nowa ja, camiyänö bluca ya bä nö nia bleaamaö nosi blacäcou —a cuma.
Ö̦jö däjä, Caino a noshi umabou ja, Jeobaanö etä oni taquema. A dablaö bädaoje ja, bä moyawäobä etä oni taquema, a shäö mlaobeje. 16A fa oniblamolunö, Jeobaa a daa showadaquefälöma. Ö̦jö däjä, Caino a blajaa showalayofälöma. Nodo tä ulifi jamö a culayoma. Edena ai tä mashi jamö, motoca a lä faö wei tä mashi jamö, a bälöaliyoma.
Caino nodiwä bä
lä cuono wei tä a̦
17Cainonö suwä a fa dälänö, a fa shibönabömalönö, bä ijilubö Enocö e cublaliyoma. Enocö a lä tablaleno wei däjä, bä fö̦ö e shabonomoma. Ö̦jamö lä Enocö a tablalema cudeenö, ö̦ja bä lä bälöono wei bä lä cui, Enocöteli bä a̦fa jilaa showaquema. Bä ijilubö e a̦fa lä cuono wei jamö, tä a̦fa ulifi yädämaquema.
18Enocö a fa yawälönö, bei suwäbö e däa fa nomöjölönö, bei ijilubö Ilada e cublou nomöjölayoma. Ilada a fa yawälönö, bei suwäbö e däa fa nomöjölönö, cama bei ijilubö Meujali e cublou nomöjölayoma. Meujali a fa yawälönö, cama bei ijilubö Medusali e cublou nomöjölayoma. Medusali a fa yawälönö, cama bei ijilubö Lameco e cublou nomöjölayoma.
19Lameco a fa yawälönö, bei suwäbö ecöbö bolacalema. Ai a lä cui, Ada a wa̦fa cuoma. Ai a mö feduwä lä cui, Sila a wa̦fa cuo mö feduoma. 20Adanö cama bei ijilubö Jabala e tablalema. Ö̦jö Jabala a lä cuinö, yalo ji̦ima ebä bluca fa tabonö, bä iyamabä ebä ca̦i shino jocäaö cuaama. Yalo ebä lä lulubono wejei jamö, yalo sibä ja bä shino wejejou cuaafälöma. Inaja cama a jaba cuaama cudeenö, cama ebä ca̦i cuaaö nodiaö showaoma.
21Jabala bei fääshä e lä cui, Jubala a wa̦fa cuoma. Täbä amowamobä jamö öjönö täbä a̦ jaba madofi jutäma. Bei a̦sita lä jubamou wei täbä ca̦i, täbä lä jolamou wei täbä a̦ jaba ca̦i madofi jutäma. Inaja Jubala a jaba cuaama cudeenö, cama ebä ca̦i cuaaö nodiaö showaoma.
22Lameco bei suwäbö ai e mö feduwä lä cuinö, Sila a wa̦fa lä cuono wei a lä cuinö, cama bei ijilubö Dubacai a tablalema. Ö̦jönö duo shibä ja, madofi bä jaba tama. Shibä lä jude wei shibä ma cui ja, shibä lä jelejei shibä ma cui ja, bä madofi jaba wabama. Dubacai bä yaö e lä cuono wei, Naama e a̦fa cuoma.
23Bei suwäbö cäcöbö nija, Lameco a wa̦ nö wäoma.
—Ada. Sila. Wafäle a̦ da ji̦li. Suwäböyä wafäcö lä cui, cäcöbö yömöca da daicu. Wa̦lo tänö camiyä wale nabä queo ja, ya nö shäa showalebö wei. Oshe tänö ma cui, wale i̦liyamaö bädao ja, ya nö ca̦i yabäcäa showalayobö wei. 24Caino a nowa ja, bluca bä nö nia bleaamaö nosi blacäcou ja, camiyä Lameco ya nowa ja, tä ulifi nia yai blocoblou dodijio —Lameco a cuma.
Adananö Sede a taa nomöjöquema
25Adananö bei suwäbö nija, ijilu ai a taa fa co̦cönö, Ewa a shibönaböa co̦layoma. Bei ijilubö e lä wawämaleno wei däjä, abinaja a suwä cuma.
—Caino a ishou fa dicoonö, ya jaba lä bufiblano wei nija, ya wajäwä nö bleaama. Ö̦jö ma cui, Yai Bada tänö wale bufi lojodoblamaö co̦a lä cule. Ei ya bufibou majöobä, wale dobäa co̦lema yalo, Sede bei ya wa̦fa nia jilabou —a cuma.
26Sede a fa yawälönö, cama bei ijilubö e wawäa fa nomöjömalönö, Enosi a wa̦fa jilaquema. Ö̦jö däjä, yanowamö täbä bayelimamobä, Jeobaa nija bä nö bayeli jaba nacaoma.
Àwon tá yàn lọ́wọ́lọ́wọ́ báyìí:
Génesis 4: GUU
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
©2012, All Rights Reserved