Luka 4
4
Jesũ kũgerua
(Mat 4.1-11; Mar 1.12-13)
1Jesũ nĩ aumire rũjĩni rwa Jorodani ejũrĩtwe nĩ Roho Mũtheru. Roho ũu akĩmũtongoria akĩmwira rwanda. 2Agĩĩkara rwanda ntukũ mĩrongo ĩna akĩgeragua nĩ Nkoma. Atarĩjaga no mbi ntukũ iu mĩrongo ĩna, kwogu ikũthira akĩgua aũti.
3Nkoma akĩmwĩra, “Kethĩrwa gwe ũrĩ Mwana wa Ngai, atha ĩiga rĩrĩ rĩtuĩke mũgate#4.3 mũgate: kiugo gĩkĩ rĩmwe gĩtaũkaga: “irio.” .”
4Nawe Jesũ akĩmũcokeria, “Nĩkwandĩke, ‘To mũgate ũngĩtũũria muntũ mwoyo.’”
5Nkoma akĩmwitithia antũ ĩgũrũ, na o rĩmwe akĩmwonia monene monde ma ndĩ, 6akĩmwĩra atĩrĩ, “Nĩngũkũa monene mama monde na ũkumio bwamo. Marĩ njarani jiakwa na no nenkere muntũ o wonde ndĩnkienda. 7Ũngĩnturĩria maru ũndathaiye, ũnene bũbũ bunde bũgatuĩka bwaku.”
8Nawe Jesũ agĩcokeria Nkoma akĩmwĩra, “Nĩkwandĩke, ‘Thathaagia Mwathani Ngai waku, na ũmũtungatagĩre o we wenka.’”
9Nkoma agĩcoka akĩmwira Jerusalemu, akĩmũtũyia gacũmbĩrĩ ga Hekarũ akĩmwĩra, “Kethĩrwa ũrĩ Mwana wa Ngai, ĩarũkie kuuma aa; 10nĩũntũ nĩkwandĩke,
‘Akatha araika bae bakũmenyeere na bagũĩkarie,’
11Na atĩrĩ,
‘Bagakwambĩĩria na njara jiao
Ũtĩkeje kũringwa kũgũrũ nĩ ĩiga.’”
12Ĩndĩ Jesũ akĩmũcokeria, “Mandĩko nĩmaugĩte, ‘Ũtĩkagerie Mwathani Ngai waku.’”
13Rĩrĩa Nkoma athiririe kũgeria Jesũ na njĩra jionde, akĩmũtiga, o nkinya rĩrĩa akona kanya kangĩ.
Jesũ kwambĩĩria kũunjia Galili
(Mat 4.12-17; Mar 1.14-15)
14Jesũ nĩ acokire Galili atongoretue nĩ Roho Mũtheru, na nkuma yae igĩtamba ndĩ ĩu na kũrĩa kunde kwariganĩtie na yo. 15Nawe akĩrutana sinagoguni#4.15 sinagogu: Nĩ kĩrombero kĩa Ayahudi. jiao na antũ bonde bakamũkumagia.
Jesũ kũregwa Nazarethi
(Mat 13.53-58; Mar 6.1-6)
16Na rĩ, Jesũ nĩ athiire Nazarethi kũrĩa arereretwe. Ntukũ ya Sabatũ#4.16 Sabatũ: Ntuku ya Ayahudi ya kũnogoka ĩgũkinya akĩthi sinagoguni o ta bũrĩa amenyeretie. Akĩrũngama nĩkenda athoma Mandĩko Matheru. 17Akĩnenkerwa mbuku ya kĩroria Isaya, akĩguũria arĩa kwandĩkĩtwe atĩrĩ,
18“Roho wa Mwathani arĩ amwe naani,
nĩũntũ nĩ ambamũrĩte nkaunjie nteto ĩrĩa mbega kĩrĩ nkĩa.
Antũmĩte mbũke ndaũrithie barĩa bathaĩke
Na nĩkenda atumuumu bacoke kwona,
Nkinyũrũkie barĩa bakinyĩĩrie,
19Na mbugĩrĩrie atĩ ũũ nĩu mwaka
ũrĩa Mwathani agũkinyĩria antũ wega wae.”
20Akũthiria kũthoma agĩkunĩka mbuku, akĩmĩcokia kĩrĩ mũmenyeeri wa sinagogu, agĩĩkara ndĩ. Nabo barĩa bonde baarĩ kũu sinagoguni bagĩĩkara bamũraithĩte kũnũũ. 21Nawe akĩbeera atĩrĩ, “Mandĩko mama mathomwa bũkĩgujaga makũinga ũmundĩ.”
22Antũ bonde nĩbamukathiirie, na bakĩrigarua nĩ rwaria rwae rwega. Bakĩũrania, “Anga ũũ tĩ mwana wa Josefu?”
23Nawe akĩbeera, “Gũtĩ nkanja nĩbũkũngwetera ngerekano ĩno: ‘Ndagitarĩ, amba wĩthondeke gwengwa; maũntũ ta mau twĩgwĩte nĩ ũrũthĩte Kaperinaumu marũthe o na gũkũ ntũũrani yaku.’” 24Agĩcoka akĩbeera atĩrĩ, “Ndĩbwĩra atĩrĩ na ma, gũtĩ kĩroria gĩĩtĩkagĩrwa kwao. 25Ta ririkanani kagiita ka Elija; kũu Isiraeli nĩ kwathiririe mĩaka ĩthatũ na mĩeri ĩthandatũ gũtĩkuura mbura. Gũkĩgĩa ĩũra rĩnene mũno kũu kunde. Ĩndĩ o na kethĩrwa nĩ kwarĩ na aka ba ntigwa baingĩ mũno kũu Isiraeli, 26Elija atatũmirwe kĩrĩ no ũmwe wa bo; atũmirwe kĩrĩ mũka ũmwe wa ntigwa wa Zarefathi, kũu Sidoni. 27O na kaĩrĩ kagiita ga kĩroria Elisha nĩ kwarĩ na antũ baingĩ barũarĩte mũtigiri#4.27 mũtigiri: Mũrimũ mũthũku wa ngothi., ĩndĩ gũtĩ we waragithiirue nĩ Elisha, o tiga Namani Mũsuriata.”
28Antũ bonde barĩa baarĩ sinagoguni bakwĩgua ũgu bakĩthũũra mũno. 29Bagĩũkĩra bakĩmũrutũrũra nja ya kũu taũni nene. Bakĩmwira rwarani rwa karĩma karĩa taũni ĩu yakĩtwe, nĩkenda bamwarũkie rwarani ya karĩma kau. 30Ĩndĩ Jesũ agĩkũrũkĩĩra gatagatĩ kao, akĩthiĩra.
Muntũ warĩ na nkoma
(Mar 1.21-28)
31Jesũ agĩcoka akĩĩmana Kaperinaumu, taũni nene ya Galili, na ntukũ ĩmwe ya Sabatũ nĩ arutanaga antũ sinagoguni 32Nĩbarigaraga mũno nĩ ũrutani bwae, nĩ bũrĩa arutanaga arĩ na wathani. 33Kũu sinagoguni nĩ kwarĩ na muntũ warĩ na nkoma#4.33 nkoma: riĩtwa rĩrĩ rĩrĩrũngamĩĩra maroho monde mathũku. Muntũ ũu akiugĩĩria akiugaga, 34“Wuui! Nĩmbi ũkwenda natwi gwe Jesũ wa Nazarethi? Nĩka wĩjĩte gũtũthiria? Nĩnkũmenya gwe ũrĩ ũ; ũrĩ ũrĩa Mũtheru wa Ngai.”
35Ĩndĩ Jesũ akĩmĩgũkia, akĩmĩĩra, “Kira, na uume kĩrĩ muntũ ũũ!” Nkoma ĩu ĩgĩtungumania muntũ ũu nau ndĩ gatagatĩni kao, ĩgĩcoka ĩkiuma, ĩndĩ ĩtamũthũkia no kũ.
36Antũ bonde bakĩrigara. Bakĩũrania, “Ankĩũmba kuuga ũgu atĩa? Muntũ ũũ arĩ na ũnene na inya; arĩatha nkoma jiume ndani ya muntũ na ikauma.” 37Nkuma ya Jesũ ĩgĩtamba gũntũ kunde kũu kwathiũrũkĩrĩtie mwena ũu.
Jesũ kũragithia antũ baingĩ
(Mat 8.14-17; Mar 1.29-34)
38Jesũ agĩũkĩra akiuma sinagoguni, agĩtonya nyomba ya Simoni. Gina wa mũka wa Simoni nĩ arũarĩte mũrimũ wa kwĩgua mwanki mwĩrĩ, nabo bakĩromba Jesũ amũragithie. 39Jesũ akĩrũngama akuĩ nawe, akĩgondokera mũrimũ ũu, nau ũkĩthira. O rĩmwe mũka ũu agĩũkĩra na akĩbamandĩra.
40Na rĩrĩa riũa rĩathũaga antũ bonde barĩa baarĩ na arũaru mĩrimũ nkũrani nkũrani nĩbabaretire kĩrĩ Jesũ, nawe akĩbaigĩĩra njara bonde, akĩbaragithia. 41O najio nkoma ikiuma ndani ya antũ baingĩ ikiugagĩĩria, “Gwe ũrĩ Mwana wa Ngai!”
Ĩndĩ akĩigũkia, agĩikania kwaria, nĩũntũ jio nĩ jiaijĩ we nĩwe Kristũ.
Jesũ kũunjia sinagoguni
(Mar 1.35-39)
42Gwakĩa, Jesũ nĩ aumagarire akĩthi gũntũ gũtarĩ na antũ. Antũ bakĩmũcũa na rĩrĩa bamwonire bakĩgeria kũmũgirĩrĩria kuuma kũu kwao. 43Ĩndĩ we akĩbeera atĩrĩ, “No nkinya mpunjie Nteto Ĩmbega ya Ũnene bwa Ngai kĩrĩ antũ ba ntũũra irĩa jiĩngĩ o najio, nĩũntũ bũu nĩbu Ngai antũmire mbĩja kũrũtha.”
44Jesũ akĩthi mbere kũunjia sinagoguni jia kũu kunde Judea#4.44 Judea: Mandĩko mangĩ ma tene maugaga: “Galili” .
Àwon tá yàn lọ́wọ́lọ́wọ́ báyìí:
Luka 4: LUKA
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
God's word open for all
©Bible Society of Kenya, 2021
