Ŋitic. 8
8
1Ayai Saulo nen, kitojokite atwanare a Stepano.
Kisican Saulo ŋikanupak a Yesu
Akoloŋit ŋin, tolomu akisicanio ŋina aronon nooi natukot a ŋikanupak a Yesu ŋina ayai Yerusalem. Kielarae ŋikanupak daadaŋ, toloto ikes Yudeya ka Samaria; kidoŋo Ŋikiyakia bon. 2Tonuka nai Stepano ŋikilyok ŋulu ainakina neni ka Akuj, kigworos nooi aŋuna keŋ.
3Nai abu Saulo kisyak akinyasun ŋatukon a ŋikanupak; erimit iŋes nakais akiriunun ŋikilyok ka ŋaberu, toen ikes alomabus.
Tolimonokinae Ŋakiro ŋuna Ajokak alo Samaria
4Apotu ŋikanupak ŋulu aponi kielarae tolimonokis Ŋakiro ŋuna Ajokak nakwapin daadaŋ ŋuna apotu ikes toloto. 5Tolot epei kec ŋolo anyaritae Pilipo lotaun ŋolo apolon alo Samaria, tolimonok ŋituŋa ŋakiro ŋuna a Kristo. 6Ani iirarete ŋasepico ŋakiro a Pilipo ka toanyuwasi ŋakujuwuanisya ŋuna etiyae iŋes, topupokis nooi daadaŋ ŋakiro ŋuna erworo iŋes. 7Anerae apotu ŋipyan tolomut alotuŋa a ŋulu alalak iworoete nooi a etoil a ŋolo apolon; kitaŋaleunoe ŋulu alalak ŋulu alilim ŋakoyo ka ŋawat ka ŋulu aŋwalito. 8Aŋun, toyakaun alelyan nooi lotaun ŋolo apolon ŋol.
9Ayai lotaun ŋol ekile ŋolo anyaritae Simoni, ŋolo sek kitiyae ŋakikukujaeta, ŋolo kebu kituumok ŋituŋa ŋulu ka akwap a Samaria, etusubuna iŋes idiotuŋanan ŋini apolon. 10Topupo ŋituŋa daadaŋ iŋes ameun alocaryo tari narwonita ebasi, “Erae ekile lo apedor ŋina ka Akuj ŋina enyaritae ‘Apedor ŋina Apolon.’ ” 11Apupete ŋituŋa ŋakiro keŋ, anerae abu iŋes ya apaki ŋina aoyan ituumonokini ikes a ŋakikukujaeta keŋ. 12Nai ani enupete ikes Pilipo ŋina alimonokinia Ŋakiro ŋuna Ajokak ŋuna ka Apukan ka Akuj ka ŋuna ka apedor ke ekiro a Yesu Kristo, aponi kibatisae ikes, ŋikilyok kaapei ka ŋaberu. 13Abu Simoni daŋ elope tonup, kibatisae. Abu iŋes torubak erukito ka Pilipo; etuumokinito iŋes ŋaumonokineta ka ŋakujuwuanisya ŋuna apolok ŋuna etiyasi.
14Kiirasi nai Ŋikiyakia ŋulu ayakasi Yerusalem atemar acamut ŋituŋa ŋulu a Samaria ŋakiro ŋuna ka Akuj, kiyakiyasi ikes Petero ka Yoana neni kec. 15Ani edolete ikes, kilipakis ŋituŋa, ikotere eryamunete Etau ŋolo Asegan. 16Kibatisatae ikes alokiro ke Ekapolon Yesu bon; ariŋa Etau ŋolo Asegan nyemino tari neni a ipei kec. 17Kidokokis nai Petero ka Yoana ŋakan kec neni a ŋikanupak, ido toryamut ikes Etau ŋolo Asegan.
18Ani eanyuni Simoni atemar aponi inakinae Etau ŋolo Asegan anakidokokin ŋakan ŋuna a Ŋikiyakia, inak iŋes ikes ŋisiliŋa, 19tema, “Inakinae ayoŋ daŋ apedor na, ikotere ani ŋini daadaŋ edokokini ayoŋ ŋakan, toryamu Etau ŋolo Asegan.”
20Nai kiŋenyak Petero iŋes tema, “Totwania iyoŋ kaapei ka ŋikonisiliŋa! Itami mono iyoŋ kire atemar ipedori aryamun ainakinet ŋina ka Akuj a ŋisiliŋa a? 21Nyimarar iyoŋ ka emam ibore kon eyai lotic lo, anerae nyiyookino etau kon alokiŋaren Akuj. 22Aŋun, toki nai aronis kon na, kilip neni ke Ekapolon atemar ani kepedor, kisyoni iŋes ŋuna eya lotau kon. 23Anerae ete ayoŋ atemar ileleba arakao neni kon ka ikienit iyoŋ asecit.”
24Toboŋok Simoni tema, “Kilipa neni ke Ekapolon aŋuna kaŋ, ikotere nyitiyakin idiobore ŋini ilimu iyoŋ neni kaŋ.”
25Ani kedaut Petero ka Yoana akiteyenun ka erwor ŋakiro ke Ekapolon, toboŋosi Yerusalem elimonokinete Ŋakiro ŋuna Ajokak lorerya ŋulu alalak ŋulu a Samaria.
Pilipo ka ekile ŋolo anakwap a Esiopia
26Apeikoloŋit, tolimok emalaika ŋolo ke Ekapolon Pilipo tema, “Tonyou tolot nakan ŋina alo Kwap, lorot ŋolo etiyaar alo Yerusalem, ŋolo itori naloŋisat tari Gasa.” 27Tonyou nai Pilipo, tolot. Ayai lorot ŋol ekile ŋolo anakwap a ŋina a Esiopia ŋolo arae ekolup. Apolokinit iŋes ŋisiliŋa daadaŋ ŋulu a Kandace, a ŋina epukat Esiopia. Kelosit sek ekile lo Yerusalem akilip. 28Aboŋi iŋes lore apaki ŋin, edokit agaari ŋina erito ŋaŋolei, tosyomi ekitaabo ŋolo ke ekadwaran a Isaya. 29Tolimok Etau ŋolo Asegan Pilipo tema, “Tolot nagaari ŋin, kidunya neni keŋ.” 30Toem nai Pilipo nagaari, kiira ekile ŋol esyomi ekitaabo ŋolo ke ekadwaran a Isaya, kiŋit tema, “Iyeni iyoŋ apolou a ŋakiro a ŋuna isyomi iyoŋ a?”
31Toboŋok iŋes tema, “Ekokini ayoŋ ayenuni ai, erae pa kakalimoki ayoŋ ituŋanan idio?” Tonyaraiya nai iŋes Pilipo adokar nagaari, kiboikin ka iŋes. 32Ŋakiro ŋuna asyomi ekile ŋol a Nakigireta ikes nu:
“Ikwa amesek ŋina erikoryo akiŋol
kori ikwa ililiŋia imesek alokiŋaren ekatubon ŋajul keŋ,
nyelimuno iŋes adiokirot.
33Alotooma akitiditeuna keŋ,
aponi kitiyae ŋuna nyeriyan neni keŋ.
Ŋae elimori ŋuna a ŋiletok keŋ,
anerae alemar akiyar keŋ anakwap.”
34Kiŋit ekile ŋol Pilipo tema, “Tolimokinae kare, ŋae irworor ekadwaran, iŋes pei elope kori ituŋanan ice?” 35Kirworik nai Pilipo, togeu a Nakigireta a ŋunapei a ŋun, tolimonok iŋes Ŋakiro ŋuna Ajokak ŋuna a Yesu. 36Ani elosete ikes alorot, todolo neni ayakasi ŋakipi, ido tolimok ekapolon ŋol Pilipo tema, “Kiŋolik, ŋakipi nu! Nyo ekeretakini ayoŋ akibatisao?” [ 37Tolimu Pilipo tema, “Ani kinupit iyoŋ a ekonitau a daadaŋ, ipedori akibatisao.” Toboŋok iŋes tema, “Anupit atemar erae Yesu Kristo Lokoku ka Akuj.”]
38Kitowuo iŋes agaari, torukosi iŋes ka Pilipo kidiŋ ŋakipi, kibatisa Pilipo iŋes. 39Ani elomunete ikes anakipi, ya Etau ŋolo ke Ekapolon Pilipo, nyiŋolik nabo ekapolon iŋes. Nai tolot lore keŋ elelyani. 40Totakanu nai Pilipo aneni enyaritae Asotus, elimonokini Ŋakiro ŋuna Ajokak lotaunio daadaŋ tari neni adolyo Kaisaria.
Àwon tá yàn lọ́wọ́lọ́wọ́ báyìí:
Ŋitic. 8: NIB2008
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ngakarimojong Interconfessional Bible © Bible Society of Uganda, 2008.