Ŋitic. 11
11
Ŋakiro ŋuna erworo Petero natukot a Ŋikristo alo Yerusalem
1Kiirasi Ŋikiyakia ka ŋikanupak ŋulu alo Yudaya daadaŋ atemar kecamut ŋituŋa ŋulu pa arae Ŋiyudayan daŋ ŋakiro ŋuna ka Akuj. 2Aŋun, ani elosi Petero Yerusalem, kitepega iŋes Ŋiyudayan ŋulu eitanito kileŋerae ŋituŋa ŋulu nyerae Ŋiyudayan temasi, 3“Kaanukiro ilosyo iyoŋ lotuŋa ŋulu nyileŋeritae, akimuj ka ikes?” 4Nai kisyak Petero alimonokin ikes ŋakiro daadaŋ ereunit a ŋapeipei tema:
5“Apeikoloŋit eriŋa ayoŋ elipi alotaun a ŋolo enyaritae Yoppa, abu oanyuwa atakanikinet. Eŋolik ibore ŋini ekoni anaŋga ŋina apolon, iyooliunitoe anakuj kwap alocileta a ŋuluomwon, bu towo alodiyete kaŋ. 6Abu eŋolik kojokan, oanyuwa ŋityaŋ ŋulu ka ariet, ŋulu alyatok ka ŋikyeny. 7Eira etoil ebala neni kaŋ, ‘Petero, tonyou, toar, tonyam!’ 8Nai otema ayoŋ, ‘Ekapolon, mam! Anerae nyenyama ayoŋ ŋinapei idiobore ŋini italeo kori ŋini nyeseg.’ 9Nai kirworik nabo etoil anakuj tema, ‘Ibore ŋini etesegu Akuj, nyitemokino iyoŋ ibala nyeseg.’ 10Kitiyakin ŋun ŋakitiyakinet ŋauni, ido kinyakarae nai ibore ŋin nakuj. 11Apaki ŋinapei, todolunete ŋikilyok ŋiuni, ŋulu eyakuunitae neni kaŋ alo Kaisaria kai ŋina ayai ayoŋ. 12Okolimok ayoŋ Etau ŋolo Asegan arukor ka ikes pa aŋayaŋayat. Orukosi daŋ ayoŋ ka ŋikaitotoi ŋulukanikapei lu, tolotoi kai a Kornelio. 13Ikitatamik iŋes isua epite ŋolo keanyuwaritor iŋes emalaika ewuoi alokai keŋ ebala, ‘Kiyakiya ŋikilyok Yoppa, tonyaraut Simoni ŋolo erae Petero. 14Ikilimokini iŋes iyoŋ ŋakiro ŋuna iunor iyoŋ kaapei ka ekal kon daadaŋ.’ 15Ani ageuni ayoŋ erwor, min Etau ŋolo Asegan neni kec, lopite ŋolo aminio neni yok anageunet. 16Otamu nai ayoŋ ŋakiro ŋuna ke Ekapolon ŋina abaakar, ‘Abu Yoana kibatisa a ŋakipi, nai ikibatisao iyes a Etau a ŋolo Asegan.’ 17Ani nai keinakinit Akuj ikes ainakinet ŋina ikoni ŋina abu ikiinak iwon apaki ŋina anupere Ekapolon Yesu Kristo, karae nai ayoŋ ŋae ekatakini akiretakin Akuj?”
18Ani iirarete ikes ŋun, tojoŋoto apega. Kipuro Akuj temasi, “Ainaki nai Akuj ŋulu nyerae Ŋiyudayan daŋ apaki ŋina ekiyata, toyara!”
Atukot a Ŋikristo alo Antiokio
19Toloto ŋikanupak ŋulu aponi kielarae aŋuna ka akisicanio a ŋina atakanuni kelunyar atwanare a Stepano, todolo Poenikia, Kupuro ka Antiokio. Kitatama ikes Ŋakiro ŋuna Ajokak neni a Ŋiyudayan make. 20Nai apotu ŋikanupak ŋice ŋulu arae ŋulu alo Kupuro ka Kurene toloto Antiokio, kirworo tari lotuŋa ŋulu pa arae Ŋiyudayan, tolimonokis ikes Ŋakiro ŋuna Ajokak ŋuna ke Ekapolon Yesu. 21Ayai apedor ŋina ke Ekapolon neni kec, kibelekinos ka tonupa ŋituŋa ŋulu alalak Ekapolon.
22Todolo ŋakiro nu natukot ŋina a ŋikanupak a Yesu alo Yerusalem, ido kiyakiya atukot Baranaba alosit Antiokio. 23Ani edoluni iŋes ka iŋolikini epite ŋolo kebunio Akuj kiterereŋio ikes, tolakar iŋes. Kicikak ikes arubakin anupit Ekapolon a ŋitai kec a daadaŋ. 24Arae Baranaba ekile ŋolo ajokan, ŋolo eleleba Etau ŋolo Asegan ka anupit. Kiyatakin nooi ŋituŋa, potu neni ke Ekapolon.
25Tolot nai Baranaba Taso akiwarit Saulo. 26Ani eryamuni, yau iŋes Antiokio. Yaasi ikes ekaru daadaŋ iryamiryameneneete ka ŋikanupak, kitatama daŋ ŋituŋa ŋulu alalak. Arae Antiokio esyakinere anyarare ŋikasyomak atemar Ŋikristo.
27Alorwa a ŋul, aponeneete ŋikadwarak alo Yerusalem tari Antiokio. 28Tonyou epei alokidiŋ kec ŋolo anyaritae Agabo, todwar ka apedor a ŋina ke Etau a ŋolo Asegan atemar ebuni eron ŋolo apolon nakwap daadaŋ. Abu nai eron ŋol bu apaki ŋina araakar Klauda ekepukan a Roma. 29Totyakut ŋikasyomak a Yesu atemar itemokino ŋinituŋanan alokidiŋ kec tolemu alopite a ŋolo apedorya alemun idiobore ŋini kiŋarakinet ŋikanupak alo Yudaya. 30Kitiyata ikes ŋun, kiyakiyasi Baranaba ka Saulo yaasi ŋisiliŋa, inakis ŋikatukok ŋulu ka atukot a Ŋikristo alo Yudeya.
Àwon tá yàn lọ́wọ́lọ́wọ́ báyìí:
Ŋitic. 11: NIB2008
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Ngakarimojong Interconfessional Bible © Bible Society of Uganda, 2008.