Sơnròp Gơlik Gơs 12
12
Abram geh Yàng hòi sac
1 #
Broă 7:2-3; Heb 11:8. Yàng Jehôwa đơs mơ Abram lah: “Mê lik tĕ bơh lơgar mê dê, jơi bơtiàn mê, mơ hìu bèp mê mơ lòt tus hơ lơgar Añ rơp sơnio mê in.
2Añ rơp lơh mê in gơlik gơs dô làng bol dờng,
Añ rơp ai lơngai mê in
mơ lơh tiơng pơnro sơnđan mê,
mơ mê rơp gơlik gơs dô nơm cat lơngai.
3 #
Gal 3:8. Añ rơp ai lơngai ală cau lơi ai lơngai mê in,
srat rma ală cau lơi srat rma mê,
mơ jơh ală làng bol tòm làm ù,
rơp geh lơngai bơh dê mê.”#12:3 Rct: Kòp làng bol hơđang ù rơp dan Añ ai lơngai bol khai in be Añ neh ai mê in.
Abram tus hơ lơgar Kanaan
4Gen Abram lik lòt jat be jơnau Yàng Jehôwa neh đơs; Lot lòt bal mơ khai. Tòm tŭ Abram lik lòt bơh Caran, khai neh tơl poh jơt pram nam. 5Abram lam Sarai, bau khai, Lot, kòn cau oh khai mơ jơh ală phan mơna khai neh pơjum, mơ ală dĭ gơna khai neh geh tòm Caran, lik bơh hơ̆ nàng lòt tus hơ lơgar Kanaan. 6Abram lòt gan lơgar do, tus hơ tòm cha Môre dê, tòm Sicem. Tòm tŭ hơ̆, cau Kanaan ơm tòm lơgar.
7 #
Broă 7:5; Gal 3:16. Yàng Jehôwa tơlik mat mơ Abram mơ đơs lah: “Añ rơp ai jơi bơtiàn mê in lơgar do.” Gen tềng hơ̆ Abram lơh dô nơm cơnòng duh khoai Yàng Jehôwa in la Bơtau neh tơlik mat mơ khai.
8Bơh hơ̆, khai lòt tus hơ mơnơm đah mattơngai lik Betel, gen lơh sàl; đah mattơngai mut Betel, mơ đah mattơngai lik gơs Ahi. Khai lơh tềng hơ̆ dô nơm cơnòng duh khoai Yàng Jehôwa in mơ hòi dê sơnđan Kơnràñ. 9Mơ Abram lòt rhòi tus hơ kơnhwàl Negep.#12:9 kơnhwàl đah đơm Kanaan.
Abram mù hơ lơgar Ejiptơ
10Tŭ hơ̆, tòm lơgar gơs bơta jơgloh rung, bơta jơgloh rung hơ̆ la dờng ngan tòm lơgar gen Abram mù ơm ing tòm lơgar Ejiptơ. 11Tŭ mòr mut tòm lơgar Ejiptơ, gen khai đơs mơ Sarai, bau khai lah: “Do, añ git ai la dô nă cau ùr hàng mơnĕ. 12Tŭ lơi cau Ejiptơ gŏ ai, bol khai rơp đơs lah: ‘Do la bau ùr khai,’ gen bol khai rơp tơnchơt añ mơya bol khai lòi ai kis. 13#Sơnròp 20:2; 26:7.Añ dan ai yal mơ bol khai ai la oh ùr añ, tồ bơh ai añ rơp geh wă rò niam mơ bơta kis añ jê geh ring lơngai.” 14Dơ̆ Abram tus hơ lơgar Ejiptơ, cau Ejiptơ sền gŏ cau ùr do la hàng mơnĕ ngan. 15Ală cau kwang Pharaôn dê kung sền gŏ khai mơ jòng ro khai di đap cau bơtau, mơ lam cau ùr hơ̆ tus hơ gơlang Pharaôn. 16Tài bơh khai gen Pharaôn wă rò niam Abram mơ Abram dòp geh belàt, kơnrồ, alàng dam, alàng me, làkđa, dĭ klau mơ dĭ ùr. 17Mơ tài bơh Sarai, bau Abram dê, Yàng Jehôwa ai ală bơta rung rài dờng lơh glài Pharaôn mơ hìu nhă khai. 18Gen Pharaôn hòi Abram mơ lùp lah: “Ñchi mê neh lơh añ in be do? Mbe mê ò yal mơ añ khai la bau mê taih? 19Mbe lơh mê neh đơs lah: ‘Cau hơ̆ la oh ùr añ’ taih? Tian gơs añ neh kup khai nàng bau. Tŭ do bau mê do, ai tĕ khai mơ lòt.” 20Mơ Pharaôn sồr cau jun ùr klau Abram mơ jơh ală phan khai dê.
Àwon tá yàn lọ́wọ́lọ́wọ́ báyìí:
Sơnròp Gơlik Gơs 12: KPM2018
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2018 United Bible Societies. All rights reserved.