Khuurakikha 11
11
Kukwombekhe kwe nuungo tsingali kwe Babeli
1Mu khunyoowa khukhweene, babaandu be shibala shoosi baaba bakanikha luulomo lutweela. 2Ne babaandu ni baakyeendaanaka beetsa khukhwaama i bwaamanyaanga, boola khu musaleela kwe mu Shinari#11.2 Shinari: Shifwo shino nisho Babulooni, bekholela buumenyo ibweene iyo.
3Baryo kila beelomela bonyene bari, “Khakhwiitse atweela, khubuumbeyo kamatofwaali, khukoomise koome kahandalalile ilala buulayi bubweene.” Baryo baafuna kamatofwaali ke khukhwoombekhela mu shifwo she kamabaale busa, baafunayo ni buutosi bubuwaambanisa kamatofwaali atweela. 4Lwanyuma ndi kila beelomela bonyene bari, “Khayo khwiyombekhele shiriimba, nga shilimwo kukwombekhe kwe tsinuungo tsingali, nga kwaakulukha shisuli shakwo, shaaniina khukhwoola mwikulu, nio nafwe khuryo khube nga khwekholeele lisiina. Shino shinakhuyeeta khulekhe khusalanila khumalatane mu shibala shoosi ta.”
5Ne Umukasya naye umweene kila eekha aasi khuulola khu shiriimba ni kukwoombekhe byeesi babaandu baaba boombekhile. 6Kila Umukasya naye aloma ari, “Babaandu bano balikho baraambila atweela, lwekhuuba bakanikha luulomo lutweela. Khuno khuli khuurakikha busa khweesho sheesi bali khuukana khuukhola. Nashiryo mbaawo shiindu shoosi shishikane shibakhaase khuukhola ta. 7Nashiryo ari yiitsa khwiikhe aasi, khutsye khukaraangaranise luulomo lwaabwe, nio ilekhe khuubawo umuundu umanya sheesi uwashe aloma ta.”
8Aryo Umukasya waasalanisaka babaandu khukhwaama awo khuutsya mu shibala shoosi. Ni abweene awo baakamisa khukhwoombekha shiriimba. 9Isho nisho shishakila shiriimba isho shalaangibwa bari Babeli, lwekhuuba abweene awo, niwo isi Umukasya aakaraangaranisila luulomo lwe babaandu boosi. Ni khukhwaama abweene awo, waasalanisa babaandu khuutsya mu shibala shoosi.
Lisaaye lya Shemu
10Bano nibo babaaba babetsukhulu ba Shemu. Lwanyuma lwe kimiiko kibili nga kameetsi kaaweeleele, Shemu aaba nga oolesa kimiiko shitoondo shitweela (100) kye buukhulu, waasaala Arupakusadi. 11Ne lwanyuma lwe khuusaala Arupakusadi, aawaangala waamenyawo kimiiko kikiindi bitoondo biraano (500), waasaalayo babaana babaandi besiinde ni bekhaana.
12Nga Arupakusadi naye woolesile kimiiko kamakhumi kataru na kiraano (35) kye buukhulu, waasaalayo umwaana umusiinde, waamutwiikha lisiina ari Shela. 13Lwanyuma lwe khuusaala Shela, Arupakusadi aawaangala, waamenyawo kimiiko kikiindi bitoondo bine na kitaru (403), waasaalayo babaana babaandi besiinde ni bekhaana.
14Nga Shela naye woolesile kimiiko kamakhumi kataru (30) kye buukhulu, waasaala umwaana umusiinde waamutwiikha lisiina ari Eberi. 15Lwanyuma lwe khuusaala Eberi, Shela aawaangala, waamenyawo kimiiko kikiindi bitoondo bine na kitaru (403), waasaalayo babaana babaandi besiinde ni be khaana.
16Nga Eberi naye woolisile kimiiko kamakhumi kataru na kine kye buukhulu (34), waasaala umwaana umusiinde, waamutwiikha lisiina ari Pelegi. 17Lwanyuma lwe khuusaala Pelegi, Eberi aawaangala, waamenyawo kimiiko kikiindi bitoondo bine ni kamakhumi kataru (430), waasaalayo babaana babaandi besiinde ni bekhaana.
18Nga Pelegi woolesile kimiiko kamakhumi kataru (30) kye buukhulu, waasaala umwaana umusiinde, waamutwiikha lisiina ari Rewu. 19Lwanyuma lwe khuusaala Rewu, Pelegi aawaangala, waamenyawo kimiiko kikiindi bitoondo bibili na syeenda (209), waasaalayo babaana babaandi besiinde ni bekhaana.
20Nga Rewu naye woolisile kimiiko kamakhumi kataru na kibili (32) kye buukhulu, waasaala umwaana umusiinde, waamutwiikha lisiina ari Serugi. 21Lwanyuma lwe khuusaala Serugi, Rewu aawaangala, waamenyawo kimiiko kikiindi bitoondo bibili na musaafu (207), waasaalayo babaana babaandi besiinde ni bekhaana.
22Nga Serugi naye woolisile kimiiko kamakhumi kataru (30), waasaala umwaana umusiinde, waamutwiikha lisiina ari Nahori. 23Lwanyuma lwe khuusaala Nahori, Serugi aawaangala, waamenyawo kimiiko kikiindi bitoondo bibili (200), waasaalayo babaana babaandi besiinde ni bekhaana.
24Nga Nahori naye woolisile kimiiko kamakhumi kabili na syeenda (29), waasaala umwaana umusiinde, waamutwiikha lisiina ari Tera. 25Lwanyuma lwe khuusaala Tera, Nahori aawaangala, waamenyawo kimiiko kikiindi shitoondo shitweela ni likhumi na syeenda (119), waasaalayo babaana babaandi besiinde ni bekhaana.
26Nga Tera naye woolisile kimiiko kamakhumi musaafu (70), waasaala babaana besiinde bataru, nga nibo bano: Iburamu, Nahori, ni Harani.
Lisaaye lya Tera
27Lusaalo lwa Tera lwaba luri: Tera aasaala Iburamu, Nahori, ni Harani. Harani naye waasaala Loti. 28Lwanyuma Harani waafwiila mu shiriimba sheesi aasaalikhilamwo sha Uri#11.28 Uri: Alala shaamanyikhana nga Babulooni, shishaba she Bakaludaaya, nga paapa weewe ashiiliwo mulamu. 29Nabo Iburamu ni Nahori baayila bakhasi. Iburamu aayila umukhasi isi balaanga bari Sarayi, n'isi Nahori naye aayila nga bamulaanga bari Milika, uwaba umukhaana wa Harani naluundi paapa wa Isika. 30Sarayi aaba umukuumba busa, niye s'asaalakho babaana ta.
31Tera waakhalawo khuuwuuya khukhwaama i Uri, khuutsya mu shibala sha Kanaani. Aryo waatsya ni Iburamu atweela ni Sarayi, umukhaana weewe umukhwe, uwaba umukhasi wa Iburamu, ni Loti umwitsukhulu weewe, uwaba umwaana wa Harani. Baryo ni beetsa boola mu Harani, baamenya ibweene iyo.
32Tera waafwiila ibweene iyo mu Harani, nga woolisile kimiiko bitoondo bibili na kiraano (205) kye buukhulu.
Àwon tá yàn lọ́wọ́lọ́wọ́ báyìí:
Khuurakikha 11: LPE
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
The Bible in Lumasaaba © Bible Society of Uganda, 2016.