SAN MATEO 16

An lapanakni yu ixjajunkan fariseojnin chi yu ixjajunkan saduceojnin ixtala'ts'imputun tu'u yu lhi'a'nin

(Mr. 8:11-13; Lc. 12:54-56)

1An Jesús tala'cha'alhi an fariseojnin chi an saduceojnin ixtalhila'ts'intanuycha, ixtajuniy li ma kajamasunilh tu'u an lakt'iyan. 2Yucha ja'alhtaylh jajuniy:

―Akxni tats'isiycha uxitnan nawnat li oxi wilhchani kajuna katunkuna akxni la'ts'inat an lakt'iyan li slapulh. 3Chi akxni wats'isin, li wa talaktsin an jataputs'i chi li slapulhi an lakt'iyan, nawnat li kamina xkan chi li kalaya un. ¡Uxitnan wa layatcha! Mu li layi k'ats'ayat tuchini katapasayacha xlakata t'ani la'ts'inatcha an lakt'iyan, ¿pus tasu li jant'uch'a lhimach'a'xayat'iti an tanlhunch'a la'ts'inat ani panch'e'exi? 4An la'ma'lhta'alhinin yu chaway tat'ajun talakask'in li tu'u kajamasunikalh, pero jantu tu'u katijamasunikalh, wa yucha an tacha putapasalh tichi lapanak yu ixjunkan Jonás, yu ma'anchacha ixlichiwiniy ixchiwinti Dios.

Jamakawlh an Jesús, alhcha.

Ixlamaskajank'an lapanakni yu ixjajunkan fariseojnin

(Mr. 8:14-21)

5Tacha'alhcha ixtapiktutam an lakxkan, an ixt'alhtanan an Jesús ixtakapta li katalhi'alh pan. 6An Jesús jajuniy:

―K'ajalajk'ats'anant'iti li jantu katamatsaman an ixlamaskajank'an an fariseojnin chi an saduceojnin.

7Yu'uncha ixtapast'ak'a li sna xliyu jantu ixtalhi'anta pan. 8Pus jalhimacha'xanilhi an Jesús, jajuniy:

―Wa k'isi jak'iklak'a'ininat'iti lapanakni. ¿Tasu li p'ast'ak'atcha li sna xliyu jant'u lhit'ant'at pani li chuncha klajunawi? 9¿Jant'uk'a' lhimach'a'xayat'it, ch'i jant'u p'ast'ak'at'iti akxni an la'akisi milh lapanakni ta'ulh wa a'xkisi pan, chi tani la'achuxcha canastaja p'usakch'o'ot? 10¿Chi akxni ta'ulh la'at'at'i milh lapanakni wa a'xtujun pan, chi tani la'achuxcha canastaja p'usakch'o'ot? 11¿T'asuch'a li jant'u lhimach'a'xayat'iti li jantu xliyu li jant'u lhit'ant'at pani li iklajunaw li k'ajalajk'ats'anant'iti, li jantu katamatsaman ixlamaskajank'an an fariseojnin chi an saduceojnini?

12Pus akxni talhimacha'xalhcha li jantu yu an lhimaskajakan pani juniy an Jesús, yucha an ixlamap'a'sink'an an fariseojnin chi an saduceojnin.

An Pedro juniy an Jesús li yucha Cristo

(Mr. 8:27-30; Lc. 9:18-21)

13Akxni cha'alhcha xalakaat'un tanchun junkan Cesarea de Filipo an Jesús, jalhisakmiycha an ixt'alhtanan, jajuniy:

―¿Tasucha talaknajun an lapanakni li tichini yuchacha an isTs'alh Lapanaki?

14Yu'uncha tajuniy:

―Ali'in tanajun ma jama'paxanaj Juan, chi ali'in tanajun ma Elías, chi ali'in tanajun ma Jeremías, u ma wa xatichicha yu ixlichiwiniy ixchiwinti Dios.

15Yucha jajuniy:

―Chi uxitnan, ¿tisi kit'inch'a nawnat'iti?

16Pus an Simón Pedro alhtaylh, juniy:

―Uxint'i Cristojk'at'i, isTs'alh Dios, yu la'ajunta.

17Wa chuncha alhtaylh an Jesús, juniy:

―Sawalhch'a oxi ilht'uk'ani Simón, ists'alh Jonás, yucha an kimPay yu wilhchalh lakt'iyani chuncha manawniyan, jantu wa mijatapast'ak'atcha. 18Chi k'it'in wachu ijkunan, uxint'i Pedrojk'at'i, chi la ix'ukxni ani chiwxi akyawya an kintajtan. An ixlakmakxkayaxtu lhinin jantu lay katilhajalhi an kintajtan. 19Akxta'niyani an xayavej an lhich'alhkat anu lakt'iyan, chux yu k'ach'i'ulaya'a ani lakaat'un, anu lakt'iyan wachu kach'i'ulakananta. Chi chux yu k'ax'ot'a'a ani lakaat'un, anu lakt'iyan wachu kax'otkananta.

20Wa chuncha an Jesús, jajuniy an ixt'alhtanan li jantu xamati katajunilh li yucha Cristo.

An Jesús jajuniya li kaniya'

(Mr. 8:31—9:1; Lc. 9:22-27)

21Chi akxni, an Jesús tsukulhcha jajuniya ixla'ts'awalanti an ixt'alhtanan li ka'ana stak ma'alh'ajna yucha, la'acha'an Jerusalén, li katama'niya'. Jajuniy:

―Yu'uncha an laktatanincha jamacha'an Israel chi an xalaj'ajin sacerdotejnin chi an xamaestrojnin lhamap'a'sini yu akintama'niya'. Pero akla'awcho'oya ixlila'at'utu wilhchan.

22Pus wa chuncha an Pedro t'atala'xtinulhi an Jesús, chi sawalhcha juniy:

―¡Jantu Jamach'alhkat Jesús, jantu layi ch'unch'ach'a k'at'ip'ut'ap'asa! Dioscha kalhi'a'tayjun.

23An Jesús tala'asp'itlhi, juniy an Pedro:

―¡K'a'ost'i, Satanás, k'imama't'ijlay! Mu uxint'i jant'u yu lhak'ap'up'in yu ixnawin Dios, wa yucha an ixjatapast'ak'atchak'an lapanakni lhak'ap'up'in.

24Chi jajuniy an ixt'alhtanan an Jesús:

―Li xamati kint'alhtana jumputun, kamakawlhcha yu wa ixjatapast'ak'atcha, kaxa'a'ilhcha ixcruz yu lay kapuma'nikalh chi akinch'a'o'alhcha. 25Mu wa tichicha li yu kama'alhtaxtuputuna ixjatsukunti, kama'ats'an'aya', pero yu kama'ats'an'aya ixjatsukunti kilakata, kala'cha'ana'. 26Chi an lapanak masi wanajcha ix'anu kajun'olh an lakamunulhpa, ¿tasu lhila'ancha li kama'ats'an'alhi an ixjatsukunti? ¿Tasucha lay kalhila'cha'ancho'oya ixjatsukunti? 27Mu an isTs'alh Lapanak alhp'asi kaxlimj mina la ixtachaput an ixPay, ali an ix'angelhnini kajat'amina'. Akxni atamj atamjcha kamapalhnikana tuchini ilhtulhcha. 28Klajunaw yu sawalh, ali'in yu ani tat'ajun, jantu katitanilh sta akxni katala'ts'inacha kamina ch'alhkatna an isTs'alh Lapanak.

Àwon tá yàn lọ́wọ́lọ́wọ́ báyìí:

SAN MATEO 16: tpp

Ìsàmì-sí

Pín

Daako