TAUNET 5
5
Iyoteetap Adam agoi Noah
1 # Tau 1.27-28 Ni ko sireet ne po teteetap iyoteetap kap Adam. Eng' peetuut ne ki toi Kamuktaindet koyai chiito, ko ki yai icheek eng' kergeindonyi. 2#Mat 19.4; Mar 10.6 Ki yai icheek, muren ak tye ak koberuur, yeityo kotoochi icheek kainet koguure Adam. 3Ki tar Adam kenyiisyek pogol ak sosom kosich weeriit eng' kergeindonyi ak eng' itoondonyi, ak kiguure kainennyi Seth. 4Ye kingo kagosich `Adam Seth, kotar kenyiisyek pogol sisiit ak ki sich weeriik alak ak tiibiik. 5Ki ilil Adam kotinyei kenyiisyek pogol sogool ak sosom.
6Ye kingo tinyei Seth kenyiisyek pogol ak muut, kosich Enosh. 7Ki tar Seth kenyiisyek pogol sisiit ak tisap ye kingo kagosich Enosh, ak ki sich weeriik alak ak tiibiik. 8Eng' tugul, ko ki tar Seth kenyiisyek pogol sogool ak taman ak aeng' si kolili.
9Kingo po Enosh kenyiisyek tamanwogik sogool, kosich Kenan. 10Ki tar Enosh kenyiisyek pogol sisiit ak taman ak muut ye kingo kagosich Kenan, ak ki sich weeriik alak ak tiibiik. 11Ki ilil Enosh ko po kenyiisyek pogol sogool ak muut.
12Ki po Kenan kenyiisyek tamanwogik tisap kosichei Mahalalel. 13Komeng'iis Kenan kenyiisyek pogol sisiit ak artam ye kingo kagosich Mahalalel ak kosich weeriik alak ak tiibiik. 14Ki ilil Kenan ko po kenyiisyek pogol sogool ak taman.
15Kosich `Mahalalel Jared kotinyei kenyiisyek tamanwogik lo ak muut. 16Ak ki tebi Mahalalel kenyiisyek pogol sisiit ak sosom ye kingo kagosich Jared, ak ki sich weeriik alak ak tiibiik. 17Ki po Mahalalel kenyiisyek pogol sisiit ak tamanwogik sogool ak muut ye kingo lili.
18Kingo po Jared kenyiisyek pogol ak tamanwogik lo ak aeng' kosich Enok. 19Eng' kenyiisyek pogol sisiit ye kingo kagosich `Jared Enok, ko ki sich kora weeriik alak ak tiibiik. 20Ki ilil Jared ko po kenyiisyek pogol sogool ak tamanwogik lo ak aeng'.
21Kingo po Enok kenyiisyek tamanwogik lo ak muut kosich Methuselah. 22Ki pendat Enok ak Kamuktaindet eng' kenyiisyek pogol somok ye kingo kagosich Methuselah ak ki sich weeriik alak ak tiibiik. 23Peetuusyek tugul che po sabeetap Enok ko ki kenyiisyek pogol somok ak tamanwogik lo ak muut. 24#Jud 14; Heb 11.5 Kibendoti Enok ak Kamuktaindet; ak ki mata kiro amu ki imut ineendet `Kamuktaindet!
25Kingo tinyei Methuselah kenyiisyek pogol ak tamanwogik sisiit ak tisap kosich Lamek. 26Ki meng'iis Methuselah kenyiisyek pogol tisap ak tamanwogik sisiit ak aeng' ye kingo kagosich Lamek ak ki sich weeriik alak ak tiibiik. 27Ki ilili Methuselah ko po kenyiisyek pogol sogool ak tamanwogik lo ak sogool.
28Ki tar Lamek kenyiisyek pogol ak tamanwogik sisiit ak aeng', kosich weeriit. 29Kiguure kainennyi Noah, kole, “Ineendet ne igoigoech eng' nyalilwogik che po poisyonikyok che uueen eng' ng'wony ne ki chup Kamuktaindet ne Toroor.” 30Ki meng'iis Lamek kenyiisyek pogol muut ak tamanwogik sogool ak muut ye kingo kagosich Noah, ak ki sich weeriik alak ak tiibiik. 31Ki po Lamek kenyiisyek pogol tisap ak tamanwogik tisap ak tisap ye kingo lili.
32Ak ye kingo tinyei Noah kenyiisyek pogol muut, kosich Shem, Ham ak Japhet.
Àwon tá yàn lọ́wọ́lọ́wọ́ báyìí:
TAUNET 5: KALDC
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Kalenjin Revised Bible Catholic Edition © Bible Society of Kenya, 2015.