उत्पत्ति 4
4
कयिन व हाबिल
1आदम व हव्वाया दथुइ लसपस जुल। अले हव्वाया प्वाथय् दयाः कयिनयात#४:१ कयिन हिब्रू भाषाय् थ्व खँग्वः लःल्हानाकाःगु खँग्वः लिसे ज्वः लाः। बुइकल। वं धाल “परमप्रभुया आशिर्वादं जिकाय् दत।” 2अनं लिपा वं मेम्ह काय् हाबिल बुइकल।
हाबिल फैजवाः जुल, कयिन बुँज्या याइम्ह जुल। 3छुं ई लिपा कयिनं परमप्रभुयात थःगु बुँइ सय्कूगु छायेहल। 4हाबिलं नं दक्वसिबय् न्हापां बूपिं फैतय्गु पुचलं दक्वसिबय् स्वयेज्यूम्ह फैचा ल्ययाः बलि बी हल। परमप्रभुं हाबिल व वयागु देछायात यय्कादिल। 5कयिन व वयागु देछायात धाःसा यय्का मदिल। उकिं कयिन तसकं तंम्वल। वयागु ख्वाः खिउँसे च्वन।
6अले परमप्रभुं वयात धयादिल, “छ छाय् तंम्वयागु? छंगु ख्वाः छाय् खिउँसे च्वंगु?” 7छं भिंगु ज्या याःसा ला छन्त नं यय्कीगु खः नि। छं भिंगु ज्या मयात धाःसा पाप छंगु लुखाय् हे वयाच्वनी। वं छन्त ल्हातय् कायेत स्वइ, तर छं वयात बसय् काये हे माः।
8अले कयिनं थःकिजा हाबिलयात धाल, “बुँइ वनेनु।” बुँइ थ्यंकाः कयिनं थःकिजा हाबिलयात हय्काल, अले स्यानाबिल।
9अले परमप्रभुं कयिनयात धयादिल, “छिमि किजा हाबिल ग्व?”
कयिनं लिसः बिल, “जिं मस्यू। जि जिमि किजाया जवाः खः ला?”
10परमप्रभुं धयादिल, “छं थ्व छु यानागु? छिमि किजायागु हिं जितः बँ दुनें सः बियाच्वंगु दु। 11छं आः बँ स्वयाः अप्वः सराः फयेमाली। छाय्धाःसा थ्व बं छंगु ल्हातिं छिमि किजायागु हि फयेत म्हुतु वांखाःगु दु। 12छं बुँज्या याःसां छन्त वं अन्न बी मखु। छ पृथ्वीइ थाय्बाय् मदय्का उखेंथुखें जुइमाली।”
13अले कयिनं परमप्रभुयात धाल, “थ्व ला जिं सह याये मफइगु सजाँय जुल। 14स्वयादिसँ, थौं छिं जितः थ्व बं पितिनादिल। जि छिपाखें सुपिलाः जुइमाली। अले थाय्बाय् मदय्काः जुइमाली। अले जितः सुनानं स्याना नं बी फु।”
15परमप्रभुं धयादिल, “अथे मखु। कयिनयात स्याःम्हय्सित न्हय्दुगं अप्वः बदला काइ।” उकिं परमप्रभुं वयात सुनानं स्याये मफयेमा धकाः वयागु कपालय् छगू चिं तयाबियादिल। 16अले व परमप्रभुया थासं पिहां वनाः अदनया पुर्बपाखे च्वंगु नोद धयागु देशय् च्वंवन।
17कयिनया थः कलाःलिसे लसपस जुल। अले वया प्वाथय् दयाः हनोकयात बुइकल। कयिनं छगू शहर दय्कल। अले उकियात थः काय्या नामं हनोक धकाः नां तयाबिल। 18हनोकया पाखें ईराद बुल। ईरादया पाखें महूयाएल बुल। महूयाएलया पाखें मतूशाएल बुल। मतूशाएलया पाखें लेमेख बुल।
19लेमेखं निम्ह कलाः ब्याहा यात। छम्हय्सिगु नां आदा व मेम्हय्सिगु नां सिल्ला खः। 20आदाया पाखें याबाल#४:२० याबाल हिब्रू भाषाय् थ्व खँग्वः न्ह्यलुवाः खँग्वः लिसे ज्वः लाः। बुल। व पशु लहीपिं व पालय् च्वनीपिनि पुर्खा खः। 21वया किजा यूबाल#४:२१ यूबाल हिब्रू भाषाय् थ्व खँग्वः तुरही खँग्वः लिसे ज्वः लाः। खः। व वीणा थाइपिं व बाँसुरी पुइपिनि पुर्खा खः। 22सिल्लां तूबल-कयिनयात बुइकल। व ली व नँया ज्याभः दय्कीपिनि पुर्खा खः। वया क्यहेँ नामा खः।
23लेमेखं तःधंछुयाः थः कलाःपिन्त धाल,
“आदा व सिल्ला, जिगु खँ न्यँ,
लेमेखया कलाःपिं, जिं धयागु खँ न्यँ,
जिं छम्ह मनूयात जितः ल्हाः वाःगुलिं स्यानाबियागु दु।
जितः घाः याःम्ह छम्ह ल्याय्म्हम्ह मनूयात।
24कयिनयात स्यात धाःसा वयागु न्हय्दुगं अप्वः बदला काइ सा,
लेमेखयात स्यात धाःसा न्हयेन्हय्दुगं अप्वः बदला काइ।”
25आदमया थः कलाःलिसे हाकनं लसपस जुल। अले वं मेम्ह छम्ह काय् बुइकल। “परमेश्वरं जितः कयिनं स्यानाब्यूम्ह हाबिलया थासय् मेम्ह काय् बियादीगु दु” धकाः वं वयागु नां शेत#४:२५ शेत हिब्रू भाषाय् थ्व खँग्वः ब्यूगु खँग्वः लिसे ज्वः लाः। तयाबिल। 26शेतया नं छम्ह काय् बुल। वं वयागु नां एनोश तल। उबलय्निसें मनूतय्सं परमप्रभुया नां कायेगु याना हल।
Àwon tá yàn lọ́wọ́lọ́wọ́ báyìí:
उत्पत्ति 4: NEW
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2024 Nepal Bible Society, Newa Christian
Literature Center and Wycliffe Bible Translators, Inc.