O Kandɔɔ 6
6
Hala kɔngɔlan le vanndacieea ciiyo
1Mɛɛ vanndacieea kandu kuiyo o ceendo coo, má va cuavaa laandua violɔɔ, 2mí poaa Hala-a#6.2 poaa Hala-a: Tɛɛsiaalan la co taw a diomndo ho o kɔɔ: 1- Vanaa pum a yiyan maa mɛlɛkaa mal fonda ndaa-a co poaa Hala-a kan ni, 2- a pum a yiyan maa cuavaa-imamaa Sɛt-a co kan ni. Kani aa nda Hala ndóò hɛli ni, kɛ má kɛɛ le diom Hala-o biyɔɔ, má yiinan a polale Kain-nden, 3- a pum yɛ, a co yiyanndo maa cuavaa lemasaa, vanaa kialaa n'yamaa, te kon te vanaa tɔ́ɔ́a co poaa Hala-a kan ni. ca maa cuavaa laandua vanndacieea va violɔɔ-a naŋ taw, má hɛli a pum, má cua nda o nɔ̀lan. 3O kon, mí Mɛlɛka dimi aa: «Yoomu nuu lo lɛnin vanndacieea nin le lɔ́ɔ́-lɔ́ɔ̀ le. Kani ɲaa yoomaa bɛnda le piɔ́mndo sɔlaa-a nda co ni. Lelan, yoomu ndaa hiw lɛnin bandei o vɔsilan kɛmɛ a bidiin coo le.» 4Boondii ken vanaa vilɛi-vilɛiya va o lɛŋnden coo ni. Mí ndáà va vɔ vɛlɛ o kon kɔɔli. Nda yɔŋnun kuubaa cɔvaa masindɛa ni, tɔ́ɔ́ pila ndáà nɔ ni. Tuma poaa Hala-a hun cua cuavaa laandua vanndacieea o nɔ̀lan-ndo nda velu vanaa vilɛyaa kan ni.
5Mí Mɛlɛka ca maa kɔlvesɛi vanndacieea va hiovɔɔ laci o ceendo coo tuŋ, mó ca maa lepalaa-lepala, yiyannda vɔɔnnda va nda o lakɔl-tan la va nda lueiyo o dɛnɛ vɔɔndo nin. 6Le hee, mí mɔnɛi bii ndu, mí ndu pila ɲunan ɲɛ vem ndu vanacieo cɔvɔɔ mó soli ndu o ceendo coo-o. 7Mó dimi aa: «Fɔ mì tɛɛmbuu vanndacieaa ya cɔw haa mí soli nda o ceendo coo-a. I co vɛlɛ visia bɛndua, visia pɔm-pɔmbɔa kela lɛŋ-nda a yowva kpow tɛɛmbuu. I sina ɲɛ-ɲɛ vem ya nda cɔvɔɔ le.» 8Kɛ mí Mɛlɛka ca Noe ɲia taw.
Mɛlɛka tuu le Noe kpakpalaa a kɔltuw ndɔɔ
9-10Polale Noe len le yɔŋnun nden ni, ndóò velu poaa nda yáá: Sɛm, Ham a Yafɛt. Vana sandaa a vana diandaa Noe yɔŋnun vanndacieea tɛɛn o paale ndɔlen ni, o va kelaa o nɛi Hala-o coo.
11Kɛ vanndacieea telen kon a va a laasiannda Hala o hɔl, yɔŋ vɔɔndo va tosanndo nɛɛ-nɛɛ ka. 12Mɛɛ Hala tofa vanndacieea o ceendo coo, mó ca nda a laasiannda kpow, kani vana-vana va kelaa o yɔŋ vɔɔndo nin. 13O kon, mó dimul Noe aa: «I cii kiolɔɔ o kɔl nuu nin le vanndacieea ciiyo o ceendo coo. Kani a cii ceendo tɛɛmbuu a kɔlvesɛiyo. I co nda cii mì faŋa nda o ceendo coo. 14Lelan, siɔl dɛ̀ndɛ̀ bɛndu-bɛndoo a pɛngɛn yɔm siprɛs, mà tosa kungulan lenin taw, mà yikpa ndu lenin a lekɔɔli. 15Mɛɛ n bɛnda le ndu siɔlɔɔ yɛ co hoo ni: bandei dunndo kɛmɛ leyáá, buo dunndo beleŋuɛɛnu, simndan dunndo beleyaa. 16Mà cua yindɔɔ o dɛ̀ndɛ̀ kalaa coo, mà mɛi fondaa bandei dunndo lepilɛ o yindɔɔ a nɛɛ kpengon mɛɛlu coo-a tɛɛn, mà soli dioo o kpengei ipilɛ. Mà tosa dɛ̀ndɛ̀ kalaa helɔɔ leyàá. 17Kani i co hunɔɔ mɛmma bɛnduan soli o lɛŋnden coo, mì tɛɛmbuu ɲɛ-ɲɛ co yoomu. Ɲɛ-ɲɛ co o lɛŋnden coo co hunɔɔ yɛɛvɛ dɔwnɔn. 18Kɛ i yii kpemaa le nɔm ciindiaa. A co hunɔɔ luɛyɔɔ o dɛ̀ndɔ̀ɔ́ nin niaa laa nɔm, poaa nɔmnda a laandaa poaa nɔmnda. 19A bɛnda ma lueinun visia a cɔlua súúlan kpow ikɛi o dɛ̀ndɔ̀ɔ́ nin. Visia súú-súù n va pɛ lueiyo, a luei o piaandoo a o laandoo, haliko mi kan lo yoomu. 20Ɲaa yoomaa súúlan kpow a hunnin nɔm ikɛi o dɛ̀ndɔ̀ɔ́, haliko ma cinda: visia pɔm-pɔmbɔa kela lɛŋ-nda, a bɛndua a yowva. 21Cua ɲɛm dian súúlan kpow mà mandan ikɛi le dioo niaa vanndacieea a cɔlua vanin nɔm ikɛi-ya.» 22Mí Noe tosa lende, ɲɛ-ɲɛ Hala dimul ndu le tosaa, mó tosa kpafii.
Àwon tá yàn lọ́wọ́lọ́wọ́ báyìí:
O Kandɔɔ 6: BKG
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© Alliance Biblique en Guinée