Mwanzo 16
16
Sarai na Hagari
1Sambi Sarai muka wa Buraimu, aapongore naye mwana anta mmoja. Falakini ákiwa nawo njakazi mmoja muka wa kwitiwa Hagari, kwawo Miswiri. 2Basi Sarai akimwambira Buraimu: “Ona, Mola kanifunga tumbo nisipongore wana. Basi nlombe Hagari, njakazi wangu, dalili upongola naye nímpata mwana.” Buraimu akikubali ngano ya nkawake Sarai. 3Kwa javyo bandi ya kuinshi myaka kumi Kanaa, Sarai akintwala njakazi wake Hagari akimpa Buraimu akimpalakanya naye. 4Buraimu akikala naye mpaka akimita. Basi Hagari paaríjiwe kuwa kanawo mimba, akanza kunnang'aniza kwa kunkejeli ntwawe ire. 5Basi Sarai akimwambira Buraimu: “Omi nukupa njakazi wangu kwa kusaka kwangu. Sambi Hagari-yu paaríjiwe kuwa kana mimba áninang'aniza kwa kunikejeli. Vyaatenda-vi sivyo shariya kwangu omi. Fala nowe-we ndi utenza. Basi uwe nomi Mola wetu ndi mwenyé kutilamula mwenyé ukosa onse!” 6Buraimu akinjibu Sarai: “Iye mpaka sambi-pa akwitika kuwa njakazi wako. Ntende vyauwona kuwa vyema vyonse.” Sarai akanza kuntabisha, mpaka ikimbidi iye kutira.
Kupongoriwa ka Sumaila
7Hagari akenenda nlanga, mbere yake akimwisukira Laika wa Mola wetu, karibu ya mahala pa tandazimu, papitire njira ya kuka Shuri. 8Laika ire akindairi: “Hagari njakazi wa Sarai, ulawapi? Ukapi?” Iye akijibu: “Nankuntira ntwawangu Sarai.” 9Fala Laika wa Mola wetu akimwambira akamba: “Ludira ka ntwawo na casaka conse untendere.” 10Zaida ya vire, akimwambira tena: “Nízidi kwengeza ujukulu wako usikidirike kuwalangika.” 11Ikisa Laika wa Mola wetu ire akimwambira akamba javi:
“Ona! Uwe kwimita úmpongola mwana nlume,
ukuja kumwita zina ra Sumaila,
konta Mola wetu kasikira kiriro ca tabu yako.
12Iye akuja kuwa mwananlume kamba nyamangalo,
akuja kubishana na wanu piya na wanu piya wakuja kubishana naye,
na akuja kuwa aduwi wa jamaa zake piya.”
13Basi Hagari akimwita zina Mola wetu wasowere naye mahala pare “Uwe ndi Mola wetu uwona!” konta akamba javi: “Mwaja! Epa mahala-pa sisimanane naye mwenye kuniwona?” 14Ntamana nowo nrimbu-wo ukwitiwa Bere-Lahai-Roi#16:14 “Bere-Lahai-Roi” luga ya kiebraniya. Mana ake ndi ‘Nrimbu wa Mwenye Hai aniwona’., na uwa kati-kati ya Kadeshi na Beredi.
15Hagari akimpongola mwana nlume. Buraimu wawaye mwana ire akimwita zina ra Sumaila. 16Buraimu pampongore Sumaila ákiwa na myaka tamanini na sita.
Àwon tá yàn lọ́wọ́lọ́wọ́ báyìí:
Mwanzo 16: wmwBI
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
© 2013, Wycliffe Bible Translators, Inc. All rights reserved.