Mata 11
11
Yohana nɛ́d baptisma bə̀ piìn gbantumsə̀ bərá
(Luka 7.18-35)
1Zɔ̀ŋ aa Yéésù bàà bɛ́' nɛ́b sáànmbə̀ oò bəraa kób zè iirə rə nwɔŋ bəraa yée kàangə́, zá' wərà, ɛ̀m nɛ́b bəd in dáàn sáànmbìá, bít nɛ́b bəd nwɔŋ dáàn udǹmbə̀ bìl boò bərú.
2Yohana nɛ́d baptisma bə̀ piìn kùm wúltígə́l bə̀ rú, zɛ̀ŋ kììà bə̀ tə́ Krístù tù' bəraa mà' rə nwɔŋ gáàm gə́, tùmà nɛ́b sáànmbə̀ oò bəd, 3yaà boò dɛ̀rə̀: «Ámda ń kùmsə̀n màn aa dáà yaànà reè, sínkɔ̀ kùm báà nwán nɛ́ŋə̀ nə́ŋ̀ ɔ̀ɔ̀rì?»
4Yéésù kè' í' bə̀: «Ɛ̀m dá ìì ùd Yohana in aa íí tə́ kiìn doó, bít kə̀ aa íí tə́ bé'ǹ doó. 5Nyəd bəd bé' núù yàá, nɛ́b dun tə́ŋke bəd dun wɔ̀d yàá, gərə́ bəd si' nyɛd yàá, kpuŋə̀ bəd kìì túŋ yàá, val bəd díím yàá, bít nɛ́b búúd bə̀ bəd kɔ̀ bə̀ bánì Vɛnɛ́b Nwɔŋ Puu Sɔ̀ɔ̀nkè kiìnmbìá. 6Màn aa bɔ̀' tɛ́mbagké oò máá bòórú síndə, Vɛnɛ́b dáù nɛɛ̀n zígǹ yílú!»
7Zɔ̀ŋ aa Yohana gbantumsə̀ bəd zá' ìì tə́ ɛɛ̀m gə́, Yéésù zá' pìì nɛ́b zùúm nwɔŋ gáàmbə̀ Yohana yílú, bàà: «Ɛ̀m dáá íí ɛ̀gà níì fɔ̀gú gú? Dɛ̀gə́l aa nwul wá' reè? 8Zá ɛ̀m dá íí bé'à níì gú? Nɛ́ŋ váàndo nə́ŋ̀ gɔ̀' sɔ̀ɔ̀nkè bèì? Zá nɛ́b aa ìì pál gɔ̀' sɔ̀ɔ̀n bəd də, ìì tə́ gààd gbàád bəd yiilú. 9Zá nɛ́ɛ̀m ɛ̀m dá íí bé'à níì gú? Vɛnɛ́b gbantumsə̀ nə́ŋ̀ì? Èè, mə́ tə́ ii kíìn baanàá, Yohana kànsə̀n Vɛnɛ́b gbantumsàá. 10Kə̀ aakíin də, Yohana kùmsə̀n màn aa Núúboòd Gìdń gám nwɔŋ oò yílú, bàà: ‹Ǹ ɛ̀ga, máára mə́ Vɛnɛ́b da, mə́ tùm gbantumsə̀ mə́ tə́ ám númú,
bɔ̀b dá oò kùd n kpaŋ̀ númú› roó.
11Mə́ tə́ ii kíìn baanàá, aarə nwɔŋ sɔ̀ɔ̀ná, bə́ŋ̀ nɛ́ŋə̀ nə́ŋ̀má bə̀ lɛ̀bə̀, kàn Yohana nɛ́d baptisma bə̀ piìn kə̀ gbà'á sé. Zá mə́ tə́ ii kíìn baanàá, wàà bɛ̀ŋ́sə̀wà aa Vɛnɛ́b Gààd lɛgə́ paà bə̀ rú rə, kàŋ kànsə̀n Yohana nɛ́d baptisma bə̀ piìn da. 12Sɔ̀d sɛŋ bəraa Yohana nɛ́d baptisma bə̀ piìn tə́ nɛ́b bəd Vɛnɛ́b nwɔŋ baàn də ba, yaà wə́ə́ bə́ŋyóo, Vɛnɛ́b Gààd nyá'míìn tə́ kə̀ kpɛŋsɛ́lá, bít nɛ́b aa bə̀ tə́ in ma'ǹ kə̀ kpɛŋsɛ́l lə, nyá' bə̀ kè' tə́ sunú. 13Vɛnɛ́b gbantumsə̀ bəd gə́ kóólé, kə̀ Musa indaŋ̀mbə̀ tá, ìì bàà Vɛnɛ́b Gààd nwɔŋá, yaà wə́ə́ Yohana nɛɛ̀n bə zé. 14Bít dáà íí kè' nwɔŋ aa mə́ tə́ baàn dəì gə́, Yohana kùmsə̀n Eliya aa bə̀ bàà dáà yaànà roó. 15Íí tə́ kə̀ túŋ naà kiìnmbə̀ gə́, ìì kìì nwɔŋ aarə kíìn sɔ̀ɔ̀nkè.
16«Má nɛ́b aa bə́ŋyée də́'ǹ kə̀ nɛ́ɛ̀réè gú? Bə̀ lúŋ tə́ yɛb bɛ̀ŋ́sə̀ bəraa ìì kùm waàl gbà'á rú, bít ìì dɛ̀d ɔ̀boò bəd kambəd gə́, ìì bàà' 17‹Bə́ íl ii léd nábá, zá íí nàà sé. Bə́ nàà ii val nábá, zá íí dàl nwɔŋ sé!› roó. 18Kə̀ aakíin, Yohana yaà yàá, gìd inlíìnmbìá, nyəə badn sé, bít nɛ́b bəd bàà: ‹Tə́ kə̀ nwul vaksə́ naú!› 19Nɛ́ŋə̀ aa bə̀ dɛ̀rə̀ Nɛ́ŋ Váàndo Wàà rə, yaà yàá, tə́ gbèd líínàá, bít tə́ kíìn nyəənàá, bít nɛ́b bəd bàà: ‹Ìì ɛ̀g Nɛ́ŋ Váàndo aa yóo! Oò gə́, nɛ́d líísɛ́l bìá, bít nɛ́d badn bə̀ nyəə̀nná. Oò gə́, nɛ́d ba'káám bə̀ ke'ǹ bəd kə̀ nɛ́b invaksə́ bə̀ ma'ǹ bəd ɔ̀dzérá!› Zá ingabké Vɛnɛ́b bə̀ gə́, ì' yíl oò tə́ wɔ̀ɔ̀làá, kə̀ tù' oò bəraa tə́ ma'ǹ doó.»
Bìl bəraa ìì məə Yéésù bagǹmbə̀ roó
(Luka 10.13-15)
20Nyàm nə́ŋ̀ kàani, Yéésù zá' píí bìl bəraa mà' inwulubə̀ zùúm bəd dú rə álǹmbìá. Kàandə, ìì pɛ́n tɛ́m boò sé. Bít bàà: 21«Íí dá búúd kíìn bé'nàá, nɛ́b Korazin bìlə́ bə̀ bərá! Íí dá búúd kíìn bé'nàá, nɛ́b Bɛdsaida bìlə́ bə̀ bərá! Kàandə, dáà inwulubə̀ bəraa ma'míìn aí tə́ŋə́ yée, tə́ Tirus bìlə́, kə̀ Sidon bìlə́ gə́, nɛ́b aa bìlú wərə̀ rə, ìì páá gɔ̀' val bə̀ gídǹ bəd yàá, bít ìì zàd teemì yíləsú, bɔbm̀ i'ǹmbə̀ bənə́ pɛ́ɛ̀nə́ tɛ́m, bít bənə́ sɔ̀gnnə́ yàá. 22Kə̀ taàbìá, mə́ tə́ ii taà baanàá, nyàm aa Vɛnɛ́b dá nɛ́b bəd fágǹ bərə, nɛ́b Tirus bìlə́ bə̀ kə̀ nɛ́b Sidon bìlə́ bə̀ tá, fágə́n boò dá kuùm bɛ̀ŋ́sə̀wàá. Zá bìl bəraa rə, fágə́n boò nwuu dá sə̀n Tirus bìlə́ kə̀ Sidon bìlə́ bə̀ tá kanàá. 23Aíra, íí nɛ́b Kapɛrnaum bìlə́ bə̀ bərá, sèl íí bàà na' bənə́ dáráàn wə́ə̀n lɛgə́ paà Vɛnɛ́b yiìl wa? Ma'míìn gá. Vɛ́nà gə́, bə̀ dá ii sí'ǹ aàn yɛ́b dùú, zɔ̀ŋ aa val bəd ləə bərə ba. Kə̀ aakíin də, dáà inwulubə̀ bəraa ma'míìn ámdú yée, ma'míìn tə́ Sodoma bìlə́ gə́, bìl aarə, nyà'aa dá kuùm túrú ní. 24Kə̀ taàbìá, mə́ tə́ ii taà baanàá, nyàm aa Vɛnɛ́b dá nɛ́b bəd fágǹ bərə, nɛ́b aa Sodoma bìlə́ rə, búúd boò dá kuùm bɛ̀ŋ́sə̀wàá. Zá bìl bəraa rə, búúd boò bə̀ nwuu dá sə̀n Sodoma bə̀ kanàá.»
Yéésù dɛ̀d nɛ́b bəd boò bàg bəǹ kúnú
(Luka 10.21-22)
25Kàanyée gə́, Yéésù bàà kà' nwɔŋ aa yóo: «Báá, mə́ mɔ̀' n yàá, Báátììkpɛ̀ŋ lɛg kə̀ yɛ́b tə́ bìá. Mə́ tə́ən kíìn káŋàá, kə̀ in bəraa ń ì' nɛ́b aa gàb in sé, bít ń mə́' nɛ́b in bə̀ gabm̀ bəd kə̀ nɛ́b wágə̀n bə̀ bəd tə́ yóo. 26Èè, Báá, mə́ tə́ən kíìn káŋàá, kàandə, sɔ̀ɔ̀n n kúnú, ń mà' taà kàani.
27«Báá, ḿ pii mə́ in bərì kóólé nɛɛ̀n tɛ́mú. Nɛ́ŋə̀ nə́ŋ̀má gàb Wàà sé, wàà Báá oò nə́ŋ̀ní gàb sùnú. Bít nɛ́ŋə̀ nə́ŋ̀má gàb wàà Báá sé, Wàà oò nə́ŋ̀ní gàb sùnú. Nɛ́b aa bə̀ dá wàà Báá gabm̀ də, dá kuùm nɛ́b aa Wàà í' bə̀ Báá oò i'ǹmbə̀ rə ní.
28«Ìì yaà máá sunú íí kóólé, nɛ́b aa íí mú' inpi'kè pa'ǹmbə̀ yílə́ roó; bít máá ii nyi'ké piinàá. 29Ìì ləə mə́ kúnú, ìì dàà máà ì' ii kpaŋ̀á, bít ìì kè' insánke mə́ra. Kə̀ aakíin də, máá rə, mə́ nɛ́d tɛ́m tɛbkè bìá, nɛ́d tɛ́m lə́ə́ke bìá, bít íí dá nyi'ké gɔ̀ŋsə́ íí bə̀ kíìn bɔbàá. 30Kə̀ aakíin də, kpaŋ̀ aa máá ii i'ǹ də, gbò' bagǹmbə̀ sé; bít in aa máá ii piìn ìì pà' rə kɔ̀, tə́ zá'keá.»
Àwon tá yàn lọ́wọ́lọ́wọ́ báyìí:
Mata 11: SLNT98
Ìsàmì-sí
Pín
Daako
Ṣé o fẹ́ fi àwọn ohun pàtàkì pamọ́ sórí gbogbo àwọn ẹ̀rọ rẹ? Wọlé pẹ̀lú àkántì tuntun tàbí wọlé pẹ̀lú àkántì tí tẹ́lẹ̀
Nouveau Testament en Samba Leko © Alliance Biblique du Cameroun, 1998.
