KWABASEROMA 12:1-21
KWABASEROMA 12:1-21 IZIBHALO EZINGCWELE (XHO75)
Ndiyanivuselela ngoko, bazalwana, ngeemfefe zikaThixo, ukuba niyinikele imizimba yenu ibe lidini eliphilileyo, elingcwele, elikholekileyo kuThixo: inkonzo yenu ke leyo yasengqondweni. Kanjalo ningamilisi okweli phakade; manibe kumila kumbi ngokuhlaziyeka kwengqiqo yenu, ukuze nikucikide into okuyiyo ukuthanda kukaThixo okulungileyo, okukholekileyo, okuzalisekileyo. Kuba ngalo ubabalo endababalwa ngalo, ndithi kubo bonke abaphakathi kwenu, mabangazicingeli ngaphezu koko bamelwe kukuzicingela ngako; mabazicingele ingcinga ephilileyo, njengoko uThixo abelé ulowo nalowo umlinganiso wokholo. Kuba, kwanjengokuba sinamalungu amaninzi mzimbeni mnye, abe ke onke amalungu la engenamsebenzi mnye, ngokunjalo thina aba, sibaninzi nje, simzimba mnye kuKristu, sonke ke ngabanye singamalungu omnye elomnye. Sinezibabalo nje ke ezahlukahlukileyo, ngokobabalo esababalwa ngalo, nokuba sinokuprofeta, masiprofete ngokomlinganiselo wokholo; nokuba sinobulungiseleli, masihlale ebulungiselelini obo; nokuba ngofundisayo, makahlale emfundisweni leyo; nokuba ngovuselelayo, makahlale ekuvuseleleni oko; owabàyo makabe engenakumbi; owongamelayo, makongame enyamekile; owenza inceba makayenze inceba echwayithile. Uthando malungabi naluhanahaniso; kuthiyeni okungendawo, namathelani kokulungileyo. Mayela nothando olu lobuzalwana, ndithi, yenzelanani ububele; mayela nembeko leyo, phangelanani; mayela nokunyameka oko, musani ukunqena; mayela nomoya lo, vuthani; mayela neNkosi le, khonzani; mayela nethemba, vuyani; mayela nembandezelo, nyamezelani; mayela nomthandazo, zingisani; mayela neentswelo zabangcwele, yibani nobudlelane; ukubuka iindwendwe kusukeleni. Basikeleleni abanitshutshisayo; sikelelani, ningaqalekisi. Vuyani nabavuyayo, nilile nabalilayo. Cingelanani nto-nye; musani ukucinga izinto eziphakamileyo, tsalelani kwezithobekileyo. Musani ukuba ziingqondi ngokwenu. Ningabuyekezi ububi ngobubi nakubani. Khathalelani okùhle emehlweni abantu bonke. Ukuba kunokwenzeka, okukokwenu nina, hlalani ninoxolo nabantu bonke. Musani ukuziphindezelela, zint'anda; yikhweleleni ingqumbo; kuba kubhaliwe kwathiwa, Impindezelo yeyam, kuya kubuyekeza mna, itsho iNkosi. Ngoko ke, ukuba utshaba lwakho lulambile, luphe ludle; ukuba lunxaniwe, luseze; kuba ngokwenjenjalo ke, woba ufumba amalahle omlilo phezu kwentloko yalo. Musa ukweyiswa bububi; boyise ububi ngokulungileyo.
KWABASEROMA 12:1-21 Contemporary Xhosa Bible 2024 (CXB24)
Ndiyanivuselela ngoko, bazalwana, ngeemfefe zikaThixo, ukuba niyinikele imizimba yenu ibe lidini eliphilileyo, elingcwele, elikholekileyo kuThixo: inkonzo yenu ke leyo yasengqondweni. Musani ke ukuthatha isimilo sabantu beli phakade, kodwa iingqondo zenu maziguquke zihlaziyeke, nize niyivume intando kaThixo, yona ilungileyo, ikholekileyo, igqibeleleyo. Ngalo ubabalo endababalwa ngalo ndithi kuni nonke: Musani ukuzicingela ngaphezu koko umntu amelwe kukuzicingela ngako; mabacinge ingcinga ephilileyo, njengoko uThixo abele ulowo umlinganiso wokholo. Kuba, kwanjengokuba sinamalungu amaninzi mzimbeni mnye, abe ke onke amalungu la engenamsebenzi mnye. Ngokunjalo thina, sibaninzi nje, simzimba mnye ngokumanywa noKrestu, yaye sonke ngabanye singamalungu omnye elomnye. Masizisebenzise ke iziphiwo ezahlukeneyo esababalwa ngazo nguThixo. Ukuba sinesiphiwo sokuvakalisa ilizwi elivela kuThixo, masilivakalise ngokokholo esinalo; nokuba sinobulungiseleli, masihlale ebulungiselelini obo; nokuba ngofundisayo, makahlale emfundisweni leyo; nokuba ngovuselelayo, makahlale ekuvuseleleni oko; owabayo makabe engenakumbi; owongamelayo, makahlale enyamekile; owenza inceba makayenze inceba echwayithile. Uthando malungabi naluhanahaniso. Kwenyanyeni okungendawo; namathelani kokulungileyo. Mayela nothando olu lobuzalwana, ndithi, yenzelanani ububele; mayela nembeko leyo, phangelanani; Musani ukunqena ishishini; ushushu emoyeni; khonzani iNkosi; Vuyani ninethemba; nyamezelani embandezelweni; nizingisa emthandazweni; Yiboneleleni iintswelo zamakholwa; ziphatheni ngokubuka iindwendwe. Basikeleleni abanitshutshisayo; sikelelani, ningaqalekisi. Vuyani nabavuyayo, nilile nabalilayo. Cingelanani nto-nye; musani ukucinga izinto eziphakamileyo, tsalelani kwezithobekileyo. Musani ukuba ziingqondi ngokwenu. Musani ukubuyekeza ububi ngobubi nakubani. Yenzani okulungileyo phambi kwabantu bonke. Yenzani unako-nako ukuhlalisana ngoxolo nabantu bonke. Zintanda, musani ukuziphindezelela, yikhweleleni ingqumbo; kuba iziBhalo zithi: “Impindezelo yeyam; kuya kubuyekeza mna, utsho uYehova. Ngoko ke, ukuba utshaba lwakho lulambile, luphe ludle; ukuba lunxaniwe, luseze; kuba ngokwenjenjalo ke, woba ufumba amalahle omlilo phezu kwentloko yalo. Musa ukoyiswa bububi; boyise ububi ngokulungileyo.
KWABASEROMA 12:1-21 IBHAYIBHILE (XHO96)
Ndiyanikhuthaza ngoko, mawethu, ngenxa yenceba kaThixo, ukuba nizinikele nina ziqu nibe lidini eliphilayo, elingcwele, elikholekileyo kuThixo. Leyo ke yindlela yenu efanelekileyo yokukhonza uThixo ngengqiqo. Musani ke ukuthatha isimilo sabantu beli phakade, kodwa iingqondo zenu maziguquke zihlaziyeke, nize niyivume intando kaThixo, yona ilungileyo, ikholekileyo, igqibeleleyo. Ngalo ubabalo endababalwa ngalo ndithi kuni nonke: Musani ukuzicingela ngaphezu koko umntu amelwe kukuzicingela ngako. Ndaweni yaloo nto yibani neengcinga ezithobekileyo. Elowo nalowo makazikhuthaze ngokokholo aluphiwe nguThixo. Kaloku, kwanjengokuba sinamalungu amaninzi mzimbeni mnye, abe ke onke amalungu la engenamsebenzi mnye, ngokunjalo thina aba, sibaninzi nje, simzimba mnye ngokumanywa noKrestu. Sonke ke ngabanye singamalungu omnye elomnye. Masizisebenzise ke iziphiwo ezahlukeneyo esababalwa ngazo nguThixo. Ukuba sinesiphiwo sokuvakalisa ilizwi elivela kuThixo, masilivakalise ngokokholo esinalo. Ukuba sinesiphiwo sokukhonza abanye, masizingise ekukhonzeni. Ukuba sinesiphiwo sokufundisa, masifundise kangangoko sinako. Ukuba sinesiphiwo sokukhuthaza, masiqine ekukhuthazeni. Ongumabi makazabe izipho ngesisa. Owongameleyo makongamele ngenzondelelo. Owenza inceba makayenze echwayitile. Uthando malungabi naluhanahaniso. Yithiyeni inkohlakalo; bambelelani kokulungileyo. Thandanani ngokwabazalanayo. Shiyiselanani ngokwenzelana imbeko. Zondelelani ningatyhafi. Yibani nefuthe loMoya. Yikhonzeni iNkosi. Vuyani, ninethemba nje, ninyamezele ezimbandezelweni zenu, nithandaze ningayeki. Ziboneleleni iintswelo zamakholwa, nizikhathaze ngokubuka iindwendwe. Basikeleleni abanitshutshisayo; sikelelani, ningaqalekisi. Vuyani nabavuyayo, nilile nabalilayo. Yibani moya mnye. Musani ukusukela amawonga; yaneliswani kukuzithoba. Musani ukuzicingela ukuba niziingqondi. Musani ukubuyekeza ububi ngobubi. Zimiseleni ukwenza okulungileyo phambi kwabantu bonke. Yenzani unako-nako ukuhlalisana ngoxolo nabantu bonke. Zihlobo, musani ukuziphindezela ngokwenu. Impindezelo yiyekeleni ingqumbo kaThixo, njengoko *iziBhalo zitshoyo ukuthi: “Impindezelo yeyam, kuya kubuyekeza mna, itsho iNkosi.” Kaloku iziBhalo zikwatsho nokuthi: “Ukuba utshaba lwakho lulambile, luphe into etyiwayo; ukuba lunxaniwe, luphe into eselwayo; kuba ngokwenjenjalo ke, woba uluvisa udano, khon' ukuze luguquke.” Musa ukoyiswa bububi; boyise ububi ngokulungisa.
KWABASEROMA 12:1-21 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
NDIYANIKUNGA ngoko, bazalwana! ngezibele ZIKATIXO, ukubaniyimisele imizimba yenu ibe lidini elipilileyo, elingcwele, elikolekileyo KUTIXO, okusisikonzo senu esifanelekileyo: nize ningalinganisani nelilizwe likoyo, niti nibe nenziwe ngakumbi ngokuhlaziywa kwoluvo lwenu, ukuba niqiqe into iyiyo intando KATIXO elungileyo, ekolekieyo, efezekileyo. Ngokuba ndisiti, ngalo ufefe endanikwa lona, kubo bonke abakoyo pakati kwenu, mabangakumbuli ngokupezulu koko bafanele ukukumbula ngako, koko mabakumbule ngokutelekelela, njengokuba UTIXO wabele abanye ngabanye isilinganiselwa sokolo. Ngokuba kwa njengokuba sinawo amalungu amaninzi emzimbeni mnye, kanti amalungu akanawo umsebenzi mnye onke; kwa njalo tina, sibaninzi nje, singumzimba mnye ku‐Kristu, namalungu omnye nomnye ngabanye. Kekaloku sinazo izipiwo ngezipiwo ngowofefe esanikwa lona nje, nokuba bubuprofitesho, masoprofiteshe ngokwesaci sokolo lwetu; nokuba bubukonzi, masisebenze ebukonzini betu: nokuba ngofundisayo, makahlale ekufundiseni kwake; nokuba ngoyalayo, ekuyaleni kwake: owabayo, makenje njalo ngesisa; opatayo, ngokuku̔tala; owenza ngobubele, ngokucwayita. Utando lwenu malube lolungazenzisiyo. Zondani okukohlakeleyo; namatelani kokulungileyo. Ekutandeni abazalwana, yibani nobubele omnye kwomnye; ekubekeni, yenzani ngokupangelana; ekuku̔taleni, ninganqeni; zondelelani emoyeni; konzani ENKOSINI; vuyani etembeni; nyamezelani ebunzimeni; zingisani ekutandazeni; yabelani intswelo zabangcwele; nxamelani imbuko yabasemzini. Tamsanqelisani abo banitshutshisayo: tamsanqelisani, ningqalekisi ke. Vuyani nabo bavuyayo, nilile nabo balilayo. Yibani nokuvumelana omnye nomnye. Ningamyamekeli izinto ezipakamileyo, niti nitobele kwezitobekileyo. Ningaziqa̔yiseli ngobulumko. Ningavuzi mntu ngobubi ngenxa yobubi. Yazalelelani izinto ezifaneleyo ebusweni babantu bonke. Ukuba kungenzeka, maniti okungecala lenu nixolane nabantu bonke. Ninggazipindezeleli ngokwenu, batandwa! niti ninike indawo kuwo umsindo; ngokuba kuba̔liwe ukuti: Kukokwam ukupindezela, kwobuyekezwa ndim; utsho UYEHOVA. Ngako xeshekweni utshaba lwako lulambayo, lufunzele; xeshekweni lunxanwayo, luseze: ngokuba usenje njalo uya kufumba amalahle omlilo pezu kwentloko yalo. Ungoyiswa kokukohlakeleyo, uti ukwoyise okukohlakeleyo ngokulungileyo.
