UMATEYU 25:31-46
UMATEYU 25:31-46 IZIBHALO EZINGCWELE (XHO75)
Xa ke athe wafika uNyana woMntu esebuqaqawulini bakhe, enazo zonke izithunywa ezingcwele, ngelo xa uya kuhlala phezu kwetrone yobuqaqawuli bakhe; zihlanganiswe phambi kwakhe zonke iintlanga, abahlule abanye kwabanye, njengokuba umalusi ezahlula izimvu ezibhokhweni; athi zona izimvu azimise ngasekunene kwakhe, athi kodwa zona iibhokhwe azimise ngasekhohlo. Úya kuthi ke ukumkani kwabangasekunene kwakhe, Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi; kuba ndalamba, nandipha ukudla; ndanxanwa, nandiseza; ndandingowasemzini, nandingenisa endlwini; ndandizé, nandambesa; ndandisifa, nandivelela; ndandisentolongweni, neza kum. Oza amphendule ke amalungisa, esithi, Nkosi, sákubona nini na ulambile, sakonga; unxaniwe, sakuseza? Sákubona nini na ke ungowasemzini, sakungenisa endlwini, uzé, sakwambesa? Sákubona nini na ke usifa, okanye usentolongweni, seza kuwe? Aze aphendule ukumkani athi kuwo, Inene ndithi kuni, Ekubeni nenjenjalo nakumnye waba bazalwana bam bangabona bancinane, nenjenjalo nakum. Úya kuthi nakwabangasekhohlo, Mkani kum, nina baqalekiswa, niye emlilweni ongunaphakade, owalungiselwa uMtyholi nezithunywa zakhe. Kuba ndalamba, anandipha kudla; ndanxanwa, anandiseza; ndandingowasemzini, anandingenisa ndlwini; ndandizé, anandambesa; ndandisifa, ndandisentolongweni, anandivelela. Boza ke bamphendule nabo, besithi, Nkosi, sákubona nini na ulambile, okanye unxaniwe, okanye ungowasemzini, okanye uzé, okanye usifa, okanye usentolongweni, asakulungiselela? Aze abaphendule, esithi, Inene ndithi kuni, Ekubeni ningenjanga njalo nakumnye waba bangabona bancinane, anenjanga njalo nakum. Baya kumka aba baye elubethweni olungunaphakade; ke wona amalungisa aya kuya ebomini obungunaphakade.
UMATEYU 25:31-46 IBHAYIBHILE (XHO96)
“Xa athe wafika *uNyana woLuntu esebuqaqawulini bakhe, enazo zonke izithunywa zezulu, uya kuhlala enkundleni yakhe yobungangamsha, zihlanganiselwe phambi kwakhe zonke iintlanga. Wothi ke abahlule abanye kwabanye ngokomalusi esahlula iigusha ezibhokhweni. Zona iigusha wozibeka ngasekunene kwakhe, iibhokhwe ngasekhohlo. Ukumkani ke uya kuthi kwabangasekunene: ‘Yizani, nina basikelelweyo nguBawo, nixhamle uyolo lolawulo enalulungiselelwayo kwasekusekweni kwehlabathi; kuba ndandilambile, nandipha ukutya; ndandinxaniwe, nandipha amanzi; ndandingowasemzini, nandamkela; ndandihamba ze, nandambathisa; ndandigula, nandihambela; ndandisentolongweni, nandivelela.’ “Omphendula ke amalungisa esithi: ‘Nkosi, ngaba sakubona nini na ulambile, sakupha ukutya; unxaniwe, sakunika amanzi? Ngaba sakubona nini na ungowasemzini, sakwamkela; uhamba ze, sakwambathisa? Ngaba sakubona nini na ugula, okanye usentolongweni, sakuhambela?’ Wophendula ukumkani athi kuwo: ‘Ndithi kuni, inene, ekubeni nithe nenjenjalo nakomnye kula mawethu angawona agqusha eluthulini, nithe nenjenjalo nakum.’ “Wothi ke kwabo bangasekhohlo: ‘Mkani kum, nina baqalekisiweyo nguThixo, niye emlilweni ongunaphakade, olungiselelwe umtyholi nezithunywa zakhe; kuba ndandilambile, naza ànandipha kutya; ndandinxaniwe, naza anandipha manzi; ndandingowasemzini, naza anandamkela; ndandihamba ze, naza anandambathisa; ndandigula, ndandisentolongweni, naza ànandihambela.’ “Bophendula ke bathi: ‘Nkosi, ngaba sakubona nini na ulambile, unxaniwe, ungowasemzini, uhamba ze, ugula, okanye usentolongweni, saza àsakunceda?’ Wobaphendula ke athi: ‘Ndithi kuni, inene, ekubeni ningenzanga njalo nakumnye waba bangabona bancinane, anenzanga njalo nakum.’ Baya kumka aba, baye esohlwayweni esingunaphakade. Ke wona amalungisa aya kuya ebomini obungunaphakade.”
UMATEYU 25:31-46 Contemporary Xhosa Bible 2024 (CXB24)
Xa ke athe wafika uNyana woMntu esebuqaqawulini bakhe, enazo zonke izithunywa ezingcwele, ngelo xa uya kuhlala phezu kwetrone yobuqaqawuli bakhe; zihlanganiswe phambi kwakhe zonke iintlanga, abahlule abanye kwabanye, njengokuba umalusi ezahlula izimvu ezibhokhweni; athi zona izimvu azimise ngasekunene kwakhe, athi kodwa zona iibhokhwe azimise ngasekhohlo. Uya kuthi ke ukumkani kwabangasekunene kwakhe, Yizani, nina nisikelelweyo nguBawo, nibudle ilifa ubukumkani obalungiselwa nina kwasekusekweni kwehlabathi. Kuba ndalamba, nandipha ukudla; ndanxanwa, nandiseza; ndandingowasemzini, nandingenisa endlwini; ndandize, nandambesa; ndandisifa, nandivelela; ndandisentolongweni, neza kum. Oza amphendule ke amalungisa, esithi, Nkosi, sakubona nini na ulambile, sakonga; unxaniwe, saseza? Sakubona nini na ungowasemzini, sakungenisa endlwini? Uze, sakwambesa? Sakubona nini na ke usifa, okanye usentolongweni, seza kuwe? Aze aphendule ukumkani athi kuwo, Inene ndithi kuni, Ekubeni nithe nenjenjalo nakomnye waba bazalwana bam bangabona bangabona bancinane, nenjenjalo nakum. Uya kuthi nakwabangasekhohlo, Mkani kum, nina baqalekiswa, niye emlilweni ongunaphakade, owalungiselwa uMtyholi nezithunywa zakhe. Kuba ndalamba, anandiseza; ndanxanwa, anandiseza; ndandingowasemzini, anandingenisa ndlwini; ndandize, anandambesa; ndandisifa, ndandisentolongweni, anandivelela. Boza ke bamphendule nabo, besithi, Nkosi, sakubona nini na ulambile, okanye unxaniwe, okanye ungowasemzini, okanye uze, okanye usifa, okanye usentolongweni, asakulungiselela? Aze abaphendule athi, Inene ndithi kuni, Ekubeni ningenjanga njalo nakumnye waba bangabona bangabona bancinane, anenjanga njalo nakum. Abo baya kumka aba baye elubethweni olungunaphakade; ke wona amalungisa aya kuya ebomini obungunaphakade.
UMATEYU 25:31-46 Incwadi Yeziba̔lo Ezingcwele 1864, 1902 (Xhosa Appleyard) (XHO1902A)
Kekaloku akuza unyana wesintu ebungcwaliseni bake, nazo zonke ingelosi ezingcwele kunye naye, uya kwandula ahlale pezu kweterone yobungcwalisa bake; kwaye kuya kuhlanganiswa pambi kwake zonke intlanga; waeya kubahlula abanye kwabanye, njengokuba umalusi esahlula izimvu ezibokweni; ati izimvu ke azimise ngasekunene kuye, ati kodwa ibokwe azimise ngasekohlo. Oko nya kuti ukumkani kwabo bangasekunene kuye: Yizani, nina batanyusanqelweyo NGUBAWO! yidlani ilifa lobukumkani obulungiselwe nina kwa sekumisweni kwelizwe: ngokuba bendilambile, naza nandipa ukutya; bendinxaniwe, naza nandiseza; bendingowasemzini, naza nandamkela endlwini; bendizé, naza nandambesa; bendisifa, naza nandilunguza; bendisentolongweni, neza kum ke. Baya kwandula ukupendula kuye abalungileyo, besiti: Nkosi! bekuninina esakubona ulambile, saza sakwondla; umhlaumbi unxaniwe, saza sakuseza? bekuninina esakubona ungowasemzini, saza sakwamkela endlwini; umhlaumbi uzé, saza sakwambesa? bekuninina esakubona usifa, umhlaumbi usentolongweni, seza kuwe ke? Waeya kupendula ukumkani ati kubo: Ngokwenene nditi kuni: Ngendawo yokuba nibe nisenje njalo kwomnye waba abazalwana bam noko amncinane kubo bonke, nibe nisenje njalo kum. Oko uya kuti nakwabo bangasekohlo: Mkani kum, nina baqalekisiweyo! niye emlilweni ongunapakade, olungiselwe u‐Satane nengelosi zake: ngokuba bendilambile, anandipa ukutya ke; bendinxaniwe, anandiseza ke; bendingowasemzini, anandamkela endlwini ke; bendizé, anandambesa ke; bendisifa, bendisentolongweni kanjalo, anaza kundibona ke. Baya kwandula ukupendula kuye nabo, besiti: Nkosi! bekuninina esakubona ulambile, umhlaumbi unxaniwe, umhlaumbi ungowasemzini, umhlaumbi uzé, umhlaumbi usifa, umhlaumbi usentolongweni, saza asakwonga? Uya kwandula apendule kubo, esiti: Ngokwenene nditi kuni: Ngendawo yokuba nibe ningenje njalo kwomnye waba noko amncinane kubo bonke, nibe ningenje njalo nakum. Babeya kumka aba ukuya ekubetweni okungunapakade, kodwa abalungileyo ukuya ebomini obungunapakade.