Likezo 7
7
Pulelo ya Setefani
1Muprisita yo muhulu a buza Setefani, a li, “Kikuli ki niti, ki hona mo ku inezi cwalo?”
2 #
Sim 12.1
Cwale Setefani a alaba, a li, “Banabahesu ni bo ndate, a mu ni teeleze! Mulimu wa kanya u kile a bonahala ku ndat'a luna Abrahama, ha n'a sa pila mwa Mesopotamia, a si ka tutela kale kwa Harani. 3A li ku yena, ‘Siya banabahenu ni naha ya henu, mi u ye kwa lifasi le ni ta ku supeza.’ 4#Sim 11.31; 12.4 Cwale a zwa mwa naha ya Makaladeya, a y'o yaha mwa Harani. Mwamulaho a lifu la ndat'ahe Abrahama, Mulimu a mu tutiseza mwa naha mo, mo mu pila ka nako ye. 5#Sim 12.7; 13.15; 15.18; 17.8 Mulimu n'a si ka fa Abrahama kalulo ye ñwi ya naha yeo, nihaili ka ka kuma fa butelele bwa lihutu, kono n'a mu sepisize kuli u ta mu fa yona kaufela, i be ya hae ni ya bana ba hae. Abrahama n'a si na mwana, Mulimu h'a mu sepisa cwalo. 6#Sim 15.13-14 S'a mu bulelezi Mulimu ki se, ‘Baikulu ba baikulu ba hao ba ta y'o pila mwa naha i sili. Ba ta y'o ba batanga, mi ba ta nyandiswa hahulu ka lilimo ze mianda ye mine. 7#Mut 3.12 Kono, ni ta atula sicaba se si ka ba luwa, mi mwa mulahonyana, ba ta zwa mwa naha yeo ku t'o ni sebeleza mwa naha yona ye, ku bulela Mulimu. 8#Sim 17.10-14; 21.2-4; 25.26; 29.31—35.18 Cwale Abrahama a fiwa mupato kuli i be sisupo sa bulikani bo, mi ki cwalo kuli Abrahama, ha s'a pepile Isaka, a mu isa kwa mupato, a nz'a na ni sunda i liñwi feela ya ku pepwa. Isaka ni yena a isa Jakobo, ni Jakobo cwalo a isa bashemi ba masika a lishumi ka a mabeli a ba Isilaele kwa mupato.
9 #
Sim 37.11, 28; 39.2, 21 “Bana bao ba Jakobo ba shwela Josefa muna, ba mu lekisa kuli a y'o luiwa kwa Egepita. Kono Mulimu n'a nz'a mu babalela. 10#Sim 41.39-41 A mu zamaisa hande mwa manyando a hae kaufela. A mu fa ku kateleha ni ku bonisa butali fapil'a Faro, mulena wa Egepita, mi mulena yo a beya Josefa ku ba mubusisi wa naha kaufela ya Egepita, mane ni wa lika za bulena kamukana. 11#Sim 42.1-2 Kiha ku kena tala ye tuna mwa naha ya Egepita ni ya Kanana kaufela. Ku nyanda kwa ba ko kutuna, mi bo kukw'a luna ba tokwa lico. 12Cwale Jakobo, ha s'a utwile kuli ne ku na ni lico mwa Egepita, a luma bo kukw'a luna kwateñi, ili musipili wa bona wa pili. 13#Sim 45.1; 16 Ka musipili wa bubeli, Josefa a izibahaza kwa bahulwani ba hae, mi Faro a ziba cwalo za lusika lwa Josefa. 14#Sim 45.9-10, 17-18; 46.27 Cwale Josefa a lumela ndat'ahe Jakobo ni ba mba ya hae kaufela, kuli ba tahe mwa Egepita, mi batu bao kaufela ne ili ba mashumi a supile ni ba ketalizoho. 15#Sim 46.1-7; 49.33 Jakobo a ya kwa Egepita kw'a il'o shwela ni ko ku il'o shwela ni bo kukw'a bo kukw'a luna. 16#Sim 23.3-16; 33.19; 50.7-13; Josh 24.32 Litupu za bona za tiswa kwa Sikemi, mi za bulukwa mwa libita l'a n'a lekile Abrahama ka mali, kwa bana ba Hamori, mwa Sikemi mo.
17 #
Mut 1.7-8
“Nako ha i se i li fakaufi ya kuli Mulimu a pete sepiso y'a n'a sepisize Abrahama, sicaba sa luna sa kala ku ata hahulu mwa Egepita. 18Kiha ku yola mulena yo munca, ya n'a si ka ziba Josefa, mi a kala ku busa mwa Egepita. 19#Mut 1.10-11; 22 Mulena yo a puma sicaba sa luna, mi a nyandisa bo kukw'a luna, mane a hanisa limbututu za bona ku ina mwa mahae ili kuli li shwe. 20#Mut 2.2 Ki yona nako y'a n'a pepilwe Mushe, yona yeo, ili mushimani yo munde hahulu. A utelwa mwa ndu ya ndat'ahe likweli ze talu. 21#Mut 2.3-10 Mi ha s'a zwisizwe mwa hae, mwan'a Faro wa musizana a mu nga ku y'o mu uta ni ku mu eza mwan'a hae. 22Mushe a lutiwa butali kaufela bwa Maegepita, mi a ba mutu yo mutuna ka lipulelo ni ka likezo.
23 #
Mut 2.11-15
“Mushe ha s'a na ni lilimo ze mashumi a mane, a hupula ku y'o potela banabahabo, ili bona ba Isilaele. 24A bona yo muñwi wa bahabo a katazwa ki Muegepita. Kiha s'a y'o mu tusa ni ku mu lamulela, mane a bulaya Muegepita yo. 25N'a hupula kuli mwendi banabahabo ba ta utwisisa kuli Mulimu n'a ta itusisa yena ku ba lukulula, kono ha ba si ka utwisisa. 26Habusa, Mushe a bona Maisilaele ba babeli ba ba ne ba itwanisa, mi a lika ku ba kalimela kuli ba utwane, a li, ‘Yela banna, mu bana ba mba, cwale mu twanisezañi? 27Kono ya n'a kataza yo muñwi a kasheza Mushe kwatuko, a li, ‘Ya ku file bubusi ni buatuli mwahal'a luna ki mañi? 28U bata ku ni bulaya sina mo u bulaezi Muegepita yani maabani, nji?’ 29#Mut 18.3-4 Cwale Mushe h'a utwa cwalo, a zwa mwa Egepita, a y'o yaha mwa naha ya Midiani, mi koo a y'o pepa bana ba babeli ba bashimani.
30 #
Mut 3.1-10
“Lilimo ze mashumi a mane ha li se li felile, Mushe a bona lingeloi mwa malimi a mulilo wa sicacani se ne si ca mwa naheñi, fakaufi ni Lilundu la Sinai. 31Mushe a komokiswa ki pono yeo, kono h'a sutelela ku t'o talimisisa hande, a utwa linzwi la Mulena, li li, 32‘Ki na Mulimu wa bo kukw'a bo kukw'a hao, Mulimu wa Abrahama, wa Isaka ni wa Jakobo.’ Mushe a ngangamiswa ki sabo, mane a saba ni ku talima. 33Mulena kih'a li ku yena, ‘Zwisa makatulo kwa mahutu a hao, kakuli u yemi fa sibaka se si kenile. 34Ni boni hande manyando a batu ba ka mwa Egepita. Ni utwile ku tonga kwa bona, kiha ni tezi ku t'o ba pilisa. Cwale u tahe, ni ku lume kwa Egepita.’
35 #
Mut 2.14
“Ki yena Mushe yo ya n'a hanilwe ki bana ba Isilaele, yo ne ba ize ku yena, ‘Ki mañi ya ku ezize mubusi ni muatuli wa luna? Ki yena ya n'a lumilwe ki Mulimu ku t'o ba mubusi ni mupilisi, ka tuso ya lingeloi le ne li li mwa sicacani se ne si ca mulilo. 36#Mut 7.5; 14.21; Lipa 14.33 Ki yena ya n'a zamaisize batu, ku ba zwisa mwa Egepita, ka ku eza limakazo ni ze komokisa mwateñi, kwa Liwate le Lifubelu ni mwa lihalaupa ka lilimo ze mashumi a mane. 37#Mul 8.15, 18 I sa li yena Mushe yo ya n'a ize kwa batu ba Isilaele, ‘Mulimu u ta mi lumela mupolofita, sina mw'a ni lumezi na, ili ya ta zwa mwa lusika lwa mina.’ 38#Mut 19.1—20.17; Mul 5.1-33 Ki yena ya n'a inzi ni batu ba Isilaele ha ne ba kopani mwa naheñi. N'a li teñi ni bo kukw'a bo kukw'a luna, mi i sa li yena ya n'a inzi ni lingeloi ha li bulela ni yena fa Lilundu la Sinai. A amuhela manzwi a' pilisa a Mulimu ku t'o a fitisa ku luna.
39“Kono bo kukw'a bo kukw'a luna ha ba si ka mu kolwa. Ba mu nyaza mane ba lakaza ku kutela kwa Egepita. 40#Mut 32.1 Ba li ku Aruni, ‘U lu ezeze milimu ye ta lu etelela, kakuli ha lu zibi se si tahezi Mushe yani ya lu zwisize mwa Egepita.’ 41#Mut 32.2-6 Kiha ba eza siswaniso sa namani, ba si ezeza sitabelo, mi ba eza mukiti wa ku kuteka se ba ikezelize. 42#Am 5.25-27 Cwale Mulimu a ba fulalela, mi a ba fa ku lapela linaleli za kwahalimu sina mo ku ñolezwi mwa buka ya bapolofita, kuli,
‘Batu ba Isilaele!
I n'e si na, ye ne mu bulaezi lifolofolo
ku ni ezeza sitabelo,
ka lilimo ze mashumi a mane
mwa lihalaupa.
43I ne li tende ya Moloke
ye ne mu lwezi,
ni siswaniso sa naleli
ya mulimu wa mina Refani,
ili maswaniso a ne mu ikezelize
kuli mu a sebeleze.
Kabakaleo ni ta mi tutiseza kwahule,
kwabuse bwa Babilona.’
44 #
Mut 25.9,40 “Mwa lihalaupa, bo kukw'a bo kukw'a luna ne ba na ni tende ye ne bonisa kuli Mulimu n'a inzi ni bona. Ne i ezizwe mw'a n'a bulelezwi ni mw'a n'a boniselizwe Mushe ki Mulimu. 45#Josh 3.14-17 Tende yeo, ya ba mwa pabalelo ya bo kukw'a luna ba ba tile mwamulaho. Ba i lwala ha ba zamaya ni Joshua mi ba nga manaha kwa bañi ba ona, ba ba ne ba lelekilwe ki Mulimu. Mi ya siyala mwateñi ku fitela nako ya Davida. 46#2 Sam 7.1-16; 1 Lita 17.1-14 Davida a fumana sishemo ku Mulimu, mi a mu kupa tumelelo ya ku yahela Mulimu wa Jakobo ndu. 47#1 Male 6.1-38; 2 Lita 3.1-17 Kono ndu yeo ya t'o yahiwa ki Salumoni.
48“Nihakulicwalo, Muambakani ya Pahami h'a ini mwa mandu a yahilwe ki batu sina mw'a bulelela mupolofita,
49 #
Isa 66.1-2
‘Lihalimu ki lubona lwa ka,
ku bulela Mulena,
mi lifasi ki situlo sa mahutu a ka.
Ki ndu ye cwañi
ye ne mu ka ni yahela?
Ne ni ka pumulelanga
mwa sibaka sifi?
50Kikuli ha si na, ya ezize lika zeo kaufela?’
51 #
Isa 63.10
“Mu na ni mahañi a cwañi, mina bao lipilu ni lizebe za mina li tibani mi li palelwa ku utwa lipizo za Mulimu! Mu swana ni bo kukw'a bo kukw'a mina! Mu hanisa kamita Moya o Kenile! 52Kana ku na ni nihaili mupolofita a li muñwi feela ye ba si ka nyandisa bo kukw'a bo kukw'a mina! Ba bulaile balumiwa ba Mulimu ba ba ne ba til'o biha kale-kale za ku taha kwa Mutanga ya Lukile. Mi cwale mu mu betekile ni ku mu bulaya. 53Ki mina ba ba amuhezi Mulao wa Mulimu, o n'o tisizwe ki mangeloi, kono ha mu si ka u lumela!”
Lifu la Setefani
54Ba ba ne ba li mwa Kuta ba halifa hahulu ha ba utwa manzwi ao, mane kabakala ku nyema, ba kweca meeno ha ba talima Setefani. 55Kono yena, a nz'a tezi Moya o Kenile, a talima kwa lihalimu, mi a bona kanya ya Mulimu ni Jesu a yemi ku la silyo la Mulimu. 56A li, “A mu teeleze! Ni bona lihalimu li kwaluluhile ni Mwan'a Mutu a yemi ku la silyo la Mulimu!”
57Cwale ba itiba lizebe, mi ba huwa hahulu. Ba matela ku yena kaufel'a bona. 58Ba mu hohela kwa mandamino a munzi, mi ba y'o mu pobaula ka macwe. Lipaki za siya liapalo za bona mwa pabalelo ya mucaha ya n'a bizwa Saule. 59Ha n'a nz'a pobaulwa ka macwe, Setefani n'a lapela cwana, a li, “Mulena Jesu, amuhela moya wa ka!” 60Kiha kubama mi a huwa ka linzwi le li pahami, a li, “Mulena! U ba swalele sibi se!” A sin'o bulela cwalo, a shwa.
Currently Selected:
Likezo 7: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.