Likezo 3
3
Ku foliswa siyanga
1Ka zazi le liñwi Pitrosi ni Joani ba ya kwa Tempele, manzibwana ka nako ya ku y'o lapela, ili nako ya sitabelo sa manzibwana. 2Ne ku na ni mutu, ye ne li siyanga a li ku pepwa, ya n'a inanga fakaufi ni munyako wa Tempele o n'o bizwa Munyako o Munde. Ne ba mu nanulelanga kwa munyako wo, ka zazi ni zazi, kuli a n'o ikupelanga mali ku ba ba ne ba kena mwa malapa a Tempele. 3H'a bona bo Pitrosi ni Joani ba kena, a kupa kuli ba mu fe se siñwi. 4Ba mu lubukela, mi Pitrosi a li ku yena, “U lu talime!” 5Cwale a ba talima ka sepo ya kuli u ta fumana se siñwi ku bona. 6Pitrosi kiha s'a li ku yena, “Ha ni na mali ni a makana, kono ni ta ku fa se ni na ni sona. Ka libizo la Jesu Kreste wa Nazareta ni li, ‘Zamaya!’ ” 7Kiha s'a mu swala ku la silyo, mi a mu yemisa. Ka nako yona yeo, mahutu ni lingongo za hae za tiya. 8A tula, a yema ka mahutu a hae, mi a kala ku zamaya-zamaya. A kena ni bona mwa malapa a Tempele, a nz'a zamaya, a tulaka, a lumba Mulimu. 9Batu kamukana ba mu bona h'a nz'a zamaya a lumba Mulimu. 10Mi ha ba bona kuli ki yena mukupi ya n'a inanga fa Munyako o Munde wa Tempele, ba kala ku babaza ni ku komokiswa ki se ne si mu tahezi.
Manzwi a Pitrosi kwa batu
11Kakuli mutu yo n'a kumalezi bo Pitrosi ni Joani, batu kaufela ba matela ku bona mwa Makozwana a Salumoni, ba ikomokezi. 12Pitrosi h'a bona cwalo, a li ku bona, “Banna ba Isilaele, kiñi ha mu komokiswa ki foliso yeo? Kiñi ha mu lu lubukezi inge ki luna lu konile ku zamaisa mutu yo ka maata a luna kapa ka bulumeli bwa luna? 13#Mut 3.15 Mulimu wa Abrahama, wa Isaka, ni wa Jakobo, Mulimu wa bo kukw'a luna ki yena ya tumisize libizo la mutang'a hae Jesu. Mina mu mu swalisize, mwa mu fa babusisi, mi mwa mu latula fa meeto a Pilato ya n'a lata ku mu lukulula. 14#Mat 27.15-23; Mar 15.6-14; Luk 23.13-23; Joa 19.12-15 Mu latuzi Ya Kenile, Ya Lukile, mi mu kupile Pilato kuli a mi lukululele mubulai. 15Mane, mu bulaile mufani wa bupilo, kono Mulimu u mu zusize kwa bafu, mi luna lu lipaki za taba yeo. 16Ki maata a libizo la Jesu a konile ku tiisa siyanga se. Se mu bona, ni se mu ziba, si ezizwe ka ku lumela libizo la hae. Tumelo ya ku lumela Jesu i mu folisize hande fapil'a mina kaufela.
17“Cwalehe banabahesu, ni ziba kuli se mu ezize ku Jesu, mina ni baeteleli ba mina, mu si ezize ka ku sa ziba. 18Mulimu n'a zibisize kale, ka bapolofita kaufela, kuli Mesia wa hae n'a ta nyanda, mi u bonahalize niti ya z'a n'a bulezi ka ona mukwa wo. 19Mu tuhele bumaswe bwa mina, mi mu sikuluhele ku Mulimu, kuli a te a takule libi za mina. 20Kihona Mulena a ta kona ku tahisa linako za ku ishumusa, ni ku mi lumela Mesia y'a n'a s'a mi ketezi pili, ili yena Jesu. 21Ka nako ye, u swanezi ku inelela kwa lihalimu ku fitela linto kamukana ha li ka eziwa sinca, sina mw'a n'a bulelezi Mulimu kwakale, ka bapolofita ba hae ba ba kenile. 22#Mul 18.15,18 Kakuli Mushe n'a ize, ‘Mulena Mulimu wa mina u ta mi lumela mupolofita, sina na. U ta ba wa habo mina. Mu swanezi ku mamela litaba kaufela z'a ka mi bulelela. 23#Mul 18.19 Mutu kaufela ya ka hana ku teeleza se si ta bulelwa ki mupolofita yo, u ta zwiswa mwahal'a batu ba Mulimu, a bulaiwe.’ 24Mi bapolofita ba ba polofitile ka ku tatamana kwa bona, ku zwa ku Samuele, ba bulezi ni bona kamukana ka za ona mazazi a. 25#Sim 22.18 Lisepiso z'a n'a sepisize Mulimu ka bapolofita ki za mina, mi mu keni mwa bulikani bw'a n'a isweli Mulimu ni bo kukw'a mina ha n'a ize ku Abrahama, ‘Ni ka tohonolofaza batu ba lifasi kamukana ka lusika lwa hao.’ 26Kabakaleo, Mulimu u ketile ni ku luma mutang'a hae ku mina pili, ku t'o mi tohonolofaza ka ku mi tuhelisa mikwa ya mina ye maswe, kaufel'a mina.”
Currently Selected:
Likezo 3: Lozi09
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
Lozi Interconfessional Bible, Catholic Edition © Bible Society of Zambia, 2009.