मात्ति 1
1
येसु खिरिस्टका पुर्खाचि
(लुका ३:२३-३८)
1येसु खिरिस्ट च्हेन आब्राहाम नुङ् दाउदका छोङ्गा साया॥ उका पुर्खाचि खाचि न्साया– 2आब्राहामगा उच्या इसाहाक साया॥ इसाहाकका उच्या याकुब, याकुबका उच्याचि याहुदा नुङ् हेकोहा उफु-उनुन्छाचि ङ्वाया॥ 3याहुदागा उच्याचि फारेस नुङ् जाहेर सायाचि (उङ्चि मा तामार साया), फारेसका उच्या हेसोरोन, हेसोरोनगा उच्या आराम, 4न्हाङा आरामगा उच्या आम्मिनादाब, आम्मिनादाबका उच्या नाहासोन, नाहासोनगा उच्या साल्मोन साया॥ 5साल्मोनगा उच्या बोआज साया, (बोआजका उमा च्हेन राहाब साया), बोआजका उच्या ओबेद साया, (ओबेदका उमा रुथ साया)॥ ओबेदका उच्या यिसाइ साया॥ 6यिसाइगा उच्या हाङ् दाउद साया॥
दाउदका उच्या सोलोमान साया, (सोलोमानगा उमा बेत्सेबा च्हेन उरियाहागा उहिङ्खुमा साया)॥ 7सोलोमानगा उच्या राहाबाम, राहाबामगा उच्या आबिया, आबियागा उच्या आसा, 8आसागा उच्या याहोसापात, याहोसापातका उच्या याहोराम, याहोरामगा उच्या उज्जियाहा, 9उज्जियाहागा उच्या योताम, योतामगा उच्या आहाज, आहाजका उच्या हिजिकिया, 10हिजिकियागा उच्या मानास्से, मानास्सेगा उच्या आमोन, आमोनगा उच्या योसियाहा साया॥ 11याहुदिचि बेबिलोन खाम्युकपे छेक्पा चोङ्खेॽमा हाक्निङ् ओन्दाङ् योसियाहागा उच्या याकोनियास नुङ् उका उनुन्छाचिगा वाम लेक्सा॥#२ हाङ् २४:१४-१६; २ उथुक्साला ३६:१०; यार्मिया २७:२०; ४०:१
12बेबिलोनबे ङ्खेतुचिहोङ्– याकोनियासका उच्या साल्तिएल, साल्तिएलगा उच्या यारुबाबेल, 13यारुबाबेलगा उच्या आबिउद, आबिउदका उच्या एल्याकिम, एल्याकिमगा उच्या आजोर, 14आजोरगा उच्या सादोक, सादोकका उच्या आखिम, आखिमगा उच्या एलिउद, 15एलिउदका उच्या एलाजार, एलाजारगा उच्या मात्तान, मात्तानगा उच्या याकुब साया॥ 16न्हाङा याकुबका उच्या योसेफ साया॥ योसेफ मारियामगा उहिङ्खुबा साया, न्ना मारियामभाङ् माङ् खिरिस्ट येसुगा वाम लेक्सा॥
17खाॽला आब्राहाम नाहाङ्तो दाउद सोम्मा एना पुस्ता न्लेक्सा, दाउद भाङ् इजिरेलिचि बेबिलोन खाम्युकपे ङ्खेतुचिहा बेला सोम्मा एना पुस्ता, न्हाङा बेबिलोनबे ङ्खेतुचिहा बेला नाहाङ्तो येसुगा वाम लेक्साना बेला सोम्मा चा एना पुस्ता माङ् न्लेक्सा॥
खिरिस्ट येसुगा वाम
(लुका २:१-७)
18येसु खिरिस्टका वाम खाॽला लेक्सा– उका उमा मारियाम योसेफनुङ् थाङ् छेङ्मागा न्नाक्तिक्सा॥ ङ्खाॽनिङ्गो उङ्चि थाङ् छेङ्मा हाक्निङ् ओन्दाङ् मारियाम पाबित्तारा आत्मागा साक्तिङा उच्या तोक्खुमा लेक्सामाना चेॽया था लेक्सा॥#लुका १:२७ 19योसेफ धार्मोति याॽमि साया, न्हाङामाङ् याॽमिचिगा उयुम्बे मारियाम इसिॽनुङ् न्लेङ्निन्निभोङ् स्वाक इसाङा चा था मेन्दोक्ले नान्सिॽमा मितु॥
20ङ्खाॽनिङ्गो योसेफङा खाॽलाहा चेॽया मिॽमास्यानिङ् इलेन सेम्माङ्बे हाङ्बा निङ्वाफुमागा वालोक्दुत ओता न्हाङ् खाॽला लु, “ओ दाउदका सान्तान योसेफ, मारियामगा ओफोकपे इसा वान्ने, न्ना पाबित्तारा आत्मागा साक्तिभाङ् लेक्साना ओम, ङ्खोङ्माङ् न्दा मारियामनुङ् थाङ् छेङ्मा ङ्गिसितान॥ 21उङा एको उच्या बाबु तोक्त्वा, न्ना पिछाङामाङ् उका याॽमिचि उङ्चि पाप पाहाङ् हिङ्मेत्वाचिहा, ङ्खोङ्माङ् न्ना पिछागा उनिङ् न्दा येसु#१:२१ “येसु” निङ् च्हेन हिब्रु चेॽया “याहोसु” भाङ् तायाना ओम, नागा तुम्बिला ओम “हाङ्बाङा हिङ्मेमेहा॥” युक्सुबि॥”#लुका १:३१
22निङ्वाफुमाभाङ् चेक्खुबागा याभाङ् हाङ्बा निङ्वाफुमाङा चेक्तुहा खा चेॽया पुरा लेङ्निभोङ्माङ् खा घाक लेक्साहा ओम– 23“सोयानुम, एको थाङ् न्छेङान्ना मामुङा ओफोक ख्वाहोङ् एको उच्या बाबु तोक्त्वा, न्हाङ् याॽमिचिङा न्ना पिछा इम्मानुएल ल्वाना” नागा तुम्बिला ओम, “निङ्वाफुमा कानिङ्नुङ्॥”#यासाइया ७:१४
24योसेफ उयुप्माभाङ् चेन्दाक्या न्हाङ् हाङ्बा निङ्वाफुमागा वालोक्दुतङा सेम्माङ्बे लुहा लोॽवामाङ् मारियाम थाङ् छेङुहोङ् उपाङ्बे खेतु॥ 25ङ्खाॽनिङ्गो मारियामङा उच्या मेन्दोक्ले सोम्मा उङ्चि सोरि ङ्ङिप्सान्चिन॥ हेक्साङ् मारियामङा उच्या बाबु तोक्तु न्हाङ् योसेफङा न्ना पिछागा उनिङ् येसु युक्सुबि॥#लुका २:२१
Currently Selected:
मात्ति 1: YAKH
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2023, Wycliffe Bible Translators, Inc. and Nepal Bible Society