Génesis 15
15
Tratúꞌ nchi̱sóyuꞌú Ndiosíꞌ nu̱u̱nꞌ Abram
1Sáá njia̱ꞌa rá yaꞌá, nkenta tu̱ꞌun I̱toꞌoꞌ‑ó nu̱u̱nꞌ Abram sáá nxi̱nénu̱u̱nꞌ I̱toꞌoꞌ‑ó nu̱u̱nꞌ re̱ꞌ jee nkachiꞌ‑i:
―Koto yúꞌví nú, Abram, chi nuꞌuꞌ ví ya̱ nama noꞌó jee máá ñáꞌnú ví ta̱ꞌvi̱ꞌ taji ni̱ꞌ nu̱u̱nꞌ noꞌó.
2Soo nna̱xiníkó Abram:
―Ndiosíꞌ máá kúñáꞌnú ya̱ kúvi I̱toꞌoꞌ ni̱ꞌ, ¿na̱kui chi taji nú ta̱ꞌvi̱ꞌ nu̱u̱nꞌ ni̱ꞌ rúja?, chi ni ntu íyó se̱ꞌya ni̱ꞌ jee kino̱o nɨꞌɨ ya̱ kúmí ni̱ꞌ nu̱u̱nꞌ Eliezer ya̱ kúvi musúꞌ ni̱ꞌ ya̱ néen kuéntáꞌ re̱ꞌ veꞌi ni̱ꞌ ya̱ kúvi re̱ꞌ te̱e ñuunꞌ Damasco.
3Jee nkachiꞌ Abram:
―Ntu ntaji nú se̱ꞌya nu̱u̱nꞌ ni̱ꞌ jee maáréꞌ ya̱ néen kuéntáꞌ veꞌi ni ví ya̱ ni̱ꞌi̱nꞌ rá nantíñú ni̱ꞌ.
4I̱ña̱jée nkenta tu̱ꞌun I̱toꞌoꞌ‑ó nu̱u̱nꞌ Abram:
―Nsú te̱e yaꞌá ví ya̱ kino̱o jín rá nantíñú nú. Ɨɨn se̱ꞌya yɨ́ɨ́ ya̱ kúvi se̱ꞌya ni̱ñɨ̱ꞌ nú ya̱ kene‑e nu̱u̱nꞌ nú ví ya̱ ni̱ꞌi̱nꞌ rá nantíñú nú.
5Jee ntavaꞌ Ndiosíꞌ Abram chíkéꞌi jee nkachiꞌ‑i:
―Kune̱ꞌyá súkún, jee kaꞌvi rá tiu̱u̱nꞌ, retuan kuneí kaꞌvi nú ráa jee sukuán koo kue̱ꞌe̱ꞌ rá ichiyúkúnꞌ nú ―nkachiꞌ I̱toꞌoꞌ‑ó nu̱u̱nꞌ re̱ꞌ.
6Nku̱neí iniꞌ Abram ni̱nu̱ꞌ iniꞌ re̱ꞌ I̱toꞌoꞌ‑ó jee saáva nkuna̱a̱ꞌ iniꞌ Ndiosíꞌ ya̱ kínóo na̱a̱ꞌ re̱ꞌ nu̱u̱nꞌ‑u. 7I̱ña̱jée nkachiꞌ Ndiosíꞌ nu̱u̱nꞌ re̱ꞌ:
―Maáníꞌ kúvi I̱toꞌoꞌ nú, ya̱ ntavaꞌ ni̱ꞌ nó nu̱u̱nꞌ ñuunꞌ Ur ya̱ yɨ́ꞌɨ́ xi̱ntíín rá ñɨvɨ caldeo sáva taji ni̱ꞌ ñuꞌun yaꞌá nu̱u̱nꞌ nú, sáva kino̱o nú jín‑i.
8Jee nkachiꞌ re̱ꞌ:
―Ndiosíꞌ máá kúñáꞌnú ya̱ kúvi I̱toꞌoꞌ ni̱ꞌ, ¿na̱ja kukáꞌnú iniꞌ ni̱ꞌ ya̱ ni̱ꞌi̱nꞌ ni̱ꞌ maa kino̱o ni̱ꞌ jín‑i? ―nkachiꞌ Abram.
9Jee nkachiꞌ Ndiosíꞌ nu̱u̱nꞌ re̱ꞌ [ya̱ ku̱ꞌva ñujiínꞌ ya̱ íyó saꞌá sáva saꞌá tratúꞌ]:
―Kuákéꞌen ɨɨn chelu sɨ́ꞌɨ́ ya̱ uníꞌ kui̱ya̱ꞌ, jín ɨɨn chuvíyáꞌ ya̱ uníꞌ kui̱ya̱ꞌ, jín kanerúꞌ ya̱ uníꞌ kui̱ya̱ꞌ jín ɨɨn kúku jín ɨɨn paloma.
10Ña̱na̱ka Abram nɨꞌɨ rá kitɨ vá, jee nkuachi sava re̱ꞌ rátíꞌ jee nchi̱só re̱ꞌ sáva ta ɨɨn rá kitɨ vá ɨɨn ichi jín inka sáva nchi̱só re̱ꞌ íyó ka̱ꞌ ichi ichinúúnꞌ, soo rá sááꞌ chi ntu nta̱sáva re̱ꞌ rátíꞌ. 11Jee nki̱kuun rá kitɨ tu̱mi ya̱ yájíꞌ ku̱ñu rá ñunéꞌyúꞌ rá kitɨ níꞌiꞌ, soo nta̱níkɨ́nꞌ Abram rátíꞌ. 12Sáá nini kuíí, jee nkixiꞌ naanꞌ re̱ꞌ. Jee nnu̱neenꞌ túún mánasɨ́ ñasɨꞌ‑ɨ re̱ꞌ jee nyu̱ꞌví nasɨ́kuitɨꞌ re̱ꞌ. 13Jee nkachiꞌ Ndiosíꞌ nu̱u̱nꞌ Abram:
―Kuniꞌ nijia nú ya̱ rá ichiyúkúnꞌ ya̱ kene nu̱u̱nꞌ nú kuvi ráa to̱ꞌo̱ꞌ kuneeꞌ ráa inka ñuunꞌ ya̱ ntu kúvi ñuunꞌ ráa. Jee satíñú ráa nu̱u̱nꞌ rá ñɨvɨ ñuunꞌ vá jee kuvi ráa musúꞌ keꞌen ñɨvɨ, jee koto u̱ꞌvi̱ꞌ rá ñɨvɨ vá ráa ku̱mi̱ꞌ sientúꞌ (400) kui̱ya̱ꞌ. 14Jee keꞌneꞌ ni̱ꞌ kua̱chi vá xinóꞌo ni̱ꞌ rá ñɨvɨ ñuunꞌ vá nu̱u̱nꞌ satíñú saɨn ráa nu̱u̱nꞌ rá ñɨvɨ ñuunꞌ vá, jee kuíre kene ráa ñuunꞌ vá jín kue̱ꞌe̱ꞌ ntántúníꞌ nantíñú ni̱ꞌi̱nꞌ ráa. 15Jee noꞌó chi va̱ꞌa kuvi iniꞌ nú kuviꞌ va̱ꞌa nú jee nakeꞌen Ndiosíꞌ ánímaꞌ nú nutútú‑u ichi kútú jín rá ánímaꞌ rá tátáꞌ jííꞌ nú yanaꞌán, jee kɨse̱ꞌí nú, sáá kuñáꞌnú nú koo va̱ꞌa nú. 16Jee jia̱ꞌa ku̱mi̱ꞌ sientúꞌ (400) kui̱ya̱ꞌ ya̱ kueꞌnu ráa yukuán jee nanikó i̱i̱ꞌ rá se̱ꞌya ichiyúkúnꞌ nú nu̱u̱nꞌ ñuꞌun yaꞌá, chi ntiáꞌan kenta chitú kua̱chi sáꞌá rá ñɨvɨ amorreo ya̱ ntiáꞌan kenta tiempúꞌ xinóꞌo ni̱ꞌ ráa ―nkachiꞌ Ndiosíꞌ nu̱u̱nꞌ Abram.
17Sáá ntaꞌanꞌ nka̱niiꞌ nku̱neenꞌ víꞌí jee niniꞌ Abram ɨɨn ya̱ íyó kuéntáꞌ i̱tu̱nꞌ nu̱u̱nꞌ kéne ñu̱ꞌma̱ꞌ jín ɨɨn ítɨ́ sújié ya̱ ntɨ́ɨn ñuꞌunꞌ, jee jiáꞌa ráa ma̱ꞌñú rá kitɨ níꞌiꞌ vá. 18Máá ki̱vɨ̱ꞌ yukuán ñakɨnꞌ I̱toꞌoꞌ‑ó tratúꞌ jín Abram jee nchi̱sóyuꞌú re̱ꞌ nu̱u̱nꞌ Abram:
―Nu̱u̱nꞌ rá se̱ꞌya ichiyúkúnꞌ nú ya̱ váji ichinúúnꞌ ku̱ꞌva ni̱ꞌ ñuꞌun yaꞌá kénta ne̱ ntekáꞌnú naní Egipto jín ne̱ ntekáꞌnú naní Éufrates, 19ñuꞌun nu̱u̱nꞌ nééꞌ rá ñɨvɨ quenita, rá quenizita, rá cadmoneo, 20rá hitita, rá ferezeo, rá refaita, 21rá amorreo, rá cananeo, rá gergeseo jín rá jebuseo.
Currently Selected:
Génesis 15: meh
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2022, Wycliffe Bible Translators, Inc. All rights reserved.