Matius 1
1
Daptar angki-bayatn Yesus, Rajo Inyo Dijanjian Allah
(1:1-17)
(Luk. 3:23-38)
1Ni'innam koturutan angki-bayatn Yesus, Rajo Inyo Dijanjian Allah, Rajo inyo kito sobut ‘Kristus’. Yesus nantai koturutan Rajo Daud, huatan koturutan Abrahapm jam. Koturutannyo ia'an:#1:1: Matius monulis buku ni'in toutamo pakai' monunju'an obai Yesus nantai Rajo Inyo Dijanjian Allah, ia'an Rajo inyo disobut ‘Kristus’. Daptar koturutan ni'in pontikng obai jouh ari sobolupm Yesus lahir, boko nabi Allah monyampaian posatn Allah obai Kristus nantai koturutan Rajo Daud.
2Abrahapm boana'an Ishak; Ishak boana'an Yakub; Yakub boana'an Yehuda huatan boko somadikannyo; 3Yehuda boana'an Peres ongko Zerah. (Indai sia' duo ni'in ia'an Tamar). Peres boana'an Hezron; Hezron boana'an Ram; 4Ram boana'an Aminadab; Aminadab boana'an Nahason; Nahason boana'an Salmon; 5Salmon boana'an Boas. (Indai Boas ia'an Rahab.) Boas boana'an Obed. (Indai Obed ia'an Rut.) Obed boana'an Isai; 6Isai boana'an Rajo Daud.
Daud boana'an Salomo. (Indai Salomo ia'an Batsyeba, botina' inyo jadian agatn Uria sobolupm jadian agatn Daud.) 7Salomo boana'an Rehabeam; Rehabeam boana'an Abia; Abia boana'an Asa; 8Asa boana'an Yosafat; Yosafat boana'an Yoram; Yoram boana'an Uzia; 9Uzia boana'an Yotam; Yotam boana'an Ahas; Ahas boana'an Hizkia; 10Hizkia boana'an Manasye; Manasye boana'an Amon; Amon boana'an Yosia; 11Yosia boana'an Yekhonya ongko boko somadikannyo. Timpu nantai banya' urakng Yahudi monjadi tawatan boparakng ongko dibaba' ko negara Babel.#1:11: Kisah ni'in ado di buku 2 Boko rajo 24–25.
12Lopas jadi urakng Yahudi dibaba' ko Babel, Yekhonya boana'an Sealtiel; Sealtiel boana'an Zerubabel; 13Zerubabel boana'an Abihud; Abihud boana'an Elyakim; Elyakim boana'an Azor; 14Azor boana'an Zadok; Zadok boana'an Akhim; Akhim boana'an Eliud; 15Eliud boana'an Eleazar; Eleazar boana'an Matan; Matan boana'an Yakub; 16Yakub boana'an Yusuf. Yusuf nantai laki Maria inyo boana'an Yesus, Rajo Inyo Dijanjian Allah, Rajo inyo disobut ‘Kristus’.#1:16: Torjomahan ni'in momakai roti doi' ‘Kristus’ agatn ‘Rajo Inyo Dijanjian Allah.’ Tiat catatan ponjolasan di buku Lukas 2:11.
17Jadi, ado ompat bolas koturutan doi' Abrahapm sampai Daud. Ado ompat bolas koturutan jam doi' Daud sampai watu urakng Yahudi monjadi tawatan boparakng di nogori Babel. Huatan ado ompat bolas koturutan agi' doi' joman boko tawatan nantai sampai kodatakan Kristus, ia'an Rajo Inyo Dijanjian Allah.
Kolahiran Yesus, Rajo Inyo Dijanjian Allah
(1:18-25)
(Luk. 2:1-7)
18Kolahiran Yesus Kristus, Rajo Inyo Dijanjian Allah nantai, tojadi dinga' ni'in: Maria nantaiam indai Yesus. Sobolupm nantai, io botunangan agatn Yusuf. Apo sobolupm sia' kawitn, ruponyo Maria udah buntikan. Nantai tojadi obai kuaso Roh Allah. 19Apo Yusuf nantai ia'an urakng inyo boi' hati. Io pan co honda' momaluan Maria di hadapan urakng banya'. Obai nantai, io bopikir honda' mombalakan potunangannyo agatn Maria socaro bototapu'.#1:19: Obai Yusuf nantai urakng inyo hidup bondar di hadapan Allah, ongko io monaati boko hukupm Allah. Jadi, io mongotohu'i io gola' momutus hubukannyo agatn tunangan inyo kinyo sotia. Apo obai Yusuf pan kinyo honda' ngomalu'i Maria, io honda' momutusan hubukan nantai socaro bototapu'.
20Apo timpu Yusuf tongahan momikiran hal nantai, datakam molekat Tuhatn Allah ko io dalapm mimpi. Molekat nantai bopandir, “Yusuf, koturutan Rajo Daud, jangan gola' monguti' Maria pakai' monjadi bini kolai. Obai, kuaso Roh Allah inyo bulah Maria buntikan. 21Maria paca'an boana'an siku' bobia' lolaki. Kolai gola' mondamo'i-Nyo, Yesus,#1:21: Damo ‘Yesus’ dalapm baso Yunani ia'an samo agatn damo ‘Yosua’ doi' baso Ibrani. Koduo damo nantai boroti ‘TUHATN monyolamant'an’. obai Io monyolamant'an umant-Nyo doi' boko dosa sia'.”
22Somuo hal nantai tojadi oca' pomandiran Tuhatn Allah ditopati. Timpu joman komai ado nabi inyo monulis pomandiran Allah nantai: 23“Dinga'anbo! Siku' urakng botina' daro paca'an buntikan, lalu boana'an siku' bobia' lolaki. Sia' paca'an mondamo'i Sio, Imanuel.”#1:23: Doi' buku Yesaya 7:14. (Damo Imanuel nantai boroti “Allah monyoroto'i kito.”)
24Pas, Yusuf huas tidu' lalu molabuhan la'apo inyo disiuh molekat Tuhatn nantai ko io. Io monguti' Maria monjadi bininyo. 25Apo Yusuf kinyo kopal-kumpul agatn Maria sampai Maria boana'an Bobia' nantai. Lopas Bobia' nantai lahir, Yusuf mondamo'i-Nyo, Yesus.
Currently Selected:
Matius 1: TBDS
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena