Jenesesi 4
4
Muselu wa Kayini na Abeli
1Evale Adawu ohomugonana muhiyanaye Eva. Agamugonnena, Eva ohokana vambani, liye mbala mwana wa mwanapongwe. Nzina naye kala Kayini. Evale Eva kwi: <<Peno mbwenye Yehova udikamiheda. Dihinkana mwana mulombwana.>> 2Noira eno, ohombalela eto mbalayiwa, nzina naye Abeli. Kagaulukunle, Abeli ali namakumbuza wa mabila. Kayini ali namalima.
3Siku nimohi Kayini ohotukula ja mmundani mwaye, dowa velela wa Yehova. 4Mbwenye Abeli ohotukula mwa jifuwo jaye, mwanainyama wapama, oroma baliwa,#4:4 mwanainyama wapama, oroma baliwa: Owu hehi anavinyama apama oroma baliwa. liye pa. Agapile, ohotukula jonuna japama, liye velela wa Yehova. Mwa enne Yehova ohomurumela Abeli na yovelela yaye. 5Mbwenye Yehova kamurumenle Kayini vamohi na jovelela jaye. Na mwasa wenne, Kayini ohotakaleliwa valukulu, liye pota makwizi vakoveni vaye.#4:4-5 Yehova ohomurumela Abeli na yovelela yaye: Nafwanya Eberewu 11:4, nnovwa ira Abeli ohovelela yovelela yaye muwari mwa nroromelo eto muwari mwa nroromelo liye ohowanda kala pama vamentoni va Mulugu. Agali mazu a Mulugu kinaniwandela mutu guvi amuwandenle Abeli na Kayini zela makalelo okuta mukuto, nafwanya Levitiku 1:1-5, nnovwa ira mutu avelela mwanainyama wapama ira arumeliwe na Mulugu. Ku wonga mwanainyama avelela mutu owatchela jotega jaye, amala eno opiwa vamalroni vaye malro omuwombola. Eto fwanyeya ira Yehova kamurumenle Kayini vamohi na jovelela jaye. Mulugu oharuma atu ira kavelele jalo muwari momutamalela, hiya mofuna leveleliwa. (Levitiku 2:1-15) So mbwenye Mulugu gwaarumile ira kavelele mwanainyama ira kaleveleliwe jotega jiwa. Abeli muwari moirana mwa nroromelo ohowanda kala pama vamentoni va Mulugu. Mbwenye Kayini ohovuluvuliha mazu a Mulugu, liye velelaga jaye jene. Agomenleve eno, Mulugu karumenle mukuto waye.
6Evale Yehova ohonfuka Kayini eraga: <<Utakaleliwele nni, upotaga makwizi vakoveni vawo? 7Kodi weyo wasakanya yengo yapama kunarumeliwa? Mbwenye wahasakanye yapama, uiziwe ira yotega imala fiya vamulangoni vawo eto inafuna yugondjihe. Mbwenye weyo inafwanela uigondjihe.>>
Kayini ohompa mbalaye Abeli
8Evale Kayini ohomuwongana mbalaye Abeli kwi: <<Ndowe minda.>> Mwa enne kagadowile minda ule, Kayini ohomurungunuwela mbalaye, mpa. 9Evale Yehova ohonfukaga Kayini, liye kwi: <<Mbalawo Abeli uli waani?>> Kayini ohowakulaga eraga: <<Miyo kadiiziwile uli liye. Kodi miyo dili maliba muing'anela mbalaga?>> 10Evale Yehova ohonfukaga akoka, liye ira: <<Kodi weyo usakanyile nni? Sangiri na mbalawo neno nitatiyile vateyani, nnodiitana. 11Na mwasa wenno weyo eni uhumala tembelrelreya zela pandi ya teya yenno ihunle wanoni iwatchela sangiri na mbalawo umpile we na ndanda nawo. 12Weyo walima, jolima jawo kajinakumege. Weyo eni unerege wendawenda mwilamboni wagali mutu otawa eto wagali mutu opupuruwa.>>
13Evale Kayini ohowonga na Yehova eraga: <<Matongelo mudivahile nyo kohosimbwa ulukula! Miyo kannawanda! 14Kaing'anani, nyo peno munaditamangiha vateyani volima eto miyo kadiza dikala vamentoni venyu akoka, so mabasaga nnakala mutu otawa eto mutu opupuruwa mwilamboni ya vati. Eto mutu uli watene unadifwanye unagomela dipa.>> 15Mbwenye Yehova ohomuwakulaga eraga: <<Nari. Yeniyo mbwenye kinaireya. Tchoira mutu wenne unaupe weyo, atu atanu na ambinli a muibalini mwaye anokwa.>> Noira eno, Yehova ohomuhela Kayini sinale#4:15 Yehova ohomuhela Kayini sinale: Sinale yaheliwe Kayini Bibiliya kaniwandenle. Ku wonga kalivo uiziwile sinale Mulugu ahenle liye mmaningoni mwa Kayini. So iiziwile hiyo tchoira yali yengo yooneya na meso ira mutu amufwanya, aove mpa. ira mutu uli watene anfwanya, ahampe. 16Noira eno, Kayini ohokumaga vamentoni va Yehova, liye maruwa dowaga makumelo wa nzuwa wa Edeni, dowa kalaga ilambo ya Node.
Ahima a Kayini
17Kayini ohomugonana muhiyanaye,#4:17 muhiyanaye: Hiyo nihiiziwa ira Kayini muhiyanaye ali murongoliye mwasiwa Mazu anawonga ira atu atene kakumile muwari mwa Adawu na Eva. (Jenesesi 3:20) Eto fwanyeya ira Adawu na Eva kohabala ahimiwa pwi, amohiwa alombwana, amohiwa ahiyana. (Jenesesi 5:4-5) Ora yenno Mulugu kakamelihile mutu mutela murongoliye. So atu kagaromile indjiva tchi tempu Mulugu yakamelihile liye ejo. (Levitiku 18:9) muhiyanayele kana vambani. Mwa enne ohombala mwana wa mwanapongwe, liye nvaha nzina na Enoki. Noira eno, mulombwana Kayini ohomanga sidadi imohi, liye vaha sidadile nzina na Enoki, nzina neno nanvahile liye mwanaye ule. 18Enoki ohombala Irade, Irade ohombala Mewujayeli, Mewujayeli ohombala Metusayeli, Metusayeli ohombala Lameki. 19Lameki aatenle ahiyana ambinli. Muhiyana mmohi aitaniwa Ada eto muhiyana mmohiwa aitaniwa Zila. 20Ada ohombala mwanapongwe eriwa Jabali, wenno ali mundimuwa wa atu anno anawendawenda na misasa diwa kadjihaga ng'ombe. 21Jabali ohomukana eto mbalaye aitaniwa Jubali, wenno ali mundimuwa wa atu anne anaimba arpa na falauta.#4:21 arpa na falauta jinafwanyeya jagali joimbana jimohi jahanalabiwana mwilamboni mwihu muno, mbwenye vilambo dimohi diwa jeji jihikalawo. 22Eto muhiyanaye Zila ohombala mwanapongwe aitaniwa Tubalikayini, wenno ali maliba hana fwaramento dohiyana-hiyana, na mukuwa, na momba. Eto Tubalikayini ohomukana murongoliye aitaniwa Naama.
23Siku nimohi mulombwana Lameki ohawongana ahiyanaye ale, liye kwi: <<Ada na Zila, mudivuruwane pama. Nyo ahiyana a Lameki, muvwe yengo nnafuna miyo uwandelani. Inafuna miyo wonga tchi ila. Miyo dihimpa mulombwana mmohi na mwasa odiporotcha bahi. Eto dihimpa mwana muzombwe mmohi na mwasa odinyingala! 24Akala mutu wenne afune mpa mulombwana Kayini, abalaye atanu na ambinli kogokwa, zela miyo, mutu wenne unadipe, anakwa abalaye 77.>>
Mwana waneraru wa Adawu na Eva
25Adawu ohowelela mugonana muhiyanaye Eva akoka. Noira enne, Eva ohombala mwanapongwe mmohiwa, liye nvaha nzina na Seti, eraga: <<Mulugu uhudivaha mwanapongwe mmohiwa ira akale vamalroni va Abeli wenno Kayini umpile liye.>> 26Evale mulombwana Seti agaulukunle, ohombala mwana wa mwanapongwe. Liye nvaha nzina na Enosi. Mwa tempu yenne paromile atu lobelaga nzina na Yehova.#4:26 paromile atu lobelaga nzina na Yehova: Va nnowanda hiyanihavo makalelo a Kayini na ahimaye vamohi na Seti na ahimaye. Lameki ohobaliwa muibalini mwa Kayini eto liye ohokana makalelo ovalanya eto liye ali mutu owonga miririmuwo. Eto fwanyeya ira Enosi ali mwana Seti eto liye na afwaye kohokana makalelo olobela na nzina na Yehova.
Currently Selected:
Jenesesi 4: iLolo
Qaqambisa
Share
Copy
Ufuna ukuba iimbalasane zakho zigcinwe kuzo zonke izixhobo zakho? Bhalisela okanye ngena
© 2018 Visão Integral